Mātiu 18:21–35

Ko e Talanoa Fakatātā ʻo e Tamaioʻeiki Taʻefakamolemolé

ʻI ha tali ki ha fehuʻi naʻe fai ʻe Pita fekauʻaki mo e fakamolemolé, naʻe akoʻi ai ʻe Sīsū Kalaisi ʻa e talanoa fakatātā ʻo e tamaioʻeiki taʻefakamolemolé. ʻE lava ke tokoni ‘a e lēsoni ko ʻení ke ke hoko ʻo hangē ange ko e Tamai Hēvaní mo Sīsū Kalaisi ʻi hoʻo feinga ke fakamolemoleʻi e niʻihi kehé.

Vahevahe ha ngaahi fakamatala mo ha ngaahi talanoa moʻoni. Ke tokoni ke fakatupulaki e mahuʻingaʻia ʻa e kau akó ʻi ha lēsoní, fakakaukau ke vahevahe ha ngaahi talanoa moʻoni pe ngaahi fakamatala mei he moʻui ʻa e kau palōfitá mo e hisitōlia ʻo e Siasí pea pehē ki he ngaahi lea ʻo e konifelenisi lahí, ngaahi makasini ʻa e Siasí, pe ko hoʻo moʻuí. ʻE lava ke fakatupulaki ʻe he ngaahi talanoa ko ʻení ʻa e tui ʻa e kau akó ki he ongoongolelei ʻo Sīsū Kalaisí ʻaki hono tokoniʻi kinautolu ke mahino ʻa e ongoongoleleí ʻo fakafou ʻi he ngaahi aʻusia ʻa e niʻihi kehé.

Teuteu ʻa e tokotaha akó: ʻOku pehē ʻe he ʻEikí ʻi ha potufolofola fakataukei fakatokāteline, “ʻOku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē” ( Tokāteline mo e Ngaahi Fuakava 64:10). Fakaafeʻi e kau akó ke fakalaulauloto ki he ʻuhinga ʻoku fekauʻi ai kitautolu ʻe Sīsū Kalaisi ke tau fefakamolemoleʻakí. ʻE lava foki ke ʻaonga ke fakaafeʻi e kau akó ke nau lau ʻa e Tokāteline mo e Ngaahi Fuakava 64:9–11 pea fakakaukau ki he pōpoaki ʻa e ʻEikí ʻi he ngaahi veesi ko iá.

Ngaahi ʻEkitivitī Ako ʻOku Ala Fakahokó

ʻI he lolotonga ʻo e lēsoni ko ʻení, tokanga ki he kau ako ʻoku nau faingataʻaʻia ke fakamolemoleʻi ha taha kuó ne fakamamahiʻi kinautolú. Fakakaukau ke fakaʻaongaʻi ha niʻihi ʻo e ngaahi fakamatala ʻoku maʻu ʻi he konga “Ngaahi Fakamatala Fakamahinó mo e Puipuituʻá” ʻe ala tokoni ki he kau ako ʻoku nau fehangahangai mo e ngaahi tūkunga peheé.

“Te ke fakamolemoleʻi nai au?”

Lolotonga e Tau Lahi Hono II ʻa Māmaní, naʻe lau māhina e faingataʻaʻia ha fefine ko Koli teni Pumi hono hingoá ʻi ha nofo kemi ʻa e kau Nasí ʻi Lavenisipuluki, Siamane. Naʻe mālōlō ai hono tokoua ko Petisií. Hili e taú, naʻe lea ʻa Koli ki ha falukunga kakai fekauʻaki mo e fakamolemole ʻa e ʻOtuá. Naʻe fakamatala ʻe Pīsope Kifi B. Mekimalini, naʻe ʻi he Kau Pīsopeliki Pulé kimuʻa, ʻa e meʻa naʻe hoko hili ʻene leá. ʻI hoʻo laú, fakakaukau ki ha ngaahi founga naʻe mei fili mei ai ʻa Koli ke ne fai.

Naʻe haʻu kiate ia ha tangata. Naʻá ne fakatokangaʻi ko e taha ia ʻo e kau leʻo angakovi taha ʻi he ʻapitangá. Naʻá ne pehē ange, “Naʻe kau ʻa Lēvenisipuluki ʻi hoʻo leá. “Naʻá ku leʻo ai. … Kae talu mei ai mo ʻeku hoko ko e Kalisitiane.” Naʻá ne fakamatala ʻo pehē naʻá ne fekumi ki he fakamolemole ʻa e ʻOtuá ʻi he ngaahi meʻa taʻeʻofa naʻá ne fakahokó. Naʻá ne mafao mai hono nimá. “Fakamolemoleʻi muʻa au?” [Corrie ten Boom, Tramp for the Lord (1974), 56].

(Keith B. McMullin, “Ko e Hala ʻo Hotau Fatongiá,” Ensign pe Liahona, Mē 2010, 13)

• Ko e hā ha ngaahi fakakaukau naʻe fakakaukau ki ai ʻa Koli ʻi he momeniti ko iá?

• Ko e hā ha ʻuhinga ʻoku faʻa faingataʻa ai ke fakamolemoleʻi ʻa e niʻihi kehé?

Lau ʻa e Mātiu 18:21–22 ke ʻilo pe naʻe tali fēfē ʻe Sīsū ha fehuʻi naʻe fai ʻe Pita fekauʻaki mo e fakamolemolé.

• Te ke fakamatalaʻi fēfē ʻa e meʻa naʻe akoʻi ‘e Sīsū kia Pitá?

• ʻOkú ke pehē ko e hā e ʻuhinga ʻoku fekauʻi ai ʻe he ʻEikí ke tau hoko ko e kakai faʻa fakamolemolé?

Neongo ʻoku lahi ha ngaahi tefitoʻi moʻoni mahuʻinga fekauʻaki mo e fakamolemolé, ka ʻoku nofotaha ʻa e lēsoni ko ʻení ʻi heʻetau fakaʻamu ke fakamolemoleʻi ‘a e niʻihi kehé ʻo hangē ko hono fakamolemoleʻi kitautolu ʻe Sīsū Kalaisí. Makatuʻunga ʻi he ngaahi tali ʻa e kau akó ki he fehuʻi hokó, fakakaukau ke fulihi e lēsoní ke feau ʻenau ngaahi fiemaʻú.

• Ko e hā haʻo ngaahi fehuʻi ʻokú ke maʻu fekauʻaki mo e fekau ʻa e Fakamoʻuí ke tau fakamolemoleʻi ‘a e niʻihi kehé?

Fakakaukau ki he ngaahi ongo ʻokú ke maʻu fekauʻaki mo e fakamolemolé. ʻOku ʻi ai nai ha taha ʻoku faingataʻa ke ke fakamolemoleʻi? Hiki ʻi hoʻo tohinoa akó ʻa e founga ʻe tāpuekina ai hoʻo moʻuí kapau te ke lava ʻo fakamolemoleʻi ʻa kinautolu ne nau fakaʻitaʻi koé. Fakakaukau foki ke lēkooti ʻa e founga naʻe mei kehe ai hoʻo moʻuí kapau naʻe ʻikai ke ke feinga ke fakamolemoleʻi ʻa e niʻihi kehé.ʻI hoʻo ako ha talanoa fakatātā naʻe vahevahe ʻe he ʻEikí mo Pitá, kumi e founga ʻe lava ai ʻe he finangalo lelei ʻa e ʻEikí ke fakamolemoleʻi kitautolú ʻo fakamālohia hoʻo malava ke fakamolemoleʻi e niʻihi kehé.

Ko e Talanoa Fakatātā ʻo e Tamaioʻeiki Taʻefakamolemolé

Lau ʻa e Mātiu 18:23–27, ʻo kumi ki he founga ʻoku fakafeangai ʻaki ʻe he tuʻi ʻi he talanoa fakatātaá ki heʻene tokotaha fakamoʻuá. ʻOku mahuʻinga ke ʻilo ko e talēniti ʻe 10,000 ko ha moʻua ia ʻoku ʻikai lava ke totongi. Naʻe mei fie maʻu ha tangata ngāue masiva ʻi he kuonga ʻo Sīsuú ha taʻu ʻe 250,000 tupu ke maʻu ʻa e paʻanga lahi ko iá (vakai Jay A. Parry and Donald W. Parry, Understanding the Parables of Jesus Christ [2006], 95).

• ʻOkú ke pehē ko e hā ʻe fakaʻaongaʻi ai ʻe Sīsū Kalaisi ha moʻua ʻoku ʻikai lava ke totongí ke akoʻi ʻaki ʻa e talanoa fakatātā ko ʻení?

Lau ʻa e toenga ʻo e talanoa fakatātaá ʻi he Mātiu 18:28–35, ʻo kumi e founga ʻoku totonu ke tau fakafeangai aí pea mo hono ʻuhingá. ʻOku tokoni ke ʻilo ko e tenali ʻe 100 ‘oku fakafuofua ia ko e “vahe māhina ʻe tolu ia ʻo ha tangata ngāue masivá” ( veesi 28, futinouti a).

• Ko e hā ʻokú ke ako fekauʻaki mo e fakamolemolé mei he talanoa fakatātā ko ení?

• Ko e hā ʻoku mahuʻinga ai ke mahino ʻa e lahi ʻo e ʻaloʻofa ʻoku foaki mai ʻe he Fakamoʻuí maʻatautolú?

Ko e moʻoni ʻe taha te tau lava ʻo ako mei he talanoa fakatātā ko ʻení ʻe lava ke tau muimui ki he sīpinga ʻa Sīsū Kalaisí ʻaki hono fakamolemoleʻi e niʻihi kehé ʻo hangē ko ʻEne fakamolemoleʻi kitautolú.

Naʻe toe fakamamafaʻi ʻe he ʻEikí ʻa e mahuʻinga hono fakamolemoleʻi ʻo e niʻihi kehé ʻi hotau kuongá. Lau ʻa e Tokāteline mo e Ngaahi Fuakava 64:9-11, ʻo kumi e ngaahi akonaki ʻa e ʻEikí fekauʻaki mo e fakamolemolé.

• Makatuʻunga ʻi he meʻa kuó ke ako ‘i he ʻaho ní, ʻokú ke pehē ko e hā ʻoku fie maʻu ai ʻe he ʻEikí ke tau fakamolemoleʻi ʻa e kakai kotoa pē?

ʻE lava ke tokonia kitautolu ʻe Sīsū Kalaisi ke tau fakamolemoleʻi e niʻihi kehé

ʻOku faingataʻa he taimi ʻe niʻihi ke fakamolemoleʻi ‘a e niʻihi kehé. Ka ʻi he tokoni ʻa e Fakamoʻuí, ʻoku malava ʻa e meʻa kotoa pē.

ʻI hoʻo lau ʻa e fakaʻosinga ʻo e talanoa ʻa Pīsope Mekimalini fekauʻaki mo e fehangahangai ʻa Koli mo ʻene tangata leʻo ʻi he falepōpulá, kumi ki he founga naʻe foaki ange ai ʻe he Fakamoʻuí ʻa e mālohi ke ne lava ‘o fakamolemoleʻí.

Mahalo te ke fie mamata ʻi he foʻi vitiō “Ko e Hala ‘o hotau Fatongiá,” ʻoku maʻu ʻi he ChurchofJesusChrist.org, mei he taimi 2:16 ki he 3:26.

“Mahalo naʻe lau sekoni pē ʻene tuʻu aí—ʻo mafao mai hono nimá—ka naʻe hangē ia kiate au ha ngaahi houa lahí ʻi heʻeku fāinga mo e meʻa faingataʻa taha naʻe pau ke u faí.

“… Ko e pōpoaki ko ia ʻoku faʻa fakamolemole ʻa e ʻOtuá ʻoku ʻi ai e meʻa ʻoku … tuʻunga ia ʻi ai: ke tau fakamolemoleʻi ʻa kinautolu naʻa nau fakalaveaʻi kitautolú. …

“… Ne u lotu fakalongolongo pē, ʻTokoni mai!’ ‘Te u lava pē ʻo hiki hake hoku nimá. Te u lava pē ʻo fai ia. Kuo pau ke ke ʻomi ʻe koe ʻa e ongoʻi fie fakamolemolé.’

“… Ne u ongoʻi ongonoa ʻi heʻeku mono atu hoku nimá ki he nima naʻe mafao mai kiate aú. ʻI heʻeku fai iá, naʻe hoko ha meʻa fakaofo. Naʻe kamata pē ʻa e mālohi ʻo e ongó ʻi hoku umá ʻo lele hifo ki hoku nimá, ʻo aʻu ki homa ongo nima ne fepukeʻakí. Hili iá naʻe hangē ʻoku fakafonu kotoa hoku sinó ʻe he māfana fai fakamoʻui ko ʻení, ʻo tō ai hoku loʻimata.

Ne u tangi mo pehē ange, ʻʻOku ou fakamolemoleʻi koe, ‘aki hoku lotó kotoa.ʼ

“Ne ma fepukeʻaki nima ʻi ha momeniti, ko e tokotaha naʻe hoko ko e leʻó pea [mo e tokotaha] naʻe nofo pōpulá. Ne teʻeki ai ke lahi pehē fau haʻaku ongoʻi e ʻofa ʻa e ʻOtuá, kimuʻa ʻo hangē ko e taimi ko ʻení” [Corrie ten Boom, Tramp for the Lord (1974), 54–55].

(Keith B. McMullin, “Ko e Hala ʻo Hotau Fatongiá,” Ensign pe Liahona, Mē 2010, 13)

• Ko e hā naʻá ke ako mei he aʻusia ʻa Kolí ʻe lava ʻo tokoni atu ke ke fakamolemole ʻi he taimi ʻoku faingataʻa aí?

• Ko e hā kuó ke ako mei hoʻo moʻuí, moʻui ʻa e niʻihi kehé, pe ko e folofolá fekauʻaki mo e founga ke fakamolemoleʻi ai e niʻihi kehé ʻi he taimi ʻoku faingataʻa aí?

Ko e meʻa ʻe taha ʻe lava ʻo tokoni kiate kitautolu ʻi heʻetau ako e folofolá ko ʻetau ako mei he folofolá pea fekumi leva ke fakatupulaki e ngaahi ʻulungaanga ʻo Sīsū Kalaisí. Ko e Mātiu 18:21–35 ko e taha ia ʻo e ngaahi potufolofola lahi ʻokú ne fakahā ʻa e natula fakamolemole ʻo e Fakamoʻuí pea mo e fakamaau totonu ʻa e ʻOtuá ʻi he taimi ʻoku tau fili ai ke ʻoua te tau fakamolemolé. Fakakaukau ki he meʻa te ke lava ʻo fai ke ke hoko ai ko ha tokotaha faʻa fakamolemole ange hangē ko Sīsū Kalaisí. Te ke fakaafeʻi fēfē ʻa e Fakamoʻuí ke tokoni kiate koe?

Fakamatala Fakamahinó mo e Puipuituʻá

Mātiu 18:24 . Ko e hā e lahi ʻo e paʻanga ʻoku talēniti ʻe 10,000?

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku kehekehe pē fakamatala ʻa e kau potó fekauʻaki mo e mahuʻinga fakapaʻanga hení—pea kātaki pē ʻa e mahuʻinga fakapaʻanga ʻAmeliká—ka ke faingofua ki heʻetau talanoa fiká, kapau ko e tenali siʻisiʻi ne ʻikai lava ʻo fakamolemoleʻí, tau pehē, ko e $100 he taimí ni, ta ʻoku fakaofi atu e moʻua talēniti ʻe 10,000 ia ne fakamolemoleʻí, he $1 pilioná—pe lahi ange!

ʻI he moʻua fakatāutahá, ko ha mataʻifika lahi moʻoni ia—mahulu hake he meʻa ʻoku tau ʻiló. (ʻIkai lava ha taha ia ʻo fakatau lahi pehē!) Ka ko e taumuʻa ʻo e talanoa fakatātaá ni, ʻoku fakataumuʻa ia ke mahulu hake heʻetau mahinó; ʻoku fakataumuʻa ia ke mahulu hake he meʻa ʻoku tau lavá, pea mahulu hake he meʻa ʻoku tau malava ke totongi fakafokí. ʻOku ʻuhinga iá, he ʻoku ʻikai ko e ʻuhinga e talanoá ki he vākovi ʻa ha ongo tamaioʻeiki ʻi he Fuakava Foʻoú. Ka ʻoku ʻuhinga ia kiate kitautolu, ko ha fāmili hinga ʻo e tangatá—ʻoku ʻi ai hotau moʻua he matelié, ko e kau maumaufono, mo e kau pōpula kotoa kitautolu. ʻOku ʻi ai hotau moʻua kotoa, pea ko e tauteá ke tau ngāue pōpula kotoa. Pea ne tau mei nofo pehē ai pē ka ne taʻe ʻoua e ʻaloʻofa ha Tuʻi naʻá Ne fakatauʻatāinaʻi kitautolu koeʻuhí pē ko ʻEne ʻofa ʻiate kitautolú mo ʻEne “ʻaloʻofa kiate [kitautolú]” [ Tokāteline mo e Ngaahi Fuakava 121:4 ].

(Jeffrey R. Holland, “Ko Ia Ke Haohaoa ʻA Kimoutolu,” Ensign pe Liahona, Nōvema 2017, 41)

ʻOku ʻuhinga nai ʻa e ongoʻi mamahi koeʻuhí ko e meʻa naʻe fai mai kiate aú kuo teʻeki ai ke u fakamolemoleʻi ha taha?

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ka neongo ia, ʻoku mahuʻinga ke fakatokangaʻi ʻe hamou niʻihi ʻoku fuʻu moʻui loto-mamahi ʻa e meʻa naʻe ikai ke Ne folofola ʻakí. Naʻe ʻikai ke Ne pehē, ʻʻOku ʻikai ngofua ke mou ongoʻi ʻa e mamahi moʻoní pe loto-mamahi moʻoní, ʻi he ngaahi aʻusia fakamamahi mei he nima ʻo ha taha.”

(Jeffrey R. Holland, “Ko e Ngāue ʻo e Fakaleleí,” Ensign pe Liahona, Nōvema 2018, 79)

Naʻe akoʻi ʻe ʻEletā Tēvita E. Sōleniseni ʻo e Kau Fitungofulú ha foʻi moʻoni mahuʻinga fekauʻaki mo e fekau ke fakamolemolé.

ʻOku ou loto ke fakamahino heni ʻoku ʻikai totonu ke fetoʻoaki ʻa e fakamolemoleʻi ʻo e ngaahi angahalá mei hono fakaoleoleʻi ʻo e koví. … Neongo kuo pau ke tau fakamolemoleʻi ha kaungāʻapi ʻokú ne fakalaveaʻi kitautolu, ka ʻoku totonu ke tau kei ngāue mālohi pē ke taʻofi ‘a e toutou hoko ha lavea pehē.

(David E. Sorensen, “Forgiveness Will Change Bitterness to Love,” Ensign pe Liahona, May 2003, 12)

 

 

Ko e hā e ʻuhinga ʻa e Fakamoʻuí ʻi Heʻene folofola kia Pita ke fakamolemoleʻi e niʻihi kehé ke “liunga fitungofulu lau ʻe fitú”? ( Mātiu 18:22)

Naʻe fakamatalaʻi ‘e ‘Eletā Lini. G. Lōpini, naʻe ‘i he Kau Pālesitenisī ʻo e Fitungofulú kimuʻa ‘o pehē:

Naʻe talaange ʻe he Fakamoʻuí kia Pita ʻi Heʻene talí ke ʻoua ʻe toe lau—ke ʻoua ʻe fokotuʻu ha fakangatangata ʻi he fakamolemolé.

Ko hono moʻoní, naʻe ʻikai ko hano fokotuʻu ange ʻe he Fakamoʻuí ke ngata ʻi he tuʻo 490. He ʻe tatau ia mo ha pehē ʻoku fakangatangata e maʻu sākalamēnití ki he 490, pea ʻi hono tuʻo 491, ʻe fakatonutonu mai ʻe ha ʻaotita fakalangi ʻo pehē “Kātaki, kuo ʻosi hoʻo kaati fakatomalá—mei heni ʻo faai atu, te ke fetakai tokotaha pē.”

Naʻe ngāue ʻaki ʻe he ʻEikí ʻa e fika ʻo e liunga fitungofulú ko ha fakatātā ʻo ʻEne Fakalelei taʻe-fakangatangatá, ʻo ʻEne ʻofa taʻe-hano ngataʻangá, mo ʻEne ʻaloʻofa taʻefakangatangatá. “ʻIo, pea ʻo ka fakatomala maʻu pē ʻa hoku kakaí te u fakamolemoleʻi ʻa kinautolu ʻi heʻenau ngaahi angahala kiate aú” [ Mōsaia 26:30 ; tānaki atu ʻa e fakamamafa].

(Lynn G. Robbins, “Kae Liunga Fitungofulu Lau ʻe Fitu,” Ensign pe Liahona, Mē 2018, 23)