Mateu 26:26–30; Lluka 22:19–20

Sakramenti

Në një vend të njohur si dhoma e sipërme, Shpëtimtari “u ul në tryezë bashkë me të dymbëdhjetët” (Mateu 26:20) dhe kremtoi festën e Pashkës judease për herë të fundit në vdekshmëri. Gjatë kësaj darke të fundit të Pashkës judease, Jezu Krishti themeloi ordinancën e sakramentit si një mënyrë të re që dishepujt e Tij ta kujtonin Atë. Ky mësim mund të të ndihmojë të kuptosh dhe ndiesh rëndësinë e të kujtuarit të Shpëtimtarit ndërsa merr sakramentin.

Ftesë për nxënësit që të flasin. Kërkoni mundësi për t’i ftuar nxënësit që të tregojnë përvojat e tyre. Shprehja e pikëpamjeve dhe përvojave të përshtatshme mund të ndihmojë për të qartësuar të kuptuarit e nxënësit për doktrinën dhe parimet e ungjillit. Teksa nxënësit i tregojnë këto pikëpamje dhe përvoja, ata shpesh drejtohen nga Fryma e Shenjtë te një dëshmi më e thellë pikërisht për të vërtetat që po shprehin. Nëpërmjet fuqisë së Frymës së Shenjtë, fjalët e tyre mund të kenë gjithashtu një ndikim të rëndësishëm në zemrën dhe mendjen e bashkëmoshatarëve të tyre.

Përgatitja e nxënësve: Informojini nxënësit se në këtë mësim ata do të ftohen të vlerësojnë përvojat e tyre të marrjes së sakramentit. Ftojini nxënësit të mendojnë për përvojën e tyre më të fundit të marrjes së sakramentit dhe të vijnë të përgatitur të tregojnë atë që po bënin, mendonin ose ndienin, që i ndihmoi ata të kujtonin Shpëtimtarin.

Veprimtari të Mundshme të të Mësuarit

Rëndësia e sakramentit

Për veprimtarinë vijuese, merreni parasysh t’i ftoni nxënësit të përgjigjen në dyshe ose në grupe të vogla. Më pas ftojini ata tʼi diskutojnë përgjigjet e tyre me klasën. Gjithashtu, mund të jetë e dobishme t’i ftoni nxënësit ta interpretojnë me role këtë skenar.

Si mund të përgjigjeshe nëse dikush do të të bënte pyetjen në vijim:

Përse anëtarët e Kishës së Jezu Krishtit të Shenjtorëve të Ditëve të Mëvonshme shkojnë në kishë çdo të diel?

Si një alternativë për leximin e thënies vijuese, merreni parasysh të tregoni një përvojë vetjake mbi dallimin e rolit qendror të ordinancës së sakramentit si pjesë e frekuentimit të Kishës

Një arsye e rëndësishme përse ne e frekuentojmë Kishën është që të marrim sakramentin. Motra Sheril A. Esplin, ish-Këshilltare e Parë në Presidencën e Përgjithshme të Fillores, tregoi një ndërveprim që ndodhi ndërmjet një burri 96-vjeçar dhe birit të tij që tregon rolin qendror të marrjes së sakramentit si pjesë e frekuentimit të Kishës.

“Sa më shumë e përsiatim domethënien e sakramentit, aq më i shenjtë dhe kuptimplotë ai bëhet për ne. Kjo ishte ajo që një baba 96-vjeçar shprehu kur i biri e pyeti: ‘Babi, pse shkon ti në kishë? Ti nuk mund të shohësh, nuk mund të dëgjosh dhe është e vështirë për ty që të lëvizësh. Përse shkon në kishë?’ Babai u përgjigj: ‘Prej sakramentit. Unë shkoj që të marr sakramentin.’”

(Sheril A. Esplin, “Sakramenti – Një Përtëritje për Shpirtin”, Ensign ose Liahona, nëntor 2014, f. 13–14)

Si mendon, çfarë kuptoi dhe ndjeu ky burrë për sakramentin që e bëri atë aq të rëndësishëm për të?

Ftojini nxënësit të përsiatin në heshtje ndërsa plotësojnë vetëvlerësimin vijues. Merreni parasysh t’u jepni atyre kohë për t’i mbajtur shënim përgjigjet në ditarët e tyre të studimit.

Vlerësoje përvojën tënde të frekuentimit të Kishës dhe të pjesëmarrjes në ordinancën e sakramentit. Duke përdorur një shkallë nga një deri në pesë, ku një është më e ulëta dhe pesë është më e larta, përgjigju për pyetjet vijuese.

Sa përparësi e madhe është për ty të frekuentosh Kishën dhe të marrësh pjesë në sakrament?
Kur merr sakramentin, sa gjasa ka të mendosh për Jezu Krishtin dhe të kesh një përvojë kuptimplotë?

Pasi ta kesh vlerësuar përvojën tënde, mendo se përse e vlerësove veten në atë mënyrë. Ndërsa e studion këtë mësim, kërko ndihmën e Zotit për të kuptuar se si ta thellosh kuptueshmërinë tënde për rëndësinë e të kujtuarit të Shpëtimtarit ndërsa merr sakramentin.

Jezu Krishti themelon sakramentin

Jezu Krishti mori pjesë në festën e Pashkës judease pikërisht para vuajtjeve të Tij në Gjetseman dhe vdekjes në kryq. Kjo ngjarje njihet si Darka e Fundit. Ndërsa Shpëtimtari hëngri darkën e Pashkës judease me Apostujt e Tij, Ai themeloi ordinancën e sakramentit.

Nëse nxënësit do të përfitonin nga një kuptueshmëri më e thellë për ordinancën e Pashkës judease dhe lidhjen e saj me sakramentin, merreni parasysh të zhvilloni veprimtarinë e pjesës “Veprimtari Plotësuese të të Mësuarit” në fund të këtij mësimi.

Lexo te Mateu 26:26–30 dhe te Lluka 22:19–20 , duke kërkuar atë që Shpëtimtari iu dha mësim Apostujve të Tij për qëllimin e sakramentit. Ti mund të duash të nënvizosh fjalë ose fraza të rëndësishme.

Cili ishte qëllimi i Shpëtimtarit në themelimin e ordinancës së sakramentit?

Një e vërtetë që mund të mësojmë nga këto fragmente është që Jezu Krishti e themeloi sakramentin për të na ndihmuar ta kujtojmë Atë.Megjithëse Shpëtimtari nuk e kishte përjetuar ende vuajtjen dhe ankthin e sakrificës së Tij shlyese, ordinanca dhe emblemat për të cilat po u jepte mësim Apostujve të Tij, duhet t’i ndihmonin ata ta kujtonin Atë dhe dhuratën e Shlyerjes së Tij.

Çfarë shkrimesh të shenjta apo përvojash vetjake të kanë ndihmuar të mendosh për sakrificën që Shpëtimtari bëri për ty?
Çfarë ndjenjash ke për Shpëtimtarin kur i lexon këto vargje apo mendon për këto përvoja?

Nëse nxënësit kanë nevojë për ndihmë për të kujtuar përvoja dhe ndjenja, merreni parasysh të tregoni përvoja vetjake, fjalët e Vëllait Land në pjesën “Komente dhe Informacion për Rrethanat” të këtij mësimi, apo shkrime të tjera të shenjta siç janë Doktrina e Besëlidhje 19:16–19 ose Alma 7:11–13 . Në një mësim të ardhshëm, nxënësit do t’i studiojnë këto fragmente më në hollësi si pjesë e të kuptuarit për vuajtjen dhe përvojat e Shpëtimtarit në Kopshtin e Gjetsemanit.

Si mund të të ndihmojnë simbolet e sakramentit që ta kuptosh më mirë atë që Shpëtimtari ka bërë dhe mund të bëjë për ty?

Krijimi i përvijimit të një mësimi

Përfytyro sikur të kanë kërkuar të japësh mësim për sakramentin në diskutimin e ardhshëm të një studimi të shkrimeve të shenjta në shtëpinë tënde. Duke përdorur shkrimet e shenjta që sapo ke studiuar, dhe referenca të tjera që zgjodhe (të tilla si Gospel Topics [Tema të Ungjillit], “Sakramenti”, topics.ChurchofJesusChrist.org ose fjalime të konferencës së fundit të përgjithshme), përgatitu t’i ndihmosh të tjerët të kuptojnë dhe ndiejnë rëndësinë e sakramentit.

Paraqitini udhëzimet e mëposhtme që nxënësit t’u referohen kur të krijojnë përvijimin e tyre për mësimin.

Përvijimi yt i mësimit duhet të përfshijë sa vijon: 1) një ose disa shkrime të shenjta apo thënie të udhëheqësve të Kishës për sakramentin për t’u studiuar ose përsiatur, 2) të paktën dy pyetje që mund t’i bësh për të thelluar njohuritë dhe 3) një ftesë për të zbatuar të vërtetat që ti trajton. Përdor disa ose të gjitha pyetjet vijuese që mund të të drejtojnë në krijimin e përvijimit tënd.

Çfarë është sakramenti?
Si mund të na ndihmojë sakramenti të kuptojmë më mirë Shpëtimtarin dhe Shlyerjen e Tij?
Çfarë të ka ndihmuar të kesh përvoja kuptimplota ndërsa merr sakramentin?
Si do të ishte jeta jote ndryshe po të kujtoje Jezu Krishtin më shpesh?

Nxitini nxënësit të përpiqen të bëjnë më shumë për të kujtuar Shpëtimtarin teksa marrin sakramentin.

Komente dhe Informacion për Rrethanat

Cila është lidhja ndërmjet Pashkës judease dhe sakramentit?

Përse përdorim ujë në vend të verës për sakramentin?

Doktrina e Besëlidhje 27:1–2 thotë se nuk ka rëndësi se çfarë përdoret për sakramentin për sa kohë që të bëhet “me syrin e drejtuar te lavdia e [Krishtit]” ( vargu 2). Sot, udhëheqësit e Kishës na kërkojnë të përdorim ujë kur marrim sakramentin.

Çfarë mund të bëj që sakramenti të jetë më kuptimplotë?

Presidenti Stiven J. Land, Presidenti i Përgjithshëm i Të Rinjve, dha mësim:

“Sa herë që një dhjak mban tabakanë e sakramentit, neve na kujtohet historia e shenjtë e Darkës së Fundit, e Gjetsemanit, e Kalvarit dhe e varrit në kopsht. Kur Shpëtimtari u tha Apostujve të Tij: ‘Bëni këtë në përkujtimin tim’ [Lluka 22:19], Ai po i fliste gjithashtu përgjatë epokave, secilit prej nesh. Ai po fliste për mrekullinë e pafundme që Ai do të siguronte ndërsa dhjakët, mësuesit dhe priftërinjtë e ardhshëm do t’i paraqitnin emblemat e Tij dhe do t’i ftonin fëmijët e Tij që ta pranonin dhuratën e Tij shlyese.

Të gjitha simbolet e sakramentit na drejtojnë tek ajo dhuratë. Ne kundrojmë bukën që Ai e copëtoi dikur – dhe bukën që priftërinjtë përpara nesh, me radhë, po e copëtojnë tani. Ne mendojmë për kuptimin e ujit të shenjtëruar, në atë kohë dhe tani, teksa fjalët e atyre lutjeve të sakramentit kalojnë solemnisht nga gojët e priftërinjve të rinj në zemrat tona dhe drejt qiellit, duke përtërirë besëlidhjet që na lidhin ne me vetë fuqitë e shpëtimit të Krishtit. Ne mund të mendojmë se ç’domethënie ka kur një dhjak i mbart emblemat e shenjta për te ne, duke qëndruar atje ku do të qëndronte Jezusi nëse Ai do të ishte aty, duke ofruar që t’i ngrejë barrët tona dhe dhembjen tonë.”

(Stiven J. Land, “Gjetja e Gëzimit në Krisht”, Ensign ose Liahona, nëntor 2020, f. 36)

Presidenti Dallin H. Ouks, i Presidencës së Parë, dha këshillën në vijim:

“Gjatë mbledhjes së sakramentit – dhe veçanërisht gjatë shërbimit të sakramentit – ne duhet të përqendrohemi tek adhurimi dhe të shmangemi nga të gjitha aktivitetet e tjera, veçanërisht nga sjellja që mund të pengojë adhurimin e të tjerëve. Madje edhe një person që dremit qetësisht nuk i pengon të tjerët. Mbledhja e sakramentit nuk është kohë për të lexuar libra ose revista. Të rinj, ajo nuk është kohë për biseda me pëshpërima në celular apo për t’iu dërguar mesazhe personave në vende të tjera. Kur marrim sakramentin, ne bëjmë një besëlidhje të shenjtë që do ta kujtojmë gjithmonë Shpëtimtarin. Sa e trishtueshme është të shohësh persona që e shkelin dukshëm atë besëlidhje në po atë mbledhje ku po e bëjnë atë.”

(Dallin H. Ouks, “Mbledhja e Sakramentit dhe Sakramenti”, Ensign ose Liahona, nëntor 2008, f. 18–19)

Veprimtari Plotësuese të të Mësuarit

Festa e Pashkës Judease

Që t’i ndihmoni nxënësit të kuptojnë lidhjen ndërmjet Pashkës judease dhe sakramentit, ftojini ata të shqyrtojnë figurat e darkës së Pashkës judease dhe sakramentit, ose merrni parasysh të vendosni një bukë pa maja (ose galeta të kripura) dhe një filxhan në një anë të tryezës dhe tabakatë e sakramentit në anën tjetër të tryezës. Ftojini nxënësit të tregojnë atë që dinë për elementet e darkës së Pashkës judease të kremtuar në lashtësi dhe lidhjen e saj me ordinancën e sakramentit që kremtojmë sot.

Bërja më kuptimplotë e sakramentit