Luka 9:24–26, 57–62

O Soo o Iesu Keriso

Na aoao mai e Iesu Keriso le tele o upumoni e uiga i le ala e mafai ai ona avea i tatou ma Ona soo. O le a mafai ona fesoasoani lenei lesona e te iloa ai auala e avea ai ma soo moni o Iesu Keriso.

Meaalofa faaleagaga. Ua faamanuiaina oe e le Alii i meaalofa faaleagaga ma tomai e pai atu ai i olaga o tagata aoga i lau vasega. Taumafai ia iloa, atiina ae, ma faalautele au meaalofa faaleagaga ina ia mafai ona auauna atu ai i le Alii ma faamanuia ai olaga o isi. Mo nisi faamatalaga e uiga i meaalofa faaleagaga, tagai i le Moronae 10:8–19 ; Mataupu Faavae ma Feagaiga 46:8–26 ; 1 Korinito 12:1–11 .

Sauniuniga a le tagata aoga: Valaaulia tagata aoga e mafaufau i auala o loo latou taumafai ai e mulimuli ia Iesu Keriso.

Gaoioiga E Ono Mafai Ona Aoao Mai Ai

Mafaufau e amata le vasega i le fai atu i se tagata aoga e taitai le vasega i ni faamalositino eseese po o ni gaoioiga faigofie. A maea, valaaulia tagata aoga e faasoa mai po o le a le mea na faigofie pe faigata ai ona mulimuli i le taitai.

O le avea ai o se soo o Iesu Keriso

I Lana auaunaga atoa, sa valaaulia ai e Iesu Keriso tagata e mulimuli ia te Ia ma avea ai ma Ona soo. O se soo o se tasi ua papatisoina, e mulimuli ia Iesu Keriso, ma e taumafai e ola e tusa ai ma Ana aoaoga. I le Luka 9, tatou te faitau ai e uiga i mataupu faavae eseese, afai e mulimuli ai, e mafai ona fesoasoani ia i tatou e avea ai ma soo o Iesu Keriso.

• I le mafaufau ai i mea ua e iloa e uiga ia Iesu Keriso, aisea o le a aoga ai se taumafaiga tele e avea ai ma Ona soo?

Tufa atu le pepa lenei i tagata aoga, ma valaaulia i latou e galulue taitoatasi i se tasi o gaoioiga, pe e mafai foi ona vaevae le vasega i ni vaega ma atofa atu i ai se tasi o gaoioiga.

O vaega taitasi nei e tolu o loo taulai atu i se tasi o aoaoga a le Faaola. E mafai ona fesoasoani nei mea ia te oe a o e taumafai e avea ai ma se soo o Iesu Keriso. Faitau faasolo i vaega uma, ma filifili se tasi pe sili atu e faamaea. Valaaulia le Agaga Paia e tuuina mai faaaliga patino mo le tagata lava ia i auala e mafai ona e faaaogaina ai mea ua e aoaoina i lou olaga.

Tauave lou satauro

Faitau le Luka 9:23, ma vaavaai mo mea e manaomia e le Faaola ina ia avea ai ma Ona soo.

• O le a se mea o aoao mai e lenei fuaiupu e uiga i le avea ai ma se soo moni o Iesu Keriso?

O lenei fuaiupu e faatatau i le satauro faaletino na tauaveina ma puapuagatia ai Iesu Keriso ina ia faataunuu ai le finagalo o Lona Tama. E ui e le o talosagaina i tatou e tauave se satauro faaletino e pei ona sa faia e le Alii, ae ua talosagaina i tatou e mulimuli ia te Ia e ala i le faataunuuina o le finagalo o le Tama Faalelagi mo i tatou tusa lava pe faigata.

Faitau le Faaliliuga a Iosefa Samita, Mataio 16:26 (i le Mataio 16:24, vaefaamatalaga i), ma vaavaai po o le a le uiga o le tauaveina o lo tatou satauro ma mulimuli atu ia Iesu Keriso.

Na faamatala e Elder Ulisses Soares o le Korama a Aposetolo e Toasefululua le uiga o le tauaveina o lo tatou satauro. Atonu e te manao e matamata i le vitio “Ave Lo Tatou Satauro” mai le faailotaimi 3:08 seia oo i le 3:49, o loo maua i le ChurchofJesusChrist.org, pe faitau le anotala lenei.

Tatou te aoao e ala i tusitusiga paia, o i latou o e mananao e tauave lo latou satauro e alolofa ia Iesu Keriso i se auala latou te faafitia ai i latou lava mai mea uma e lē faaleatua ma tu’inanau uma faalelalolagi ae tausi Ana poloaiga.

O lo tatou naunautaiga e lafoai ese mea uma e feteenai ma le finagalo o le Atua ma faataulagaina mea uma ua poloaiina ai i tatou e tuuina atu ma tauivi e mulimuli i Ana aoaoga o le a fesoasoani ia i tatou e tumau ai i le ala o le talalelei a Iesu Keriso—e oo lava i fetaia’iga ma faigata, vaivaiga o o tatou agaga, po o faatosinaga faaagafesootai ma filosofia faalelalolagi ia e tetee i Ana aoaoga.

(Ulisses Soares, “Ave Lo Tatou Satauro,” Ensign po o Liahona, Nov. 2019, 113–14)

Mafaufau loloto i fesili nei:

• Aisea e manaomia ai ona e faafitia oe lava mai soo se mea e le faaleatua po o tuinanau faalelalolagi i lou olaga?

• O a ni auala e mafai ai e le faafitia o oe lava mai le le faaleatua po o tuinanau faalelalolagi ona faapei o le amoina o se satauro?

• O le a sou manatu e mafai faapefea e le “tauaveina o lou satauro” ona fesoasoani ia te oe e avea ai o se soo moni o Iesu Keriso?

Faamaumau lou ola ina ia faasaoina ai

Faitau le Luka 9:24–25, ma vaavaai po o a mea na aoao mai e le Alii e uiga i le avea ai ma Ona soo.

• O a mea ua aoao mai e nei fuaiupu e uiga i le avea ai o se soo moni o Iesu Keriso?

• O a ni auala e te manatu o le a oo i ai tagata e taulai atu i o latou lava loto ma manaoga manatu faapito ma iu ina “maumau” ai o latou ola?

• O le a sou manatu i le uiga e faapea o le a e faasaoina lou ola pe a faamaumauina ona o Iesu Keriso?

Sa faamalamalama mai e Peresitene Thomas S. Monson (1927–2018) le uiga o le faamaumau o o tatou ola mo Iesu Keriso:

O i latou o e ola mo na o i latou lava e iu ina magumagu ma maumau ai lo latou ola i se gagana faatusa, a o i latou o e faaalu o latou lava ola e auauna atu ai i isi, e ola ma lauusiusi—ma iu ina faasaoina ai, i se tulaga moni lava, o latou ola.

(Thomas S. Monson, “What Have I Done for Someone Today?” Ensign po o le Liahona, Nov. 2009, 85)

• O ai se tasi e te iloaina na filifili e faamaumau lona ola mo Iesu Keriso? O le a se aafiaga o lenei filifiliga i lenei tagata?

• O a ni auala ua faamanuiaina ai oe ona sa soifua ai Iesu Keriso i aoaoga o loo i nei fuaiupu?

Faatoilalo mea faalavefau ma alofaga

Faitau le Luka 9:57–62, ma vaavaai mo mea na mananao nisi o tagata e faia a o lei mulimuli atu i le Faaola.

• O a mea ua aoao mai e nei fuaiupu e uiga i le avea o se soo moni o Iesu Keriso?

E lei ta’uina mai e Iesu Keriso e sese le faanoanoa i le maliu o se tasi e pele pe faatofa atu i uo ma aiga. Peitai, sa Ia aoaoina i latou i se lesona taua e uiga i le tau o le avea ai ma soo.Sa faamatala e Peresitene Howard W. Hunter (1907–1995) le talafaatusa o le suotosina i le Luka 9:62 .

Ina ia eliina se atupu’e [po o se alavai], e manaomia e le suafanua ona tulimatai lana vaai i se pine faailoga i ona luma. O lena faailoga o le a tumau ai o ia i se ala tonu. Peitai, afai e toe tilotilo i tua e vaai pe o fea lea sa i ai o ia, ona faateleina ai lea o ona avanoa e sese ese ai. O le taunuuga o ni atupu’e pi’opi’o ma lē tutusa. … Afai e le taulai atu lo tatou malosi i o tatou tua ae o luma atu o i tatou—i le ola faavavau ma le olioli o le faaolataga—e mautinoa lava lo tatou mauaina o lea taunuuga.

(Howard W. Hunter, “Am I a ‘Living’ Member?” Ensign, May 1987, 17)

• O a ni mafuaaga taatele e ono tuuina mai e tagata i aso nei mo le filifili ai latou te le mulimuli i le Alii?

• E mafai faapefea ona e faatumauina lou taulai atu i mea ua poloaiina ai oe e le Faaola e fai i le taimi nei ma i lou lumanai?

A uma ona faamaea e tagata aoga ia gaoioiga, valaaulia ni nai tagata aoga e lipoti mai i mea sa latou suesueina. O se tasi auala e faia ai lenei mea o le tusi lea Ina ia avea ma se soo moni o Iesu Keriso e mafai ona tatou … i luga o le laupapa ma valaaulia tagata aoga e faauma le fasifuaitau.

O la’u laasaga o le a sosoo ai

Valaaulia tagata aoga e fai se fuafuaga e fesoasoani ai i ai i latou i taumafaiga e avea ai ma soo o Iesu Keriso. Mafaufau e valaaulia tagata aoga e faaali mai a latou fuafuaga. O mea nei e mafai ona tusia i luga o le laupapa e fai ma se tasi o faataitaiga o le auala e mafai ona latou faia ai lenei mea.

Tusi se ata o se faasitepu e le itiiti ifo ma le tolu sitepu. Tusi le Iesu Keriso i le pito i luga o faasitepu. Fatu se faatusa o oe lava i le pito i lalo o faasitepu.

Saili le taitaiga a le Agaga Paia a o e mafaufau e uiga i au taumafaiga e avea ai ma se soo o Iesu Keriso ma pe mafai faapefea ona e mulimuli atili ia te Ia. Manatua e mafai e le Agaga Paia ona tuu manatu i lou mafaufau ma lagona i lou loto a o e mafaufau loloto (tagai i le Mataupu Faavae ma Feagaiga 8:2–3).

Lisi ni faasitepu atonu e mafai ona e savalia e fesoasoani ai a o e taumafai e avea ma se soo o Iesu Keriso. E mafai ona e filifilia faasitepu e te lagona e pei e finagalo le Alii e te faia, pe faaigoa faasitepu i le faasologa e te manao e faataitai ai.

• O le a le isi laasaga e mafai ona e faia i au taumafaiga e avea ai o se soo faamaoni sili atu o Iesu Keriso?

• E faapeī foliga o le alualu i luma e te maitauina pe a e faia lenei laasaga?

• O a ni auala e te manatu e mafai ai e le Faaola ona fesoasoani ia te oe a o e faia lenei laasaga ma laasaga i le lumanai?

Molimau atu i le alofa o Iesu Keriso ma Lona naunautaiga e fesoasoani ia i tatou a o tatou taumafai e avea ma Ona soo.

Talatalaga ma Faamatalaga o Talaaga

Luka 9:24 . O le a le uiga o le faamaumau o lou ola ina ia faasaoina ai?

Na faamalamalama mai e Elder D. Todd Christofferson o le Korama a Aposetolo e Toasefululua:

O le tele o lou mafaufau i ai, o le tele foi lea o lou maofa i le tuuina atu pea lava pea e Iesu o Lona soifua i le Tama, i le ala na tuuina atu ai atoatoa Lona soifua i le finagalo o le Tama—i le soifuaga ma le mutaaga. …

O le poloaiga a Keriso e mulimuli ia te Ia o se poloaiga e … faamaumau ai lo tatou ola mo le olaga moni, le olaga faamaoni, o le ola ua gafatia ona o le malo selesitila lea na muai fuafuaina e le Atua mo i tatou taitoatasi.

(D. Todd Christofferson, “ Mauaina o Lou Ola,” Liahona, Mati 2016, 18)

Galuega Faatino Faaopoopo e Aoao Mai Ai

O le feavata’i ma le agalelei

E toatele e liliu atu i finauga ma le feitaga’i pe a latou lagonaina ua agaleagaina i latou e isi. E oo lava ia Iakopo ma Ioane sa le fiafia ina ua teena e tagata i se nuu o Samaria le Faaola. Faitau le Luka 9:51–56, ma vaavaai mo le savali a Iesu Keriso ia i latou o e agaleagaina e isi. E faapefea ona iai se eseesega i le lalolagi pe afai tatou te mulimuli uma i le faataitaiga a le Faaola mai lenei tala?