Siviʻi Hono 2 Hoʻo Akó

Mātiu 3–7; Luke 3–6; Ma‘ake 1; Sione 2–4

ʻOku ʻi mui ʻa Sīsū mo ha falukunga kakai ʻoku tangutu ʻi muʻa ʻiate Ia.

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú, meʻa ʻokú ke akó, pea mo e tupulaki fakataautaha kuó ke aʻusia lolotonga hoʻo ako ki he Fuakava Foʻoú ʻi he taʻu ní.

Teuteu ʻa e tokotaha akó: Fakaafeʻi e kau akó ke nau fakakaukau ki heʻenau ngaahi feinga ke tekeʻi mo ikunaʻi e ʻahiʻahí ʻo fakafou ʻi he tui kia Sīsū Kalaisí.

Ngaahi ʻEkitivitī Ako ʻOku Ala Fakahokó

Ko e Muimui kia Sīsū Kalaisí

ʻOku fakataumuʻa ʻa e meʻa ʻokú ke ako mei he Fuakava Foʻoú ʻi he seminelí ke tokoniʻi koe ke ke haʻu kakato ange kia Sīsū Kalaisi pea hoko ko ʻEne ākonga, pe ko ʻEne tokotaha muimui. Fakahoko ha taha ʻo e ngaahi ʻekitivitī ʻe tolu ko ʻení, ʻo kumi e ngaahi tāpuaki ʻoku muimui mai ʻi he taimi ʻoku tau muimui ai ki he Fakamoʻuí ʻaki hono fakahoko ʻEne ngaahi akonakí. Hili ia pea tali ʻa e ongo fehuʻi ʻoku hoko maí.

Fili pe ko e fē ʻi he ngaahi ʻekitivitī ʻe tolu ko ʻení ʻe ʻaonga taha ki he kalasí, pea fakaafeʻi e kau akó ke nau fakahoko ʻa e ʻekitivitī ko iá. Fakapapauʻi ʻoku tuku ha taimi feʻunga ki he toenga ʻo e lēsoní.

1. Hivaʻi pe fanongo ʻi he foʻi hiva Palaimeli “Ko e Tangata Potó mo e Tangata Valé” (Tohi Hiva ʻa e Fānaú, 132), pea lau ʻa e Mātiu 7:24–27 .

2. Tā ha fakatātā faingofua ʻi ha laʻipepa pe ʻi hoʻo tohinoa akó ʻo e ngaahi akonaki ʻa e Fakamoʻuí ʻi he Mātiu 7:24–27 .

3. Fakaʻaongaʻi ha ʻū poloka pe ha ʻū ipu ke langa ha kiʻi fale faingofua pe faʻunga ʻi ha fakavaʻe mālohi, hangē ko e falikí pe funga tesí pe tēpilé. Langa leva ha faʻunga faingofua ʻe taha ʻi ha fakavaʻe ʻoku ʻikai loko fefeka, hangē ko ha mohenga, kafu kuo pelupelu, pe pilo. Ngāue ʻaki ho ongo nimá ke tekeʻi ki lalo ʻi he funga ʻo e faʻunga takitaha, pea fakatokangaʻi ʻa e meʻa ʻe hokó. Lau ʻa e Mātiu 7:24–27, ʻo kumi ki he ngaahi faitatau ʻi he ʻekitivitī ko ʻení mo e talanoa fakatātā ʻa e Fakamoʻuí.

• Ko e hā naʻá ke ako mei he ʻekitivitī ko ʻení?

• Ko e hā ha ngaahi tāpuaki te tau maʻu kapau te tau fakahoko ʻa e ngaahi akonaki ʻa e Fakamoʻuí?

Fakakaukau ki he tupulaki kuó ke aʻusia ʻi hoʻo ako mo feinga ke fakaʻaongaʻi e ngaahi akonaki ʻa e Fakamoʻuí mei he Fuakava Foʻoú ʻi he taʻu ní. Tali ha fehuʻi ʻe taha pe lahi ange ʻi he ngaahi fehuʻi ko ʻení:

• Ko e hā ha ngaahi akonaki ʻa Sīsū Kalaisi kuó ke ako ʻoku mātuʻaki mahuʻingamālie kiate koe?

• Ko e hā ha ngaahi founga kuó ke toe ofi ange ai ki he Fakamoʻuí ʻi hoʻo ako ʻEne folofolá?

• Ko e hā ha ngaahi akonaki kuó ke ako he taʻú ni kuó ke lava ʻo fakaʻaongaʻi ʻi hoʻo moʻuí? Ko e hā ha ngaahi tāpuaki kuó ke aʻusia ko ha ola ʻo hoʻo fakahoko iá?

ʻE tokoni atu e lēsoni ko ʻení ke ke vakaiʻi ha ngaahi founga ʻe niʻihi ʻokú ke langa ai hoʻo moʻuí ʻi he maka ʻo Sīsū Kalaisí kae lava ke ke matuʻuaki e ngaahi faingataʻa ʻe ala hoko maí.

Ko e toenga ʻo e lēsoní ‘oku toʻo ia mei he ngaahi lēsoni ko ʻení:

• Mātiu 3:1–12; Ma‘ake 1:1–8

• Luke 3:7–14

• Mātiu 4:1–11, Konga 1

• Mātiu 4:1–11, Konga 2

• Sione 3:1–8

• Mātiu 6:1–18

Kapau naʻe fakahoko ha ngaahi liliu ki he ngaahi lēsoni ko ʻení, pe kapau naʻe ʻikai akoʻi ʻa e ngaahi lēsoni ko ʻení, ‘e ngali fiemaʻu ke liliu ʻa e ngaahi ʻekitivitī ko ʻení ke feʻunga mo ia.

Fakamatalaʻi ʻa e mahuʻinga ʻo e fakatomalá, papitaisó, mo e hilifakinimá

Fakakaukau ke fakaafeʻi e kau akó ke nau fakatulamaʻi tautau toko ua pe fakakulupu iiki ʻa e ʻekitivitī ko ʻení.

ʻE lava ke tokoni atu ʻa e ʻekitivitī ko ʻení ke ke fakafuofuaʻi ʻa e tuʻunga hoʻo mahinó mo lava ke fakamatalaʻi ʻa e tokāteline ʻa e Fakamoʻuí ki he fakatomalá, papitaisó, mo e hilifakinimá. Fakakaukau ki he ongo fakamatala ko ʻení, pea hiki ha tali ki he fakamatala takitaha ke tokoni ke fakaleleiʻi ʻa e hohaʻa ʻoku hā hení. Fakaʻaongaʻi ha potufolofola ʻe taha pe lahi ange mei hoʻo ako fakamuimuitahá. ʻE ala tokoni ʻa e ngaahi fakamoʻoni fakafolofola ‘oku ʻi he haʻí. Ongoʻi tauʻatāina ke fakakau ha faʻahinga aʻusia pe fakamoʻoni fakatāutaha.

1. Ko ha tokotaha lelei ‘aupito au. Ko e hā ʻoku totonu ai ke u hohaʻa ki he fakatomalá kapau ʻoku ʻikai ke u fakahoko ha ngaahi angahala lalahi? (Vakai, Mātiu 3:1–8 ; Luke 3:7–14 .)

2. ʻOku ou tui kia Sīsū Kalaisi, ka ʻoku ʻikai ke u tui ʻoku fiemaʻu ke papitaiso mo hilifakinima au ke u foki ʻo nofo mo e ʻOtuá. (Vakai, Ma‘ake 1:1–9 ; Sione 3:5 ; 2 Nīfai 31:5–12, 17–18 .)

ʻI hono vahevahe ʻe he kau akó ʻenau ngaahi talí, vakaiʻi pe ʻoku mahino fēfē nai kiate kinautolu ʻa e tokāteline ʻo e fakatomalá, papitaisó, mo e hilifakinimá. Kapau ʻe fiemaʻu, kole ki ha niʻihi ʻo e kau akó ʻoku ngali mahino lelei kiate kinautolu ʻa e tokāteliné ke vahevahe ʻenau fakamatalá, mo e ngaahi fakamoʻoni fakafolofola ne nau ngāue ʻakí mo e kotoa ‘o e kalasí.

Siviʻi hoʻo malava ke tekeʻi mo ikunaʻi ʻa e koví ʻo fakafou ʻi he tui kia Sīsū Kalaisí

ʻOku tuʻu ʻa Kalaisi ʻi ha feituʻu makamaka ʻi Heʻene valokiʻi ʻa Sētane ʻoku ʻasi hake mei laló. ʻOku fakahaaʻi ʻe he tā valivalí ʻa e meʻa naʻe hoko ʻa ia naʻe feinga ai ʻa Sētane ke ʻahiʻahiʻi ʻa Kalaisi hili e ʻaho ʻe fāngofulu ʻo e ʻaukai ʻa Kalaisi ʻi he feituʻu maomaonganoá. ʻOku fekauʻi ʻe Kalaisi ʻa Sētane ke mavahe mei Hono ʻaó.

Naʻá ke toki ako kimuí ni fekauʻaki mo hono tekeʻi ʻe he Fakamoʻuí ʻa e ngaahi ʻahiʻahí pea ke maʻu ha faingamālie ke faʻu ha palani ke muimui ki Heʻene sīpingá mo falala kiate Ia ʻi hoʻo fehangahangai mo ho ngaahi ʻahiʻahí. (‘E ala tokoni ke toe vakaiʻi ʻa e Mātiu 4:1–11 mo e meʻa naʻá ke hiki ʻi hoʻo tohinoa akó ki he lēsoni ko iá.)

Ke tokoni ki hoʻo siviʻi e founga kuó ke fakaʻaongaʻi ai e meʻa naʻá ke akó, fakaʻaongaʻi ha ngaahi miniti siʻi ke fakalaulauloto ai ki hoʻo ngaahi feinga ke muimui ki he sīpinga ʻa e Fakamoʻuí pea falala kiate Ia ke fakafepakiʻi ʻa e ʻahiʻahí. (ʻE lava ke kau heni ʻa e ngaahi potufolofola kuó ke feinga ke manatuʻi pe ako maʻulotó.) Fakakaukau ki he meʻa kuó ke ako mei hoʻo aʻusiá ʻi hoʻo vakai ki he tūkunga ko ʻení:

Fakakaukauloto ki hao kaungāmeʻa kuo fāinga ke tekeʻi ʻa e ʻahiʻahi ke sio ponokalafí. Kuó ne feinga ke toʻo ʻa e ʻahiʻahí ʻaki ʻa e ʻikai ke ne fakaʻaongaʻi e ʻinitanetí ʻi he taimi ʻokú ne toko taha aí pea ʻikai tuku ʻene telefoní ʻi hono lokí ʻi he poʻulí. Naʻá ne aʻusia ha ngaahi lavameʻa lahi ʻo laulau ʻaho ka naʻá ne tukulolo ki he ʻahiʻahí kimui ange ai. Naʻá ne fuʻu loto-mamahi ʻaupito ʻo ne lava ai ʻo fakaʻehiʻehi mei he ponokalafí ʻo lava ha ngaahi ʻaho kimuʻa peá ne toe tukulolo peé. ʻOkú ne fiemaʻu ha toe ngaahi fakakaukau mo e tokoni lahi ange ke fakaʻaongaʻi e mālohi ʻo e Fakamoʻuí ke tekeʻi ʻaki e ʻahiʻahi ko ʻení.

Fakakaukau ke fakahoko fakakalasi ʻa e ʻekitivitī ko ʻení. Kole ki ha taha ako ke ne vahevahe ha meʻa ʻaonga te ne talaange ki he kaungāmeʻa ko ʻení. Fakaafeʻi leva ʻa e tokotaha ako ko iá ke ne fili ha mēmipa ʻe taha ʻo e kalasí ke ne vahevahe ha fakakaukau ʻe ala tokoní. ʻE lava ke hokohoko atu e feuiaki ʻa e kau akó ke nau fevahevaheʻakí, pe ‘e lava ‘e he niʻihi fakafoʻituituí ‘o hiki honau nimá ke kau mai. Kapau ʻe fiemaʻu, vahevahe mo e kalasí ʻa e meʻa ʻe ala lea ʻaki pe ongoʻi ʻe he kaungāmeʻá ʻi heʻene talí.

Fai ha kiʻi tohi ki ho kaungāmeʻá kae ʻoua ʻe vahevahe hoʻo ngaahi ʻahiʻahi pau ʻaʻaú. Fakakau mai ha meʻa ʻe ua pe lahi ange mei he ngaahi meʻá ni ʻi hoʻo talí:

• ko ha meʻa kuó ke fakahoko ke tafoki ai ki he ʻEikí ʻa ia kuó ne tokoniʻi koe ke ke ikunaʻi ʻa e ʻahiʻahí

• meʻa ʻokú ke ʻilo fekauʻaki mo Sīsū Kalaisi ʻa ia ʻe lava ke tokoniʻi ho kaungāmeʻá ke ne ongoʻi ʻoku ʻofaʻi mo fakaʻaiʻai ia ke hokohoko atu ʻene tekeʻi ʻa e ʻahiʻahí

• meʻa ʻokú ke fokotuʻu atu ke fakahoko ʻe hoʻo kaungāmeʻá ke muimui ki he sīpinga ʻa e Fakamoʻuí pea falala kiate Ia ke tekeʻi ʻa e ʻahiʻahí

• ko e hā ha ngaahi lavameʻa mo ha ngaahi faingataʻa ʻe ala fehangahangai mo ho kaungāmeʻá ʻi heʻene laka atu ki muʻá mo faleʻi ki he founga ke falala ai ki he ʻEikí ʻi heʻene fehangahangai mo kinautolú

Fakakaukau ki he founga ʻe ala tokoniʻi fakatāutaha ai koe ʻe he ʻekitivitī ko ʻení. Ko e hā e meʻa te ke fie fakahoko ke hokohoko atu ai hono tekeʻi mo ikunaʻi e ʻahiʻahí ʻaki e mālohi ʻia Sīsū Kalaisí? Kapau ʻokú ke ongoʻi loto-foʻi pe puputuʻu, fakakaukau ke ke lotua hoʻo ngaahi hohaʻá mo e ngaahi ongo ʻokú ke maʻú. ʻE ala tokoni foki ka ke ka talanoa mo ha mātuʻa pe ko ha pīsope. ʻOua naʻa siva hoʻo ʻamanakí ʻi hoʻo feinga ke langa hoʻo moʻuí ʻi he Fakamoʻuí mo ʻEne ngaahi akonakí.

Fakakaukau ki hoʻo holi ke moihū fakamātoato mo muimui ki he ʻOtuá

Ko e tefitoʻi moʻoni fakaʻosi ʻe taha ke fakakaukau ki aí ko hoʻo holi ke moihū fakamātoato ki he ʻOtuá pea muimui kia Sīsū Kalaisí. Naʻá ke ako ʻi ha lēsoni kimuʻa, kapau te tau fakahoko ha ngaahi ngāue māʻoniʻoni ke fakahōifua ki he Tamai Hēvaní, te Ne totongi fakahā kiate kitautolu (vakai, Mātiu 6:1–6; 16–18). ʻI hoʻo ako e moʻoni ko ʻení, mahalo naʻá ke mei fakafonu ha saati naʻe fōtunga peheni:

Ko e hā ha ngaahi ngāue lelei ʻe tolu kuó ke fakahoko he uike kuo toki ʻosí? (Lisi ha meʻa ʻe taha ʻi he ʻotu.)	Ko e hā hoʻo ngaahi ʻuhinga ki hono fakahoko kinautolú?	Ko e hā hoʻo ongó ʻi he hili hoʻo fakahoko ʻa e “ngaahi ngāue lelei” ko ʻení?

Fakakaukau ke tānaki atu ki he sātí ha ngāue lelei ʻe taha pe ua kuó ke fakahoko talu mei he lēsoni ko iá mo tali ʻa e ngaahi fehuʻi vakaiʻí ʻi he sātí. Fakalaulauloto pe kuó ke lava ʻo tokanga taha fakamātoato ange ki he ʻOtuá.

• Kapau naʻe ongoʻi ʻe ha taha naʻá ne faingataʻaʻia ke fakahoko ha ngaahi ngāue lelei ke fakahōifua ki he ʻOtuá, ko e hā ha faleʻi te ke ʻoange kiate ia?

Fakafanongo fakalelei ki he ngaahi tali ʻa e kau akó. Muimui ʻi he tataki ʻa e Laumālie Māʻoniʻoní ke tānaki atu ha faleʻi, ngaahi aʻusia, mo ha fakamoʻoni.