‘Oku Akoʻi ‘e he Fakamoʻuí ‘Ene Kau Ākongá ke Fai ha Ngaahi Ngāue Lelei
ʻĪmisi
Ko e malanga ʻa Sīsū Kalaisi ki ha kakai tokolahi. ʻOku ʻafio ʻa Kalaisi ʻi ha tafamoʻunga makamaka. ʻOkú Ne tui ha pulupulu lanu kulokula mo pulū. ʻOku hiki Hono toʻukupu ʻe taha ki ʻolunga. Ko ha niʻihi ʻo e kakaí ʻoku nau kūnima ʻi ha fakataha lotu.
Naʻe hoko atu ʻe Sīsū ʻEne Malanga ʻi he Moʻungá, ʻo akoʻi ʻoku totonu ke tau fakahoko ha ngaahi ngāue lelei ke fakahōifua ki heʻetau Tamai Hēvaní pea ʻoua ʻe tohoakiʻi e tokanga mei he kakai kehé. Te ke maʻu ʻa e faingamālie ʻi he lēsoni ko ʻení ke vakaiʻi hoʻo ngaahi taumuʻa ki hono fakahoko e ngaahi ngāue leleí pea fili ʻa e founga ke ke fakalakalaka aí.
Ko hono ʻiloʻi mo maʻu ha mahino ki he tokāteline ʻo Kalaisí. Tokoni ke “ʻilo pea mahino” ʻa e tokāteline ʻo Kalaisí ki he kau akó. Ko e ʻiloʻí mo e maʻu ha mahinó “ko e poto ia ki he ʻatamaí mo e lotó.” ʻI he taimi ʻe fakamoʻoniʻi ai ʻe he Laumālié ʻa hono moʻoni ʻo ha tefitoʻi moʻoni ʻo e ongoongoleleí, ʻe ngali ke “ongoʻi ange ʻe he kau akó ʻa hono moʻoni ʻo e tefitoʻi moʻoni ko iá pea kamata ke nau sio lelei ange, holi lahi ange, pea mahino kakato ange ki honau lotó ʻa e ngaahi ngāue ʻo e tefitoʻi moʻoni ko iá ʻi heʻenau moʻuí.” (Kim B. Clark, “Deep Learning and Joy in the Lord” [lea naʻe fakahoko ʻi he fakamafola ako fakataʻu ʻa e Seminelí mo e ʻInisititiuti Fakalotú, 13 Sune 2017])
Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi taumuʻa ʻo ʻenau ngaahi tōʻonga ʻi he houa ʻe 24 kimuʻa ʻi he kalasí.
Ngaahi ʻEkitivitī Ako ʻOku Ala Fakahokó
Fakatokangaʻi ange: ʻE akoʻi ʻa e Lotu ʻa e ʻEikí mo e ngaahi potufolofola ʻoku fekauʻaki mo iá ( Mātiu 6:9–15) ʻi ha lēsoni ʻamui ange ʻoku fakatefito ʻi he Luke 11 .
Ko ʻetau ngaahi taumuʻá
Fakakaukau ki he fakamatala ko ʻení: Naʻe fakaleleiʻi ʻe Kasitavo e ʻā ‘o hono kaungāʻapí.
Fakakaukau ke tā ʻi he palakipoé ha fakatātā faingofua ‘o ha tokotaha ʻokú ne pukepuke ha hāmala. Hiki ʻa e fakamatalá ʻi he palakipoé ʻo ofi ki he fakatātaá.
ʻĪmisi
Fakatātā ʻo ha tokotaha ʻokú ne pukepuke ha hāmala
Ko e hā hoʻo fakakaukau kia Kasitavó?
Tamateʻi ʻa e piliote ʻi he fakaʻosinga ʻo e “Naʻe fakaleleiʻi ʻe Kasitavo ʻa e ʻā ʻo hono kaungāʻapí,” pea tohi ʻa e koeʻuhí … ʻi he fakaʻosinga ʻo e fakamatalá. Kole ki he kau akó ke nau fakakakato e fakamatalá ʻaki ha ngaahi ʻuhinga kehekehe ‘e malava ai ke fakaleleiʻi ʻe Kasitavo ʻa e ʻaá. ‘E malava ke kau ʻi he ngaahi talí e ngaahi kupuʻi lea hangē ko e “ʻokú ne angaʻofa,” “naʻá ne kau ʻi ha ngāue tokoni naʻe fekau ia ʻe heʻene faʻeé ke ʻalu ki ai,” “naʻá ne feinga ke saiʻia ai e ʻofefine ʻo hono kaungāʻapí,” “naʻe ʻikai ke ne loto ke haʻu e kulī hono kaungāʻapí ki hono ʻapí,” pea mo e “naʻá ne maumauʻi e ʻaá ʻi ha ʻita lahi pea fekau ia ʻe heʻene tamaí ke ne fakaleleiʻi ia.”
Ko e hā ʻoku mahuʻinga ai ʻetau ngaahi taumuʻá?
ʻOku tau lau ʻi he Mātiu 6 naʻe hoko atu ʻe he Fakamoʻuí ʻEne Malanga ʻi he Moʻungá pea akonaki fekauʻaki mo e ngaahi taumuʻa ki hono fakahoko ʻo e ngaahi ngāue leleí. Fakahoko e ʻekitivitī ko ʻení ke tokoniʻi koe ke ke fakakaukau ki he ngaahi ʻuhinga ʻokú ke fakahoko ai ha ngaahi ngāue lelei hangē ko e ngāue fakaetauhí, tokoniʻi e niʻihi kehé, lotú, mo e ʻalu ki he seminelí.
Faʻu ha saati kōlomu-tolu ʻi hoʻo tohinoa akó. Fakafonu ʻa e konga taupotu ki ʻolunga ʻo e sātí ʻo hangē ko ʻení:
Fakaʻaliʻali e saati ko ʻení ʻi he palakipoé. Fakaafeʻi e kau akó ke hiki ʻi heʻenau sātí ʻenau tali ki he ngaahi fehuʻi ʻi ʻolunga ʻi he sātí.
Ko e hā ha ngāue lelei ʻe tolu kuó ke fakahoko ʻi he uike ne toki ʻosí? (Lisi ha meʻa ʻe taha ʻi he ʻotu.)
Ko e hā hoʻo ngaahi ʻuhinga ki hono fakahoko iá?
Naʻá ke ongoʻi fēfē nai ʻi he hili hoʻo fakahoko e ngaahi ngāue lelei ko ʻení?
Lau e Mātiu 6:1–6, 16–18, ʻo kumi e meʻa naʻe akoʻi ʻe he Fakamoʻuí fekauʻaki mo ʻetau ngaahi taumuʻa ki heʻetau ngaahi ngāue angatonú. Ko e foʻi lea foaki ʻoku ʻuhinga ia ki he “ngaahi ngāue ʻo e līʻoa fakalotú” veesi 1, ), hangē ko e foaki ki he masivá. Ko e foʻi lea mālualoi ʻoku ‘uhinga ia kiate kinautolu ʻoku “fakangalingalí” ( veesi 2, ).
Te ke fakamatalaʻi fakanounou fēfē nai ʻa e meʻa naʻe akoʻi ʻe he Fakamoʻuí?
Fakaafeʻi e kau akó ke nau fakamatalaʻi fakanounou e meʻa ne nau laú pea ‘eke ha faʻahinga fehuʻi pē ne nau maʻu. ʻI hono fakamatalaʻi fakanounou ʻe he kau akó, ʻe malava ke nau fakahā ʻa e ngaahi tefitoʻi moʻoni hangē ko ʻení: Kapau te tau fakahoko ha ngaahi ngāue angatonu ke fakahōifua ki he Tamai Hēvaní, te Ne finangalo lelei ke fakapaleʻi kitautolu. Kapau te tau fakahoko ha ngaahi ngāue angatonu ke mamata ki ai e niʻihi kehé, he ʻikai ke tau maʻu ha ngaahi tāpuaki fakalangi ʻi heʻetau ngaahi ngāué.Fakaafeʻi e kau akó ke nau hiki ʻi he palakipoé ʻa e ngaahi tefitoʻi moʻoni ne nau maʻú.
ʻOku mahuʻinga ke mahino ʻoku ʻikai hala ʻa e lotu ʻi he kakai tokolahí koeʻuhí ko e ʻikai fakahoko ia “ʻi he liló” ( Mātiu 6:6). ʻE lava ke fakahoko ʻa e lotú mo e ngaahi ngāue fakalotu kehé ʻi he haʻohaʻonga ʻo e kakaí kapau ʻoku fakahoko ia ʻi he loto-fakamātoato, māteaki, mo ha holi ke fakalāngilangiʻi ʻa e ʻOtuá. ʻOku toe moʻoni foki ʻeni fekauʻaki mo e ʻaukaí. ʻOku ʻuhinga ʻa e ongo kupuʻi lea “fakamatapekó” mo e “ʻoku nau fakakehe honau matá” ʻi he Mātiu 6:16 ki he niʻihi fakafoʻituitui ʻi he kuonga ʻo Sīsuú naʻa nau fakahā ki tuʻa ʻenau ʻaukaí ke tohoakiʻi ʻa e tokangá kiate kinautolu.
ʻOkú ke pehē ko e hā ʻoku fuʻu tokanga ai e ʻEikí ki heʻetau ngaahi taumuʻá, ʻo aʻu ai pē ki he taimi ʻoku tau fakahoko ai ha ngaahi ngāue angatonú?
Toe vakai ki hoʻo sātí pea fakafehoanaki hoʻo ngaahi ʻuhinga ki he ngaahi ngāue lelei kuó ke fakahokó ki he meʻa naʻe akoʻi ʻe he Fakamoʻuí ʻo hangē ko ia ʻoku lekooti ʻi he Mātiu 6 .
ʻOkú ke pehē ko e hā ʻoku totonu ai ke ke “feinga ke tokoni koeʻuhí ko e ngaahi ʻuhinga ʻoku māʻolunga mo lelei tahá”? (Dallin H. Oaks, “Why Do We Serve?” Ensign, Nov. 1984, 13).
Kapau naʻe faingataʻaʻia ha taha ke fakahoko ha ngāue ʻi ha ngaahi ʻuhinga totonu, ko e hā te ke fokotuʻu ange ke nau fakahokó?
Naʻe akonaki ʻa Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí, fekauʻaki mo e ngaahi taumuʻa ʻa e Fakamoʻuí ʻi hono fakahoko ʻEne ngaahi ngāué. Mamata ʻi he foʻi vitiō “Ko e Fakamātoato Moʻoní” mei he taimi 15:34 ki he 16:29, pe lau ʻa e fakamatala ko ʻení.
ʻĪmisi
Tā fakaʻofisiale ʻo ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, 2006. Naʻe uiuiʻi ko e Tokoni Ua ʻi he Kau Palesitenisī ʻUluakí, ʻi he ʻaho 3 ʻo Fēpueli 2008. Tā fakaʻofisiale ʻi he 2008 ʻo fetongi e tā naʻe faitaaʻi ʻi he 2004.
Ko e tangata maʻongoʻonga tahá, lavameʻa tahá, lelei taha kuo ʻaʻeva he māmaní naʻe toe hoko pē ia ko e tangata angavaivai tahá. Naʻá Ne fakahoko e niʻihi ʻo ʻEne ngāue tokoni lelei tahá ʻi he ngaahi momeniti ne toko taha aí, pea ko e tokosiʻi pē naʻa nau ʻilo ki aí, pea naʻá Ne kole ange ke “ʻoua naʻa fakahā ki ha taha” ʻa e meʻa kuó Ne fakahokó [vakai, Luke 8:56 ]. Ko e taimi naʻe ui ai Ia ʻe ha taha ko e “leleí,” naʻe vave ʻEne ofeʻi e foʻi fakalāngilangi ko iá, ʻo ne vilitaki ke tala ko e ʻOtuá pē ʻoku lelei moʻoní [vakai, Maʻake 10:17–18 ]. Naʻe mahino ʻa e ʻikai mahuʻinga kiate Ia ʻa e fakalāngilangi ʻa e māmaní; ko ʻEne tefitoʻi taumuʻá pē ke tokoni ki Heʻene Tamaí mo “fai maʻu ai pē ʻa e ngaahi meʻa ʻoku lelei ai iá” [ Sione 8:29 ]. Te tau hoko ʻo lelei kapau te tau muimui ki he sīpinga ʻa hotau ʻEikí.
(Dieter F. Uchtdorf, “Ko e Fakamātoato Moʻoní,” Ensign pe Liahona, Mē 2015, 83)
Fakakaukau ki ha ngaahi sīpinga ʻoku nau fakatātaaʻi ʻa e ngaahi taumuʻa ʻa e Fakamoʻuí ki hono fakahoko ʻEne ngāué.
Ko e hā e meʻa ʻokú ke saiʻia ai ʻi he ngaahi sīpinga ko ʻení?
ʻOku fakatupulaki fēfē nai ʻe he ngaahi sīpinga ko ʻení hoʻo mahino ki he ʻofa ʻa e Fakamoʻuí mo e ʻuhinga naʻá Ne fakalelei ai maʻa ʻetau ngaahi angahalá?
Fakaʻaliʻali ʻa e ngaahi fehuʻi ko ʻení, pea fakaafeʻi e kau akó ke nau tali ia ʻi heʻenau ngaahi tohinoa akó.
ʻOkú ke ongoʻi fēfē nai fekauʻaki mo hoʻo ngaahi taumuʻa ki hono fakahoko ha ngaahi ngāue leleí?
Ko e hā e ngaahi founga ʻe lava ke tākiekina ai ʻe hoʻo ngaahi taumuʻa ki hono fakahoko ʻo e ngaahi ngāue leleí ʻa ho vā fetuʻutaki mo e Tamai Hēvaní?
Ko e hā ha meʻa ʻe taha te ke lava ʻo fakahoko ke muimui ai ‘i he sīpinga ʻa e Fakamoʻuí ʻi hono fakahoko e ngaahi ngāue leleí?
Fakaafeʻi ha niʻihi tokosiʻi ʻo e kau akó ke nau vahevahe ha meʻa ne nau tohi pe ongoʻi. Talaange ki he kau akó te nau maʻu ha faingamālie ʻi he lēsoni ka hokó ke nau vakaiʻi e founga kuo liliu ai ʻenau ngaahi taumuʻa ki hono fakahoko ha ngaahi ngāue leleí talu mei heʻenau ako e lēsoni ko ʻení. Fakakaukau ke fakahoko hoʻo fakamoʻoni ki he ngaahi tefitoʻi moʻoni naʻe akoʻi ʻi he lēsoni ko ʻení.
Fakamatala Fakamahinó mo e Puipuituʻá
Ko e hā ʻa e ngaahi ʻuhinga totonu ke tau tokoni aí?
Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻa e ngaahi ʻuhinga totonu ke ngāue tokoni aí:
ʻĪmisi
Tā fakaʻofisiale ʻo Palesiteni Dallin H. Oaks naʻe faitaaʻi ʻi Māʻasi 2018.
Naʻe akoʻi ʻe he palōfita ko Molonaí kapau ʻe lau ʻetau ngaahi ngāué ki he leleí, kuo pau ke fakahoko ia ʻi ha ngaahi ʻuhinga totonu. Kapau ko ha tangata “ʻokú ne foaki ha meʻaʻofa, pe lotu ki he ʻOtuá, ka ʻo kapau ʻoku ʻikai te ne fakahoko ia ʻi he loto-moʻoni ʻoku taʻeʻaonga ia kiate ia.
“He vakai, ʻoku ʻikai lau ia kiate ia ko e māʻoniʻoni.” ( Molonai 7:6–7 .) …
… ʻOku totonu ke hoko ʻetau ngāue tokoní ko e ‘ofa ki he ʻOtuá mo e ‘ofa ki he kāingá, kae ʻikai koeʻuhi ko ha lelei fakataautaha pe ko ha toe taumuʻa ʻoku māʻulalo ange.
(Dallin H. Oaks, “Why Do We Serve?” Ensign, Nov. 1984, 12, 14)
ʻE lava fēfē nai ʻe ha fakamoʻoni kia Sīsū Kalaisi mo ʻEne ongoongoleleí ʻo fakaʻaiʻai kitautolu ke tau fakahoko ha ngaahi ngāue lelei?
Naʻe akoʻi ‘e ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e “ivi fakaʻaiʻai mālohi taha ʻi heʻetau moʻuí”:
ʻĪmisi
Tā fakaʻofisiale ʻo ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, 2006. Uiuiʻi ko e Tokoni Ua ʻi he Kau Palesitenisī ʻUluakí, ʻaho 3 ʻo Fēpueli 2008. Tā fakaʻofisiale ʻi he 2008 ʻo fetongi e tā naʻe faitaaʻi ʻi he 2004.
Ko ʻetau ngaahi taumuʻá mo ʻetau ngaahi fakakaukaú te na iku tākiekina ʻetau ngaahi ngāué. Ko e fakamoʻoni ki he moʻoni ʻo e ongoongolelei kuo fakafoki mai ʻo Sīsū Kalaisí ko e ivi fakaʻaiʻai mālohi taha ia ʻi heʻetau moʻuí. Naʻe toutou fakamamafaʻi ʻe Sīsū ʻa e mālohi ʻo e ngaahi fakakaukau leleí pea mo e ngaahi taumuʻa totonú: “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē” ( T&F 6:36).
… ʻOku fakaʻaiʻai kitautolu heʻetau fakamoʻoní ke tau moʻui anga māʻoniʻoni, pea ʻe hanga ʻe he moʻui anga māʻoniʻoní ʻo fakatupu ha tupulaki ʻo mālohi ange ʻetau fakamoʻoní. …
… ʻOku fakaʻaiʻai kitautolu ʻe he fakamoʻoní ke tau fili ki he totonú ʻi he taimi kotoa pē pea ʻi he tūkunga kotoa pē. ʻOkú ne fakaʻaiʻai kitautolu ke tau toe ofi ange ki he ʻOtuá, ʻo fakaʻatā Ia ke Ne toe vāofi ange mo kitautolu (vakai, Sēmisi 4:8).
(Dieter F. Uchtdorf, “Ko e Mālohi ʻo ha Fakamoʻoni Fakafoʻituitui,” Ensign pe Liahona, Nōvema 2006, 37, 39)
Ngaahi ʻEkitivitī Fakalahi ki he Akó
Ko ha founga ʻe taha ke kamata ʻaki e lēsoní
Kimuʻa pea hū e kau akó ki he loki akó, fakakaukau ke hiki ʻi he palakipoé ʻa e fehuʻi ko ʻení: “Ko e hā ha ngaahi ʻuhinga ʻoku tokoniʻi ai ʻe he kakaí ʻa e niʻihi kehe?” Fakaafeʻi e kau akó ke hiki ʻenau ngaahi talí ʻi he palakipoé. Pea ʻai ke nau fakahokohoko ʻenau ngaahi ʻuhinga ki hono tokoniʻi e niʻihi kehé mei he lelei tahá ki he kovi tahá. Fakakaukau ke ʻeke ange ʻa e ngaahi fehuʻi ko ʻení: “Ko e hā ha meʻa naʻá ke toki fakahoko kimuí ni mai naʻe lelei? Ko e hā hoʻo taumuʻá ʻi hono fakahoko iá?”
Tānaki atu ki ha lisi ʻo e ngaahi ʻulungaanga fakalangí
ʻI ha lēsoni kimuʻa, ‘e malava ke kamata ʻaki ʻe he kau akó ha tohi ʻi he tohinoá naʻe kamata ʻaki ʻa e “ Mātiu 5–7 : Te u lava ʻo hoko lahi ange ʻo hangē ko e Tamai Hēvaní mo Sīsū Kalaisi ʻaki …” Fakakaukau ke fakaafeʻi kinautolu ke tānaki atu ki he fakamatala tohinoa ko ʻení ha faʻahinga fakakaukau ne nau maʻu mei he lēsoni ʻo e ʻaho ní.
