Mauaina o le Malamalama Faaleagaga, Vaega 3

Saili le Malamalama Atili e ala i Punavai Paia ua Atofaina

O se tasi o faamoemoega o le atamai i aoaoga faavae o le fesoasoani lea ia te oe e aoao ma faaaoga mataupu faavae mo le mauaina o le malamalama faaleagaga. E mafai ona fesoasoani lenei lesona ia te oe ia e malamalama ai i le taua o le saili i mea moni e ala i punaoa ua tuuina mai ma le alofa e le Tama Faalelagi ma Iesu Keriso.

Tapenaga mo Tagata Aoga: Valaaulia tagata aoga e mafaufau i mea e masani ona latou liliu i ai mo faamatalaga pe a iai ni a latou fesili e uiga i le Atua po o le Ekalesia. Valaaulia i latou e mafaufau loloto i le uiga o le saunoaga lenei a Elder Neil L. Andersen o le Korama a Aposetolo e Toasefululua: “O fesili faaleagaga e talafeagai ma tali faaleagaga mai le Atua” (“Iosefa Samita,” Ensign po o le Liahona, Novema 2014, 28, 30).

Gaoioiga e Mafai ona Fai e Aoao Mai Ai

O fea e te saili ai mo ni tali?

Afai e le o maua i le vasega ni punaoa e sue ai faamatalaga nei, fesili i tagata aoga po o fea latou te ono liliu i ai e sue ai faamatalaga. O se isi mea e mafai ona fai o le sui o nisi mau fasi faamatalaga mananaia talafeagai mo tagata aoga e sueina.

• Le tau mo le faaiuga o le vaiaso a sau

• Le laumua o Greenland

• Le faiga o se meaai e faaaoga ai le makaloni po o le alaisa

Mafaufau i fesili nei.

• O a punaoa na e (pe masani ona e) faaaogaina e saili ai faamatalaga?

• Pe aisea e te talitonuina ai nei punaoa mo faamatalaga e uiga i nei ituaiga o fesili?

O fea e mafai ona tatou maua ai tali mai le Alii?

• A faapea e fesili se isi ia te oe po o fea e maua ai tali i fesili taua e uiga i le Alii, le Ekalesia, po o le fuafuaga o le faaolataga o le a sou fautuaga?

Mafaufau e tusi i luga o le laupapa tali a tagata aoga i lalo o le ulutala “Punavai Paia ua Atofaina.” Mafaufau e faaopoopo i le lisi a o faagasolo le lesona ao aoao e tagata aoga isi punavai o mea moni mai le Atua.

Mafaufau i ni au fesili e uiga i le Atua, le Ekalesia, po o le ata o le faaolataga. E mafai ona aofia ai faamatalaga sa e faitauina pe faalogo ai foi ma ua e taumafaufau ai pe taufaaletonu ai foi. Saili mo le Agaga Paia e taiala ao e suesue i taiala i lenei lesona e ono fesoasoani atu ia te oe.

Faitau fuaitau nei, ma vaavaai pe mafai faapefea e punaoa o mea moni o loo aoao mai i nei fuaitau ona faamanuiaina ai i tatou.

E mafai ona galulue taitoalua tagata aoga, e tofu le tagata ma ni fuaitau se lua e faitau ma fefaasoaai ma a latou paga mea latou te maua.

• Efeso 4:11–14

• 2 Timoteo 3:15–17

• Iakopo 1:5–6

• Parakalafa 11 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022)

A o tali e tagata aoga ia fesili nei, mafaufau e faaopoopo i le lisi o punaoa paia ua atofaina i luga o le laupapa.

• O a ni punaoa o mea moni sa e mauaina i nei fuaitau? Aisea e mafai ai ona tatou talitonuina atoatoa nei punaoa?

• O fea ni punaoa e ono sue ai e isi tagata ia faamatalaga e uiga i fesili faaleagaga e te lapataia ai i latou? Aisea?

Ae a pe a faapea ou te le o mautinoa le talitonuina o se punaoa o faamatalaga?

Mafaufau e fesili i tagata aoga po o a ni fautuaga latou te avatu i se tasi o faaaogaina le initoneti e sue ai tali i fesili taua faaleagaga? A fua i a latou tali, mafaufau pe talafeagai ona faasoa atu se vaega o faamatalaga i lea parakalafa pe faasoa uma iai le parakalafa, filimaoti pe o nisi o faamatalaga po o faamatalaga uma i le parakalafa lenei o le a aoga e faasoa atu.

O se tasi o auala masani aupito sili o le sailia o faamatalaga i le aso o le faaaogaina lea o le initoneti. E ala i le initoneti, tatou te maua ai le tele o punaoa lelei o faamatalaga. I le taimi foi lea, e avatu faaaliali ai i tatou e le initoneti i le tele o punaoa o faamatalaga e le faatuatuaina ma e le moni. Elder Neil L. Andersen o le Korama a Aposetolo e Toasefululua sa lapatai mai:

O faamatalaga i le initoneti, e leai se faamama mo “mea moni”. O nisi faamatalaga, e tusa lava po o le a le faatosina e le moni lava.

(Neil L. Andersen, “Iosefa Samita,” Ensign po o le Liahona, Novema 2014, 29)

Faitau le parakalafa 12 o le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae. Mafaufau e faailoga mafuaaga e ala ai ona matautia le saili o tali i fesili faaleagaga mai punaoa e le mailoa pe le talitonuina foi.

Pe a e mauaina ni faamatalaga fou e uiga i le Atua, le Ekalesia, po o le ata o le faaolataga, e lelei pe a e fai ifo ia te oe lava fesili e pei o nei e uiga i le punavai o le faamatalaga. Ao e faitau i fesili nei, vaavaai mo fesili e te manatu o le a sili ona aoga pe a filifili pe talitonuina pe leai foi se faapogai. (E mafai foi ona e suesue i faitauga o loo tuufaatasi ma nei mau faasino.)

Saunia mo le vasega ni kopi o fesili nei e fai ma tufaaga. Fautuaina tagata aoga e tuu lenei tufaaga i se mea e faigofie ona latou maua ai mo le faaaogaina i le lumanai.

O Ni Nai Fesili mo le Iloiloina o Faamatalaga Fou

• O le a se mea na ou lagonaina mai le Agaga Paia i le taimi sa ou faitau pe faalogo ai i lea faamatalaga? (Tagai i le Mataupu Faavae ma Feagaiga 50:23–24 .)

• Pe faalatalata atili ai au ia Iesu Keriso ma Lana Ekalesia i lenei faamatalaga? (Tagai i le Moronae 7:15–17 .)

• Pe faamalosiauina au e lenei faamatalaga e tausi poloaiga a le Atua?

• Pe ogatusa ma mea o loo aoao mai e tusitusiga paia ma perofeta o ona po nei? (Tagai i le 2 Timoteo 3:15–17 ; Mataupu Faavae ma Feagaiga 1:38 .)

• Pe o faamautu ai mea ua uma ona ou lagonaina o tau mai e le Agaga Paia ia te au e moni, pe o uunaia ai au e masalomia upumoni o le talalelei? (Tagai i le Moronae 10:5 .)

• Pe mai se faapogai e talitonuina e le Faaola po o taiai o Lana Ekalesia le faamatalaga?

• Pe mata o le a se tala a ou matua po o taitai o le Ekalesia e uiga i nei faamatalaga? (Afai ua faaosoosoina au e natia mai ia i latou, o le a se mea o tau mai ai ia te au e uiga i lona faapogai?)

• O fea o fesili nei e te manatu e pito sili ona aoga mo oe? Aisea?

• O a nisi fesili e te manatu e tatau ona fesili atu ai se tasi e uiga i faamatalaga latou te feagai?

Mo lenei gaoioiga faataitai, e mafai ona galulue taitoatasi tagata aoga po o ni vaega toalaiti. A uma ua lava se taimi, valaaulia ni tagata e le gata e faasoa mai po o a mea sa latou maua ae faaali foi i le vasega mai lea laasaga i lea laasaga pe na faapefea ona latou mauaina le faamatalaga e talitonuina.

Pe a lava se taimi, o se gaoioiga e sui ai e mafai ona faaali le vitio o le “Punaoa Paia ua Atofaina,” o loo fautuaina mai i le vaega o “Tala ma Faamatalaga o Talaaga,” o le lesona. O loo faaalia i lenei vitio ia aafiaga moni o le olaga o talavou o loo saili mo tali e uiga i le Atua ma le Ekalesia.

Filifili fasi faamatalaga na e faalogo i ai po o sau fesili e uiga i le Atua, le Ekalesia, po o le ata o le faaolataga. Faaaoga ni nai minute e faataitai ai le sueina o tali e faaaoga ai punaoa paia ua atofaina. E faaopoopo atu i isi mea, e mafai ona e mafaufau e

• tatalo;

• suesue i tusitusiga paia e faaaoga ai le Taiala i Autu, Bible Dictionay, Taiala i Tusitusiga Paia, po o fuaitau o le atamai i aoaoga faavae;

• sue lauga o le konafesi aoao, le itulau o Autu o le Talalelei i luga o le ChurchofJesusChrist.org, po o le Gospel Library app;

• faitau vaega talafeagai i anomea a le Ekalesia e pei o leMo Le Malosi o le Autalavou(tamaitusi, 2011) po o le Autu o le Talalelei, topics.ChurchofJesusChrist.org;

• faafesootai se tasi e te iloaina ma talitonuina, e pei o ou matua, epikopo, se taitai autalavou i lau uarota po o le paranesi, po o se faiaoga seminare, e fesoasoani ia te oe i le sueina o tali.

Atonu e na o se taimi e amata ai le suesuega a tagata aoga i le vasega e lava. Afai o lea, fautuaina i latou e faaauau a latou suesuega pe a uma le vasega.

• O le a se mea na e aoaoina i le taimi o lenei lesona o le a fesoasoani ia te oe pe a e fetaiai ma faamatalaga fou e uiga i le Atua po o le Ekalesia?

• Aisea e te manatu ai e taua i le Tama Faalelagi ma Iesu Keriso ia faapogai e te liliu i ai mo tali ma faamatalaga?

Mafaufau e tuu atu lau molimau i le alofa o le Tama Faalelagi ma Iesu Keriso o loo faaalia e ala i le tuuina mai ia i tatou o punaoa paia o mea moni?

Tala ma Faamatalaga o Talaaga

O le a se mea e tatau ona ou faia pe afai e le mafai ona ou maua se tali i se fesili e ala i punaoa paia ua atofaina?

Ua aoao mai Elder Neil L. Andersen o le Korama a Aposetolo e Toasefululua:

E le o tali uma o le a vave ona oo mai, ae o le tele o fesili e mafai ona foia e ala i le suesue ma le loto ma saili atu i tali mai le Atua. …

E le fa’amalosia lava e le fa’atuatua se tali i fesili uma ae saili e le fa’atuatua le fa’amautinoaga ma le lototele e aga’i atu ai i luma, ma le iloaina i nisi taimi, “Ou te le iloaina mea uma, ae ua lava lo’u iloa e aga’iga’i atu ai pea i le ala o le avea ai ma so’o.”

O le faatofuina o oe lava i le le mautonu faifai pea, lea e fafagaina e tali mai le au le faatuatua ma le au le faamaoni, e faavaivaia ai le faatuatua o se tasi ia Iesu Keriso ma le Toefuataiga.

(Neil L. Andersen, “O Le Faatuatua E Le Tupu Faafuasei, ae e ala i Filifiliga,” Ensign po o le Liahona, Novema 2015, 66)

Aisea e tatau ai ona ou faaeteete i le sueina o tali e uiga i le Ekalesia mai ia i latou ua o ese mai ai?

Na saunoa Elder Neal A.Maxwell (1926–2004) o le Korama a Aposetolo e Toasefululua:

O nisi sa na o le mananao e suesueina le Ekalesia e ala i fofoga o le au faatautee—e pei o le faatalanoaina o Iuta ia malamalama ia Iesu. O tagata faatautee e masani lava ona latou tau mai mea e uiga ia i latou lava nai lo le lotu ua latou o ese mai ai.

(Neal A. Maxwell, “All Hell Is Moved” [faigalotu a le Iunivesite o Polika Iaga, 8 Novema 1977], 3, speeches.byu.edu)

E mafai faapefea ona aafia au faaleagaga ona o punaoa o faamatalaga ua ou filifilia?

Matamata le vitio “Punaoa Paia ua Atofaina” (9:16), o loo maua i le ChurchofJesusChrist.org. Vaavaai pe na faapefea ona aafia talavou o i le vitio i e na latou filifilia e faalogo i ai ma fea sa latou filifili e saili ai mo tali.

O le vitio “In Search of Truth” (3:03), e maua i le ChurchofJesusChrist.org, e mafai foi ona aoga.

Gaoioiga Faaopoopo e Aoao Mai Ai

Lesona faatino

Mafaufau e faaali le fasifuaitau “Upu Moni mai Le Atua” i le tasi pito o le potuaoga ma le “O Tala Pepelo mai ia Satani” i le isi itu o le potu.

Valaaulia tagata aoga e mafaufau faapea o punaoa uma o faamatalaga i le lalolagi atoa (e aofia ai foi punaoa paia ua atofaina faapea foi ma isi faapogai e pei o tusi, tusiga i fesootaiga faaleagafesootai, manatu, suesuega, tusiga i nusipepa, ma isi mea) o loo suitulaga e avanoa i le va o nei fasifuaitau e lua. Faamatala afai o se punaoa e aumai o loo tuuina mai ai ni upumoni e tele atu mai le Atua nai se isi punaoa, o le a tuu faalatalata i le fasifuaitau “Upumoni mai le Atua” nai lo le isi punaoa. Fai atu i tagata aoga fesili nei:

• O a punaoa o mea moni e tatau ona tuu faalatalata i le fasifuaitau “Upu Moni mai Le Atua”?

• O a punaoa e faigata atu ona tuu i autafa o le tasi fasifuaitau ona o loo i ai uma upumoni ma mea sese?