Luke 7:36–50

“Ko Ia ʻOku Lahi Ai ʻEne ʻOfá”

Naʻe maʻu meʻatokoni efiafi ʻa Sīsū ʻi he ʻapi ʻo ha tangata Fālesi ko Saimone. Naʻe hū atu ha fefine naʻe pehē ʻe Saimone ko ha “angahala ia” ʻo “kamata fufulu ʻe ia [ʻa e] vaʻe [ʻo e Fakamoʻuí] ʻaki hono loʻimatá,” holoholoʻi ʻaki ia hono louʻulú, “pea ʻuma ki hono vaʻé, ʻo tākai ʻaki ia ʻa e lolo” (Luke 7:37–39). ʻI he tali ki he ngaahi fakakaukau ʻa Saimoné, naʻe vahevahe ai ʻe he Fakamoʻuí ha talanoa fakatātā fekauʻaki mo e fakamolemolé mo e ʻofá. ʻOku fakataumuʻa ʻa e lēsoni ko ʻení ke tokoniʻi koe ke ke ngāue ʻaki ʻa e tui kia Sīsū Kalaisí mo fakatomala mei hoʻo ngaahi angahalá.

Fakalaulauloto. Fakaafeʻi ʻa e kau akó ke nau fakalaulauloto ki he meʻa ʻoku nau akó. ʻOku ʻuhinga ʻa e fakalaulaulotó ke fakakaukauʻi fakamātoato ha meʻa pea ʻe lava ke tokoniʻi ʻe he lotú. ʻI he ako ʻa e kau akó ke fakalaulaulotó, ʻe faʻa fakahā ʻe he Laumālié ʻa e moʻoní kiate kinautolu mo akoʻi kiate kinautolu ʻa e founga ke nau hoko ai ʻo hangē ange ko Sīsū Kalaisí.

Teuteu ʻa e tokotaha akó: Fakaafeʻi e kau akó ke nau lau e Luke 7:36–50 pea omi mateuteu ke vahevahe ʻenau tali ki he ngaahi fehuʻi ko ʻeni ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻoú 2023: “Fakalaulauloto ki he founga ʻokú ke hangē ai ko e fefine ʻoku fakamatalaʻi ʻi he Luke 7:36–50 . Ko e fē nai e taimi kuó ke aʻusia ai e ʻofa ongoʻingofua mo e ʻaloʻofa naʻe fakahā ʻe he Fakamoʻuí ki he fefiné ni? Ko e hā ʻokú ke ako mei heʻene sīpinga ʻo e tuí, ʻofá, mo e loto fakatōkilaló?” (“27 Fēpueli–5 Māʻasi. Mātiu 8; Maʻake 2–4; Luke 7: ʻKuo Fakamoʻui Koe ʻe Hoʻo Tuí’”).

Ngaahi ʻEkitivitī Ako ʻOku Ala Fakahokó

Ko e huʻunga ʻoku tau ʻunu ki aí

Fakaʻaliʻali e fakatātā ko ʻení mo e ngaahi fehuʻi ʻoku ʻoatu fakataha mo iá.

• Ko e hā ʻokú ke fakatokangaʻi fekauʻaki mo e kakai ʻi he fakatātā ko ʻení?

• Ko e hā ʻe ala fokotuʻu mai ʻe honau vā mamaʻo mei he Fakamoʻuí pea mo e feituʻu ʻoku nau hanga ki aí fekauʻaki mo honau vā fetuʻutaki mo Iá?

Kiʻi fakakaukau ki ha feituʻu te ke ʻi ai ʻi he fakatātā ko ʻení pea mo e feituʻu te ke hanga ki aí. Naʻe fakamatalaʻi ʻe ʻEletā Leli R. Lōleni, ko ha mēmipa mālōlō ʻo e Kau Fitungofulú, ʻo pehē:

ʻOku ʻafioʻi ʻe he Tamai Hēvaní hotau tufakanga fakalangí. ʻOkú Ne fiefia he taimi kotoa pē ʻoku tau laka atu ai ki muʻá. ʻOku mahuʻinga ange kiate Ia hotau huʻungá kae ʻikai ko e vave ʻetau fonongá.

(Larry R. Lawrence, “Ko e Hā ʻOku Teʻeki Ai Ke u Faí?,” Ensign pe Liahona, Nōvema 2015, 35)

• ʻOkú ke pehē ko e hā ʻoku mahuʻinga ange ai ʻa e huʻunga fakalaumālie ʻoku tau hanga ki aí ʻi he vave ʻo ʻetau ʻunú?

ʻOku ongoʻi fiefia lahi ʻa e ʻEikí ʻi he taimi ʻoku tau feinga ai ke fakatomalá (vakai, Luke 15:7 ; Tokāteline mo e Ngaahi Fuakava 18:13). Ko e founga ʻe taha ke fakamatalaʻi ʻaki ʻa e fakatomalá ko e tafoki mei he angahalá pea hanga ki he ʻOtuá (vakai, Fakahinohino ki he Ngaahi Folofolá, “ Fakatomalá, Fakatomalaʻí,” scriptures.ChurchofJesusChrist.org). ʻI hoʻo akó, tokanga ki he ngaahi ueʻi ʻa e Laumālié ʻe ala tokoni atu kiate koe ke ke tafoki mei he angahalá ʻo hanga ki he Fakamoʻuí.

ʻOku taumafa ʻa Sīsū ʻi he ʻapi ʻo Saimone ko e tangata Fālesí

Fakaafeʻi e kau akó ke nau fakakaukau ki heʻenau tali ki he ngaahi fehuʻi naʻe kole ange ke nau fakalaulauloto ki ai ko ha konga ʻo e ʻekitivitī teuteu ʻa e tokotaha akó.

ʻOku ʻi he Luke 7 ha talanoa ʻo e taumafa ʻa Sīsū ʻi he ʻapi ʻo ha tangata Fālesi ko Saimone. Lolotonga e ʻafio ʻa Sīsū Kalaisi ʻi he ʻapi ʻo Saimoné, naʻe fakaofi atu ha fefine naʻe ʻiloa ko ha fefine angahala (vakai, Luke 7:37, 39).

Lau ʻa e Luke 7:36–39, ʻo kumi e meʻa naʻe hoko ʻi he taimi naʻe haʻu ai e fefiné kia Sīsū lolotonga ʻa e kātoanga kai ko ʻení.

• Ko e hā naʻá ke fakatokangaʻi fekauʻaki mo Saimoné? fekauʻaki mo e fefiné?

Naʻe ʻafioʻi ʻe Sīsū ʻa e ngaahi fakakaukau ʻa Saimoné peá Ne vahevahe ha talanoa fakatātā. Lau ʻa e Luke 7:40–43, ʻo kumi e meʻa naʻe akoʻi ʻe he Fakamoʻuí kia Saimone ʻi he talanoa fakatātā ko ʻení. Mahalo ʻe tokoni ke ʻiloʻi ko e tenali ʻe tahá ko e lahi ia ʻo e paʻanga angamaheni ke maʻu ʻe ha taha ngāue ʻi ha ʻaho (vakai, veesi 41).

• Ko e hā naʻe mei tokoniʻi ʻe he talanoa fakatātā ko ʻení ke mahino kia Saimone fekauʻaki mo ʻene fiemaʻu ha fakamolemolé?

Fakamatalaʻi ange lolotonga e kuonga ʻo Sīsuú naʻe angamaheni ʻaki pē ki he tokotaha ʻokú ne fai e fakaafé ke ne fakalāngilangiʻi ʻene kau fakaafe ʻiloá ʻaki hono fai e ngaahi ngāue angaʻofa hangē ko e ʻuma kiate kinautolu ʻi hono talitali kinautolú, ʻoange ha vai ke fufulu ʻaki honau vaʻé, mo tākai honau ʻulú ʻaki e loló (vakai, James E. Talmage, Jesus the Christ[1916], 261). Hangē ko hono lekooti ʻi he Luke 7:44–46, naʻe fakamahinoʻi ʻe he Fakamoʻuí naʻe ʻikai fakahoko ʻe Saimone ʻa e ngaahi fakalāngilangi ko ʻení kia Sīsū, ka naʻe feinga lahi e fefiné ke fakahaaʻi ʻene ʻofa mo e houngaʻia kiate Iá.

• ʻOkú ke pehē ko e hā naʻe mahino ki he fefiné ni fekauʻaki mo Sīsuú ka naʻe ʻikai mei mahino kia Saimoné?

• Ko e hā ha fakamoʻoni ʻokú ke fakatokangaʻi naʻe fakatomala ʻa e fefiné, pe tafoki mei heʻene ngaahi angahalá kae hanga ki he Fakamoʻuí?

Lau ʻa e Luke 7:47–50, ʻo kumi e ʻuhinga naʻe fakamolemoleʻi ai ʻe he ʻEikí ʻa e fefine ko ʻení mei heʻene ngaahi angahalá.

• Ko e hā ha ngaahi fakakaukau pe ongo naʻá ke maʻu fekauʻaki mo e Fakamoʻuí ʻi hoʻo ako ʻa e talanoa ko ʻení?

• Ko e hā ha ngaahi moʻoni naʻá ke ako mei he talanoa ko ʻení?

ʻE lava ke ʻiloʻi ʻe he kau akó ha ngaahi moʻoni kehekehe mei he talanoa ko ʻení, kau ai ʻeni: ʻI he taimi ʻoku fakamolemoleʻi ai kitautolu mei heʻetau ngaahi angahalá, ʻoku loloto ange ai ʻetau ʻofa ki he Fakamoʻuí. ʻI heʻetau tui kia Sīsū Kalaisi pea fakatomala mei heʻetau ngaahi angahalá, te tau maʻu ʻEne fakamolemolé.

Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi akonaki ʻoku fekauʻaki mo e talanoa ʻoku lekooti ʻi he Luke 7. Sio ʻi he foʻi vitiō “Ke u Tohoakiʻi ʻa e Kakai Fulipē Kiate Au” (13:39) mei he taimi 4:22 ki he 5:03, pe lau ʻa e fakamatala ko ʻení.

//media.ldscdn.org/webvtt/general-conference/april-2016-general-conference/2016-04-1070-dale-g-renlund-eng.vtt

Ko e lahi ange ʻetau ofi kia Sīsū Kalaisi ʻi he fakakaukaú mo e taumuʻa ʻo hotau lotó, ko e lahi ange ia ʻetau fakahoungaʻi ʻEne tonuhia ʻa faiekiná, ko e lahi ange ia ʻetau fakahoungaʻi e ʻaloʻofá mo e fakamolemolé, pea ko e lahi ange ia ʻetau fiemaʻu ke fakatomala pea hoko ʻo hangē ko Iá. ʻOku mahuʻinga e tuʻunga totonu ʻoku tau mamaʻo ʻaki mei he Tamai Hēvaní mo Sīsū Kalaisí, ka ʻoku toe mahuʻinga ange ʻa e feituʻu ʻoku tau fakataumuʻa ki aí. ʻOku fiefia ange ʻa e ʻOtuá ʻi he kau angahala ʻoku fakatomala ʻo feinga ke ofi ange kiate Iá ʻi he niʻihi fiemāʻoniʻoni mo fakaangá, hangē ko e kau Fālesí mo e kau tangata tohi ʻo e kuonga muʻá, ʻoku ʻikai ke nau fakatokangaʻi ʻa e lahi ʻo e fiemaʻu ke nau fakatomalá.

(Dale G. Renlund, “Ke u Tohoakiʻi ʻa e Kakai Fulipē Kiate Au,” Ensign pe Liahona, Mē 2016, 40)

• Ko e hā ha ngaahi foʻi lea pe ngaahi kupuʻi lea ʻi he fakamatala ko ʻení ʻoku nau fakalahi hoʻo mahino ki he meʻa naʻá ke toki ako ʻi he Luke 7?

• Ko e hā ha ngaahi aʻusia kuo nau tokoniʻi koe ke ke ongoʻi ha ʻofa mo ha houngaʻia lahi ange ki he Fakamoʻuí mo e ʻaloʻofa ʻokú Ne foaki maí?

Faʻu ha palani

Tuku ange ha taimi ki he kau akó ke nau tali e ngaahi fehuʻi ko ʻení ʻi heʻenau tohinoa akó.

Manatuʻi ko e fakatomalá ʻoku ʻikai ko ha meʻa pē ia ʻoku hoko pe ʻoku fakahoko pē ia koeʻuhí ko ha angahala mamafa. Ko e fakatomalá ko ha ngāue, pea ʻoku tau fakatomala ʻi ha faʻahinga taimi pē ʻoku tau feinga ai ke tau ofi ange ki he ʻEikí pea tafoki mei he koví.

Toe vakai ki he ʻīmisi ʻo e Fakamoʻuí mo e fakatātā ʻo e kakai ʻoku fakaʻaongaʻi ki ai ʻa e stick figures, pea fakakaukau ki ho vā fetuʻutaki mo Sīsū Kalaisí pea mo e feituʻu ʻokú ke fakataumuʻa ke ʻunu ki aí. Faʻu ha palani ke fakaloloto hoʻo ʻofa ki he Fakamoʻuí ʻaki haʻo fakatomala fakaʻaho. Fakakakato ʻa e ngāue ko ʻení ʻi ha laʻipepa mavahe koeʻuhí ke ke lava ʻo tauhi fakafoʻituitui ia. Mahalo te ke maʻu ha faingamālie ke toe vakaiʻi e aʻusia ko ʻení ʻi ha lēsoni ʻi he kahaʻú.

Ko e lēsoni “Siviʻi Hoʻo Akó” ʻoku hoko mai ʻi he ngaahi lēsoni ʻo e Mātiu 8–13; Maʻake 2–5; mo e Luke 7, 9, 11 ʻoku lave ia ki he palani ko ʻení pea ʻokú ne fakaafeʻi e kau akó ke nau fakakaukauloto ki heʻenau fakalakalaká.

• Ko e hā ha meʻa ʻe taha ʻoku fiemaʻu ke ke taʻofi hono fakahokó kae lava ke ke ofi ange ai ki he Fakamoʻuí? Te ke taʻofi fēfē nai ia?

• Ko e hā ha meʻa ʻe taha ʻoku fiemaʻu ke ke kamata fakahoko ke ke ofi ange ai ki he Fakamoʻuí? Te ke kamata fēfē nai ia?

Fakamatala Fakamahinó mo e Puipuituʻá

Ko hai ʻoku ou faitatau taha mo ia ʻi he talanoa ko ʻení: Saimone pe ko e fefiné?

Naʻe pehē ʻe Palesiteni Tieta F. ʻUkitofa, ʻi heʻene hoko kimuʻa ko ha mēmipa ʻo e Kau Palesitenisī ʻUluakí:

Ko hai ʻi he ongo meʻá ni ʻoku tau tatau taha mo iá?

ʻOku tau tatau nai mo Saimone? ʻOku tau vēkeveke mo fiemālie nai ʻi heʻetau ngaahi ngāue leleí, ʻo falala ki heʻetau angamāʻoniʻoní? ʻOku faʻa siʻi nai ke tau kātakiʻi ʻa kinautolu ʻoku ʻikai ke nau aʻusia ʻetau tuʻunga moʻuí? ʻOku puleʻi nai kitautolu ʻe ha tōʻonga tukupau, ʻo tau fakahoko e ngaahi ngāué, maʻu ʻetau ngaahi houalotú mo e fakatahá, mamao fiemohea ʻi he kalasi Tokāteline ʻo e Ongoongoleleí, pea mahalo vakaiʻi ʻetau telefoni toʻotoʻó lolotonga e houalotu sākalamēnití?

Pe ʻoku tau tatau mo e fefine ko ʻení, naʻá ne fakakaukau kuo mole kotoa pea ʻikai ha toe ʻamanaki koeʻuhí ko e angahalá?

ʻOku tau ʻofa lahi?

ʻOku mahino nai kiate kitautolu hotau moʻua ki he Tamai Hēvaní pea tau tautapa ʻaki e kotoa hotau laumālié ke maʻu e ʻaloʻofa ʻa e ʻOtuá?

ʻI heʻetau tūʻulutui ke lotú, ʻoku fakataumuʻa nai ia ke fakalau ai e ngaahi lelei lahi ʻo ʻetau anga māʻoniʻoní, pe ʻoku fai ia ke vete ai ʻetau ngaahi fehalaākí, tautapa ke maʻu e ʻaloʻofa ʻa e ʻOtuá, pea tō mo ha loʻimata ʻo e houngaʻia koeʻuhí ko e palani fakaofo ʻo e huhuʻí?

He ʻikai ke lava ʻo fakatau e fakamoʻuí ia ʻaki e talangofuá pē; ʻoku fakatau ʻaki ia e taʻataʻa ʻo e ʻAlo ʻo e ʻOtuá [vakai, Ngāue 20:28 ].

(Dieter. F. Uchtdorf, “Ko e Meʻaʻofa ʻo e ʻAloʻofá,” Ensign pe Liahona, Mē 2015, 109)

Ko e hā ʻoku mahuʻinga ai ke fakatomala fakaʻahó?

Naʻe fakamatala ʻe Palesiteni Lāsolo M. Nalesoni ʻo pehē:

ʻOku hala ha meʻa ʻe toe fakatauʻatāina ange, fakaʻeiʻeiki ange, pe toe mahuʻinga ange ki heʻetau fakalakalaka fakafoʻituituí ka ko e tokanga fakaʻaho maʻu pē ki he fakatomalá. Ko e fakatomalá ʻoku ʻikai ko ha meʻa pē ʻoku hoko; ka ko ha ngāue. Ko e kī ia ki he fiefiá mo e nonga ʻo e ʻatamaí. Ko e taimi ʻoku fakatahaʻi ai mo e tuí, ʻoku malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí.

(Russell M. Nelson, “Te Tau Lava ʻo Fai Lelei Ange pea Toe Lelei Ange” Ensign pe Liahona, Mē 2019, 67).

Ngaahi ʻEkitivitī Fakalahi ki he Akó

Fetongitongi e teuteu ʻa e tokotaha akó mo e kamataʻanga ʻo e lēsoní

Kimuʻa pea akoʻi e lēsoní, fakakaukau ke fakaafeʻi e kau akó ke nau fakakaukau ki he meʻa angaʻofa taha kuo fai ʻe ha taha maʻanautolu. Fakaafeʻi kinautolu ke nau fakakaukau ki he ongo ne nau maʻu ki he tokotaha ko ʻení pea mo e meʻa ne nau fakahoko ke fakahaaʻi ʻaki ʻenau houngaʻiá. Te nau lava ʻo kole ki he kau mēmipa ʻo e fāmilí pe ngaahi kaungāmeʻá ke nau vahevahe foki mo e ngaahi meʻa kuo nau aʻusiá. ʻE lava ke vahevahe ʻe he kau akó ʻa e ngaahi aʻusia ko ʻení ʻi he kamataʻanga ʻo e lēsoní ke tokoni ke nau ongoʻi ʻa e mahuʻinga ʻo e moʻoni ko iá ko e taimi ʻoku fakamolemoleʻi ai kitautolu mei heʻetau ngaahi angahalá, ʻoku loloto ange ai ʻetau ʻofa ki he Fakamoʻuí.

Ngaahi potufolofola ke fakaloloto e mahino ʻa e kau akó

Ke tokoni ke mahino lelei ange ki he kau akó ʻa e foʻi moʻoni ko iá ko e taimi ʻoku fakamolemoleʻi ai kitautolu mei heʻetau ngaahi angahalá, ʻoku loloto ange ai ʻetau ʻofa ki he Fakamoʻuí, ʻe lava ke kole ange ke nau ako ha niʻihi pe kotoa ʻo e ngaahi potufolofola ko ʻení: Loma 2:4 ; Loma 5:8 ; 1Sione 4:19 ; ʻĪnosi 1:1–11 ; pea mo e Mōsaia 27:23–37 .