Mataio 3:1–12; Mareko 1:1–8

“Ina Teuteu ia Outou le Ala o le Alii”

A o lei amataina e Iesu Keriso Lana misiona i le lautele, na saili Ioane le Papatiso e saunia isi ia talia ma mulimuli i le Faaola. I lenei lesona o le a e mafaufau ai pe na faapefea ona e taliaina ma mulimuli i le Faaola, le auala sili e mafai ona e faia e talia ma mulimuli ai ia te Ia, ma le mea e mafai ona e faia e saunia ai isi e talia ma mulimuli ia te Ia.

Fesoasoani le tasi i le isi. O le tele o tagata aoga e fiafia e aoao mai le tasi ma le isi. Fesoasoani ia i latou ia malamalama a o latou saofaga i le vasega, e mafai ona i ai so latou aafiaga lelei i isi. Uunaia i latou e faalogo lelei i isi sui o le vasega, ma tali atu ma le magafagafa ma le agalelei i le tasi ma le isi.

Tapenaga a le tagata aoga: Valaaulia tagata aoga e mafaufau po o a ni mea e latou te fai ma talatalanoa i ai pe afai e maua se avanoa latou te saunia ai se isi tagata e talia ma mulimuli i le Faaola.

Gaoioiga e Mafai ona Fai e Aoao Mai Ai

Tapenaina mo Iesu Keriso

E avea o se tasi ata faataitai i le ata faataitai lea, mafaufau e tuu ni meafaitino e poloka ai le ulufale mai i le vasega po o nofoa o tagata aoga. Mo se faataitaiga, tuu se nofoa po o se laulau e poloka ai le faitotoa pe o luma o le mea e nonofo ai tagata aoga. A o mai tagata aoga, valaaulia i latou e o mai i totonu ma nonofo i o latou nofoaga. Matau po o a mea e fai e tagata aoga ina ia ulufale mai ai i le vasega ma nonofo i lalo. I le amataga o le lesona, talatalanoa pe na faapefea e tagata aoga ona tali atu i nei meafaalavelave i fesili e pei o le “O a mea sa outou faia i mea sa faalavelave.” “Na e mataua se tasi na fesoasoani i isi tagata ina ia aveeseina nei mea faalavelave?”

Mafaufau sa e alu i se malaga taua tele ma sa i ai ni mea na faalavelave i le auala. O le a se mea e te faia? E te toe foi? E te taumafai e ae i luga pe alu i autafa o nei mea? E te taumafai e ave ese nei mea faalavelave mo i latou e mulimuli mai? Manatu faapea na i ai se tagata na sau muamua ma ia aveeseina le tele o mea faigata na faalavelave i le auala.

• O le a sou lagona ia i latou sa tapenaina le ala mo oe?

O le aso o le a outou suesue ai e uiga ia Ioane le Papatiso, o lana misiona o le tapenaina o tagata ina ia talia ma mulimuli i le Faaola (tagai i le Luka 1:17).

• O ai na fesoasoani e tapena le ala mo oe e talia ma mulimuli i le Faaola i lou olaga?

• O ai o loo tapenaina le ala mo le Faaola ina ia i ai atili le Faaola i lou olaga?

• O a ni mea na fesoasoani ia te oe e talia ma mulimuli i le Faaola?

Ao e suesue i lenei lesona, mafaufau i ni mea o loo faalavelave pea ia te oe po o isi i le taliaina ma mulimuli ia te Ia, ma po o a foi ni mea e fesoasoani ia te oe po o i latou e faatoilalo na faalavefau.

Faatomuaga i le Evagelia a Mareko ma le galuega talai a Ioane le Papatiso

Na amata le Evagelia a Mareko i le tala ia Ioane le Papatiso. E ese mai ia Mataio ma Ioane, o Mareko e le o se tasi o se Aposetolo a Iesu Keriso, ae o se na liua mulimuli ane. Atonu sa tusia le Evagelia a Mareko i lalo o le taitaiga a le Aposetolo o Peteru. I lana Evagelia, sa tusi atu ai Mareko i se aofia o nuu ese sa ia faamamafaina ai mea sa fai e le Faaola nai lo o mea sa Ia fetalai atu ai.

Mafaufau e valaaulia tagata aoga e galulue i ni paga, po o ni vaega toalaiti ao latou suesueina fuaiupu nei.

Faitau le Mareko 1:1-8, ma vaai po o a mea sa fai e Ioane le Papatiso na fesoasoani e tapenapena ai isi e talia ma mulimuli ia Iesu Keriso.

Meafaigaluega e suesue ai tusitusiga paia.

O le tele o meafaigaluega ma metotia e suesue ai e mafai ona faalautele ai lou aoaoina. Ina ia faalautele au suesuega o tala faatusi paia, taumafai e tilotilo i le tala lava e tasi mai tusitala eseese o Evagelia.

O faitauga e uiga i le mea e tasi na tupu i tala eseese a Evagelia, e tele ina mafai ai ona fesoasoani i lou aoaoina. Faitau le Mataio 3:7–12, ma vaavaai mo ni isi auiliiliga e uiga i le galuega talai a Ioane le Papatiso. I ona po o le Faaola, e toatele Isaraelu o le feagaiga na matuai faamaualuluga ma latou liliu ese mai aoaoga a Ieova. Sa talitonu nisi ua lava lo latou tupuga mai ia Aperaamo e faaolaina ai i latou (tagai i le Faaliliuga a Iosefa Samita, Mataio 3:36 [i le faaopoopoga i le Tusi Paia] ma le Faaliliuga a Iosefa Samita, Luka 3:8 i le Luka 3:8, vaefaamatalaga d).

• O a mea sa fai e Ioane le Papatiso e fesoasoani ai e tapena tagata e talia ma mulimuli i le Faaola?

Ao tali mai le vasega, mafaufau e fai fesili tulitatao e pei o le “E faapefea ona aoga le tautau atu o agasala ma le salamo e saunia ai tagata e talia atoatoa ma mulimuli i le Faaola?” Manatua o lesona e lua e sosoo ai e auiliili loloto ai le salamo ma le papatisoga.

E mafai ona aoga le faamanino atu o upu a Ioane o loo tusifaamaumauina i le Mareko 1:7–8 e faatatau i le Faaola.

• O a ni isi malamalamaaga na e maua mai le suesueina o le tala a Mataio e uiga ia Ioane le Papatiso?

• O a ni faamaoniaga ua e vaai i ona po nei o loo taumafai pea le Tama Faalelagi e tapenapena tagata ia talia ma mulimuli i le Faaola?

O le taliaina o le Faaola ma fesoasoani i isi e taliaina o Ia

Faamaea se tasi o gaoioiga nei. Mafaufau i auala e mafai ona e talia ma mulimuli atoatoa ai oe lava ia i le Faaola ma fesoasoani ai e tapena isi e faia le mea lava lea e tasi.

Mafaufau e faaali atu gaoioiga nei e filifili ai pe fatufatu ni nai tufaaga laiti o gaoioiga taitasi mo tagata aoga e faaaoga pe a maea la latou gaoioiga sa filifilia.

Gaoioiga A: Api Talaaga

Mafaufau ma tusi i lau api talaaga mo suesuega ia aafiaga na fesoasoani ia te oe e talia ai ma mulimuli i le Faaola. Mafaufau e faaaofia ai mea sa fesoasoani ia te oe e talitonu ia Iesu Keriso ma atili tautino atu ai e ola i Ana aoaoga. Ona tali lea o fesili nei:

• O le a sou manatu, mata o le a se mea e valaaulia oe e le Tama Faalelagi e fai ia e talia atili ai ma mulimuli ia Iesu Keriso i le lumanai?

• O a ni mea e mafai ona e faia e fesoasoani ai i isi tagata latou te talia ma mulimuli ia Iesu Keriso?

Atonu e aoga foi le tufaina atu o ni kopi o le mekasini o le Liahona o le konafesi aoao e sili ona lata mai, mo tagata aoga na filifilia le Gaoioiga E.

Gaoioiga E: Sailiili i le konafesi aoao

Toe tomanatu i mea sa e aoaoina mai le konafesi aoao talu ai nei. A mafai ona fai, toe faamanatu se lauga se tasi pe lua o le konafesi aoao, ma vaavaai mo savali e mafai ona fesoasoani ia te oe e talia atoatoa ai ma mulimuli ia Iesu Keriso.

• O a ni mea sa aoao mai talu ai nei e perofeta o aso nei e fesoasoani ai ia te oe e talia atoatoa ma mulimuli i le Faaola?

• E faapefea ona e faaaogaina se tasi o a latou aoaoga i lou olaga pe faasoa atu i isi?

Gaoioiga I: Suesue i tusitusiga paia

Faaaoga tusitusiga paia ina ia e malamalama atili ai pe na faapefea ona taitaia isi tagata e talia ma mulimuli ia Iesu Keriso. Mo se faataitaiga, e mafai ona e suesue i faataitaiga mai le Tusi a Mamona e pei o le Enosa 1:2–8 ; Mosaea 5:1–2, 5 ; Alema 22:17–18, 22–23 ; po o le Helamana 5:28–30, 40–42 .

• O a ni mea na e aoao mai i mau na e suesueina?

• E faapefea ona fesoasoani nei malamalamaaga ia te oe e talia atoatoa ai ma mulimuli i le Faaola pe fesoasoani i isi e faia lena lava mea?

Valaaulia ni tagata aoga e faasoa mai mea na latou aoaoina ma lagonaina.

Mafaufau e faauma i le molimau atu, pe valaaulia tagata aoga e faasoa mai a latou molimau, e uiga i le olioli ma le fiafia o le a oo mai pe a tatou talia ma mulimuli i le Faaola ma fesoasoani i isi e o mai ia te Ia.

Tala ma Faamatalaga o Talaaga

O ai Mareko?

O Mareko (po o Ioane Mareko) e le o se tasi o uluai soo o Iesu Keriso, ae na mulimuli ane liua o ia ma sa ia galue soosootauau ma le tele o Aposetolo a le Faaola. Sa taua e Peteru o ia o “Mareko lo’u atalii” ( 1 Peteru 5:13), e ta’u mai ai le mafana o le la mafutaga. E foliga mai sa tusia le Evagelia puupuu a Mareko i tagata Roma, o isi nuu ese, ma isi tagata faatoa liliu mai i le FaaKerisiano. Na galulue foi Mareko ma Paulo mo se taimi i le malaga faamisionare muamua (tagai i le Galuega 12:25).

O a nisi o matapule iloga i le Evagelia a Mareko?

O le Evagelia a Mareko e amata faafuasei ma e maeu lava, ma e tausisia se saoasaoa, i le toefaamatalaina o mea na tutupu i se faasologa vave. E tele ina faaaoga e Mareko ia upu o le i le taimi nei ma le vave, e maua ai le aafiaga o le vavevave ma faatinoga.I autu taua o le tusi a Mareko e i ai fesili e faatatau ia Iesu, po o ai o Ia ma tagata na malamalama i Lona faasinomaga, faapea foi le matafaioi a le soo, o se tasi e tatau ona “amo lona satauro, ma mulimuli ia [Iesu]” ( Mareko 8:34). E le gata i lea, o Mareko na o le pau lea o le Evagelia ua faamatalaina le faataoto i le fatu na ola lava ia (tagai i le Mareko 4:26–27), o le faamaloloina o se tagata tutuli i le itulagi o Tekapoli (tagai i le Mareko 7:31–37), ma le faamaloloina auauai o se tagata tauaso i Petesaita (tagai i le Mareko 8:22–26).

Mareko 1:8 . O le a le papatisoga i le Agaga Paia?

Na tautino mai e Ioane le Papatiso o ia na te papatiso atu i le vai ao Iesu e “papatisoina … i le Agaga Paia” ( Mareko 1:8). O lenei papatisoga i le Agaga Paia ma le afi e faatatau i le tulaga o le faamauina pe a uma le papatisoga, ona maua ai lea o le mafutaga ma le Agaga Paia. Ona fufulu ma faamamaina lea o i tatou e le Agaga Paia, e pei o le aafiaga faamama e maua i le afi.

Mataio 3:7 . O ai le au Faresaio ma le au Satukaio?

O le au Faresaio o tagata o se aulotu Iutaia o e sa faamaualuluga ona o lo latou tausisia o le tulafono a Mose. Sa latou matele e tuuitiitia faatuatuaga i le na o le tausisi o le mau tulaga amioga faalesauniga. O le au Satukaio o le vasega o tagata mauoa Iutaia ua tele foi o latou sao i mataupu faalelotu ma le pulega faaupufai. Latou te lei talitonuina le aoaoga faavae o le toetu. O nei vaega e lua sa o ese mai le uluai faamoemoega o tulafono a le Atua, ma o le toatele o o latou tagata sa mumusu e talia le savali mai le perofeta a le Atua, o Ioane le Papatiso.

(Sau, Mulimuli mai ia te Au—Mo Tagata Taitoatasi ma Aiga: Feagaiga Fou 2019, 19)

Mataio 3:12 . O le a le uiga ma le faatusatusaga o le asu, le falesaito, le faaputugasaito, ma le otaota o le saito?

O le “asu” o loo taua i le Mataio 3:12 o se asu faamama sa faaaogaina e asu ai le saito i le ea. … Ona toe toulu ifo ai lea o le saito i le eleele a ua feulaina ese e le matagi les aito māmā ua taua o le aputi saito. Ona faaputuputu ai lea o le saito i se falesaito, po o se fale e teu ai, ae susunu i le afi le otaota. Sa aoao atu e Ioane le Papatiso e faapea o le Faaola, o le o le a mulimuli mai ia te ia, o le a tuueseeseina le au talitonu mai ia i latou e le talitonu e pei ona tuueseese ai le saito ma le otaota.

(New Testament Student Manual [2018], ChurchofJesusChrist.org)

Gaoioiga Faaopoopo e Aoao Mai Ai

O se isi auala e mafai ona amata ai le vasega

Tuu se taimi mo tagata aoga e faasoa mai ai po o a ni mea o latou iloa ia Ioane le Papatiso ma lana galuega talai e “sauni le nuu e faatatauina mo le Alii” ( Luka 1:17). Valaaulia i latou e mafaufau ma faapea o latou o Ioane, mafaufau po o a ituaiga mea latou te fai ma talanoa atu ai e saunia ai isi e talia Iesu Keriso, ma mafaufau po o a ni mea e faigata ai lenei galuega.

O le Lotogatasi o Evagelia

E mafai ona aoga le faaali atu i le vasega le meafaigaluega o le Harmony of the Gospels e maua i le vaega o Fesoasoaniga mo Suesuega i luga o le Gospel Library app, po o le Faaopoopoga i le Tusi Paia. Fesoasoani i tagata aoga ina ia malamalama o lenei meafaigaluega e faailoa mai ai le mea o loo tusifaamaumau ai mea lava nei e tasi na tutupu i Evagelia eseese. Valaaulia i latou e sue ni mau e uiga ia Ioane le Papatiso o loo aoao mai ai e uiga i lona olaga ao lei papatisoina e ia Iesu Keriso.