Mataio 27:50--66; Luka 23:55–56; Ioane 19:39–40

Faamamaluina ma le Faaalia o le Alofa mo le Faaola

Ina ua maliu Iesu, “sa luluina le eleele, ma sa mavaevae papa” (Mataio 27:51), ae sa i ai se mea e sili atu ona taua na tupu i le malumalu: o le veli i le Mea e Sili ona Paia na saeluaina i ni vaega se lua. Ina ua mavae le maliu o le Faaola, sa faia e Ona soo se taumafaiga tele ina ia maua Lona tino ma saunia ma le faaeteete mo le tanuga. O lenei lesona ua faamoemoe e fesoasoani ia te oe e malamalama ai ma manatunatu i mea na faia e Iesu Keriso mo oe ma mea e mafai ona e faia e faaalia ai le faamamaluina ma le talisapaia o Ia.

Tuuina atu o le taimi e mafaufau loloto ai. E mafai ona manuia tamaiti aoga mai le i ai o se taimi e mafaufau loloto ai i upumoni o le talalelei o loo latou aoaoina. Tuu atu se taimi i vasega taitasi e mafaufau filemu ai tamaiti aoga e uiga i mea ua latou aoaoina ma pe faapefea e nei upumoni ona aafia ai la latou vaaiga aoao, la latou silasila manino, ma a latou filifiliga i le lumanai.

Sauniuniga a le tamaitiiti aoga: Valaaulia tamaiti aoga e mafaufau loloto i mea na faia e le Faaola mo i latou ma fai se lisi o auala e mafai ona latou faaalia ai lo latou alolofa mo Ia.

Gaoioiga e ono Mafai Ona Aoao Ai

Faamamaluina o i latou ua maliliu

Afai e ono mafai, mafaufau e faamatala faapuupuu mai le falelauasiga o se e pele ma lagona o i latou sa auai. E mafai ona aoga le faaali atu o se ata o le e pele na maliu, o se faasalalauga, po o se polokalama mai le falelauasiga. Ia nofouta i lagona o tamaiti aoga o e ua maliliu e pele ia i latou.

O tagata o aganuu eseese e eseese auala e manatua ma faamamaluina ai se tasi ua maliu. Mafaufau i se tasi e te alofa i ai ua maliu, pe mafaufau loloto pe faape‘i pe a maliu se tasi e latalata atu ia te oe.

• O le a se mea e te manao (pe o le a e) manao i taimi uma e manatua e uiga i lē e pele ia te oe?

• O le a se mea e te faia e faamamalu ai pe faaalia ai le alofa mo i latou ua maliliu?

O fuaitau o mau o i lenei lesona o loo faamatala ai le maliu o le Faaola i luga o le satauro ma mea na tutupu i le taimi lava mulimuli ane ai. Faaalu sina taimi e manatunatu ai i fesili nei:

• Mata o le a sou lagona pe ana e vaai tino i le maliu o Iesu?

• O le a sou lagona e uiga i Lona maliu i le taimi nei?

• Mata e faapefea ona e manao e manatua ma faamamalu ia te Ia?

A o e suesue i le aso, saili le taitaiga a le Agaga Paia e fesoasoani ia te oe ia iloa pe mafai faapefea ona e manatua, faamamalu, ma faaali atu le alofa mo le Faaola.

Faatusa o le veli o le malumalu

I le taimi o le maliu o Iesu sa i ai se mafuie ma isi faaaliga vaaia faaletino, e aofia ai le faaleagaina o le malumalu. Faitau le Mataio 27:50–51 ma mafaufau e maka le faamatalaga auiliili e uiga i le malumalu na tusia e Mataio.

Mafaufau e tusi le ata lenei i luga o le laupapa e fesoasoani ai e faamatala le faatusa o le malumalu anamua.

O le malumalu anamua e lua potu na vaeluaina i se veli, po o se pupuni. E faa-tasi i le tausaga, i le Aso o le Togiola, ona laasia ai e le faitaulaga sili mai le Nofoaga Paia e ui atu i le veli o le malumalu ma ulufale atu i le Paia o Paia. O lenei potu sa faatusa i le afioaga o le Atua. I totonu o lenei potu, sa sausauina ai e le faitaulaga sili le toto o se taulaga mo agasala i luga o le fatafaitaulaga e togiola ai agasala a Isaraelu (tagai Levitiko 16).

• Mata o le a le mea e faatusa i ai le saeia o le veli e tau atu i le Paia o Paia?

Valaaulia tamaiti aoga e faasoa mai o latou manatu. Faasoa atu pe otooto le saunoaga a Elder Bruce R. McConkie pe a manaomia.

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua le taua faafaatusa o lenei mea na tupu:

O le Paia o Paia ua tatalaina nei i tagata uma, ma o tagata uma foi, e ala i le toto togiola o le Tamai Mamoe, ua mafai ai nei ona ulufale atu i le nofoaga aupito maualuga ma aupito paia i nofoaga uma, lena malo lea e maua ai le ola e faavavau. [O tagata uma] ua agavaa e ui atu i le veli i le afioaga o le Alii ina ia maua le faaeaga atoatoa.

(Bruce R. McConkie, Doctrinal New Testament Commentary, 3 vols. [1965–73], 1:830)

O se upumoni e tasi e mafai ona tatou aoao mai i le mea na tupu i le Mataio 27:51 e faapea O Iesu Keriso ua mafai ai e i tatou uma ona toe foi atu i le afioaga o le Tama Faaalelagi ma avea e faapei o Ia. Na aoao mai foi e le Aposetolo o Paulo e faapea, o le saeia o le veli/ na faaalia ai lenei upumoni (tagai Eperu10:19–20).

Atonu o se taimi lelei lenei e faamanatu atu ai i tamaiti aoga ia manatua mea sa latou mafaufau loloto i ai ia latou sauniuniga a le tamaitiiti aoga e uiga i mea na faia e le Alii mo i latou.

Mafaufau loloto i le tau na totogi e lou Faaola ina ia mafai ai ona matala le veli ma mafai ai ona e toe foi atu i le malo o Lona Tama.

Tusi i lalo ni nai auala na fesoasoani ai le Faaola ia te oe lava ia e tuputupu ae ai ma faaleleia ma avea atili e faapei o lou Tama Faalelagi ina ia mafai ai lava ona e toe foi atu i Lona afioaga.

Valaaulia tamaiti aoga e faasoa mai o latou manatu. Mafaufau e fai se lisi o tali a tamaiti aoga i luga o le laupapa.

Ua faamamaluina Iesu e Ona soo

Ina ua maliu Iesu, sa saili Ona soo ia manatua ma faamamalu ia te Ia. Faitau e uiga i auala na faaalia ai e nisi o le au soo lo latou alolofa ia Iesu.

• Mataio 27:57–60:: O Iosefa le Arimataia, o se soo mauoa ma o se tasi o le au Saneterini, o le aufono pito maualuga o pulega a tagata Iutaia

• Ioane 19:39–40: Nikotemo, o se Faresaio ma se tasi o le au Saneterini

• Luka 23:55–56: Maria le Makatala ma isi fafine

O faamatalaga nei e mafai ona fesoasoani ia te oe e malamalama atili ai i faatinoga a nei soo

Mafaufau e faaali atu ata nei ma faamatala pe o le a lo latou fesootaiga ma le falelauasiga o Iesu:

O Iosefa le Arimataia, e ui e le o se soo aloaia o Keriso, ae sa faaalia le agaalofa ma le lototoa e ala i le talosaga atu mo le tino o Iesu. O le tuugamau, po o le loa, lea na saunia e Iosefa mo le tino o le Faaola na eliina mai le maa, e foliga e tele sona tau.

O le muro o se apulupulu mago manogi e faaaoga e saunia ai le tino o le tagata ua maliu. O le aofaiga o le muro ma aloe na aumai e Nikotemo e uuina ai le tino o le Faaola sa talitutusa ma lea na faaaoga i falelauasiga tautupu.

Sa saunia e fafine mea manogi ma suauu e faamaea ai le tapenaga o le tino o Iesu ona sa faanatinati ona tanuina o ia.

• O a mea o faaalia i faatinoga a nei tagata e uiga i o latou lagona i le Faaola?

Faaalia o lou alofa mo lou Faaola

E ui e le o i ai i le tino le Faaola ma i tatou, e mafai lava ona tatou maua auala e faaali atu ai lo tatou alolofa ia te Ia.

Valaaulia tamaiti aoga e faasoa mai ni auala e faaalia ai le alofa mo le Faaola (atonu na latou mafaufau i ni nai manatu i le taimi o a latou sauniuniga a le tamaitiiti aoga). E mafai ona tusi e tamaiti aoga o latou manatu i le laupapa.

Mafaufau e faasoa atu le saunoaga a Sister Craven i le vaega o “Faamatalaga ma Talaaga” po o le vitio i le vaega o “Gaoioiga Faaopoopo e Aoao ai”.

Tusi [se faamatalaga] pe tusi se ata o se mea se tasi pe sili atu e te lagona e tatau ona e faia e faamamalu ai ma faaali atu ai le alofa mo le Faaola. E pei ona sa faia mo Iosefa le Arimataia, Nikotemo, ma Maria le Makatala ma isi fafine, e ono manaomia ai e lenei mea le ositaulaga.

Afai e ono mafai, a o tusitusi pe tusi se ata a tamaiti aoga, mafaufau e tata ni viiga po o isi musika e faamatalaina ai le Faaola ma mea na Ia faia mo i tatou. O nisi o viiga e mafai ona aofia ai “Ua Sili Oe” (Viiga, nu. 46), “Se Tagata Faanoanoa Mativa” (Viiga, nu. 16), “Ou te Tu ma Ofo” (Viiga, nu. 107), po o le “Faitau Ou Manuia” (Viiga, nu. 151).

Valaaulia tamaiti aoga e faasoa mai mea na latou tusia po o ata. Faaali atu le talitonuina i lo latou gafatia ona faailoa atu lo latou alolofa mo le Faaola ma le talisapaia faamaoni o a latou taumafaiga e faia ai.

Mafaufau e faaiu le lesona i le valaaulia o tamaiti aoga e faatino mea na latou lagona e tatau ona latou faia e faaalia ai lo latou alolofa i le Faaola.

Talatalaga ma Faamatalaga o Talaaga

O le a se mea ua faia e le Faaola mo au?

Na aoteleina e Peresitene Dallin H. Oaks o le Au Peresitene Sili nisi o mea na faia e le Faaola mo i tatou taitoatasi:

I lalo o le fuafuaga a lo tatou Tama Faalelagi, sa Ia “foafoaina le lagi ma le lalolagi” ( Mataupu Faavae ma Feagaiga 14:9) ina ia mafai e i tatou taitoatasi ona maua le aafiaga faaletino e tatau mo le sailia o lo tatou taunuuga faalelagi. I le avea ai ma se vaega o le fuafuaga a le Tama, sa faatoilalo ai e le Toetu o Iesu Keriso le oti ina ia faamautuina le tino ola pea mo i tatou taitoatasi. O le taulaga togiola a Iesu Keriso ua aumaia ia i tatou le avanoa e salamo ai mai i a tatou agasala ma toe foi atu ai ma le mamā i lo tatou aiga faalelagi. O Ana poloaiga ma feagaiga ua faaali mai ai ia i tatou le ala, ma o Lana perisitua ua aumaia ai le pule e faatino ai sauniga manaomia e taunuu ai i lena taunuuga. Ma na finagalo lava lo tatou Faaola ia oo i tiga uma faaletino ma vaivaiga ina ia Ona silafia ai le auala e faamalosia ai i tatou i o tatou mafatiaga.

(Dallin H. Oaks, “O Le A le Mea Ua Faia e lo Tatou Faaola mo i Tatou?,” Liahona, Me 2021, 77)

O a nisi o auala e mafai ona faaali ai lo’u alofa i le Faaola?

Na faapea mai Sister Becky Craven o le Au Peresitene Aoao o Tamaitai Talavou:

Afai tatou te alolofa ia te Ia e pei ona tatou folafola atu, e lē mafai la ona tatou faaalia lena alofa e ala i sina faaeteetega itiiti i le ola ai i Ana poloaiga?

O le faaeteete i le ola ai i le talalelei e le faapea o le fiamamalu po o le faaulumalo. Ae o lona uiga o le talafeagai lelei i o tatou mafaufauga ma amioga i le avea ai ma soo o Iesu Keriso. A o tatou mafaufau loloto i le eseesega i le va o le faaeteete ma le faasamasamanoa i lo tatou ola ai i le talalelei, o nisi nei o manatu e mafaufau i ai:

O tatou faaeteete ea i a tatou tapuaiga o le aso Sapati ma i a tatou sauniuniga e taumamafa i le faamanatuga i vaiaso taitasi?

E mafai ona tatou faaeteete atili i a tatou tatalo ma suesuega o tusitusiga paia po o le punouai mataalia atili i le Sau, Mulimuli Mai ia te Au—Mo Tagata Taitoatasi ma Aiga?

O tatou faaeteete ea i a tatou tapuaiga i le malumalu, ma pe o tatou ola ea ma le faaeteete ma le manatu tonu i feagaiga na tatou osia uma i le papatisoga ma i le malumalu? O tatou faaeteete ea i o tatou foliga vaaia ma tauagafau i o tatou laei, aemaise i nofoaga ma tulaga paia? O tatou faaeteete ea i le auala o tatou ofuina ai laei paia o le malumalu ? Pe ua taitaiina e sitaili a le lalolagi se uiga atili ona faasamasamanoa?

O tatou faaeteete ea i le auala o loo tatou auauna atu ai i isi ma i le auala o loo tatou faataunuuina ai o tatou valaauga i le Ekalesia, pe o tatou lē popole pe faasamasamanoa i o tatou valaauga e auauna atu?

O tatou faaeteete po o faasamasamanoa i mea tatou te faitau i ai ma mea tatou te matamata ai i luga o le TV ma i luga o a tatou masini feaveai? O tatou faaeteete ea i a tatou upu ma gagana? Pe o tatou taliaina faasamasamanoa gagana masoā ma mataga?

O loo i ai i le tamaitusi o le Mo Le Malosi o le Autalavou tulaga faatonuina ia, afai e mulimulitaia ma le faaeteete, o le a aumaia faamanuiaga silisili ma fesoasoani ia i tatou e tumau ai i luga o le ala o feagaiga.

(Tagai i le Becky Craven, “Faaeteete poo le Faasamasamanoa,” Ensign po o le Liahona, Me 2019, 10)

Gaoioiga Faaopoopo e Aoao Ai

O le iloaina ai o le Faaola

Mafaufau e valaaulia tamaiti aoga e faitau le Mareko 15:39 e iloa ai pe na faapefea ona tali atu le taitai o le toaselau ina ua uma ona molimauina le maliu o Iesu Keriso ma le mafuie ma afa. E mafai ona valaaulia tamaiti aoga e mafaufau e uiga i mea na fesoasoani ia i latou e iloa ai o Iesu Keriso o le Alo o le Atua ma le ala e aafia ai o latou olaga i lena malamalama.

Auala e faaali atu ai le alofa ia Iesu Keriso

Mafaufau e faaali le “If We Love Him” (3:57), o lo o maua i le ChurchofJesusChrist.org, ma valaaulia tamaiti aoga e mafaufau i ni auala e mafai ona latou faaalia ai lo latou alolofa mo le Faaola.