Atamai i Aoaoga Faavae Toefaamanatu 11
Malamalama ma Faaaoga
O lenei lesona o le a fesoasoani ia te oe e toe faamanatu ai upumoni o loo maua i fuaitau o mau o le atamai i aoaoga faavae ma o le a fesoasoani ia te oe e faataitai ai le faaaogaina o nei upumoni i ni tulaga eseese.
Faaauaiina o tamaiti aoga i le aoaoina. O tamaiti aoga o e auai atoatoa punouai i le aafiaga faaleaoaoga o le a sili atu ona manatua mea sa latou aoaoina. Valaaulia tamaiti aoga e auai i gaoioiga e aofia ai gaoioiga faaletino ma fegalegaleaiga ma tagata ma mea faitino o siomia ai i latou.
Sauniuniga a le tamaitiiti aoga: Afai e ono mafai, tuu atu i tamaiti aoga se kopi o le pepa e tufaaga o loo aofia ai i lenei lesona. Valaaulia i latou e toe faamanatu ia mau o le atamai i aoaoga faavae ma fasifuaitau autu. Ma le isi, fai atu ia i latou e mafaufau i ni tulaga e mafai ona fesoasoani ai upumoni o loo maua i nei fuaitau o le atamai i aoaoga faavae.
Gaoioiga e ono Mafai Ona Aoao Ai
O se lesona o le fuaitau o le atamai i aoaoga faavae atonu e manaomia ona aoao atu e suitulaga i lenei lesona toefaamanatu. Tagai i le faasologa faatulagaina o lesona ua saunia e le faatonu o le eria po o le risone po o le taitai faamaopoopo ina ia mautinoa o lesona o fuaitau o le atamai i aoaoga faavae taitasi o le a aoaoina a o faagasolo ia vasega seminare.
Toefaamanatu fuaitau o le atamai i aoaoga faavae
Faaalu sina taimi e iloilo ai fuaitau o le atamai i aoaoga faavae i le Feagaiga Fou. O fea o mau e te iloaina lelei? O fea o mau e itiiti lou i ai?
-
O a nisi o upumoni o loo aoao mai e nei fuaitau e faapitoa ona anoa ia te oe?
Afai o le a manuia tamaiti aoga mai se iloiloga o mau o le atamai i aoaoga faavae ma fasifuaitau autu, mafaufau e faia soo se gaoioiga po o gaoioiga uma nei:
Manatua: I le taimi o na gaoioiga, e mafai ona fesoasoani le valaaulia o tamaiti aoga e galulue taitoalua. Mafaufau e fai paga tamaiti aoga o manaomia le fesoasoani ma tamaiti aoga o e naunau ma mafai ona fesoasoani ia i latou.
1. Faaali atu mau faasino i le tasi itu o le laupapa ma fasifuaitau autu, o loo lisiina faafefiloi, i le isi itu. Valaaulia tamaiti aoga e vaai pe fia ni mau faasino ma fasifuaitau autu e mafai ona latou faafetauia sa‘o. Valaaulia i latou e faaaoga a latou tusitusiga paia e siaki ai a latou galuega.
2. Faaali atu na o se vaega o se fasifuaitau autu, ma valaaulia tamaiti aoga e faauma ma tuu i ai le mau faasino.
3. Amata ona faitau lemu se fasifuaitau autu, ia auauai taitasi le upu i le taimi. A manatu loa tamaiti aoga ua latou iloa pe o le fea fuaitau o le atamai i aoaoga faavae o loo faasino i ai, e mafai ona latou susue loa lena fuaitau i a latou tusitusiga paia.
|
Mau Faasino o Tusitusiga Paia |
Fasifuaitau Autu o Mau |
|
“Aua o le aso nei ua fanau ai i le aai o Tavita, lo outou Faaola, o le Alii o Keriso.” | |
|
“Afai e le fanau se tasi i le vai ma le Agaga, e le mafai ona sao o ia i le malo o le Atua.” | |
|
“Aua ua faapea lava ona alofa mai o le Atua i le lalolagi, ua ia aumai ai lona Atalii e Toatasi.” | |
|
“Ia faapea ona pupula atu lo outou malamalama i luma o tagata.” | |
|
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.” | |
|
Na fetalai Iesu, “Ou te avatu foi ia te oe ki o le malo o le lagi.” | |
|
“Ai se tasi e fia fai lona finagalo, e iloa ai e ia le mataupu.” | |
|
“E te alofa atu i le Alii lou Atua. … E te alofa atu i lē lua te tuaoi.” | |
|
Na poloai mai Iesu Keriso, ia aai ma feinu i le faamanatuga “e fai ma faamanatuga ia te au.” | |
|
“O le ola e faavavau foi lenei, ia latou iloa oe le Atua moni e toatasi, ma Iesu Keriso.” | |
|
“Aua o le agaga e leai sona aano ma ni ivi, pei o a’u nei ua outou vaavaai i ai.” |
O se tasi o auala e manatua ai upumoni i tusitusiga paia o le fesootai atu lea i mea faitino o aso uma. Filifili ni fuaitau se lua o mau o le atamai i aoaoga faavae, ma toefaamanatu le fasifuaitau autu e fesootai ma mau taitasi. Ona fai lea o mea nei i fuaitau taitasi:
-
Tusi se ata o se mea faitino e te lagona e fesootai i le fasifuaitau autu o le fuaitau. (Mo se faataitaiga, mo le Mataio 5:14–16, e mafai ona e tusia pe pue se ata o se molī).
-
Tusi se faamalamalamaga puupuu pe faapefea ona fesootai le mea faitino i le upumoni o loo aoaoina i le fuaitau.
Faafesootaiina o upumoni i o tatou olaga
O Elder David A. Bednar o le Korama a Aposetolo e Toasefululua na aoao mai se upumoni e mafai ona fesoasoani ia i tatou e faaaoga ai fuaitau o le atamai i aoaoga faavae. Na ia aoao mai o mataupu faavae o le talalelei “e maua ai le vaaiga taua o le upumoni e faavavau a o tatou faatautaia tulaga eseese, luitau, faaiuga, ma aafiaga o le olaga faitino” (“O Mataupu Faavae o La’u Talalelei,”Liahona, Me 2021, 123–24). O mataupu faavae o loo maua i fuaitau o le atamai i aoaoga faavae e mafai ona fesoasoani ia i tatou e iloa ai pe faapefea ona tali atu i le tele o tulaga e ono tulai mai i o tatou olaga.
Mo le gaoioiga lenei, e mafai e tamaiti aoga ona tusi le tulaga i luma o se fasi pepa ma le fuaitau o le mau o le atamai i aoaoga faavae ma le faamalamalamaga i le pito i tua.
Faamatala se tulaga e mafai ai e se tasi ona faaaoga se upumoni mai se fuaitau o le atamai i aoaoga faavae e te filifilia. Faamatala pe mafai faapefea e le faaaogaina o lena upumoni ona fesoasoani i le tagata ia maua le fesoasoani a le Faaola.
Mafaufau e ao mai ata faataitai a tamaiti aoga ma faitau atu i le vasega. O lenei mea o le a mafai ai e tamaiti aoga ona faalogo i manatu o tagata o a latou vasega ma iloa ai e tele upumoni eseese e mafai ona faatatau i se tulaga se tasi.
O se tasi o filifiliga e faatupulaia ai le auai o tagata aoga o le faitau lea o se ata faataitai ma valaaulia tamaiti aoga (taitoatasi pe i ni vaega toalaiti) e tusi i lalo se mau faasino o le atamai i aoaoga faavae ma le fasifuaitau autu latou te manatu e mafai ona fesoasoani i le tagata o loo i le ata faataitai. Afai e faailoa mai e se tamaitiiti aoga po o se vaega o i latou ia se upumoni e ese mai nai lo le upumoni na tusia e le uluai tamaitiiti aoga, valaaulia i latou e faamatala mai pe mafai faapefea ona fesoasoani lena upumoni.
Manatunatu i upumoni a le Faaola
Toe manatunatu i fuaitau o mau o le atamai i aoaoga faavae ma fasifuaitau autu na aoaoina i le afa muamua o le tausaga (tagai i le siata lea e faaali mai i le amataga o le lesona).
Ia tusia se tusi puupuu i se tasi o le a amataina le seminare i se taimi lata mai ma e na te le o iloaina se mea e uiga i fuaitau o le atamai i aoaoga faavae. Faamatala atu ia i latou auala e fesoasoani ai fuaitau ia i latou e iloa lelei ai le Faaola ma o le a tuuina atu ai ia i latou tali i fesili ma luitau e ono tulai mai i o latou olaga. Mafaufau e faasoa atu se faataitaiga o se taimi na faamanuiaina ai oe po o se tasi e te iloaina e ala i le iloaina ma le manatuaina o upumoni a le Faaola o loo aoaoina i fuaitau o le atamai i aoaoga faavae.
Gaoioiga Faaopoopo e Aoao Ai
Faataitaiga faatino
O Peresitene Joy D. Jones, o le sa auauna atu o se Peresitene Aoao o le Peraimeri, sa faapea mai o faataitaiga faatino “e mafai ona faamalosia ai fanau ina ia saunia i se faatulagaga faigata” (“Talatalanoaga E Tatau Ai,” Liahona, Me 2021, 13). E mafai ona valaaulia tamaiti aoga e faailoa mai se tulaga e mafai ai ona fesoasoani se upumoni mai se fuaitau o le atamai i aoaoga faavae. Ona mafai lea ona latou faatino faataitai le tali atu i le tulaga e faaaoga ai le upumoni mai le fuaitau o le atamai i aoaoga faavae.