Төгс эзэмших сургаалын давтлага 7
Төгс эзэмших сургаалын нэг зорилго бол сударт заасан сургаалыг танд эсвэл таны эргэн тойронд буй хүмүүст тохиолдож болох нөхцөл байдалд хэрхэн хэрэгжүүлж сурахад туслах явдал юм. Энэ хичээл танд энэ жил суралцсан зарим сургаалаа амьдралд хэрэгжүүлэх дадлага хийх боломжийг олгоно.
Суралцагчийн бэлтгэл: Амьдралдаа хэрэгжүүлэхэд хэцүү гэж боддог нэг, хялбар гэж боддог нэг төгс эзэмших сургаалын судрын хэсгийг сонгоход суралцагчдыг урь. Яагаад судрын энэ хоёр хэсгийг сонгосноо тайлбарлахад бэлдэхийг тэднээс хүс.
Боломжит суралцах үйл ажиллагаа
Төгс эзэмших сургаалын судрын хэсгийн талаарх хичээлийг энэ давтлага хичээлийн оронд зааж болох юм. Төгс эзэмших сургаалын судрын хэсгийг авч үзэх хичээл бүрийг семинарын үеэр заасан байхад анхаарахын тулд бүсийн захирал буюу зохицуулагчийн өгсөн цагийн хуваарийг үзнэ үү.
Суралцагчийн бэлтгэлийн үед төрсөн бодол санаагаа хуваалцахад тэднийг урих замаар хичээлийг эхлүүл. Тэд үүнийг ангиараа, хосоороо эсвэл жижиг бүлгээр гүйцэтгэж болно.
Бусдад туслах
Төгс эзэмших сургаалын судрын аль нэгэн хэсэгт заасан үнэнийг хэрэгжүүлэхэд суралцагчдад туслахын тулд дараах жишээг ашиглахад эсвэл өөрсдийн гэсэн жишээг бодож олоход тэднийг урих талаар бодож үз.
Таны тохинуулдаг тойргийн тань нэгэн гэр бүлийн аав саяхан ажлаасаа халагдсан гэж төсөөл. Тэр аав маш их сэтгэлээр унасан байсан бөгөөд сүмд явах, залбирах, судар уншихаа больсон байлаа. Уг гэр бүл 17 настай залуу охин, 15 настай залуу хүү мөн 10 настай охин гээд гурван хүүхэдтэй. 10 настай охин нь ээжтэйгээ хамт хааяа сүмд явдаг. Өсвөр насны хоёр хүүхэд нь сүмд тогтмол явдаг байсан ч аав нь ажилгүй болсноор тэд сүмд ирэхээ больсон байв.
Та төгс эзэмших сургаалын судрын хэсгүүдийг дараах жагсаалтын дагуу давтахдаа, энэ гэр бүлийн гишүүн бүрд тулгарч болох зовлон бэрхшээл, төрж буй мэдрэмжийн талаар бод. Эдгээр судрын аль үнэн хүн тус бүрд хамгийн их тус болж болохыг мөн яагаад тус болох талаар бод.
Дараах хүснэгтийг үзүүлж, хичээлийн туршид харах боломжийг суралцагчдад олго. Тустай гэж үзвэл, тухайн нөхцөлд хэрэгтэй байж болох төгс эзэмших сургаалын судрын өөр хэсгүүдийг нэм.
Судрын эшлэл |
Судрын түлхүүр үг хэллэг |
“Зүдэж зүтгэгсэд хийгээд хүнд ачаа үүрсэн бүгд ээ, Над дээр ир. Би та нарыг амраая.” | |
“Би чамд тэнгэрийн хаанчлалын түлхүүрийг өгнө” хэмээн Есүс хэлэв. | |
“Чи Бурхан Эзэнээ хайрла. … Чи хөршөө … хайрла.” | |
“Намайг дурсаж” ариун ёслолоос хүрт хэмээн Есүс Христ айлдав. | |
“Хэрэв хэн нэгэн нь Түүний хүслийг үйлдэхийг хүсвэл тэрээр энэ сургаалыг мэднэ.” |
Тохинуулагч ах эсвэл эгч, гэр бүлийн гишүүн хоёрын хооронд өрнөх харилцан яриаг жүжиглэн тоглохыг суралцагчдаас хүсэх талаар бодож үз. Гэр бүлийн гишүүний дүрд тоглож буй суралцагч нөхцөл байдлынхаа талаар санаа зовниж байгаагаа илэрхийлж, тохинуулагч эгч эсвэл ахын дүрд тоглож буй суралцагч төгс эзэмших сургаалын судрын хэсэг дээр тулгуурлан зөвлөгөө өгч болно.
-
Энэ гэр бүлийн хүмүүст ямар мэдрэмж төрж, ямар асуудал тулгарсан байж болох вэ?
-
Судрын ямар үнэн хамгийн сайн туслахыг шийдэхээсээ өмнө тэдний мэдрэмж, асуудлуудын талаар бодох нь яагаад тустай байж болох вэ?
Энэ жишээн дээрх гэр бүлийн нэг хүүхдийг мөн аав, ээжийнх нь аль нэгийг сонго. Тэдний хүн тус бүрд хамгийн сайн тусална гэж бодож байгаа төгс эзэмших сургаалын судрын нэг хэсэг ба үнэнийг сонго.
-
Та аль хүнийг сонгосон бэ? Та тэдэнтэй төгс эзэмших сургаалын судрын ямар хэсэг ба үнэнийг хуваалцах вэ? Яагаад?
Сонгосон хүн бүрийнхээ талаар бод.
-
Хэрэв асуувал, эдгээр төгс эзэмших сургаалын судрын хэсэгт заасан үнэний дагуу амьдрахын тулд ямар үйлдлийг тус бүр хийхэд та тэднийг урих байсан бэ?
Суралцагчдыг өмнөх асуултад өгсөн хариултаа хуваалцах зуур дараах шалгах асуултуудыг тавих талаар бодож үз. Үүнд: Та эсвэл таны таньдаг өөр хүмүүс хэзээ үнэнийг ийм арга замаар амьдралдаа хэрэгжүүлж байсан бэ? Та эсвэл бусад хүн хэзээ ийн үйлдсэн бэ мөн үр дүн нь ямар байсан бэ? Та тэдгээр туршлагаас Тэнгэрлэг Эцэг, Есүс Христ хоёрын талаар юу олж мэдсэн бэ?
-
Эдгээр үйлдэл нь хэрхэн тэдэнд Тэнгэрлэг Эцэг, Есүс Христ хоёроос хүч чадал, эрч хүчийг хүлээн авахад тусалсан бэ?
Үргэлжлүүлэн ашиглах
Өмнөх үйл ажиллагаагаар ашиглаагүй төгс эзэмших сургаалын судрын хэсгүүдээсээ нэгийг сонго. Судрын уг хэсэг хэн нэгэнд асуултынхаа хариултыг олоход юм уу асуудлаа шийдэхэд нь тусалж болох нөхцөл байдлын талаар бодож үз. Бодол санаагаа судлах тэмдэглэлдээ бичиж тэмдэглэ.
Хүмүүс эдгээр төгс эзэмших сургаалын судрын хэсэгт заасан үнэнийг хэрэгжүүлснээр үр шимээс нь хүртэж болох өөр бусад нөхцөл байдлын талаар бодол санаагаа хуваалцахад суралцагчдыг урамшуул. Тэдгээр үнэнийг амьдралдаа хэрэгжүүлэхэд туслах Аврагчийн чадварыг гэрчлэх талаар бодож үз.