Luka 23:33–46; Ioane 19:26–30

O Le Agaalofa o le Faaola i luga o le Satauro

O mea na fetalai ai Iesu a o i ai o Ia i luga o le satauro e faaalia ai Lana amio ma uiga auaumama paia. A o e suesue, saili ia faateleina lou naunau ia avea atili e faapei o Iesu Keriso a o e aoao mai Lana faataitaiga ina ua faasatauroina o Ia.

Faavaeina o se lagona o le faamoemoe. O le i ai o se faamoemoega soofaatasi manino i faiaoga ma tamaiti aoga e mafai ai ona faatupulaia le faatuatua ma tuuina atu ai le taitaiga ma le uiga i le faatinoga i le potuaoga.

Sauniuniga a le tamaitiiti aoga: Valaaulia tamaiti aoga e o mai saunia e faasoa mai e uiga i se tasi latou te iloa na faaalia lo latou agaalofa po o le alofa mutimutivale e ui o loo aafia i ni luitau faigata.

Gaoioiga e ono Mafai Ona Aoao Ai

Puipuia o isi

Mafaufau loloto i fesili nei:E masani ona e faaalia le agaalofa i isi? Aisea e faia ai pe le faia ai foi?

I lau api tfaamaumau suesuega, lisi ai ni tulaga e ono faigata ai ia te oe ona popole e uiga i atugaluga ma le soifua manuia o isi. Faamatala pe aisea ua faigata ai ia te oe ona faia na tulaga.

Nai lo le lisiina o nei tulaga i totonu o a latou api talaaga, e mafai e tamaiti aoga ona lisi a latou tali i luga o le laupapa. I se isi itu, e mafai e se tamaitiiti aoga ona tu i le laupapa o se tusiupu a o le vasega e lua minute e lisi ai le tele o tali latou te mafaia ma faamatala a latou tali pe a uma ona latou lisiina.

Mafaufau e tali i uunaiga nei i totonu o lau api faamaumau suesuega:

• E mafai faapefea ona faaleleia atili lou olaga pe afai e te faaalia le agaalofa i isi e ui lava ina sa e i ai i ni tulaga faigata?

I lenei lesona o le a e maua ai le avanoa e suesue ai i le faataitaiga a le Faaola o le aapa atu i isi e oo lava i le taimi o Lona aafiaga tiga i luga o le satauro. A o e suesue i le faataitaiga a le Faaola, saili le taitaiga a le Agaga Paia e fesoasoani ia te oe ia e manao ia avea atili e faapei o Ia.

Aafiaga a o lei oo ma i le taimi o le Faasatauroga

Toe manatunatu i aafiaga o le Faaola a o lei oo, ma i le taimi o Lona Faasatauroga:

Mafaufau e valaaulia tamaiti aoga e toe mafaufau i faamatalaga auiliili nei nai lo le ta‘uina atu ia i latou. Atonu e aoga le faaali atu o ata o nisi po o mea uma nei na tutupu.

• Sa puapuagatia o Ia mo agasala a le lalolagi i Ketesemane (tagai Luka 22:39–44)).

• Sa faalataina o Ia e Iuta ma tuulafoaiina e Ona Aposetolo (tagai Mareko14:43–50)).

• Sa faamasinoina, sasaina, ma tuufeanu i ai taitai Iutaia (tagai Mataio 26:57–68)).

• Sa fesiligia o ia e Pilato ma Herota ma sa ulagia e Herota ma ana fitafita ( Luka 23:1–24)).

• Sa fasia tigaina ma sasaina e fitafita Roma (tagai Mataio 27:26–31).

• Sa Ia amoina Lona satauro i se vaega o le ala i Kolokota (tagai Ioane 19:16–17).

• Sa tutui fao i Ona lima ma vae ma sa faasatauroina i le va o tagata faomea e toalua (tagai Luka 23:33 ; tagai foi i le Ioane 20:25).

• Sa tautau o Ia i luga o le satauro (tagai Mataio 27:45–50 ; Mareko 15:25).

Mafaufau pe faapefea e nei mea na tutupu ona aafia ai ou lagona i le Faaola ma mea na Ia onosaia mo oe.Faitau fuaitau nei, o loo i ai faamatalaga na faia e le Faaola a o i ai o Ia i luga o le satauro. Faailoa upumoni e uiga ia Iesu Keriso mai Ana fetalaiga, ma lisi i lau api faamaumau suesuega.

Faaali atu fesoasoaniga faatatau nei ma fuaitau o mau:

Luka 23:33–34 . Na fetalai le Faaola i nei upu e uiga i fitafita sa faasatauroina o Ia (tagai i le Faaliliuga a Iosefa Samita o lenei fuaiupu i le Luka 23:34, vaefaamatalaga i).

Luka 23:39–43 . O nei fuaiupu o loo faamauina ai mea na tau mai e pagota o e sa faasatauro faatasi ma le Faaola ma le ala na tali atu ai le Faaola. (Manatua na aoao mai le Perofeta o Iosefa Samita e faapea ina ua faatatau atu le Faaola i lenei pagota i lona iai faatasi ma ia i le parataiso, sa Ia aoaoina o ia e faapea “O le a Ou faatasi ma oe i le lalolagi o agaga & o le a ou aoao ia te oe pe tali atu i au fesili” [“Discourse, 11 Iuni 1843--A, e pei ona Lipotia e Wilford Woodruff,” 44, josephsmithpapers.org]).

Ioane 19:26–27 . O nei fuaiupu o loo faamauina ai mea na fetalai atu ai le Faaola i Lona tina, o Maria, ma le Aposetolo o Ioane.

Valaaulia tamaiti aoga e faasoa mai mea na latou tusia i lalo. Mafaufau e fai atu fesili tulitatao, e pei o le fesili lenei:

• O le a se mea na e aoaoina e uiga ia Iesu Keriso sa sili ona anoa ia te oe? Aisea?

A o fetufaai tamaiti aoga, fuafua e tusi a latou tali i luga o le laupapa. Atonu e ta‘ua e tamaiti aoga ia mataupu faavae e pei o nei:

E mafai ona tatou mulimuli i le faataitaiga a Iesu Keriso i le filifili e faamagalo i latou o e agaleaga ia i tatou. E mafai ona tatou mulimuli i le faataitaiga a Iesu Keriso i le filifili e fesoasoani i isi e tusa lava pe tatou te manaomia foi ni fesoasoani.

• O a ni auala e te manao e avea ai e faapei o le Faaola? Aisea?

Sa le gata ina mafaufau le Faaola tau lava o fitafita Roma, pagota, ma Lona tina a o i ai i luga o le satauro. Na aoao mai e Peresitene Russell M. Nelson se auala faaopoopo na taulai atu ai le Faaola i isi a o tiga o Ia.

E faapei i mea uma, o Iesu Keriso o lo tatou faataitaiga sili, ‘o le na onosaia le satauro, ona o le olioli sa tuu i ona luma’ [ Eperu 12:2 ]. Mafaufau i lena mea! Ina ia mafai ona Ia onosaia aafiaga aupito i sili ona tiga e lei onosaia muamua i le lalolagi, na taulai atu ai lo tatou Faaola i le olioli!

Ma o le a le olioli lea sa tuu i Ona luma? E mautinoa lava na aofia ai le olioli i le faamamaina, faamaloloina, ma le faamalosia o i tatou; o le olioli i le totogiina mo agasala a tagata uma o le a salamo; o le olioli o le a mafai ai e oe ma a’u ona toe foi atu—i le mama ma le agavaa—e nonofo ma o tatou Matua Faalelagi ma aiga.

(Russell M. Nelson, “O Le Olioli ma le Ola ai Faaleagaga,’ Ensign po o le Liahona, Nov. 2016, 82--83).

• O le a le mea na taulai atu i ai le Faaola a o puapuagatia o Ia mo i tatou?

• O le a se mea na aoao atu e Peresitene Nelson ia te oe e uiga i faanaunauga o le Faaola mo oe?

Mafaufau loloto mo sina taimi i le upumoni e faapea, a o i ai le Faaola i luga o le satauro, sa Ia taulai atu ia te oe ma le olioli o le fesoasoani ia te oe e toe foi atu i le Tama Faalelagi.

• O le a se suiga e mafai ona faia i lou olaga e te malamalama ai i lenei mea moni? Aisea o le a faia ai e lenei malamalama se suiga tele mo oe?

Valaaulia tamaiti aoga e toe mafaufau i o latou manatu ma lagona mai a latou sauniuniga mo le vasega.

• O anafea na e fesoasoani ai i se tasi a o e feagai ma se luitau, pe o anafea foi na faia ai e se tasi lenei mea mo oe?

Afai o le a fesoasoani lenei mea ina ia iloa ai se faataitaiga, matamata le ““Love One Another as He Has Loved Us,” o loo i le ChurchofJesusChrist.org, mai le faailotaimi 3:22 i le 7:54.Ia Alofa le Tasi i le Isi Pei Ona Ia Alofa Mai Ia I Tatou

Saili le musumusuga a le Agaga Paia e ala i le mafaufau loloto i le faataitaiga a le Faaola ma mea ua e lagonaina i le aso. Faailoa ni auala e mafai ona e avea atili ai e faapei o Iesu Keriso i le faaalia o le alofa ma le mutimuti alofa i isi e ui lava i taimi o ou lava luitau. Ona faamaumau lea o nei auala i totonu o lau api faamaumau suesuega. Toe iloilo le lisi na e faia, ma filifili ma le agaga tatalo se tasi o auala e mafai ona avea atili ai oe e faapei o Iesu Keriso. Faailoa mai i lau tusiga i lau api talaaga. Tatalo ma vaavaai mo avanoa e mulimulitai ai i lenei faatinoga.

Uunaia tamaiti aoga e faasoa ane mea ua latou fuafua e fai e mulimuli ai i le faataitaiga a le Faaola. Mafaufau e faasoa atu se tala patino talafeagai po o se molimau e faaiu ai le vasega.

“Ua taunuu”

Ina ua mavae ni nai itula o puapuaga i luga o le satauro, sa fetalai atu le Faaola Ana upu faaiu.

Faitau le Ioane 19:28–30 ma le Luka 23:46 . Maka ia faamatalaga faaiu a le Faaola i le olaga nei.

• O a ni mea e mafai ona fesoasoani ai nei faamatalaga tatou te malamalama ai e uiga i le Faaola ma Lana misiona?

E pei o le Faaola, e mafai ona tatou faataunuu mea e finagalo le Tama tatou te faia i o tatou olaga. Manatua le mea lenei a o e saili e mulimulitaia o mea na e filifili e faia i le aso.

Talatalaga ma Faamatalaga o Talaaga

Ioane 19:27 . O le a se mea e mafai ona tatou aoaoina mai le fetalaiga a le Faaola “Faauta o lou tina”?

E mafai ona tatou mulimuli i le faataitaiga a Iesu Keriso a o tatou taumafai e aloaia, alofa, ma tausi i o tatou tina. O Elder Jeffrey R. Holland o le Korama a Aposetolo e Toasefululua sa ofo alofa i tina amiotonu ma faatusatusa lo latou alolofa i le alofa o le Faaola.

Maimoa i le “Behold Thy Mother,” o loo maua i le ChurchofJesusChrist.org, mai le faailotaimi 0:20 i le 2:53.

E faapefea e le fesoasoani atu i isi ae o loo tatou mafatia ona mamanuina le ituaiga tagata e avea ai i tatou?

Na aoao mai Elder David A. Bednar o le Korama a Aposetolo e Toasefululua:

O uiga e faaalia … i le mana e iloatino ai mafatiaga o isi tagata pe a o tatou mafatia foi i tatou lava; i le tomai e iloa ai le galala o isi a o tatou fia aai foi tatou; ma i le mana e aapa atu ai ma avatu le mutimuti alofa mo tiga faaleagaga o isi a o tatou i ai i le lotolotoi o o tatou lava foi mafatiaga faaleagaga. O le mea lea, o uiga e faaalia i le vaavaai atu ma le aapa atu i fafo atu ae o le tali masani ma le faalenatura o le manatu o le tagata ia te ia lava ma ona manaoga faaloloto. Afai o sea faiga o se fuataga tupito o le amiosao mama, ona avea lea o le Faaola o le lalolagi ma faataitaiga atoatoa o lena uiga e tumau ma le alofa faamaoni.

(David A. Bednar, “The Character of Christ” faigalotu a le Iunivesite o Polika Iaga–Idaho, 25 Ian., 2003], byui.edu)

O a faamanuiaga e mafai ona oo mai a o tatou auauna atu i isi ae o loo faigata foi mea mo i tatou?

Sa aoao mai Peresitene Henry B. Eyring o le Au Peresitene Sili:

E tatau ona tatou iloa puapuaga o isi ma taumafai e fesoasoani atu. O le a faigata tele lena mea aemaise pe afai o matua tofotofoina foi i tatou lava. Ae o le a tatou iloa pe a tatou siiina se avega a se isi, tusa pe itiiti, o le a faamalolosia o tatou tua ma iloaina se malamalama i totonu o le pouliuli.

(Henry B. Eyring, “Faaosoosoina, Tofotofoina, ma Faaiilaina,” Ensign po o le Liahona, Nov. 2020, 98)

Gaoioiga Faaopoopo e Aoao Ai

Ioane 19:30 . “Ua taunuu”

Ina ia fesoasoani i tamaiti aoga e mafaufau i mea sa latou aoaoina e uiga i mea na faia e le Faaola mo i latou i Ketesemane ma luga o le satauro, valaaulia i latou e toe faamanatu le fetalaiga a le Faaola “Ua taunuu” ( Ioane 19:30). E mafai ona tusia lenei faamatalaga i luga o le laupapa, ma e mafai e tamaiti aoga ona kopi i a latou api faamaumau suesuega. Ona faataamilo lea i lenei fasifuaitau e mafai ona latou tusia ai mea uma na “faataunuu” e le Faaola mo i latou. Ona mafai lea ona valaaulia i latou e mafaufau e uiga i mea o le a latou faia ona o mea sa Ia faia mo i latou.