Lucas 9:24–26, 57–62

Mga Disipulo ni Jesukristo

Si Jesukristo nitudlo og daghang mga kamatuoran mahitungod kon unsaon nato pagkahimong Iyang mga disipulo. Kini nga leksiyon makatabang kanimo sa pag-ila og mga paagi aron mahimong usa ka tinuod nga disipulo ni Jesukristo.

Espirituhanong mga gasa. Ang Ginoo nagpanalangin kanimo og espirituhanong mga gasa ug mga abilidad sa pagtandog sa kinabuhi sa mga estudyante sa imong klase. Paningkamot sa pagdiskobre, pagpalambo, ug pagpadako sa imong espirituhanong mga gasa aron makaserbisyo sa Ginoo ug makapanalangin sa kinabuhi sa uban. Alang sa dugang nga kasayoran sa espirituhanong mga gasa, tan-awa ang Moroni 10:8–19 ; Doktrina ug mga Pakigsaad 46:8–26 ; 1 Mga Taga-Corinto 12:1–11 .

Pagpangandam sa estudyante: Dapita ang mga estudyante nga maghunahuna og mga paagi nga naningkamot sila sa pagsunod ni Jesukristo.

Posible nga mga Kalihokan sa Pagkat-on

Mahimong sugdan ang klase pinaagi sa paghangyo sa usa ka estudyante nga mangulo sa klase sa nagkalainlaing mga buluhaton o yanong mga kalihokan. Human niana, dapita ang mga estudyante sa pagpaambit unsa ang nakapasayon o nakapalisod sa pagsunod sa lider.

Pagkahimong usa ka disipulo ni Jesukristo

Sa tibuok Niyang pagpangalagad, si Jesukristo nagdapit sa mga tawo nga mosunod Kaniya ug mahimong Iyang mga disipulo. Ang usa ka disipulo mao ang usa ka tawo nga gibunyagan, misunod kang Jesukristo, ug naningkamot sa pagpakabuhi sumala sa Iyang mga pagtulun-an. Sa Lucas 9 , mabasa nato ang mahitungod sa lainlaing mga baroganan nga, kon sundon, mahimong makatabang kanato nga mahimong disipulo ni Jesukristo.

• Ikonsiderar unsa ang imong nahibaloan mahitungod kang Jesukristo, nganong takos man ang dakong paningkamot aron mahimong Iyang disipulo?

Ihatag ang mosunod nga handout ngadto sa mga estudyante, ug dapita sila sa pagtrabaho sa usa sa mga buluhaton sa tinagsa, o ang klase mahimong bahinon ngadto sa mga grupo ug pag-assign og usa sa mga buluhaton.

Ang matag usa sa mosunod nga tulo ka mga bahin nagpokus sa usa sa mga pagtulun-an sa Manluluwas. Kini mahimong makatabang kanimo diha sa imong paningkamot aron mahimong usa ka disipulo ni Jesukristo. Basaha ang mga bahin, ug pagpili og usa o daghan pa aron makompleto. Dapita ang Espiritu Santo sa paghatag og personal nga pagpadayag sa mga paagi nga imong magamit ang unsay imong nakat-onan diha sa imong kinabuhi.

Magpas-an sa imong krus

Basaha ang Lucas 9:23 , nga mangita sa mga gikinahanglan sa Manluluwas aron mahimong Iyang disipulo.

• Unsa ang gitudlo niini nga bersikulo mahitungod sa pagka-tinuod nga disipulo ni Jesukristo?

Kini nga bersikulo naghisgot sa pisikal nga krus nga gipas-an ni Jesukristo ug giantos alang sa katumanan sa kabubut-on sa Iyang Amahan. Bisan kita wala gipapas-an sa usa ka pisikal nga krus sama sa gihimo sa Ginoo, kita gilaoman nga mosunod Kaniya pinaagi sa pagtuman sa kabubut-on sa Langitnong Amahan alang kanato bisan og kini malisod.

Si Elder Ulisses Soares sa Korum sa Napulog Duha ka Apostoles mipasabot sa unsay buot ipasabot sa pagpas-an sa atong mga krus. Mahimo nimong tan-awon ang bidyo nga “Magpas-an sa Atong Krus” gikan sa time code nga 3:08 hangtod sa 3:49, nga anaa sa ChurchofJesusChrist.org, o basaha ang teksto sa ubos.

Kita nakat-on pinaagi sa mga kasulatan nga kadtong kinsa gusto nga mopas-an sa ilang krus sa ilang kaugalingon nahigugma ni Jesukristo sa paagi nga sila magdumili sa ilang kaugalingon sa tanang dili diosnon ug sa tanang kalibotanong kahigal ug motuman sa Iyang mga sugo.

Ang atong determinasyon nga walay buhaton supak sa kabubut-on sa Dios ug sa pagsakripisyo sa tanan nga gisugo nga ihatag ug sa pagsunod sa Iyang mga pagtulun-an makatabang nato sa paglahutay diha sa dalan sa ebanghelyo ni Jesukristo—bisan sa nasinati nga kalisdanan, kahuyang sa atong kalag, o sosyal nga pagpamugos ug kalibotanong mga pilosopiya nga supak sa Iyang mga pagtulun-an.

(Ulisses Soares, “Magpas-an sa Atong Krus,” Liahona, Nob. 2019, 113–14)

Pamalandongi ang mosunod nga mga pangutana:

• Nganong kinahanglan man nimong did-an ang imong kaugalingon sa bisan unsang pagkadili-diosnon o kalibotanong mga kahigal sa imong kinabuhi?

• Sa unsang mga paagi nga ang pagdumili sa inyong kaugalingon sa pagkadili-diosnon o kalibutanong mga kahigal susama sa pagpas-an sa krus?

• Sa unsang paagi kaha nga ang “pagpas-an sa imong krus” mahimong makatabang kanimo aron mahimong usa ka tinuod nga disipulo ni Jesukristo?

Ang kawad-an sa iyang kinabuhi magluwas niinii

Basaha ang Lucas 9:24–25 , nga mangita kon unsay gitudlo sa Ginoo mahitungod sa pagka-disipulo diha Kaniya.

• Unsa ang gitudlo niini nga mga bersikulo mahitungod sa pagka-tinuod nga disipulo ngadto kang Jesukristo?

• Sa unsang mga paagi nga ang mga tawo nga nagtutok sa kaugalingon nilang kabubut-on ug hinakog nga mga tinguha sa kataposan “kawad-an” sa ilang kinabuhi?

• Unsa sa imong hunahuna ang buot ipasabot nga imong maluwas ang imong kinabuhi kon imong wagtangon kini alang kang Jesukristo?

Si Presidente Thomas S Monson (1927–2018) mipasabot unsa ang buot ipasabot niini nga sa pagkahikalimot [lose] sa atong mga kinabuhi alang kang Jesukristo:

Kadtong kinsa nagpakabuhi lamang alang sa ilang kaugalingon sa kataposan maminosan ang ilang pagkatawo ug sa mapasumbingayong paagi mawagtangan sa ilang kinabuhi, samtang kadtong nahikalimot sa ilang kinabuhi diha sa pagserbisyo sa uban motubo ug molambo —ug sa ingon moluwas sa ilang kinabuhi.

(Thomas S. Monson, “Unsa may Akong Nabuhat alang sa Usa ka Tawo Karon?” Liahona, Nob. 2009, 85)

• Kinsa man ang imong nahibaloan nga mipili sa pagkalimot sa iyang kinabuhi tungod ug alang kang Jesukristo? Unsa ang epekto niini nga desisyon ngadto niining tawhana?

• Sa unsang mga paagi ikaw napanalanginan tungod kay si Jesukristo nagpuyo sa mga pagtulun-an niini nga mga bersikulo?

Buntoga ang mga makabalda ug mga palusot

Basaha ang Lucas 9:57–62 , nga mangita kon unsay gustong buhaton sa piho nga mga indibidwal sa dili pa mosunod sa Manluluwas.

• Unsa ang gitudlo niini nga mga bersikulo mahitungod sa pagka-tinuod nga disipulo ngadto kang Jesukristo?

Si Jesukristo wala nagpasabot nga sayop ang pagbangotan sa kamatayon sa usa ka minahal o ang pagpanamilit sa mga higala ug pamilya. Inay, Siya nitudlo kanila og usa ka importanteng leksiyon mahitungod sa bili sa pagkadisipulo.Si Presidente Howard W. Hunter (1907–1995) mipasabot sa analohiya sa pagdaro sa Lucas 9:62 .

Aron mokalot og tul-id nga tudling sa umahan, ang magdadaro kinahanglan nga mopunting kanunay sa iyang mga mata sa usa ka permanente nga paingnan sa unahan niya. Kana magpabilin kaniya nga maanaa sa husto nga dalan. Kon, hinoon, mahitabo nga molingi siya sa luyo sa pagtan-aw sa iyang giagian, ang iyang kalagmitan sa pagkasaag modako. Hiwi ang mahimong resulta ug dili pareho ang distansiya sa tudling sa umahan. … Kon ang atong mga kusog wala nagtumong sa atong luyo apan sa unahan nato—sa kinabuhing dayon ug sa hingpit nga kalipay sa kaluwasan—kita seguradong makaangkon niini.

(Howard W. Hunter, Am I a ‘Living’ Member?” Ensign, Mayo 1987, 17)

• Unsa ang kalagmitang mahatag nga komon nga mga rason sa mga tawo karon sa pagpili nga dili mosunod sa Ginoo?

• Unsaon man nimo pagpabiling nakapokus sa unsa ang ipabuhat sa Manluluwas kanimo karon ug sa imong umaabot?

Human ang mga estudyante makakompleto sa mga buluhaton, dapita ang pipila ka mga estudyante sa pagreport sa unsa ang ilang natun-an. Usa ka paagi sa paghimo niini mao ang pagsulat sa Aron mahimong tinuod nga disipulo ni Jesukristo kita mahimong … ngadto sa pisara ug dapita ang mga estudyante sa pagkompleto sa hugpong sa pulong.

Akong sunod nga lakang

Dapita ang mga estudyante nga magplano aron makatabang kanila sa ilang mga paningkamot nga mahimong mga disipulo ni Jesukristo. Mahimong dapiton ang mga estudyante sa paghulagway sa ilang mga plano. Ang mosunod mahimong idrowing sa pisara isip usa ka ehemplo kon unsaon nila pagbuhat niini.

Pagdrowing og usa ka hagdanan nga adunay labing menos sa tulo ka mga ang-ang. Isulat ang Jesukristo sa ibabaw sa mga ang-ang. Pagmugna og usa ka representasyon sa imong kaugalingon sa ubos sa mga ang-ang.

Pagtinguha og giya sa Espiritu Santo samtang naghunahuna sa imong mga paningkamot aron mahimong usa ka disipulo ni Jesukristo ug unsaon nimo nga mas makasunod Kaniya. Hinumdomi nga ang Espiritu Santo makabutang og mga hunahuna sa imong hunahuna ug mga pagbati sa imong kasingkasing diha sa imong pagpamalandong (tan-awa ang Doktrina ug mga Pakigsaad 8:2–3).

Paglista og posibleng mga lakang nga lagmit nimong buhaton aron matabangan ka diha sa imong paningkamot nga mahimong disipulo ni Jesukristo. Mahimo nimong pilion ang kadtong pamati nimo gustong ipabuhat sa Ginoo kanimo, o markahi ang mga lakang sa han-ay nga gusto nimong sulayan sila.

• Unsa ang sunod nga lakang nga imong buhaton diha sa imong mga paningkamot nga mahimong mas matinud-anong disipulo ni Jesukristo?

• Unsa ang imong nahanduraw nga hulagway sa pag-uswag kon buhaton nimo kini nga lakang?

• Sa unsang mga paagi kaha ang Manluluwas makatabang kanimo diha sa imong pagbuhat niini ug sa umaabot nga mga lakang?

Pagmatuod sa gugma ni Jesukristo ug sa Iyang tinguha sa pagtabang kanato diha sa atong pagpaningkamot nga mahimong Iyang mga disipulo.

Komentaryo ug Background nga Impormasyon

Lucas 9:24 . Unsa ang gipasabot sa pagwagtang sa imong kinabuhi aron maluwas kini?

Si Elder D. Todd Christofferson sa Korum sa Napulog Duha ka Apostoles mipasabot:

Kon mas maghunahuna ako niini, mas mahingangha ako sa kamakanunayon sa paghatag ni Jesus sa Iyang kinabuhi ngadto sa Amahan, unsa ka hingpit sa Iyang pagwagtang sa Iyang kinabuhi diha sa kabubut-on sa Amahan—sa kinabuhi ug sa kamatayon. …

Ang sugo ni Kristo sa pagsunod Kaniya usa ka sugo sa … pagwagtang sa atong kinabuhi pabor sa tinuod nga kinabuhi, kinabuhi nga angay sa celestial nga gingharian nga gilantaw sa Dios alang sa matag usa kanato.

(D. Todd Christofferson, “Pagkaplag sa Inyong Kinabuhi,” Liahona, Marso 2016, 18)

Dugang nga Kalihokan sa Pagkat-on

Sibilidad ug pagkamabination

Adunay daghan nga misangpot ngadto sa panagbingkil ug pagdumot kon ilang bation nga ang uban nagmaltratar kanila. Bisan si Santiago ug Juan nasagmuyo sa dihang ang mga tawo sa usa ka Samaritanhong baryo misalikway sa Manluluwas. Basaha ang Lucas 9:51–56 , nga mangita sa mensahe ni Jesukristo ngadto sa mga gimaltrato sa uban. Sa unsang paagi malahi ang kalibotan kon kitang tanan misunod sa ehemplo sa Manluluwas gikan niini nga asoy?