Mareko 5:24–34; Mataio 9:20–22

O le Faaaogaina o le Mana o Iesu Keriso

A woman lying on the ground as she reaches for the hem of the garment of Jesus Christ.

Sa faamaloloina e Iesu se fafine na iai le puna toto a o Ia agai atu e faamalolo i le afafine o Iairo. O le faamoemoega o lenei lesona o le fesoasoani atu lea ia te oe e malamalama pe faapefea ona e faaaogaina le mana o le Faaola i lou olaga e ala i le faatinoina o lou faatuatua ia te Ia.

O le faaaogaina o upu a perofeta o aso nei e faailoa ai aoaoga faavae ma mataupu autu. E masani ona aoao mai e perofeta o aso nei upu moni ma mataupu autu mai tala faamaumau o loo i tusitusiga paia. Saili avanoa e fesoasoani ai i tagata o le vasega e faailoa aoaoga faavae ma mataupu autu e ala i le faaaogaina o upu a perofeta o aso nei. O le a faamanuiaina tagata o le vasega a o latou lagonaina le molimau mai o le Agaga Paia i upu moni na aoao mai e perofeta i aso anamua ma aso nei.

Tapenaga mo Tagata o le vasega: Valaaulia tagata o le vasega e tomanatu i se taimi na latou liliu atu ai ia Iesu Keriso mo se fesoasoani. E mafai foi ona latou mafaufau i se mea na tupu i se isi tagata.

Gaoioiga Talafeagai mo Aoaoga.

Falolo faaleagaga

Mafaufau e valaaulia tagata o le vasega e tulai ma falolo [o latou tino] i soo se itu. O se isi filifiliga o le talosaga atu i se tagata o le vasega e taitai le vasega atoa i se faamalositino tau falolo mo se minute e tasi.

Ua e lagonaina se eseesega i lou tino?
O le a sou manatu po o le a le aoga mo oe o le faamasani ona falolo faaletino?

E iai aoga eseese o le falolo. A falolo tagata taaalo, e sili atu le latou gaoioi ma e faaitiitia ai le avanoa e latou te maua ai se manu’a. Faapena foi, a falolo e tagata o le vasega o latou mafaufau ma faasili atili le faia o a latou suesuega masani, e faatupulaia ai le latou aoaoina.

O le a le uiga o le falolo faaleagaga ia te oe?

E tali tutusa ma le aoga o le falolo faaletino, e faatupuina lo tatou faaleagaga pe a tatou faatinoina le faatuatua i le Faaola ma faaaogaina Lona mana. I le lesona o le aso nei, o le a e aoao e uiga i se fafine sa tulaga ese lona faatuatua ia Iesu Keriso ma sa ia aapa atu lona lima i le Faaola ma faaaogaina Lona mana e malolo ai o ia. A o agai atu e faamalolo le afafine o se tagata e igoa ia Iairo, sa mulimuli ane le motu o tagata ia Iesu Keriso (tagai i le Mareko 5:22–24). Sa i ai i le motu o tagata se fafine ma’i.

Faitau i le Mareko 5:25–26, ma maitau le tulaga o le fafine ma ona manaoga.

E lē o faamatalaina mai i tusitusiga paia le natura tonu o le “puna toto” o le fafine ( Mareko 5:25). Ua tatou iloa sa faalavelave i lona olaga i auala e tele. Sa “uma atu ai foi ana oloa” i le sailiga o se fofo mai foma’i ( Mareko 5:26). E lē gata i lea, i lalo o le tulafono a Mose, o se tasi e maua i le puna toto sa faitaulia e lē mama (tagai le Levitiko 15:19–33). O lona uiga sa faanofoesea le fafine mai le aai i auala eseese mo tausaga e 12 o lona mai.

Valaaulia tagata aoga e manatunatu filemu i le fesili o le a mulimuli mai nei. E mafai ona latou faamaumau o latou tali i a latou api faamaumau suesuega.

O le a se mea e te lagona o loo e moomia ai le fesoasoani a le Faaola i lou olaga?

Faitau i le Mareko 5:27–29 ma vaavaai mo mea na fai e le fafine ina ia maua ai e ia le fesoasoani a le Faaola (tagai foi i le Mataio 9:20–22). O le faaupuga “alu ane o ia i ona tua” e faasino i lana tauiviga e faaofiofi ane i le motu o tagata ina ia mafai ai ona ia pai atu i le ofu o Iesu ( Mareko 5:27).

Jesus Heals a Woman of Faith
Jesus heals a woman's illness when she, in faith, touches His clothing.

O le a se mea o faagaeetia ai oe e uiga i mea na fai e lenei fafine ina ia mauaina ai e ia le mana o le Faaola?
I lenei faamaumauga, sa faaloaloa atu lava le lima o le fafine ina ia pai atu i le Faaola. O a ni auala e mafai ona e “falo” atu ai ma aapa atu ai i le Faaola?
E te talitonu e mafai ona faamalolo oe e le Faaola, e ui lava ina lē mafai ona e pai tino ia te Ia? Aisea?

Faitau i le Mareko 5:30–34, ma vaavaai mo le tali a le Faaola i le faatinoga o le faatuatua a lenei fafine. O le upu amio lelei i le fuaiupu 30 o lona uiga o le “mana” po o le “malosi”.

O le a se mea e te maitauina e uiga i le Faaola mai nei fuaiupu?

E ui lava ina i ai le manaoga faanatinati a Iairo e aumai Iesu i lona fale e faamalolo ai lona afafine, sa tu Iesu ma fesoasoani i le fafine.

O le a se mea ua aoao atu e lenei mea ia te oe e uiga i le Faaola?
O a ni auala ua aafia ai lou naunautai e liliu ia te Ia mo se fesoasoani i ou manaoga?

Sa faatatau e Peresitene Russel M. Nelson lenei faamaumauga i o tatou lava olaga. E te ona fia matamata i le ata pue “Mauaina o le Mana o Iesu Keriso i o Tatou Olaga,” mai le taimi 11:30 seia oo i le 13:20, pe faitau i tusitusiga o loo i lalo. A o e faia, vaavaai mo mataupu autu na aoao mai e Peresitene Nelson e uiga i le mauaina o le mana o le Faaola.

Drawing the Power of Jesus Christ into Our Lives
Elder Nelson teaches that we can draw the power of Jesus Christ into our lives as we learn of Him, have faith in Him, reach up to Him, and keep our covenants.

O e manatuaina le tala o le tusi paia e faatatau i se fafine na mafatia mo le 12 tausaga i se faafitauli matuia? [tagai i le Luka 8:43–44 ]. Sa ia faatinoina se faatuatua tele i le Faaola, ma alaga atu, “Afai ou te pa’i atu tau lava o lona ofu, ou te ola ai” [ Mareko 5:28 ].

Sa manaomia e lenei fafine faatuatua ma tuuto ona falo atu i le mamao e gata ai lona mafai ia maua ai Lona mana. O lona falo atu faaletino o se faatusa lea o lona falo atu faaleagaga. …

Pe a e aapa atu i luga mo le mana o le Alii i lou olaga i le malosi atoa e tutusa ma se tagata o loo malemo ma tau’ā’ā pea mo le ea, o le mana mai ia Iesu Keriso o le a avea ma ou mana. A silafia e le Faaola e te fia manao moni lava e aapa atu ia te Ia—pe a mafai ona Ia lagonaina le manao silisili o lou loto o le fia mauaina o Lona mana i lou olaga—o le a taitaia oe e le Agaga Paia ia iloa tonu le mea e tatau ona e faia [tagai i le Mataupu Faavae ma Feagaiga 88:63 ].

A e falo atu faaleagaga e sili atu i lo o se isi lava faaloaloa na e faia muamua, o le a tafe mai Lona mana ia te oe.

(Russell M. Nelson, “Mauaina o le Mana o Iesu Keriso i o Tatou Olaga,” Ensign po o le Liahona, Me 2017, 41–42)

Mafaufau pe faaali faalautele atu le faamatalaga a Peresitene Nelson ma valaaulia tagata aoga e faasoa i ni mataupu autu na latou mataulia ma upu o loo faaata maia na mataupu autu. E mafai foi ona tusi e tagata aoga a latou mataupu autu i le laupapa.

O a ni mataupu autu sa e maitaulia mai le faamatalaga a Peresitene Nelson?
O a ni auala e mafai ai ona fesoasoani nei mataupu autu ia te oe e falo faaleagaga e maua ai le mana o le Faaola?
O le a se taimi na e feagai ai ma se tasi o nei mataupu autu i lou olaga?

Mafaufau pe faasoa atu sau aafiaga patino e faatatau i le falo faaleagaga ina ia mauaina le mana o le Faaola. Ona faaali faalautele ai lea o fesili o le a mulimuli mai nei, ma valaaulia tagata aoga e tali ni fesili e tolu pe sili atu i totonu o a latou api faamaumau suesuega.

O le a se mea e mafai ona e faia e faaali ai o le taliaina o le fesoasoani a le Faaola o lou naunautaiga silisili lea?
E faapefea ona ese lou olaga pe ana e toaga e faaaoga le mana o Iesu Keriso?
O a ni luitau e ono moomia ona e manumalo i ai a o e aapa atu i le Faaola i le faatuatua?
O le a se mea e mafai ona e fai e te matauina ai le faatonuga mai le Agaga Paia e aapa atu i le Faaola?

Manatu ma Faamatalaga o Talaaga

Mataio 9:20. O le a le taua o le pai atu o le fafine i le tuupao o le ofusa o le Faaola?

O le tuupao o lona ofusa e faasino i se vaega taua o le ofu o se tagata Isaraelu. O le tuupao o se koke i ‘apaau’ taitasi po o tulimanu o le ofu pulupulu po o le ofu talaloa ( Mataio 14:36). Sa saisai koke i le filo lanu moana, e faatusa i le lagi (tagai i le Numera 15:38–40). O le koke e tautau i luga o le tauau i tua o lena sa pai ai le fafine. O lona aapa atu e pai i le koke o loo faatusa i le aapa atu mo le mana faalelagi o le Faaola. Sa folafolaina e le perofeta Malaki o le a “alu a’e le Faaola ma mea e malolo ai i ona apa’au” ( Malaki 4:2).

E faapefea ona ou mauaina le faamalologa o le Faaola?

Sa taua e Peresitene Jean B. Bingham, Peresitene Aoao o le Aualofa:

Ina Ia Atoa Lo Outou Olioli
Ua aoao mai Sister Bingham e faapea, e mafai ona tatou liliu atu ia Iesu Keriso o se puna o faamalologa uma, filemu, ma le alualu i luma e faavavau.

A o outou suesue i le soifuaga o Keriso ma aoaoga i auala e le mafaitaulia, o le a faateleina lo outou faatuatua ia te Ia. O le a oo ina outou iloa e alofa o Ia ia te outou taitoatasi ma e malamalama lelei foi ia te oe. …

Po o a lava mea ua tatou mafatia ai, o Ia o le pogai o le faamalologa. O i latou ua aafia i soo se ituaiga o sauaga, se toesea ogaoga, ma’i faaumiumi po o se mafatiaga le ma’alofia, tuua’iga le moni, sauaga matuia, po o se faatamaiaga faaleagaga mai le agasala po o le le malamalama e mafai ona faaatoatoa e le Togiola o le lalolagi. Peitai, o le a Ia le ulufale mai e aunoa ma se valaaulia. E tatau ona tatou o mai ia te Ia ma faatagaina o Ia e faatino Ana vavega.

(Jean B. Bingham, “Ina Ia Atoa Lo Outou Olioli,” Ensign po o le Liahona, Novema. 2017, 86)

Tuafafine Reyna I. Aburto, Fesoasoani Lua i le Au Peresitene Aoao o le Aualofa, sa aoao mai:

I Mala i Manū, Iesu, Afio Mai!
Ua molimau mai Sister Aburto e mafai e le Faaola ona fesoasoani i fanau uma a le Atua ia onosai i gasegase faalemafaufau ma faaletino.

I le taimi o Lana galuega faaletino, na faamalolo ai e Iesu Keriso ē mamaʻi ma ē mafatia, ae sa tatau i tagata taitoatasi ona faaaoga le faatuatua ia te Ia ma galue ina ia maua Lana faamalologa. O nisi sa savavali mamao mai, o isi na faaloaloa atu o latou lima e pai ai i Lona ofusa, ma o isi sa manaomia ona sii atu ia te Ia ina ia mafai ona faamaloloina i latou. Pe a oo i le faamalologa, pe tatou te le matuai manaomia uma ea o Ia?

(Reyna I. Aburto, “I Mala I Manū, Iesu, Afio Mai!,” Ensign po o le Liahona, Novema. 2019, 58)