Mātiu 8; Maʻake 2-4; Luke 7
Vakai Fakalūkufuá
Naʻe fakahaaʻi ʻe Sīsū ha mālohi lahi mo e manavaʻofa ʻi he ngaahi mana naʻá Ne fakahokó, kau ai hono fokotuʻu ha foha ʻo ha uitou meí he maté mo fakamoʻui ha tangata mahaki tete. Naʻá Ne lolomi foki ʻa e matangí ʻi he Tahi Kālelí mo fakamolemoleʻi ʻa e ngaahi angahala ʻa ha fefine naʻá ne fakahaaʻi ʻene houngaʻiá ʻaki ʻene fufulu mo tākai Hono vaʻé.
Teuteu ke Akoʻi
ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.
Mātiu 8; Luke 7:11–17
Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke fakamālohia ʻenau tui ki he mālohi ʻo Sīsū Kalaisí ke fakahoko ha ngaahi mana ʻi hotau kuongá pea ʻi heʻenau moʻuí.
-
Teuteu ʻa e tokotaha akó: Fakaafeʻi e kau akó ke nau fehuʻi ki he kau mēmipa ʻo e fāmilí pe kaungāmeʻá pe ko e hā ha ngaahi meʻa ne hoko ʻi heʻenau moʻuí pea ʻi he Siasí ʻoku nau pehē ko ha ngaahi mana. Fakamanatu kiate kinautolu neongo ʻoku ngali fakaofo ha ngaahi mana, ka ʻoku ʻi ai ha niʻihi ʻoku ʻikai fakatokangaʻi.
-
Vitiō: “Uitou ʻo Neiní” (2:22)
-
Fokotuʻu ki hono akoʻi ʻo e konifelenisi vitioó: Fakakaukau ke tuku ʻa e kau akó ʻi he fanga kiʻi loki iikike ʻoange ha faingamālie ke nau vahevahe ai ha niʻihi ʻo e ngaahi mana naʻa nau teuteu ke vahevahe ʻi he ʻekitivitī teuteu ʻa e tokotaha akó.
Maʻake 2:1–12
Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke fakatupulaki ʻenau mahino ʻe lava ke fakamoʻui ʻe he Fakamoʻuí ʻa e faʻahinga kotoa pē ʻo e ngaahi vaivaí.
-
Teuteu ʻa e tokotaha akó: Fakaafeʻi e kau akó ke nau fakakaukau ki ha aʻusia naʻe maʻu ai ʻe ha taha ʻoku nau ʻilo ha tāpuaki naʻe fiemaʻu meí he Fakamoʻuí. Naʻe uesia fēfē ʻe he tāpuaki ʻo e tokotaha ko ʻení ʻa e kakai kehé, hangē ko e ngaahi kaungāmeʻá mo e kau mēmipa ʻo e fāmilí? Kole ki he kau akó ke nau fakakaukau ki he meʻa ne nau ako ʻi heʻenau mamata ki he meʻa naʻe fai ʻe he Fakamoʻuí maʻá e tokotaha ko iá.
Luke 7:36–50
Taumuʻa ʻo e lēsoní: ʻE tokoniʻi ʻe he lēsoni ko ʻení ʻa e kau akó ke nau ngāueʻaki ʻa e tui kia Sīsū Kalaisí mo fakatomala mei heʻenau ngaahi angahalá.
-
Teuteu ʻa e tokotaha akó: Fakaafeʻi e kau akó ke nau lau ʻa e Luke 7:36–50 pea fakakaukau ki he ngaahi fehuʻi ko ʻení meí he Haʻu, ʻo Muimui ʻIate Au—Maʻáe Fakafoʻituituí mo e Ngaahi Fāmilí : Fuakava Foʻou 2023:: “Fakalaulauloto ki he founga ʻokú ke tatau ai mo e fefine naʻe fakamatalaʻi ʻi he Luke 7:36–50. Ko e fē nai e taimi kuó ke aʻusia ai e ʻofa ongoʻingofua mo e ʻaloʻofa naʻe fakahā ʻe he Fakamoʻuí ki he fefiné ni? Ko e hā ʻokú ke ako mei heʻene sīpinga ʻo e tuí, ʻofá, mo e loto fakatōkilaló?” (“Fepueli 27–Māʻasi 5. Mātiu 8; Maʻake 2–4; Luke 7: ʻKuo Fakamoʻui Koe ʻe Hoʻo Tuíʻ”).
-
ʻĪmisí: Teuteu ke fakaʻaliʻali ʻa e fakatātā ʻoku maʻu ʻi he kamataʻanga ʻo e lēsoní.
-
Vitiō:“ Ko ʻEne ʻAloʻofá—ʻOku ʻIkai Nai Ke u Lava ʻo Fakahaofi Au?” (6:25). Fakapapauʻi ke tomuʻa mamataʻi e vitiō ko ʻení ke fakapapauʻi pe ʻe feʻunga e kaveinga mo e ngaahi tefito ne aleaʻí ki he kau ako ʻi hoʻo kalasí.
-
Fokotuʻu ki hono akoʻi ʻo e konifelenisi vitioó:Lolotonga hoʻo laue ngaahi veesi ʻi he Luke 7, fokotuʻu hoʻo screen ki he “Gallery View” ke ke lava ʻo sio ki he kalasí kotoa. Fakaafeʻi ʻa e tokotaha ako naʻá ne lau ʻa e veesi kimuʻá ke tuhu ki ha huʻunga pau. Ko e fē pē ʻa e tokotaha ako ʻoku tuhu ki ai ʻi hoʻo screen, ʻe lava ke kole ange ke ne lau ʻa e veesi hono hokó.
Mātiu 8:23–27; Maʻake 4:35–41
Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau maʻu ʻa e melino mo e nonga ʻa e Fakamoʻuí lolotonga e ngaahi faingataʻa ʻoku nau fehangahangai mo iá.
-
Teuteu ʻa e tokotaha akó: Fakaafeʻi e kau akó ke fakakakato e ʻekitivitī ʻi he “Mātiu 8:23–27; Maʻake 4:35–41: ʻOku maʻu ʻe Sīsū Kalaisi ʻa e mālohi ke ʻomi ʻa e melinó ʻi he lotolotonga ʻo e ngaahi matangi mālohi ʻo e moʻuí,” ʻoku maʻu ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2023. Fakaafeʻi e kau akó ke nau haʻu mateuteu ke vahevahe ʻenau ngaahi fakakaukaú. Te nau lava ʻo kole ki he kau mēmipa ʻo e fāmilí pe ngaahi kaungāmeʻá ke nau kau fakataha mo kinautolu ʻi he ʻekitivitī ko ʻení.
-
Nāunau maʻá e kau akó: Fakapapauʻi ʻoku maʻu ʻe he kau akó ha ngaahi meʻatohi mo ha tohinoa ako pe laʻipepa ke fakaʻaongaʻi lolotonga e ʻekitivitī fakakaukaulotoá.
-
Vitiō: ”Melino ‘Ia Kalaisi” (4:09)
-
Fokotuʻu ki hono akoʻi ʻo e konifelenisi vitioó: Fakaafeʻi e kau akó ke nau puke hake ki he meʻafaitā ʻa e ngaahi fakatātā naʻa nau taá koeʻuhí ke nau lava ʻo sio ki heʻenau ngaahi fakatātaá. Fakaafeʻi ha kau ako tokosiʻi ke nau fakamatala ki he kalasí e meʻa ne nau taá.
Ngaahi Fakamanatu ʻo e Fakataukei Fakatokāteliné Hono2
Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e ngaahi fakamoʻoni fakafolofolá mo e ngaahi kupuʻi lea mahuʻinga ki ha niʻihi ʻo e ngaahi potufolofola fakataukei fakatokāteline ʻo e Fuakava Foʻoú.
Fakatokangaʻi ange: Mahalo ʻe fiemaʻu ke akoʻi ha lēsoni fakataukei fakatokāteline ʻo fetongiʻaki e lēsoni fakamanatu ko ʻení. Vakai ki he taimitēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻotineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí.
-
Teuteu ʻa e tokotaha akó: Fakaafeʻi e kau akó ke nau fakalaulauloto ki he founga ʻe lava ke tokoniʻi ai kinautolu ʻi heʻenau moʻuí ʻi hono ʻiloʻi e ngaahi fakamoʻoni fakafolofolá mo e meʻa ʻoku nau akoʻí.
-
Laʻipepa tufa:Teuteu ke fakaʻaliʻali e lisi ʻo e ngaahi potufolofola fakataukei fakatokāteliné mo honau ngaahi kupuʻi lea mahuʻinga ʻoku fekauʻaki mo iá, pe tufa ia ki he kau akó ʻi ha laʻipepa tufa.
-
Nāunau maʻá e kau akó: Fakapapauʻi ʻoku maʻu ʻe he kau akó ha me’atohi, tohinoa ako, mo ha laʻipepa ke fakaʻaongaʻi ʻi he ʻekitivitī ʻo e kaati fakamanatú.
-
Fokotuʻu ki hono akoʻi ʻo e konifelenisi vitioó: Fakakaukau ke fakaʻaongaʻi e ngaahi vaʻinga ʻi he ʻinitanetí ʻe lava ke kau fakataha ai e kau akó. ʻE lava ke fakaʻaongaʻi ha ngaahi meʻangāue kehekehe ʻi he ʻinitanetí ke fakatauhoa ʻa e kupuʻi lea mahuʻingá mo e fakamoʻoni fakafolofolá, pe ʻe lava ke fakafonu ʻe he kau akó ʻa e ngaahi ʻekitivitī ʻoku ʻikai tohi ai ha meʻá.