Mataio 1:1–17

O Iesu o le Mesia Folafolaina

Mataio, faapea foi ona iloa o Levi, o lē na tusia le tusi muamua o le Talalelei po o Evagelia o le Feagaiga Fou. O se tasi o ona faamoemoega i le tusiga o le faaalia lea sa faataunuu e Iesu perofetaga o le Feagaiga Tuai e uiga i le Mesia. I le taimi o lenei lesona, o le a mafai ai ona e aoao e uiga ia Iesu Keriso o le Mesia na folafolaina ma lagona le agaga faafetai sili atu mo Ia.

Tapena mo le vasega. A omai tagata aoga ua saunia mo le vasega, latou te valaaulia le Agaga Paia e aoao i latou ma ua i se tulaga sili atu e fesoasoani ai i le aoaoina o isi tagata aoga. E mafai ona e fesoasoani i tagata aoga e omai saunia mo le vasega i le tele o auala. Saili e faaoo atu le valaaulia i tagata aoga o le a fesoasoani ai e tapena o latou mafaufau ma loto ina ia aoaoina e ala i le Agaga Paia.

Tapenaga a le tagata aoga: Valaaulia tagata aoga e omai i vasega a o mafaufau pe aisea e taua ai Iesu Keriso i ai latou. E mafai foi ona latou fesili i aiga ma uo pe faapefea o latou lagona e uiga i le Faaola.

Gaoioiga e Mafai Ona Fai e Aoao Mai Ai

Aisea e tāua ai Iesu Keriso ia te oe.

Fa’aali se ata o Iesu Keriso, e pei o le ata i le amataga o le lesona.

I o tatou aso, “o loo toatele i latou i luga o le fogaeleele e itiiti sina mea latou te iloa ia Iesu Keriso” (Neil L. Andersen, “Tatou te Tautalatala ia Keriso,” Ensign po o le Liahona, Nov. 2020, 88).

• Aisea e te manatu ai e toatele i latou i luga o le fogaeleele e itiiti se mea ua latou iloa ia Iesu Keriso?

Manatu faapea e tasi sau minute e ta’u ai i se isi e le masani ia Iesu Keriso pe o ai le Faaola ma pe aisea e taua ai o Ia ia te oe? Tusi “Iesu Keriso” i le ogatotonu o le laupepa po o totonu o lau api talaaga. Faataamilo Lona suafa i faamatalaga taua o le a e manao e faasoa i totonu o le 60 sekone lena. Mafaufau e faaopoopo isi faamatalaga i lau pepa i le gasologa o le lesona.

Valaaulia ni nai tagata e ofo mai e faasoa se mea na latou tuuina i luga o a latou pepa. Afai ua mae’a ona fai e tagata aoga le gaoioiga o le tapenaga, mafaufau foi latou te lipoti mai mea ua latou aoaoina i le mafuaaga e taua ai Iesu Keriso i a latou uo po o aiga.

Atonu e te manao e matamata le vitio “O Ai Iesu Keriso? Vaaiga Aoao e 60-Sekone” (1:22), o loo maua i luga o ChurchofJesusChrist.org. A o e matamata ai, mafaufau pe aisea e taua ai pea Iesu Keriso i le lalolagi i aso nei, e oo foi mo i latou e le iloa e uiga ia te Ia.

Na molimau Mataio faapea o Iesu Keriso o le Mesia

Fesoasoani e faailoa atu le Talalelei a Mataio i tagata aoga e ala i le faasoa atu o faamatalaga nei.

E tai pei a o le toatele i le lalolagi i aso nei e lei malamalama lava i le tāua o Iesu Keriso, o le toatele sa ola i taimi o le Faaola latou te lei iloaina Lona taua.

O Mataio o se tasi o Aposetolo e Toasefululua a Iesu Keriso (tagai i le Mataio 10:2–4) ma sa avea ma molimau tino i le tele o mea sa tutupu na ia faamatalaina mai le soifuaga o le Faaola. Sa ia tusia le Talalelei a Mataio e fesoasoani ai i tagata aemaise lava le au Iutaia e lei talitonu i le Faaola, ia iloa Iesu Keriso, pe o ai o Ia. Sa faamamafa patino e Mataio le mea moni faapea o Iesu Keriso o le Mesia folafolaina e ala i le ta’ua soo e perofetaga anamua e uiga i le Mesia faapea na faataunuuina e Iesu Keriso.

Na amata lenei tala a Mataio i le faamaumauina o le talafaasolopito o le aiga o Iesu. Na ia faaaofia ai tagata taua ma faamatalaga auiliili (tagai i le Mataio 1:1–17). Faitau le Mataio 1:16, saili mo le fuaitau “O Iesu, ua ta’ua o Keriso.” Mafaufau e faailoga lena fuaitau i au tusitusiga paia.

• O le a sou iloa e faatatau i le uiga o le faalagiga “Keriso”?

O le upu Eperu mo “Keriso” o le “Mesia.” Faitau le tusiga i le Bible Dictionary “ Mesia ” ina ia aoao atili ai e faatatau i le uiga o lenei faalagiga ma pe aisea sa le talia ai e le toatele o le au Iutaia Iesu o le Keriso.

• O a mea ua aoaoina e uiga i le misiona a le Faaola e ala i le malamalama i Ona faalagiga o “Keriso” ma le “Mesia”?

I aso anamua, sa faauuina tagata e sauniuni ai e faatino ni tiute faapitoa. O le Talalelei a Mataio o loo tumu i faataitaiga a Iesu Keriso o faataunuuina perofetaga anamua o mea sa faauuina o Ia e fai. Vaavaai mo se lua pe tolu o faataitaiga nei i au tusitusiga paia (tagai i le siata lenei). Mafaufau pe aisea na faaalia ai e le Tama Faalelagi faamatalaga e uiga i mea o le a fai e Keriso i le tele o tausaga ae lei afio mai Keriso.

Faaali le siata lenei ina ia mafai e tagata aoga ona sue ia perofetaga ma lo latou faataunuuina.

Perofetaga o le Feagaiga Tuai o le Mesia	Faataunuuina e ala ia Iesu Keriso
O le Mesia o se e tupuga mai ia Aperaamo ma Tavita (tagai i le Ieremia 23:5–6 ; Kenese 22:18).	Mataio 1:1, 6, 17
O le Mesia o le a fanau mai i se taupou (tagai i le Isaia 7:14 ; Alema 7:10).	Mataio 1: 21–23
O le Mesia o le a fanau mai i Petelema (tagai i le Mika 5:2).	Mataio 2:4–6
O le Mesia o le a maliu mai Nasareta (tagai i le 1 Nifae 11:13).	Mataio 2:23
O le a faamalolo e le Mesia e mama’i (tagai i le. Isaia 53:4 ; Mosaea 3:5 ).	Mataio 8:16–17
O le a aoao atu le Mesia e faaaoga ai faataoto (tagai i le Salamo 78:2).	Mataio 13:35
O le a ulufale atu le Mesia i Ierusalema o loo tietie i se asini (tagai i le Sakaria 9:9).	Mataio 21:1–7

Sa tautino atu e Iesu Keriso o Ia o le Mesia

O le isi faataunuuina o le perofetaga i le Feagaiga Tuai o loo tusi faamaumauina i le Luka 4:16–21 . Ina ua asiasi atu Iesu i lona nuumoni o Nasareta, Sa Ia ulu atu i le sunako (lotu) ma faitau mai le tusi a Isaia se valoaga e uiga i le misiona paia a le Mesia. Ina ua uma ona faitau, na folofola atu Iesu e faapea, o Ia o le Mesia e ala i le faapea atu ua faataunuuina nei le valoaga a Isaia.

Faitau le Isaia 61:1–2., vaavaai mo mea na perofeta ane ai Isaia faapea na faauuina le Mesia e faia. Faailoga upu po o fuaitau e te manatu ua faailoa ai e fetaui ia Iesu Keriso le faamatalaina o faamaumauga a Isaia.

Atonu foi e te manao e matamata le vitio “Jesus Declares He Is the Messiah” mai le taimi 0:00 i le 2:05. O loo maua lenei video i le ChurchofJesusChrist.org

• O a upu po o fasifuaitau mai le Isaia 61:1–2. o molimau ia te oe faapea o Iesu Keriso o le Mesia na valo’ia.

• Na faapefea ona faataunuuina e le Faaola se mea o nei perofetaga i lou olaga po o le olaga o se isi e te iloaina?

Faaopoopo i ai faamatalaga auiliili e uiga ia Iesu Keriso i le laupepa na e amata galueaina i le amataga o le lesona. Tali mai fesili nei e fesoasoani e te mafaufau ai i faamatalaga e faaopoopo i ai.

• O a mea ua e aoaoina e uiga ia Iesu Keriso mai nei perofetaga e uiga i le Mesia ma o latou faataunuuga?

• O a mea na afio mai Iesu Keriso i le lalolagi e fai? Aisea e taua ai le malamalama i Lana misiona?

• Aisea e taua ai Iesu Keriso ia te oe?

Tuu i tagata aoga se avanoa e faasoa ai po o a mea na latou aoaoina e uiga i le Mesia. E mafai ona latou faaaoga se minute pe lua e faasoa ai nisi o faamatalaga auiliili sa latou faaopoopo i a latou pepa ma tuuina mai molimau ia Iesu Keriso.

Tala ma Faamatalaga o Talaaga

Aisea e tāua ai pea Iesu Keriso i aso nei?

Na faasoa mai e Elder Neil L. Andersen o le Korama a Aposetolo e Toasefululua le molimau lenei ia Iesu Keriso:

E faapei o se fetu taiala i se lagi manino, ma pouliuli, e faamalamalama e Iesu Keriso lo tatou ala. Na afio mai o Ia i le lalolagi i se fale o manu faatauvaa. Sa soifua o Ia i se olaga lelei atoatoa. Sa Ia faamalolo i e mamai ma faatulai i ē na oti. Sa avea o Ia o se uo i e na tuulafoaiina. Sa Ia aoao mai i tatou ia fai mea lelei, ia usitai, ma ia alofa le tasi i le isi. Na faasatauroina o Ia i luga o se satauro, ma toetu mamalu mai ina ua mavae aso e tolu, ua faatagaina ai i tatou ma ē tatou te alolofa i ai ina ia ola ai i tala atu o le tuugamau. Faatasi ai ma Lona alofa mutimtuivale ma le alofa tunoa e le mafaatusalia, na Ia tauave i Ona luga a tatou agasala ma o tatou puapuaga, aumaia ai le faamagaloga pe a tatou salamo ma le filemu i afā o le olaga. Tatou te alolofa ia te Ia. Tatou te tapuai ia te Ia. Tatou te mulimuli ia te Ia. O Ia o le taula o o tatou agaga.

(Neil L. Andersen, “Tatou Tautalatala ia Keriso,” Ensign po o le Liahona, Nov. 2020, 88)

Aisea e tāua tele ai faapea o Iesu Keriso sa tupuga mai ia Tavita?

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua:

E leai se manatu faavae e tasi sa sili atu ona ta mau i mafaufau o Iutaia i ona po o Iesu nai lo taitonuga lautele faapea o lo tatou Mesia le Alo o Tavita. Sa latou vaavaai atu mo se laveai faaletino o se o le a lafoeseina le amo o le nofopologa a Roma ma toe faasaolotoina Isaraelu. Sa latou sailia se pule o le a toefuatai maia lena mamalu ma le faatosinaga ma le malosiaga i le lalolagi atoa lea sa olioli ai i le taimi sa nofoia ai e le Atalii o Iese le nofoalii o Isaraelu.

(Bruce R. McConkie, The Promised Messiah [1978], 188)

O ai fafine na faaaofia ai e Mataio i le gafa o Keriso?

“Tamara sa sau mai Atulama o eleele o sa Kanana (tagai i le Kenese 38); Ra’ava o se sa Kanana o Ieriko (tagai i le Iosua 2:1–7 ); O Ruta o se sa Moapi a o lei liliu atu ia sa Iuta (tagai i le Ruta 1-4); ma Patisepa sa faapea o le ava a Uria, le sa Heti (tagai i le 2 Samuelu 11:3). O lea, o [fafine] uma e toafa e le o ni tagata Isaraelu pe faifaimea ma tagata e le o ni tagata Isaraelu” (Tusi Lesona a Tagata Aoga o le Feagaiga Fou [2018], 13). O le faaaofia ai o nei fafine i le gafa o Iesu Keriso e mafai ona aoao mai ai tatou faapea o le Atua e galue faatasi ma tagata uma ma e ala i auala e lei mafaufauina.

O loo faamaonia foi faapea “o lou lava amiotonu e le faalagolago i luga o tupuaga atoatoa, aua e lei ‘atoatoa’ le gafa o Iesu Keriso. [Ma] o le aofia ai o fafine i le [talafaasolopito o le aiga o le Faaola] e atagia ai le tāua o le mea moni e faapea o alii ma tamaitai e tutusa uma i le silafaga a le Atua” (Tusi Lesona a Tagata Aoga o le Feagaiga Fou, 13).

Gaoioiga Faaaopoopo e Aoao Mai Ai

Malamalama i le tāua o Iesu Keriso

Tuu atu i tagata aoga le ata faataitai lenei ma fesili:

O loo fai se lua talanoaga ma se uo, o le ua fai atu ia te oe: “Ou te le malamalama pe aisea e manatu maualuga ai isi tagata ia Iesu Keriso. E tele naua tagata maualuluga i le lalolagi; Ou te leiloa se mea lelei e sii maualuga ai Iesu i luga atu o isi.”

• Faamata o le a lau tali muamua atu i le faamatalaga a lau uo?

• O le a sou manatu o le a se mea e le o malamalama ai lau uo ia Iesu Keriso?