Mataio 3:13–17, Vaega 2

O Le Tama Faalelagi, Iesu Keriso, ma le Agaga Paia

Sa i ai uma le Tama Faalelagi, Iesu Keriso, ma le Agaga Paia i le papatisoga o Iesu Keriso. O lenei lesona e mafai ona fesoasoani i le faalolotoina o lou malamalama e uiga i sui taitasi o le Aiga Atua, lea e mafai ona aafia ai au filifiliga i le olaga.

Matauina o le malamalama o se tagata aoga i le taimi nei. E aumaia e tagata aoga taitasi ni aafiaga tulaga ese, iloa, malamalama, ma vaaiga i le vasega Saili ia iloa le malamalama o tagata aoga o i ai nei e uiga i se aoaoga faavae autu, mataupu faavae, po o se manatu faavae, ona vaavaai lea mo auala e taiala ai i latou i le gasologa o lo latou aoaoina.

Tapenaga a le tagata aoga: Valaaulia tagata aoga ia omai i le vasega ua saunia e faasoa mai po o a mea ua latou iloa i le Aiga Atua, pe faapefea ona latou iloaina, ma pe o a ni a latou fesili o i ai.

Gaoioiga e Mafai ona Fai e Aoao Mai Ai

O a ni mea e fesoasoani i le tupulaga talavou o le Au Paia o Aso e Gata Ai e taulima lelei ai faafitauli?

Mafaufau e faaali atu lenei faamatalaga ao talanoina e tagata aoga fesili o loo mulimuli mai.

Faitau le saunoaga lenei mai ia Peresitene Dallin H. Oaks o le Au Peresitene Sili:

O se tusiga [talafou] na faaulutalaina, “E sili taulima lelei e talavou Mamona: Ua maua i suesuega e sili i latou i tupulaga i le taulimaina o le olaga talavou.” Sa faaiuina lenei tusiga e faapea “E sili ona taulima lelei e Mamona i le aloese mai amioga lamatia, e lelei o latou tulaga i a’oga ma e lelei uiga faaalia e faatatau i le lumanai.” Fai mai se tasi o tagata sailiili i lea suesuega, sa faatalanoaina le toatele o a tatou talavou, “E toetoe o vaega uma sa matou tilotilo i ai, sa i ai se mamanu manino: E muamua lava Mamona.”

(Dallin H. Oaks, “Matua ma Fanau,” Ensign po o le Liahona, Nov. 2018, 62)

• Aisea e te manatu ai e lelei tele le tupulaga talavou o le Au Paia o Aso e Gata Ai i le tulimaina o faafitauli o lenei olaga?

Mafaufau i ou lava aafiaga i le olaga.

Mafaufau e valaaulia le vasega e fuafaatatau i latou lava i se fua e pei o lenei:

• O le a sou manatu i le faamatalaina o tupulaga talavou sa faatalanoaina, pe tutusa ma le faamatalaina o oe?

1. O loo faamatalaina lelei ai a’u.

2. O loo tau faamatalaina ai a’u.

3. E le o faaamatalaina ai a’u.

Sa saunoa Peresitene Oaks o se tasi o mafuaaga ua ia manatu ua matua lelei ona saunia tupulaga talavou o le Ekalesia a Iesu Keriso o le Au Paia o Aso e Gata Ai e fetaiai ma luitau ona o lo latou malamalama i le ata o le faaolataga ma lo latou iloa i lo latou sootaga ma le Atua (tagai i le “Matua ma Fanau,” 62). I se isi taimi na ia aoao mai ai e faapea:

Ona ua i ai ia i tatou le upumoni e uiga i le Aiga Atua ma lo tatou sootaga ia i Latou, o le faamoemoega o le olaga, ma le natura o lo tatou taunuuga e faavavau, ua tatou maua ai le faafanua sili ma le faamautinoaga mo la tatou malaga i le olaga faaletino.

(Dallin H. Oaks, “O Le Aiga Atua ma le Ata o le Faaolataga,” Ensign po o le Liahona, Me 2017, 103)

• Aisea e te manatu ai e fesoasoani le malamalama i upumoni mo tupulaga talavou o le Au Paia o Aso e Gata Ai, latou te aloese ai mai amioga e lamatia ai, e lelei i aoga, ma i ai se uiga faaalia lelei e uiga i le lumanai?

• E oo foi i tupulaga talavou o le Au Paia o Aso e Gata Ai, o a ni mea e faafaigata ai ona latou iloaina le Tama Faalelagi ma Iesu Keriso e ala i le mana o le Agaga Paia?

Mafaufau mo se minute i mea ua e iloaina ma malamalama i ai e uiga i matafaioi a le Aiga Atua ma le alofa o le Tama Faalelagi ma Iesu Keriso mo oe. I lenei lesona o le a e maua ai le avanoa e suesue ai e uiga i le Tama Faalelagi, o Iesu Keriso, faapea le Agaga Paia mā mafaufau loloto ai pe mafai faapefea ona fesoasoani i lou olaga le aoao e uiga ia i Latou.

Ua aoao mai Tusitusiga Paia e uiga i le Aiga Atua

Mafaufau e valaaulia tagata aoga e faasoa mai mea sa latou saunia mo le vasega, e ala i lo latou tusia o mea ua latou iloa e uiga i le Aiga Atua ma le auala na latou iloa ai.

Vaevae se laupepa i ni koluma se tolu ma faaigoa le pito i luga o le koluma muamua i le “Tama Faalelagi,”koluma lona lua “Iesu Keriso,”ma le koluma lona tolu “O Le Agaga Paia.”I totonu o koluma taitasi, tusi ai ni mea se tasi pe lua ua e iloa e uiga i lenei sui o le Aiga Atua. Faaaofia ai se faamatalaga puupuu o le ala na e aoaoina ai upumoni taitasi po o le mafuaaga ua e talitonu ai i ai. I le gasologa o le lesona, faaaoga se avanoa e faaopoopo ai i koluma ni mea e te aoaoina e uiga i sui taitasi o le Aiga Atua.

E mafai foi ona fai lenei gaoioiga e le vasega atoa e faaaogaina ai ni koluma se tolu i luga o le laupapa. E mafai ona valaaulia tagata aoga e o mai e tusi i luga o le laupapa e faaopoopo ai malamalamaaga eseese i le gasologa o le lesona.

O se tasi o vaega o tusitusiga e tatou te aoao atili ai i le Aiga Atua o le taimi sa papatisoina ai Iesu Keriso e Ioane le Papatiso.

Faaali atu se ata o le papatisoga o Iesu Keriso.

Faitau e uiga i le papatisoga o Iesu Keriso i se tasi pe sili atu o tala a Evagelia, ma vaavaai mo mea e mafai ona e aoaoina e uiga i sui taitasi o le Aiga Atua

E mafai e tagata aoga ona faailoa mai upumoni e pei o le: e toatolu peresona o le Aiga Atua e mavaevae ma manino i latou taitasi, o Iesu Keriso e gauai atu i le finagalo o le Tama, o Iesu Keriso ua faataunuuina le amiotonu uma, o le Tama Faalelagi ma le Agaga Paia la te molimau e uiga ia Iesu Keriso, e faamautuina e le Agaga Paia sauniga, e fiafia le Tama Faalelagi ia i latou o e usiusitai ia te Ia.

• Mataio 3:13–17

• Mareko 1:9–11

• Luka 3:21–22

• O a ni mea na e aoaoina mai e uiga i sui taitasi o le Aiga Atua?

Faalogo lelei ao faasoa mai tagata aoga, ona faaaoga lea o se vaega pe faaaoga uma faamatalaga e fesoasoani ai ia i latou ia malamalama atili i le Aiga Atua.

E fesoasoani nei fuaiupu tatou te malamalama ai o sui taitasi o le Aiga Atua e mavaevae, ma e faataunuuina se matafaioi taua i o tatou olaga. Mo se faataitaiga, na tuuina mai e le Faaola se faataitaiga o le faia o le finagalo o le Tama. Ina ua faifia le Atua ia Iesu Keriso i Lona papatisoga, sa Ia faaalia faapea o Ia o se Tama Faalelagi alofa e fiafia pe a tatou usitai ia te Ia.

• O a ni taimi sa e lagonaina ai ua fiafia le Tama Faalelagi ia te oe ona o se mea na e faia? Na aafia faapefea oe ona ua e iloa ua fiafia o Ia ia te oe?

Atonu e i ai tagata aoga e faapea latou te lei faia lava se mea e faafiafiaina ai le Tama Faalelagi. E aoga ona e fesili i ai e mafaufau toto’a i nei fesili ma ua’i atu i o latou mafaufauga ma lagona. O le faailoa o taimi sa latou lagonaina ai le alofa, fiafia, filemu, po o le lelei (lagona ia e maua mai le Agaga Paia) e mafai ona fesoasoani i tagata aoga e iloa ai taimi sa fiafia ai le Tama Faalelagi i a latou faatinoga (tagai i le Kalatia 5:22).

Sa faamalamalama mai e le Perofeta o Iosefa Samita (1805-44) o le Agaga Paia sa lei faaali mai o se lupe. Ae peitai, na faaali mai e le lupe o loo i ai le Agaga Paia. Sa aoao mai e Iosefa Samita, “E le mafai ona suia le Agaga Paia i se lupe; ae o le faailoga o le lupe na tuuina ia Ioane e faamaonia ai le moni o le galuega”, (Aoaoga a Peresitene: Iosefa Samita [2007], 81).

• O anafea na molimauina ai e le Agaga Paia mea moni ia te oe?

• O a ni au fesili e uiga i le Aiga Atua?

Faaaoga filifiliga nei po o ni isi e sili ona fetaui lelei ma manaoga o tagata aoga. Nai lo le fesili i tagata aoga e filifili se faatinoga, e mafai ona aoga foi le suesue faatasi o se vasega pe matamata faatasi i se tasi o vitio.

Filifili se tasi pe sili atu o filifiliga nei e fesoasoani ai ia te oe ia maua tali i au fesili e uiga i le Aiga Atua. Ao e suesue, vaavaai foi mo auala e mafai ona faamanuiaina ai oe lava ia ona o le malamalama i le Aiga Atua.

1. Saili mo nisi malamalamaaga i tusitusiga paia. Atonu e te manao e sue i le “ Le Atua, Aiga Atua ” i le Taiala i Tusitusiga Paia po o le “ Aiga Atua ” i le Taiala mo Autu.

2. Suesue i aoaoga a perofeta ma aposetolo e uiga i le Aiga Atua. Mo se faataitaiga, e mafai ona e faitau i le saunoaga a Dallin H. Oaks o le “O Le Aiga Atua ma le Ata o le Faaolataga” (Ensign po o le Liahona, Me 2017, 100–103) po o le saunoaga a Jeffrey R. Holland “Iloaina o le Aiga Atua” (Ensign po o le Liahona, Ian. 2016, 32–39).

3. Matamata le viitio “What Is the Godhead?” (7:03) po o le “Godhead—He Knows Me” (3:01), o loo maua uma i le ChurchofJesusChrist.org.

• O a ni mau po o ni aoaoga na fesoasoani ia te oe ina ia faateleina lou iloa i le Aiga Atua? O le a se mea na e aoao mai ai?

• E mafai faapefea e lenei iloa ona faamanuiaina ai lau sootaga ma i Latou?

Manatu faapea sa talosagaina oe ia faatalanoaina mo se tusiga na tulitatao ai le mea sa talanoaina i le amataga o le vasega. E toatele tagata sa tusi atu i le faatonu o le nusipepa e fia iloa mafuaaga e ala ai ona lelei le taulimaina e talavou o le Au Paia o Aso e Gata Ai o le olaga faaletalavou. Ua i ai sou avanoa e avatu ai se malamalamaaga i le auala na fesoasoani ai sui taitasi o le Aiga Atua e ala i a Latou matafaioi, e ui ina eseese ae e feaiāa’i. Mo se faataitaiga, atonu e i ai ni ou aafiaga i le taliina e le Tama Faalelagi o au tatalo, o Iesu Keriso sa puapuagatia ona o au agasala, po o le Agaga Paia i le faamautuina o le mea moni ia te oe. Fuafua au tali e ala i le taliina o fesili nei.

• E faapefea ona fesoasoani sui taitasi o le Aiga Atua ia te oe e taulimaina faigata o le olaga talavou?

• O a ni aafiaga ua fesoasoani atu ia oe ia e malamalama ma iloa ai sui eseese o le Aiga Atua?

• O le a sau fautuaga i mea e mafai ona fai e isi ina ia o latou maua faamanuiaga mai le Tama Faalelagi, Iesu Keriso ma le Agaga Paia?

Valaaulia ni tagata aoga e faasoa atu a latou tali i se tasi o fesili nei. Faasoa atu lau lava molimau pe faapefea e le malamalama ma le iloa o le Aiga Atua ona fesoasoani ia te oe i le olaga.

Tala ma Faamatalaga o Talaaga

Aisea ua fai mai ai tusitusiga paia o le Tama, le Alo ma le Agaga Paia e “tasi lava” pe a faapea e mavaevae ma maioio i latou taitasi?

Sa faamalamalama mai e Elder Jeffrey R. Holland o le Korama a Aposetolo e Toasefululua:

Tatou te talitonu o nei peresona paia e toatolu o loo maua ai se Aiga Atua e tasi e aufaatasi i le faamoemoe, i uiga, i le molimau, i le misiona. Tatou te talitonu e faatumulia i Latou i le uiga faaleatua lava e tasi o le alofa mutimutivale ma le alofa, faamasino tonu ma le alofa tunoa, onosai, faamagalo, ma le togiola. Ou te manatu e saolele ona faapea atu tatou te talitonu e tasi i Latou i uiga taua ma le faavavau, sei vagana tatou te le talitonu o i Latou o ni tagata e toatolu o loo tuufaatasia i se mea e tasi, o se manatu o le Tolutasi e le o aoaoina mai lava i totonu o tusitusiga paia aua e le moni. …

Tatou te tautino atu ma le mautinoa lava mai i tusitusiga o le Tama, le Alo, ma le Agaga Paia e eseese uma, o peresona paia e tolu, e manino mai faataitaiga e pei o le Tatalo Faatoga a Iesu i Lona Tama [tagai i le Ioane 17 ] …, o le papatisoina o Ia e Ioane [tagai le Mataio 3:13–17 ; Mareko 1:9–11 ; Luka 3:21–22 ], o le aafiaga i luga o le Mauga o Liua [tagai i le Mareko 9:7 ; Luka 9:35 ], ma le maliufasia a Setefano [tagai i le Galuega 7:55–56 ]—na o ni faataitaiga se fa mai le tele.

(Jeffrey R. Holland, “O Le Atua Moni e Toatasi Atoa Ma Le Na Ia Auina Mai o Iesu Keriso Lea,” Ensign po o le Liahona, Nov. 2007, 40–41)

Mataio 3:16 . Pe na faaali mai le Agaga Paia o se lupe?

Na faamalamalama mai e le Perofeta o Iosefa Samita (1805–44):

O le faailoga o le lupe sa faatuina a o lei foafoaina le lalolagi, o se molimau mo le Agaga Paia, ma e le mafai ona sau le tiapolo i le faailoga o se lupe. O le Agaga Paia o se peresona, ma o le foliga o se peresona. Na te le tuua o ia lava o le foliga o le lupe, ae i le faailoga o le lupe. E le mafai ona faaliliu le Agaga Paia i se lupe; peitai o le faailoga o se lupe sa tuuina atu ia Ioane e tau atu ai le moni o le mea ua fai, aua o le lupe o se faatusa po o se faailoga o le upumoni ma le mama aiai.

(Aoaoga a Peresitene o le Ekalesia: Iosefa Samita [2007], 81)

Gaoioiga Faaopoopo e Aoao Mai Ai

O isi tapenaga mo tagata aoga

Valaaulia tagata aoga e mafaufau i se faataitaiga se tasi e uiga i le augatasi o le Tama Faalelagi, Iesu Keriso, ma le Agaga Paia i o Latou faamoemoe ae e eseese uma a Latou matafaioi. (Mo se faataitaiga, tatou te tatalo i le Tama Faalelagi i le suafa o Iesu Keriso, ae e fesoasoani mai le Agaga Paia ina ia tatou iloaina tali i a tatou talosaga.)