Лук 15

Алдагдагсдын тухай сургаалт зүйрлэл

Аврагчийн мөнх бус амьдрал дахь тохинууллын төгсгөл үе ойртоход, фарисайчууд болон хуулийн багш нар Есүсийг татвар хураагчид, нүгэлтнүүдтэй харьцдаг хэмээн гомдоллосон байна. Тэдний гомдлын хариуд Есүс алдагдсан хонь, гээгдсэн зоос, үрэлгэн хүүгийн тухай сургаалт зүйрлэлийг заажээ. Энэ хичээл нь Тэнгэрлэг Эцэг, Есүс Христ хоёр таныг болон бусад бүх хүнийг хэрхэн хайрлаж, үнэлдэг болохыг мэдэж, мэдрэхэд танд тусална.

Суралцагчийн бэлтгэл: Хичээл эхлэхээс өмнө Лук 15 дахь сургаалт зүйрлэлүүдээс нэгийг эсвэл бүгдийг судлахад суралцагчдыг урамшуул. Уг сургаалт зүйрлэлүүд Бурханы хайрын талаар юу зааж байгааг эргэцүүлэн бодоход тэднийг урь.

Боломжит суралцах үйл ажиллагаа

Энэ нь ямар үнэ цэнтэй вэ?

Дараах үйл ажиллагаанд үзүүлэх материал болгож хоол хүнс, мөнгө төгрөг зэргийг ангид авчрах талаар бодож үз. Тэдний хувьд чухал юм уу амар хялбар олдох ямар ч хоол хүнс эсвэл мөнгө төгрөгийг ашиглаж болох ба мөнгийг өөрсдийн улс оронд ашигладаг мөнгөн тэмдэгтээр соль. Жишээлбэл, энэ үйл ажиллагааг 1 ширхэг чихэр ба 1 долларын дэвсгэрт ашиглан гүйцэтгэж болно. Тухайн эд зүйл тэдэнд ямар үнэ цэнтэй болохыг алхам бүрд хуруугаараа илэрхийлэн харуулахад суралцагчдыг урь.

Та 1 нь хамгийн бага, 10 нь хамгийн их гэсэн 1-ээс 10 хүртэлх хэмжүүрээр дараах эд зүйлсийг авахыг хэр их хүсэж байна вэ?

• Таны дуртай амттан

• Шалан дээр унасан таны дуртай амттан

• Хэн нэгний дээр нь гишгэсэн таны дуртай амттан

• 20 долларын дэвсгэрт

• Шалан дээр унасан 20 долларын дэвсгэрт

• Хэн нэгэн дээр нь гишгэсэн 20 долларын дэвсгэрт

Энэхүү үйл ажиллагаа хувь хүний үнэ цэнтэй хэрхэн холбоотой болохыг хэдэн хормын туршид тунгаан бод.

• Энэхүү адилтгалыг бид өөрсдийн үнэ цэнийг хэр үнэн зөвөөр олж хардаг болохтой хэрхэн харьцуулж болох вэ?

• Яагаад бид заримдаа өөрсдийгөө эсвэл бусдыг үнэ цэнгүй гэж боддог эсвэл ханддаг вэ?

Энэ хичээлийн төгсгөлд байгаа “Нэмэлт суралцах үйл ажиллагаа” хэсэг дээрх ерөнхийлөгч Дийтр Ф.Угдорфын мэдэгдлийг хуваалцах нь тустай байж болно.

Наманчлах, өөрийгөө хөгжүүлэх шаардлагатай хүмүүст болон өөртөө хэрхэн ханддагаа бод. Энэ хичээлийг судлахдаа, наманчлах шаардлагатай хүмүүст Их Эзэн хэрхэн хандаж, тэдний талаар юу гэж боддог талаарх үнэнүүдийг олж мэд.

Лук 15 -д Есүс гурван сургаалт зүйрлэл заадаг. Лук 15:1–2 -ыг уншаад, эдгээр сургаалт зүйрлэлийг заахад хүргэсэн Аврагчийн нөхцөл байдлын талаар олж мэд. Татвар хураагчид гэдэг нь ромчуудад зориулж татвар хураадаг иудейчүүд байсан тул бусад иудей хүн тэдэнд гол төлөв таагүй ханддаг байжээ.

• Эдгээр шүлэг Аврагчийн талаар танд юу зааж байна вэ? Заримдаа бид ямар байдлаараа фарисайчуудтай адил байдаг вэ?

Есүс Христ алдагдсан хонь, гээгдсэн зоос, төөрөлдсөн хүүгийн тухай зааж, фарисайчууд болон татвар хураагчдын гомдолд хариу өгчээ.

Суралцагчдыг эдгээр сургаалт зүйрлэлийн талаар юу мэддэгээ мөн тэдгээр нь Тэнгэрлэг Эцэг, Есүс Христ хоёрын хайрыг хэрхэн дүрслэн харуулдаг болохыг хураангуйлан ярихад урьж болох юм. Энэ хичээлийн суралцах үйл ажиллагааг суралцагчдын хэрэгцээ шаардлага, ойлголтод тохируулан өөрчил.

Алдагдсан хонь ба гээгдсэн зоос

Алдагдсан хонины тухай ( Лук 15:4–7 ба Лук 15:4 , зүүлт тайлбар a дээрх Иосеф Смитийн Орчуулгын бичвэр) эсвэл гээгдсэн зоосны тухай сургаалт зүйрлэл ( Лук 15:8–10)-ийн аль нэгийг уншиж эсвэл эргэж хараад, тухайн түүх бүрд гарч буй эзэнд алдсан зүйл нь ямар үнэ цэнтэй байсныг харуулсан үг, хэллэгийг хайж ол.

• Ямар үг эсвэл хэллэг тухайн эзэн алдсан зүйлээ хэрхэн үнэлж байгааг харуулж байна вэ?

• Эдгээр сургаалт зүйрлэлд гарч буй хонь эсвэл зоос нь хувь хүмүүсийг ямар байдлаар төлөөлж байна вэ?

• Эдгээр шүлэгт үндэслэвэл, гэм нүгэлтнийг наманчлах үед сүнслэг байдлын хувьд алдагдсан хүмүүсийг хайж олоход тусалдаг хүмүүст ямар мэдрэмж төрдөг вэ? Тэнгэрлэг Эцэг, Есүс Христ хоёрт ямар мэдрэмж төрдөг вэ?

• Та эдгээр сургаалт зүйрлэлээс Аврагчийн талаар ямар сургамж олж авсан бэ?

Шаардлагатай бол, Тэнгэрлэг Эцэг, Есүс Христ хоёр хувь хүн бүрийн үнэ цэнийг мэддэг бөгөөд бүгдийг нь эргүүлэн цуглуулахыг хүсдэг мөн Өөрийнх нь хүүхдүүд наманчилж, Өөрт нь эргэж ирэхэд Тэнгэрлэг Эцэг баярладаг гэсэн үнэнүүдийг тодорхойлоход суралцагчдад тусал.

Үрэлгэн хүү

Гурав дахь буюу Лук 15 дээрх сургаалт зүйрлэлийг үрэлгэн хүүгийн тухай сургаалт зүйрлэл гэдгээр нь хүмүүс сайн мэддэг (үрэлгэн гэдэг үг нь арвич хямгач бус, бодлогогүй эсвэл үрэн таран хийдэг гэсэн утгатай). Гэхдээ энэ сургаалт зүйрлэл нь эцгийн тусламж аль алинд нь хэрэгтэй байсан хоёр хүүгийн түүхийг өгүүлдэг. Үүнийг судлахдаа, ямар шалтгаан байснаас үл хамааран Тэнгэрлэг Эцэг сүнслэг байдлын хувьд алдагдсан Өөрийн бүх хүүхдийн талаар юу гэж боддог, тэдэнд хэрхэн ханддагийг илчилсэн үнэнүүдийг хайж ол.

Дараах үйл ажиллагааны хувьд, уг сургаалт зүйрлэлийг унших эсвэл видеог нь үзэхийн аль нь суралцагчдад илүү тустай болохыг бодож үз.

Лук 15:11–32 -ыг уншаад, энэ цэдэгт гарч буй эцэг Тэнгэрлэг Эцэгийг төлөөлж байгаа гэж төсөөл. Түүний хүүхдүүдийнхээ талаар юу гэж боддогийг илчилсэн үг, хэллэгийг тэмдэглэх талаар бодож үз. Та мөн ChurchofJesusChrist.org дээрх “Үрэлгэн хүү” (5:33) видеог үзээд, судруудаас уншиж болох юм.

Суралцагчид энэхүү сургаалт зүйрлэлийг “уншигчийн театр” хэлбэрээр дөрвөн хэсэгтэйгээр судалж болно. Үүнд: Өгүүлэгч ( 11, 13–16, 20, 25–28-ршүлгүүд), үрэлгэн хүү ( 12, 17–19, 21-ршүлгүүд), эцэг ( 22–24, 31–32-ршүлгүүд) болон ууган хүү ( 29–30-ршүлгүүд). Дүр тус бүрийн юу гэж хэлж, мэдэрч, бодож байгааг ойлгож, шинжлэн судлахад нь туслахын тулд уншигчийг уншиж байхад нь үе үе зогсоох талаар бодож үз.

Доорх асуултууд нь суралцагчдад сургаалт зүйрлэлд дүн шинжилгээ хийж, өөрсдийн амьдралтай холбоход туслах зорилготой.

Фарисайчууд Аврагчийг нүгэлтнүүдийг хүлээн авч, тэдэнтэй хамт хооллож байна гэж шүүмжилсэн болохыг эргэн сана.

• Аврагч фарисайчууд энэ сургаалт зүйрлэлээс юу сурч мэдээсэй гэж хүссэн гэж бодож байна вэ?

• Энэ сургаалт зүйрлэлээс юуг хамгийн сайн ойлгож, ой тойндоо суулгах хэрэгтэй гэж та бодож байна вэ? Яагаад?

Бид энэ сургаалт зүйрлэлээс Тэнгэрлэг Эцэг Өөрийн бүх хүүхдийг үнэлдэг, хайрладаг бөгөөд Түүнд хандсан бүхнийг мутраа дэлгэн хүлээн авахаар хүлээдэг гэсэн үнэнийг сурч болно.

“Үрэлгэн хүү хэрхэн алдагдсан талаар та юу олж харсан бэ?” “Нөгөө хүүг нь мөн ямар байдлаар алдагдсан гэж үзэж болох вэ?” “Бид Тэнгэрлэг Эцэг Өөр лүү нь эргэж ирэхийг эрэлхийлдэг болон Түүнд үнэнч хэвээр үлдэхийг үргэлж хичээдэг хүмүүст хэрхэн ханддаг талаар юуг энэ сургаалт зүйрлэлээс сурч болох вэ? Тэнгэрлэг Эцэгийн талаар үүнийг ойлгох нь яагаад танд чухал вэ?” гэх мэт нэмэлт асуултуудыг тэднээс асуух талаар бодож үз.

• Лук 15 дээрх сургаалт зүйрлэлүүд нүглээс болж сүнслэг байдлын хувьд алдагдсан, өөрийгөө бусдаас өөр, хүмүүс үнэлдэггүй эсвэл анзаардаггүй гэж боддог хүмүүст хэрхэн хамаатай вэ?

Хувь хүн өөрийн үнэ цэнийг мэдэх нь

Судлах тэмдэглэлийнхээ хуудсан дээр хонь тэвэрч буй хоньчны эсвэл хүүгээ тэвэрч буй эцгийн энгийн нэг зураг зурах талаар бодож үз. Энэ зургийн эргэн тойрны зайг дараах зүйлсийг бичихэд ашигла. Үүнд:

• Наманчлах хэрэгтэй байсан ч таныг болон бусад бүх хүнийг Тэнгэрлэг Эцэг хайрладаг гэдгийг сануулах үг, хэллэгүүд ( Лук 15 дээрх үг, хэллэгүүдийг оруулан) .

• Наманчлах шаардлагатай хүмүүст болон өөртөө энэрэнгүй хандах арга замууд.

Суралцагчдыг гүйцэтгэсэн үйл ажиллагааныхаа дуртай хэсгээ хуваалцахад урих талаар бодож үз.

• Та өөртөө болон эргэн тойрныхоо хүмүүст хэрхэн ханддагаа бодохдоо өнөөдөр олж мэдсэн зүйлээ хэрхэн ашиглахыг хүсэж байна вэ?

Тэнгэрлэг Эцэг, Есүс Христ хоёрын нигүүлсэл, бүх хүнийг эргэж ирээсэй гэсэн Тэдний хүслийг гэрчил.

Тайлбар ба нөхцөл байдлын талаарх мэдээлэл

Лук 15:7 . Их Эзэн “гэмших шаардлагагүй ерэн есөн хүн” гэснээр юу хэлэх гэсэн бэ?

Иосеф Смит алдагдсан хонины тухай сургаалт зүйрлэлийг тайлбарлах нэг арга зам бол ерэн есөн хонийг Есүс Христэд ирж наманчлах шаардлагагүй гэж боддог фарисайчууд болон садукайчуудтай зүйрлэж болох юм хэмээн заасан (History, 1838–1856 [Manuscript History of the Church], volume D-1, 1459, josephsmithpapers.org-ийг үзнэ үү).

Яагаад алдагдсан хүмүүсийг эрж, хайж олж, халамжлах нь тэгтлээ чухал вэ?

Арван хоёр Төлөөлөгчийн Чуулгын ерөнхийлөгчийн үүрэг гүйцэтгэгч ерөнхийлөгч М.Рассэлл Баллард ийн заасан.

Тэнгэрлэг Эцэгийн маань хувьд бодгаль бүр туйлын үнэ цэнтэй. Их Эзэн Есүс Христ Цагаатгалаар дамжуулан бидний хүн нэг бүрийг аврахын тулд асар их үнэ төлсөн гэдгийг бид хэзээ ч мартах ёсгүй. Сүмд идэвхтэй байхыг хичээж байгаа хүмүүсийг халамжилж мөн зааж сургаж чадаагүйгээсээ болж Түүний зовлон шаналлыг хий дэмий өнгөрөөхгүй байвал зохино.

(M. Russell Ballard, “Are We Keeping Pace?” Ensign, Nov. 1998, 8)

Лук 15:12–13 . Ямар утгаар хүү нь “Эд хөрөнгөнөөсөө ногдох хувийг минь надад өгөөч” гэж хэлсэн бэ?

Аврагчийн амьдарч байсан цаг үед мөрдөж байсан уламжлалын дагуу хүү нь эцгийгээ нас барсны дараа л эд хөрөнгийг нь өвлөн авдаг байв. Эцгээ нас барахаас өмнө эд хөрөнгийг нь өвлөн авахаар шаардах ( Лук 15:12–13 -ыг үзнэ үү) нь том доромжлол болох байв. Хүүгийн энэ хүсэлтийг төрсөн эцэг, өсөж торнисон гэр орон, олгосон хүмүүжил, тэр ч бүү хэл амьдарч буй тосгоноосоо бүрмөсөн татгалзсан гэж үзэх байсан.

(Шинэ Гэрээний суралцагчийн гарын авлага [2018], ChurchofJesusChrist.org)

Үрэлгэн хүүгийн тухай сургаалт зүйрлэлийг ойлгож, амьдралд хэрэгжүүлэхэд өөр ямар эх сурвалж надад туслах вэ?

Нэмэлт суралцах үйл ажиллагаа

Нэмэлт мэдэгдэл

Хичээлийн эхэнд байгаа үйл ажиллагааг гүйцэтгэснийхээ дараа, дараах мэдэгдлийг хуваалцах талаар бодож үз. Тэргүүн Зөвлөлийн ерөнхийлөгч асан Дийтр Ф.Угдорф “олон жил зовлон бэрхшээл туулж амьдарсан нэгэн эмэгтэй нулимс асгаруулан, ‘Би өөрийгөө үрчийж үнгэгдэн, урагдаж, аймаар болсон 20 долларын дэвсгэрттэй зүйрлэж байна. Гэхдээ 20 долларын дэвсгэртийн үнэ цэн хэвээр байдгийн адил би ч үнэ цэнтэй. Би хэдийгээр амьдралд нухлагдан хөгширч, сайхан харагдахгүй байгаа ч би ч мөн бүтэн 20 долларын үнэ цэн хэзээд хэвээрээ байдгийн адил юм шүү” гэсэн түүхийг хуваалцжээ. Ерөнхийлөгч Угдорф мөн “Ертөнцийг хэмжиж чадахгүйтэй адил бид бусдын амь хэр үнэ цэнтэй болохыг хэмжиж үл чадна. Бидний харсан хүн болгон Тэнгэрлэг Эцэгийн хувьд маш чухал хүн юм. Үүнийг ойлгосны дараа бид бусадтай хэрхэн харьцах ёстойгоо мэдэж эхэлдэг” хэмээн онцлон тэмдэглэжээ (Дийтр Ф.Угдорф, “Та нар миний гар,” Ensign, May 2010, 69 эсвэл 2010 оны 4-р сарын Ерөнхий чуулган, х. 80, 81-ийг үзнэ үү).

Алдагдсан хонь ба гээгдсэн зоос

Өөрсдийнх нь хувьд үнэ цэнтэй эд зүйлсээ алдаж байсан эсэхийг мөн үүнийгээ олохын тулд юу хийснийг нь суралцагчдаас асуу. Суралцагчдыг хэн нэгэн сүнслэг байдлын хувьд алдагдсан гэдэг нь юу гэсэн утгатай болохыг мөн тэднийг олох ямар байх талаар эргэцүүлэн бодоход урь. Лук 15 дээрх сургаалт зүйрлэлийг судлахдаа хонь, зоос, хүү гурав хэрхэн алдагдсан мөн тэднийг ямар ямар арга замаар олж авсан талаар бодоход суралцагчдыг урамшуул. Суралцагчдыг алдагдсан хүмүүсийг олох үүрэг хариуцлагынхаа талаар тунгаан бодоход урь.