Mataio 9:36–38; 10

Na Valaauina ma Aoaoina e Iesu Keriso ia Aposetolo e Toasefululua

Na valaauina ma aoaoina e Iesu Keriso ia Aposetolo e Toasefululua ma auina atu i latou e tala’i, auauna atu, ma faamalolo i e mamai. O le a fesoasoani lenei lesona e te malamalama ai i le valaauga ma matafaioi o Aposetolo o ni sui ma molimau o Iesu Keriso.

O le faalogologo atu i fesili a tagata aoga. Saili ia malamalama i tagata aoga e ala i le faalogo ma le toto’a ma fai atu fesili tulitatao i se agaga o le alofa ma le lagona malamalama. Tatalo mo le gafatia e tuu ai oe lava i tulaga o tagata aoga. Ia e naunau e fetuunai le lesona ma gaoioiga ina ia sili atu ona fetaui ma manaoga o tagata aoga ma lo latou malamalama i le taimi nei.

Sauniuniga a le tagata aoga: Valaaulia tagata aoga e manatunatu i o latou aafiaga ma Aposetolo a le Alii e ala i le faia o fesili o le a mulimuli mai nei: Ua faapefea ona faalatalataina atili e Aposetolo a le Faaola oe ia Iesu Keriso? O le a se mea ua faagaeetia ai oe e uiga ia te i latou? O a ni au fesili o i ai e uiga i le matafaioi a se Aposetolo?

Manatua: O loo aofia se isi sauniuniga a le tagata aoga i le vaega o “Galuega Faatino Faaopoopo e Aoao Mai Ai”.

Gaoioiga E Ono Mafai Ona Aoao Mai Ai

O ou lagona e uiga, ma le malamalama, i Aposetolo a Iesu Keriso

Toe manatunatu pe faapefea ona e taliina le fesili lenei o le pepa malumalu:

E te lagolagoina ia uso o le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga?

(Russell M. Nelson, “Malelega Faaiu,” Ensign po o le Liahona, Nov. 2019, 121)

• O le a le uiga o le lagolagoina o uso o le Au Peresitene Sili ma le Korama a Aposetolo e Toasefululua?

E masani ona tatou mafaufau i le lagolagoina o taitai o le Ekalesia o se faatinoga faaletino o le sii ae o o tatou lima. Ae o le lagolagoina e sili atu nai lo le na o le tuuina atu o se faailoga vaaia. O le lagolago e aofia ai le lagolagoina, faamalosiauina, faatuatuaina, ma le mulimuli ia i latou ua tatou lagolagoina ona tatou te talitonu ua valaauina i latou e le Atua.

• Aisea e te manatu ai o se tasi o mea e manaomia e ulu atu ai i le malumalu e fesootai ma la tatou lagolago ma lagona e faaali atu i Aposetolo a le Faaola?

Faaaoga le fua lenei e iloilo atili ai ou lagona patino ma uiga faaalia i Aposetolo a Iesu Keriso. O le a le fesiligia oe e faasoa mai au tali ma isi.

Mafaufau e faaali atu le fua lenei. Atonu e aoga le faitau leotele o fesili taitasi nei mo tagata aoga e mafaufau loloto i ai, ona valaaulia lea o i latou e tusi a latou tali i a latou api faamaumau mo suesuega.

(A) Ioe malosi (E) Ioe (I) Le mautonu (O) Le ioe

1. Ou te talitonu e taua tele Aposetolo a Iesu Keriso.

2. Ou te fia faalogo i mea e saunoa mai ai Aposetolo a le Faaola, ma ou te gauai atu pe a ou maua le avanoa e faalogo ai ia i latou.

3. E mafai ona ou faasoa atu se mea se tasi pe lua na aoao mai talu ai nei e Aposetolo a Iesu Keriso.

Faaaoga sina taimi e mafaufau loloto ai ma tusifaamaumau soo sau fesili e uiga i Aposetolo a Iesu Keriso. A o e suesue, mafaufau i nei fesili, ma saili tali mai le Agaga Paia.

Aposetolo anamua a Iesu Keriso

Faitau le Mataio 9:36–38, ma vaavaai mo se faafitauli na faailoa mai e le Faaola i nei fuaiupu.

• O le a le faafitauli, ma o le a le mea na fetalai le Faaola sa manaomia?

Mafaufau e valaaulia ni tagata aoga e faitau mau nei i ni paga pe i ni vaega toalaiti.

Ina ia fesoasoani e auauna atu i tagata, na valaauina ai e Iesu Keriso ia Aposetolo. O le upu aposetolo e sau mai le upu Eleni o lona uiga “o se tasi ua auina atu.” I le taimi muamua sa auina atu ai Aposetolo i na o le aiga o Isaraelu. Mulmuli ane, sa poloaiina ai e le Faaola toetu ua tatau foi ona talai atu le talalelei i Tagata Nuu Ese, po o i latou e le o ni aiga o Isaraelu. O le asō ua poloaiina ai i latou e talai atu i le lalolagi atoa (tagai i le Galuega 10).

Faitau le valaauga ma faatonuga a le Faaola i Aposetolo e Toasefululua i le Mataio 10:1–8 ma le Mataupu Faavae ma Feagaiga 107:23 . Ona tali lea o fesili nei.

• O le a le mea na poloaiina e le Faaola ia Ana Aposetolo e fai?

• O a ni mea e tutusa ai na e maitauina i le va o galuega na faia e Iesu ma galuega na Ia poloaiina Ana Aposetolo e fai?

• O a upumoni e mafai ona e aoao mai i nei fuaiupu e uiga i le mea na valaauina e Iesu Keriso ia Aposetolo e fai?

Aposetolo o Aso Nei a Iesu Keriso

A ono mafai, faaali atu se ata o le Au Peresitene Sili ma le Korama a Aposetolo e Toasefululua o i ai i le taimi lenei.

O se upumoni e tasi ua tatou aoao mai le Mataio 10:1–8 ma le Mataupu Faavae ma Feagaiga 107:23 e faapea, ua valaauina e le Alii ia Aposetolo e avea ma molimau faapitoa o le suafa o Keriso i le lalolagi atoa ma faia Ana galuega. E moni lenei mea i Aposetolo a le Faaola anamua ma i latou ua Ia valaauina o ni Aposetolo i aso nei.

Faitau le Mataio 10:40, ma vaavaai mo le fautuaga a le Faaola ia i latou o e talia Ana Aposetolo.

• Aisea o le a pei ai le taliaina o Aposetolo a le Faaola o le taliaina o le Faaola?

Maimoa i le vitio “Peresitene Nelson: Perofeta a le Atua” mai le faailotaimi 0:00 seia oo i le 5:41. O lenei vitio o loo faaalia mai ai Peresitene Russell M. Nelson o loo faalauteleina le matafaioi o “se tasi ua auina atu” e fai ma sui ma aumai tagata i le Faaola.

Mafaufau e faaali atu ni faataitaiga faaopoopo o auala o loo auauna atu ai Aposetolo o aso nei e pei o le Faaola. O loo maua ni faataitaiga i le vaega o “Talatalaga ma Faamatalaga o Talaaga”.

• E faapefea ona e vaaia Peresetene Nelson o auauna atu i isi i le ala lava e tasi na faia ai e Iesu Keriso?

Talu ai o le Au Peresitene Sili ma le Korama a Aposetolo e Toasefululua e fai ma sui o le Faaola ma o ni molimau faapitoa ia te Ia, o le suesueina o a latou aoaoga e pei lava o le suesueina o aoaoga a le Faaola ma o se auala e aoao ai e uiga i le Faaola (tagai i le Mataupu Faavae ma Feagaiga 1:38). I le faaaogaina o se tasi o punaoa nei (o loo maua i le ChurchofJesusChrist.org), suesue i aoaoga a Aposetolo o aso nei, ma vaavaai mo mea e mafai ona e aoaoina e uiga i le Tama Faalelagi ma Iesu Keriso.

Fuafua po o fea o punaoa e sili ona fesoasoani i tagata aoga, ma saunia ni auala mo tagata aoga e maua ai.

“ O Le Keriso Soifua: O Le Molimau a le Au Aposetolo ”

“Molimau Faapitoa a Keriso”

Saunoaga o le konafesi aoao talu ai nei

Tuu atu i tagata aoga e faasoa mai o latou aafiaga i le aoao mai ma e uiga ia Iesu Keriso e ala i le suesueina o upu a Ana Aposetolo o ona po nei.

• O le a se mea na e maua i lau suesuega e fesoasoani e te lagona ai se malamalama faateleina ma le alofa mo le Tama Faalelagi ma Iesu Keriso?

• O anafea na e lagonaina ai ma iloa ai o se Aposetolo a le Alii sa fai ma sui o Iesu Keriso?

• E ono mafai faapefea e mea ua e aoaoina i le asō ona aafia ai le ala e te lagolagoina ai ma faalogo ai i Aposetolo a le Faaola o ona po nei?

Mafaufau e faamanatu i tagata aoga le gaoioiga sauniuni pe afai ua uma ona latou faamaeaina. Valaaulia i latou e faaaoga lena aafiaga i le gaoioiga lenei.

O fesili e manatunatu loloto i ai

Mafaufau pe mafai faapefea ona e faaaogaina mea sa e suesueina i le aso, ma saili ma le agaga tatalo le taitaiga mai le Tama Faalelagi, ma gauai atu ma le toto’a i soo se uunaiga mai le Agaga Paia. Mafaufau loloto i fesili nei, ma manatu e tusi i lau api faamaumau mo suesuega soo se uunaiga e te maua ma auala atonu e te faatinoina ai.

• O faapeī oe ma lou aiga i le mauaina ma le mulimuli ai i fautuaga a Aposetolo a le Faaola i ona po nei?

• O a ni auala ua e faalatalata atili atu ai ia Iesu Keriso ona o fautuaga ma aoaoga a Aposetolo a le Faaola?

• E mafai faapefea e le i ai o se fuafuaga patino e iloa atili ai ma mulimuli ai i Aposetolo a le Faaola ona faamanuiaina oe?

• Pe ua tali au fesili e uiga i Aposetolo a le Faaola i le asō? O le a se mea na e aoaoina? O a ni au fesili o i ai pea, ma e mafai faapefea ona e maua tali ia i latou?

• I le mafaufau ai i lou aiga, uo, ma isi tou te fegalegaleai pe mafai foi ona e faatosinaina, o ai e ono faamanuiaina e ala i le aoao ma le talanoa e uiga i ou aafiaga i le asō? E ono mafai faapefea ona e faasoa atu lenei mea ma i latou?

Faataga tagata aoga naunautai e faasoa mai soo se uunaiga na latou maua, molimau na latou maua, po o faatinoga latou te lagona le musuia e fai ona o a latou suesuega.

Talatalaga ma Faamatalaga o Talaaga

Mataio 10:14 . O le a le uiga o le “tutu atu o le eleele nai o outou vae”?

Na tuuina mai e Elder James E. Talmage lenei malamalamaga e uiga i faatonuga a le Faaola e faatatau i le tutu eseina o le eleele o vae o se tagata:

O le tutuina faa-faailoga o le eleele nai vae o se tasi e avea ma se molimau e faasaga i se isi, o se malamalamaga lea sa i tagata Iutaia e faailoga ai le faamutaina o se mafutaga ma le teena o ni tausalaga uma mo taunuuga e ono mulimuli mai. Sa avea ma sauniga o le tuuaiga ma se molimau i faatonuga a le Alii i Ana aposetolo e pei ona taua i le [ Mataio 10:14 ]. I le tisipenisione i le taimi nei, ua faatonuina foi faapena e le Alii ia Ana auauna tofia ia faapea ona molimau atu faasaga ia i latou o e tetee malosi ma le taufaaleaga i le upumoni pe a tuuina atu aloaia.

(James E. Talmage, O Iesu le Keriso [1916], 345; tagai foi Mataupu Faavae ma Feagaiga 24:15; 75:18–22; 84:92–96).

E le o se faiga lenei i le taimi nei a a tatou faifeautalai, ma o le a tumau ai pea sei vagana ua tuuina mai e taitai o le Ekalesia se taiala faaopoopo.

Aisea tatou te manaomia ai Aposetolo a Iesu Keriso i le lalolagi i aso nei?

O fea e mafai ona ou aoao atili ai e uiga i Aposetolo a Iesu Keriso o ona po nei ma le ala latou te auauna atu ai e pei o le Faaola?

O punaoa nei (o loo maua uma i le ChurchofJesusChrist.org) e mafai ona fesoasoani ia te oe e aoao atili ai e uiga i Aposetolo a Iesu Keriso o ona po nei.

“ O le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi ”

Neil L. Andersen, “O Le Perofeta a le Atua,” Ensign po o le Liahona, Me 2018, 24–27

Saunoaga faaopoopo o le konafesi aoao talu ai nei

“Feiloai i Perofeta ma Aposetolo o Aso Nei”

“Saunoa Elder Bednar i le Matafaioi a Aposetolo”

“O Elder Bednar i Egelani” (mai le faailotaimi 4:06 i le 4:47)

Galuega Faatino Faaopoopo e Aoao Mai Ai

O se isi sauniuniga a le tagata aoga

Valaaulia tagata aoga e o mai saunia e tuuina atu se talaaga puupuu o le soifuaga ma aoaoga filifilia mai se tasi o uso o le Au Peresitene Sili po o le Korama a Aposetolo e Toasefululua o loo i ai i le taimi nei. Valaaulia foi i latou e o mai saunia e faasoa mai pe na faapefea e le aoao atili e uiga i lenei Aposetolo ona faasino atu i latou ia Iesu Keriso. Mafaufau e amata le vasega e ala i le faatagaina lea o tagata aoga ua saunia e faasoa ma le vasega mea sa latou aoaoina.

Fesoasoani i tagata aoga e saunia mo le konafesi aoao

Mafaufau e faaaoga pe fetuunai ni vaega o lenei lesona e fesoasoani ai i tagata aoga e saunia mo le konafesi aoao o loo loma. Atonu e aoga le faamamafa atu o le malamalama o tagata aoga e uiga i perofeta ma aposetolo o aso e gata ai ma a latou aoaoga ia Iesu Keriso (mo se faataitaiga, e ala i le fatuina o se suega puupuu e faavae i o latou olaga, e ala i le faia e tagata aoga o se suega puupuu mo le vasega, e ala i le suesueina o nisi o a latou lauga ua tuanai ma vaavaai mo se laina po o se parakalafa o loo molimau mai e uiga ia Iesu Keriso ma Lana misiona, ma isi mea faapena). Atonu foi e fesoasoani mo tagata aoga le talanoaina o auala e saunia ai e faalogo ma faamuamua le konafesi aoao (e pei o le aveesea o mea faalavefau, faaavanoaina o taimi faatulagaina, o mai ma fesili o mafaufauina, ma isi mea faapena).