Marcos 5:21–24, 35–43

Si Jesukristo Miayo sa Anak ni Jairo

Jesus is smiling at the daughter of Jairus who was raised from the dead, her father is in the foreground and some disciples in the background.

Gibuhi ni Jesus ang anak nga babaye ni Jairo gikan sa pagkamatay. Ang katuyoan niini nga leksiyon mao ang pagtabang kanimo sa pagbaton og hugot nga pagtuo ug pagsalig kang Kristo sa mga panahon sa kahadlok ug walay kasigurohan.

Pagdasig sa mga estudyante nga magtinguha og mga personal nga espirituhanong kasinatian. Samtang magtudlo ka, dasiga ang mga estudyante nga palawmon ang ilang pagkakabig pinaagi sa pagtinguha sa ilang mga kaugalingong espirituhanong kasinatian. Sa panahon niini nga mga kasinatian, mahimo silang tudloan sa Ginoo pinaagi sa gahom sa Espiritu Santo.

Pag-andam sa estudyante: Dasiga ang mga estudyante nga memoryahon ang hugpong sa mga pulong nga “Ayaw kahadlok! Salig lang” ( Marcos 5:36). Awhaga sila nga pamalandongan kon sa unsang paagi makatabang kanila kini nga hugpong sa mga pulong sa mga panahon sa pagsulay.

Mga Posible nga Kalihokan sa Pagkat-on

Pagbaton og hugot nga pagtuo diha ni Jesukristo

Sa leksiyon karon, magtuon ka og dugang mahitungod sa pagbaton og hugot nga pagtuo kang Jesukristo bisan sa mga panahon sa walay kasigurohan ug kahadlok. Hunahunaa ang bisan unsa nga mga sitwasyon nga lagmit nga nagbuhat og walay kasigurohan o kahadlok sa imong kaugalingong kinabuhi. Paglista og usa o duha niini sa imong journal sa pagtuon.

Kumusta ang imong hugot nga pagtuo niini nga mga sitwasyon? Isulat ang imong mga hunahuna sa usa hangtod sa duha ka pamahayag.

Samtang magtuon ka niini nga leksiyon, paminaw sa mga pag-aghat gikan sa Espiritu nga makadasig kanimo nga magbaton og mas hugot nga pagtuo kang Jesukristo sa mga panahon sa walay kasigurohan o kahadlok.

Jairus coming to Jesus to heal his daughter.

Sa Marcos 5 , ang usa ka magmamando sa sinagoga sa Judeo nga gihinganlan og Jairo nag-atubang og panahon sa dakong walay kasigurohan ug kahadlok.

Basaha ang Marcos 5:22–24 , ug pangitaa kon unsa ang nasinati ni Jairus.

Ngano kaha nga gitinguha ni Jairo ang Manluluwas?

Samtang nagpadulong sila sa balay ni Jairo, ang usa ka babaye nga adunay problema sa dugo mihikap sa sinina sa Manluluwas ug naayo siya. Mihunong si Jesus aron makig-istorya ug hupayon kini nga babaye (tan-awa sa Marcos 5:25–34).

Unsa nga mga huna-huna ug mga pagbati kaha ang aduna si Jairo samtang gitan-aw niya ang Manluluwas nga nakig-istorya niini nga babaye?

Basaha ang Marcos 5:35–36 , ug pangitaa kon unsa ang sunod nga nahitabo.

Unsa nga kapilian ang aduna si Jairo sa dihang gisultihan siya nga patay na ang iyang anak nga babaye?
Sa unsang paagi kaha nga ang mga pulong sa Manluluwas sa bersikulo 36 nakatabang kang Jairo sa pag-atubang sa iyang kahadlok?
Unsa ang imong nahibaloan mahitungod kang Jesukristo nga makatabang kanimo sa pagsalig Kaniya, bisan sa mga panahon sa kahadlok?

Humna ang uban pang bahin sa asoy pinaagi sa pagbasa sa Marcos 5:37–43 , mangita sa milagro nga nasaksihan ni Jairo tungod kay gipili niya nga mosalig.

Sa unsang mga paagi mapalig-on niini nga asoy ang imong hugot nga pagtuo kang Jesukristo?

Mitambag kanato ang Ginoo nga dili kita angay mahadlok

Sa kinatibuk-an sa mga kasulatan gitambagan kita sa Ginoo nga “ayaw kahadlok, salig lang” ( Marcos 5:36). Pangita sa mga kasulatan o mga pamahayag sa kinatibuk-ang komperensya para sa mga kasulatan o mga kinutlo nga nagtambag kanato nga dili mahadlok. Mahimo nimong i-link o i-cross reference kini nga mga bersikulo ug mga pakigpulong sa komperensiya sa Marcos 5:36 .

Mahimong ilista sa mga estudyante ang mga kasulatan nga ilang nakita sa pisara. Ikonsiderar ang pagpaambit og personal nga kasinatian sa pagsunod sa pag-awhag sa Ginoo nga “ayaw kahadlok, salig lang.”

Ngano kaha nga kanunay man kitang tambagan sa Ginoo nga dili mahadlok?
Sa unsang paagi ka gipanalanginan sa pagsunod sa pag-awhag sa Ginoo nga “ayaw kahadlok, salig lang”?

Lagmit nga makabenepisyo ang mga estudyante gikan sa pagtubag sa mosunod nga mga pangutana sa ilang mga journal sa pagtuon. Ikonsiderar ang pagdapit sa andam nga mga estudyante nga ipaambit ang ilang mga tubag. Mahimo sab nga maayong oportunidad kini para sa mga estudyante aron magtaho sa pag-andam sa estudyante.

Unsa ang pipila ka mga sitwasyon sa imong kinabuhi diin mahimong isulti sa Ginoo kanimo nga, “Ayaw kahadlok! Salig lang”?
Unsa ang pipila ka aksyon nga mabuhat nimo aron mosunod sa awhag sa Manluluwas nga “ayaw kahadlok, salig lang”? Sa unsang paagi makatabang kanimo kana nga mga aksyon sa pag-atubang sa imong mga kahadlok?

Kon posible, pagdala og mga supply sa sining nga magamit sa mga estudyante sa paghimo og hulagway sa mosunod nga kalihokan. Mahimo sab nga magbuhat ang mga estudyante og digital nga hulagway.

Paghimo og hulagway gamit ang hugpong sa pulong nga “Ayaw kahadlok! Salig lang.” Mahimo usab kang maglakip og uban pang mga hugpong sa mga pulong gikan sa mga kasulatan o mga kinutlo nga imong nakita. Ibutang kini nga hulagway sa usa ka lugar diin makatabang kini kanimo sa paghinumdom nga mosalig kang Jesukristo ug dili mahadlok.

Komentaryo ug Background nga Impormasyon

Unsa ang hugot nga pagtuo kang Jesukristo?

Ang mosunod nga kinutlo gikan sa Mga Hilisgutan sa Ebanghelyo nagtudlo mahitungod sa hugot nga pagtuo kang Jesukristo:

Ang pagbaton og hugot nga pagtuo diha ni Jesukristo nangahulogan og pagsalig sa hingpit diha Kaniya—pagsalig sa Iyang walay kinutobang gahom, kahibalo, ug gugma. Naglakip kini sa pagtuo sa Iyang mga pagtulon-an. Nangahulogan kini sa pagtuo nga bisan og kita wala makasabot sa tanang mga butang, Siya nakasabot. Tungod kay Iyang nasinati ang tanan natong mga sakit, mga kasakit, ug mga kahuyang, Siya nakahibalo kon unsaon sa pagtabang kanato sa pagbarog labaw sa atong mga inadlaw nga kalisod.

(Gospel Topics [Mga Hilisgutan sa Ebanghelyo], “Faith in Jesus Christ [Hugot nga Pagtuo Kang Jesukristo],” topics.ChurchofJesusChrist.org)

Unsa ang makatabang kanato nga mosalig ug dili mahadlok?

Si Elder Neil L. Andersen sa Korum sa Napulog Duha ka Mga Apostoles mitudlo:

Si Jesus misulti sa lider sa sinagoga, “Ayaw kahadlok! Salig lang.” [ Mark 5:36 ]. Ang pagkadisipulo mao ang pagtuo Kaniya sa panahon sa kalinaw ug kalisdanan, dihang ang atong kasakit ug kahadlok mahupay lamang sa pagsalig nga Siya nahigugma nato ug motuman sa Iyang mga saad.

(Neil L. Andersen, “Unsay Hunahuna ni Kristo Kanako?,”Liahona, Mayo 2012, 113)

Ang mga hagit, mga kalisdanan, mga pangutana, mga pagduha-duha—kini mga kabahin sa atong mortalidad. Apan kita wala mag-inusara. Isip mga disipulo ni Ginoong Jesukristo, kita adunay dako kaayo nga espirituhanong mga pundohanan sa kahayag ug kamatuoran nga atong magamit. Ang kahadlok ug ang hugot nga pagtuo dili mag-uban sa atong mga kasingkasing sa samang higayon. Sa atong mga adlaw sa kalisud, kita mopili sa dalan sa hugot nga pagtuo. Miingon si Jesus, “Ayaw kahadlok, sumalig ka lamang” [ Marcos 5:36 ].

(Neil L. Andersen, “Kamo Igo nga Nasay[o]d,”Liahona, Nob. 2008, 14)

Unsa ang pipila ka mga paagi nga ang Ginoo makaayo kanato?

Si Presidente Dallin H. Oaks sa Unang Kapangulohan mitudlo:

Ang mga panalangin sa pagkaayo moabot sa daghang mga paagi, ang kada usa ipahiangay sa atong matag usa nga mga panginahanglan, nga nahibaloan Niya kinsa nahigugma kaayo kanato. Usahay ang “pagkaayo” nagtambal sa atong mga sakit o nagtangtang sa atong palas-anon. Pero usahay kita “nangaayo” sa dihang gihatagan kita og kalig-on o pagkamasinabuton o pagkamapailubon sa pagpas-an sa mga palas-anon nga gisangon kanato.

(Dallin H. Oaks, “Iyang Papahulayon ang Nag-antos,” Liahona, Nob. 2006, 7)

Dugang nga mga Kalihokan sa Pagkat-on

RebyohonDali, Sunod Kanako

Ikonsiderar ang pagrebyo kauban sa mga estudyante sa ideya sa pagtuon para sa Mateo 9:18–26; Marcos 5:22–43 diha sa Come, Follow Me—For Individuals and Families: New Testament [Dali, Sunod Kanako—Alang sa mga Indibidwal ug mga Pamilya] 2023. Awhaga ang andam nga mga estudyante nga ipaambit ang ilang mga kasinatian gikan sa ilang personal nga pagtuon.

Lagmit sab nga makatabang kon hisgotan ang pipila sa mga pamahayag sa seksiyon nga “Komentaryo ug Background nga Impormasyon” mahitungod sa pagbuntog sa kahadlok pinaagi sa hugot nga pagtuo sa Ginoo.

Hugot nga pagtuo ug kahadlok

Tabangi ang mga estudyante sa pagsabot nga dili mahimong magdungan ang hugot nga pagtuo ug kahadlok. Ikonsiderar ang pagbasa sa Marcos 4:40 ug Marcos 5:36 isip usa ka klase aron ipakita kini nga punto. Hisgoti ang mga rason kon nganong dili mahimong magdungan ang hugot nga pagtuo ug kahadlok ug ang mga paagi nga makabaton kita og hugot nga pagtuo sa Manluluwas aron mabuntog ang atong mga kahadlok. Ang mosunod nga mga pangutana mahimong kabahin niini nga pakighisgot: Unsa ang mahitabo sa atong hugot nga pagtuo kon mapildi kita sa kahadlok? Sa unsang paagi mabuntog sa hugot nga pagtuo ang kahadlok?

Lagmit sab nga makatabang kon hisgotan ang mga pamahayag sa seksiyon nga “Komentaryo ug Background nga Impormasyon” mahitungod sa pagbuntog sa kahadlok pinaagi sa hugot nga pagtuo sa Ginoo.