Christ seated in the home of Mary and Martha. Mary kneels at Christ’s feet, her hands clasped in her lap. Martha stands at Mary’s side. Martha is holding a mixing bowl and spoon in her hands. She is looking at Christ. A stone arched doorway is in the background.
ʻI he taimi naʻe faiako ai ʻa Sīsū ʻi he ʻapi ʻo Māʻatá, naʻe ʻi ai ha faingamālie ke Ne akoʻi fekauʻaki mo e mahuʻinga ʻo hono fakamuʻomuʻa ʻEne ngaahi akonakí ʻi heʻetau moʻuí. ʻE lava ke tokoni atu ʻa e lēsoni ko ʻení ke ke ako ke ʻiloʻi ʻa e ngaahi fili mo e ngaahi ʻekitivitī ʻe tokoni atu ke hoko ʻa Sīsū Kalaisi mo ʻEne ongoongoleleí ko e uho hoʻo moʻuí.
Teuteu ʻa e tokotaha akó: Fakaafeʻi e kau akó ke nau hiki ha lisi ʻo e ngaahi ʻekitivitī ne nau fai ʻi ha ʻaho pē ʻe taha kimuʻa he lēsoni ko ʻení pea ʻomi ʻenau lisí ki he kalasí.
Ngaahi ʻEkitivitī Ako ʻOku Ala Fakahokó
Ngaahi meʻa ʻoku fakamuʻomuʻá
Fakakaukau ke ʻomi ki he kalasí ha faʻoʻanga meʻa mo ha ngaahi foʻi maka lalahi kehekehe. Fakapapauʻi ke ʻomi ha ngaahi maka lahi ange ʻe lava ʻo hao ʻi he faʻoʻanga meʻa naʻá ke ʻomí. Fakaafeʻi ha tokotaha ako ke feinga ke faʻo e ngaahi foʻi maká ki he lahi taha ʻe lavá ʻi he faʻoʻanga meʻá. Fai ʻa e fehuʻi ko ʻení: “Kapau ʻoku fakafofongaʻi ʻe he ngaahi foʻi maka ko ʻení ha ngaahi ʻekitivitī ʻe lava ke tau fai ʻi ha ʻaho, ʻe fakafehoanaki fēfē nai ʻa e lēsoni fakataumuʻa ko ʻení ki heʻetau moʻuí?”
ʻOku tau fai ha ngaahi fili lahi ʻi he ʻaho kotoa pē fekauʻaki mo e founga ke fakaʻaongaʻi ai hotau taimí.
Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ‘o pehē:
ʻĪmisi
Official Portrait of President Dallin H. Oaks taken March 2018.
Ko e tokolahi taha ʻo kitautolú ʻoku lahi ange ʻa e ngaahi meʻa ʻoku ʻamanaki mai ke tau faí ʻi he meʻa ʻoku tau lava ʻo faí. … ʻOku tau fehangahangai mo ha ngaahi fili lahi ʻi he meʻa te tau fai ʻaki hotau taimí mo e ngaahi maʻuʻanga tokoni kehé.
(Dallin H. Oaks, “Good, Better, Best,” Ensign pe Liahona, Nōvema 2007, 104)
Kapau ʻe fakakakato ʻe he kau akó ʻa e ʻekitivitī teuteu kuo fokotuʻu atú, fakaafeʻi kinautolu ke nau vakai ki he lisi naʻa nau faʻú.
Fakakaukau pe ko e fē ʻi he ngaahi fakamatala ko ʻení ʻokú ne fakamatalaʻi koé (te ke lava ʻo fili lahi ange he tahá).
ʻOku ou fokotuʻu ha taimi ki he ngaahi ʻekitivitī fakalaumālié mo fakatuʻasinó fakatouʻosi.
ʻOku ou fie muimui ki he Fakamoʻuí ka ʻoku ou faʻa ongoʻi femoʻuekina ʻi he ngaahi ngāue kehé.
ʻOku fakatefito ʻeku moʻuí ʻia Sīsū Kalaisi.
ʻOku ʻikai ke u fie tuku ha taimi ke u toe ofi ange ai kia Sīsū Kalaisi.
Lolotonga e lēsoni ko ʻení, te ke ako fekauʻaki mo ha fakamatala fakafolofola ʻokú ne akoʻi ʻa e mahuʻinga ʻo hono fokotuʻu ʻa Sīsū Kalaisi ko e uho ʻo ʻetau moʻuí. Tokanga ki he ngaahi ueʻi mei he Laumālie Māʻoniʻoní ʻe lava ʻo tokoni ke mahino kiate koe ʻa e founga ke fakamuʻomuʻa taha ai ʻa Sīsū Kalaisí.
ʻOku Akoʻi ʻe he Fakamoʻuí ʻa Mele mo Māʻata
ʻI he taimi ne fononga ai ʻa e Fakamoʻuí ki Pētaní, naʻá Ne ʻaʻahi ki he ʻapi ʻo ha fefine ko Māʻata, ko ha ākonga faivelenga mo mateaki.
Lau ʻa e Luke 10:38–42, pea tokanga ki he meʻa ʻokú ke ako mei he sīpinga mo e ngaahi lea ʻa e Fakamoʻuí. Mahalo ʻe tokoni ke ʻilo ko e foʻi lea femoʻuekiná ʻoku ʻuhinga ia ke loto-moʻua pe ongoʻi mafasia.
Ko e hā ʻoku akoʻi mai ʻe he fakahaá ni fekauʻaki mo e Tamai Hēvaní mo ʻEne palani maʻatautolú?
Ko e hā e founga naʻe feʻunga ai e fili ʻa Melé ki he tūkunga ko ʻení?
Ko e moʻoni ʻe taha te tau lava ʻo ako mei he talanoa ko ʻení ʻoku totonu ke fakamuʻomuʻa taha ʻi heʻetau moʻuí ʻa e ngaahi fili ko ia ʻokú ne ʻomi kitautolu ke tau ofi ange kia Sīsū Kalaisí.
ʻOkú ke pehē ko e hā ʻoku finangalo ai e Tamai Hēvaní ke tau fokotuʻu Hono ʻAlo ko Sīsū Kalaisí ko e uho ʻo ʻetau moʻuí?
Neongo naʻe mei lava pē ke tokoni ʻa Mele ki he niʻihi kehé, ka naʻá ne fili ke ako meia Sīsū Kalaisi, ʻa ia ko e meʻa mahuʻinga taha ia naʻá ne mei lava ʻo fai ʻi he taimi ko iá (vakai, Luke 10:42).
Naʻe fakamatala ʻe Palesiteni Tāleni H. ʻOakesi ʻa e founga ʻoku tau fehangahangai kotoa ai mo ha ngaahi fili tataú:
ʻĪmisi
Official Portrait of President Dallin H. Oaks taken March 2018.
ʻOku ʻikai ko ha ʻuhinga lelei ʻetau fai ha faʻahinga meʻa koeʻuhí pē he ʻoku lelei e meʻa ko iá. ʻOku lahi ʻaupito e ngaahi meʻa lelei ʻe lava ke tau faí ʻi he taimi ʻoku tau maʻu ke fakahoko ai kinautolú. ʻOku ʻi ai ha ngaahi meʻa ʻoku mahulu ange ia ʻi he leleí pea ko e ngaahi meʻa ia ʻoku totonu ke tau fuofua tokanga ki aí.
(Dallin H. Oaks, “Good, Better, Best,” Ensign pe Liahona, Nōvema 2007, 104)
Fakakaukau ke faʻu ha tēpile kōlomu ʻe ua ʻi he palakipoé mo e ngaahi ʻuluʻi tohi ko e Mahuʻinga Siʻisiʻi Ange mo e Mahuʻinga Lahi Ange.Hili iá pea hiki e tali ʻa e kau akó ki he ngaahi fehuʻi ko ʻení ʻi lalo ʻi he kōlomu totonú.
Ko e hā ha niʻihi ʻo e ngaahi meʻa siʻisiʻi ange ʻi hoʻo moʻuí te ne lava ʻo tohoakiʻi koe meia Sīsū Kalaisí?
Ko e hā ha ngaahi fili te ke lava ʻo fai te ne ʻomi koe ke ke ofi ange ai kia Sīsū Kalaisi?
Ko e hā te ne lava ʻo tokoniʻi koe ke ke fai ʻa e ngaahi fili mahuʻinga taha ʻokú ke fakamuʻomuʻa tahá?
Kapau naʻe fakaʻaongaʻi ʻa e ʻekitivitī maká ʻi he lēsoní, ʻe lava ke fakaafeʻi ʻa e kau akó ke nau tohi ʻi he ngaahi foʻi maká ha niʻihi ʻo e ngaahi ʻekitivitī ʻoku hiki ʻi he palakipoé. Te nau lava ʻo hiki ha ngaahi ʻekitivitī ʻokú ne ʻomi kinautolu ke nau ofi ange kia Sīsū Kalaisí ʻi he ngaahi maka lahi tahá pea ʻi he ngaahi maka lotolotó pe siʻisiʻí ʻa e ngaahi ʻekitivitī mahuʻinga siʻisiʻi angé. ʻE lava leva ke ʻuluaki faʻo ʻe he kau akó ʻa e ngaahi foʻi maka lalahi angé ʻi he faʻoʻanga meʻá, ʻo hokohoko atu ai pē ki he fanga foʻi maka iiki angé kae ʻoua kuo ʻikai toe ʻi ai ha feituʻu ʻi he faʻoʻanga meʻá.
Ko e hā ha ngaahi tāpuaki kuó ke aʻusia ʻi hoʻo feinga ke fakatefito hoʻo moʻuí ʻia Sīsū Kalaisí?
Faʻu ha palani
Kapau kuo ʻosi faʻu ʻe ha kau ako ʻe niʻihi ha lisi ʻo ʻenau ngaahi ʻekitivitī fakaʻahó ko e teuteu ki he kalasí, liliu e ngaahi fakahinohino ko ʻení ʻo fakatatau ki ai.
Hiki ha lisi ʻo hoʻo ngaahi ʻekitivitī fakaʻaho angamahení, pea fakapapauʻi ʻa e ngaahi ʻekitivitī ʻoku tokoni atu ke ke ofi ange ai ki he Fakamoʻuí. Fakakaukau ki ha faʻahinga meʻa pē te ke lava ʻo tānaki pe toʻo ʻo fakatatau mo e meʻa naʻá ke ako mo ongoʻi he ʻaho ní. Faʻu ha palani pau ki he meʻa te ke fai ke fakatefito kakato ange ai hoʻo moʻuí ʻi he Fakamoʻuí.
Fakakaukau ke fakaafeʻi ha kau fie vahevahe ke nau vahevahe ʻenau palaní. Kumi ha ngaahi founga ke fakahīkihikiʻi ai e kau akó ʻi he ngaahi meʻa kuo nau fai ke tokanga taha ai ki he Fakamoʻuí. Vahevahe hoʻo fakamoʻoni fekauʻaki mo e ngaahi tāpuaki ʻoku maʻu mei hono fakatefito ʻetau moʻuí ʻi he Fakamoʻuí.
Fakamatala Fakamahinó mo e Puipuituʻá
ʻOku feinga fēfē ʻa Sētane ke taʻofi kitautolu mei hono fakaʻaongaʻi fakapotopoto hotau taimí?
Naʻe pehē ʻe Palesiteni Sitīveni W. ʻOueni, ko e Palesiteni Lahi mālōlō ʻo e Kau Talavoú:
ʻĪmisi
Brother Stephen W. Owen Young Men General President. Official Portrait 2018.
ʻE feinga e filí ke ne fakalotoʻi koe ʻoku ʻikai fie maʻu ha meʻatokoni fakalaumālie pe ʻi heʻene founga olopoto angé, ʻe lava pē ke fakatoloi atu ia. Ko e ʻeiki ia ʻo e fakatutá mo e tupuʻanga ʻo e fakatoloí. Te ne ʻai ha ngaahi meʻa ʻoku ngali mahuʻinga ke ne tohoakiʻi hoʻo tokangá ka ko hono moʻoní, ʻoku ʻikai fuʻu mahuʻinga ia. Te ne feingaʻi koe ke ke “hohaʻa ki ha ngaahi meʻa lahi” pea ngalo ʻiate koe ʻa e “meʻa pē taha [ʻoku] ʻaongá” [ Luke 10:41–42 ].
(Steven W. Owen, “Tui Mateaki, Kae ʻOua ʻe Fakataʻetaʻetui,” Ensign pe Liahona, Nōvema 2019, 13)
Naʻe pehē ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.
ʻOku lahi nai ha ngaahi meʻa fakaʻofoʻofa mo fakafiefia ke fai pe lahi ha ngaahi faingataʻa ʻoku nau ʻohifo koe ʻo faingataʻa ai ke tukutaha e tokangá ʻi he meʻa ʻoku mahuʻingá? ʻI he taimi ʻoku lahi mai ai e ngaahi meʻa ʻo e māmaní, ʻoku faʻa hoko leva e ngaahi meʻa halá ia ko e meʻa mahuʻinga tahá. Pea ʻoku faingofua leva ke ngalo ʻa e tefitoʻi taumuʻa ʻo e moʻuí. ʻOku maʻu ʻe Sētane ha meʻangāue mālohi ke fakaʻaongaʻi ki he kakai leleí. Ko e tohoakiʻi e tokangá. Te ne ʻai ke fakafonu ʻe he kakai leleí ʻenau moʻuí ʻaki e “ngaahi meʻa leleí” koeʻuhí kae ʻikai ha feituʻu ki he ngaahi meʻa mahuʻingá. Kuo maʻu nai koe ʻi he tauhele ko iá kapau naʻe ʻikai ke ke ʻilo?
(Richard G. Scott, “First Things First,” Ensign, Mē 2001, 7)
Ko e hā ha ngaahi fakatuʻutāmaki ʻo hono fakamāuʻi e ngaahi fili ʻa ha taha kehé?
Naʻe pehē ʻe Palesiteni Poni D. Pākini, ko ha Palesiteni Lahi mālōlō ʻo e Fineʻofá:
ʻĪmisi
Former official portrait of Bonnie D. Parkin, general president of the Relief Society, 2002. Released at April 2007 general conference.
ʻI he fie maʻu ko ia ʻe Māʻata ha tokoní, naʻe ʻikai ha lau ki ai ka ko ha loto-fakamaau mahino: “ʻOku moʻoni au; ʻoku hala ia.”
ʻOku tau fefakamaauʻaki nai? ʻOku tau fefakaangaʻaki nai ʻi heʻetau ngaahi fili fakafoʻituituí, ʻo fakakaukau ʻoku tau ʻiloʻi lelei ange, ka ko hono moʻoní ʻoku tātaaitaha ke mahino kiate kitautolu ha tūkunga makehe pe ueʻi fakalaumālie fakafoʻituitui ʻa ha taha? … ʻOku kaihaʻasi ʻe he ngaahi fakamaau peheé … meiate kitautolu ʻa e meʻa leleí, ʻa e ʻofa haohaoa ko ia ʻa Kalaisí.
ʻOku ngalo foki ʻiate kitautolu ʻa e konga lelei ko iá ʻi he taimi ʻoku tau fakahoa ai kitautolu ki he niʻihi kehé. ʻOku fakaʻofoʻofa ange hono louʻulú, ʻoku sisino ange hoku ongo vaʻé, ʻoku talēnitiʻia ange ʻene fānaú, pe ʻoku fua lelei ange ʻene ngoué—ngaahi tokoua, ʻoku mou ʻiloʻi pē e meʻa ko iá. ʻOku ʻikai pē ke tau lava ʻo fai ia. He ʻikai lava ke tau fakaʻatā kitautolu ke tau ongoʻi taʻefeʻunga ʻaki ʻetau tokanga taha ki he tuʻunga ʻoku ʻikai ke tau ʻi aí kae ʻikai ko e tuʻunga ʻoku tau ʻi aí!
(Bonnie D. Parkin, “Choosing Charity: That Good Part,” Ensign pe Liahona, Nōvema 2003, 105)
Te u lava fēfē ʻo fili ʻi ha fili ʻe ua ʻoku ʻikai fuʻu kovi?
Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:
ʻĪmisi
Official Portrait of President Dallin H. Oaks taken March 2018.
ʻI heʻetau fakakaukauʻi e ngaahi fili kehekehé, ʻoku totonu ke tau manatuʻi ʻoku ʻikai feʻunga pē ke lelei ha meʻa. ʻOku lelei ange ha ngaahi fili kehe, pea ʻi he taimi tatau ʻoku ʻi ai ha ngaahi fili kehe ko e lelei tahá ia. …
Fakakaukau angé ki he founga ʻo ʻetau fakaʻaongaʻi hotau taimí ʻi he ngaahi fili ʻoku tau fai ke mamata televīsone aí, vaʻinga keimi vitiō, sio holo he ʻInitanetí, pe lau e ngaahi tohí pe makasiní. Ko e moʻoni ʻoku lelei ke tau mamata he ngaahi fakafiefia ʻoku fakatupulakí pe maʻu mai ha ngaahi fakamatala mālie. Ka ʻoku ʻikai mahuʻinga feʻunga ʻa e ngaahi meʻa kotoa ko iá mo e konga ʻetau moʻuí ʻoku tau fakamoleki ke maʻu ʻa e ngaahi meʻá ni. ʻOku ʻi ai ha ngaahi meʻa ʻoku lelei ange mo ha ngaahi meʻa kehe ko e lelei tahá ia. …
… Kuopau ke tau tukuange ha ngaahi meʻa lelei kae lava ke tau fili ha niʻihi ʻoku lelei ange pe lelei tahá he ʻoku nau fakatupulaki e tui ki he ʻEiki ko Sīsū Kalaisí mo fakamālohia hotau ngaahi fāmilí.
(Dallin H. Oaks, “Good, Better, Best,” Ensign pe Liahona, Nōvema 2007, 104–5, 107)
ʻEkitivitī Fakalahi ki he Akó
Ko hono kumi ha fehalaaki ʻi he ngaahi fili ʻa e niʻihi kehé
Naʻe fakatonutonu ʻe he Fakamoʻuí ʻa Māʻata ʻi he taimi naʻá ne fakahalaki ai ha ngaahi tōʻonga ʻa Melé. Fakakaukau ke tokoni ke mahino ki he kau akó ʻoku ʻikai totonu ke tau ʻai ki he niʻihi kehé ʻetau ngaahi fakakaukau ki he muimui ki he ʻEikí (vakai ki he “Ko e hā ha ngaahi fakatuʻutāmaki ʻo hono fakamāuʻi e ngaahi fili ʻa ha taha kehé?” ʻi he konga ʻo e “Ngaahi Fakamatala Fakamahinó mo e Puipuituʻá”).
ʻE lava ke fakafeʻiloaki ʻa e ʻekitivitī ko ʻení ʻaki hano fai ange ha taha ʻo e ngaahi fehuʻi ko ʻení: Kuo fakaangaʻi nai koeʻuhí ko ha fili naʻá ke fai? ʻOku malava nai ke fili ʻe ha toko ua ʻa e ngaahi ʻekitivitī kehekehe ʻoku fakatou tali ʻe he ʻEikí?
