Jesus Christ being baptized by John the Baptist in the River Jordan. Christ has been immersed and is ascending out of the water.
Naʻe hāʻele ʻa Sīsū Kalaisi kia Sione Papitaiso ke ne papitaiso Ia. ʻE lava ke tokoni atu ʻa e lēsoni ko ʻení ke mahino kiate koe mo ke fakamatalaʻi ʻa e mahuʻinga ʻo e papitaisó ʻi he ongoongolelei ʻo Sīsū Kalaisí.
Ko Hono Fakaʻaongaʻi ʻo e Tohi ʻa Molomoná ke fakapapauʻi ‘a e moʻoní. Tokoni ke maʻu ʻe he kau akó ha mahino lahi ange ki he tokāteline mahuʻinga ʻoku akoʻi ʻi he Tohi Tapú, ʻaki ʻenau vakai ki he Tohi ʻa Molomoná ke fakapapauʻi mo fakamahinoʻi ʻa e moʻoní.
Teuteu ʻa e tokotaha akó: Fakaafeʻi ‘a e kau akó ke nau teuteu ki he kalasí, ʻaki ʻenau fakakaukau ki he founga te nau fakamatalaʻi ai ‘a e mahuʻinga ʻo e papitaisó ki ha taha ʻoku nau ʻofa ai ka ʻoku ʻikai ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Ngaahi ʻEkitivitī Ako ʻOku Ala Fakahokó
Ko e mahuʻinga ʻo e papitaisó
Fakakaukau ki he kakai ʻokú ke ‘ofa ai ʻokú ke ʻiloʻi ʻoku ʻikai ke nau kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Fakakaukauloto naʻe ʻi ai ha taha ʻiate kinautolu naʻe feʻiloaki mo e kau faifekaú. Te ke ongoʻi fēfē nai? Fakakaukauloto ʻoku kole atu ʻe he kau faifekaú ke ke fakamatalaʻi ʻa e mahuʻinga ʻo e papitaisó. Fakakaukau ki ha meʻa te ke ala lea ʻaki ʻe lava ʻo tokoni ki ha taha ʻokú ke ʻofa ai ke ne fakahoko ʻa e sitepu mahuʻinga ko ʻení.
Mei he 1 ki he 10 (1 = teʻeki mateuteu; 10 = mātuʻaki mateuteu ʻaupito), te ke ongoʻi mateuteu fēfē nai ke fakamatalaʻi ʻa e mahuʻinga ʻo e papitaisó ʻi ha founga ʻe lava ke tokoniʻi ai ha taha ʻokú ke ʻofa ai ke ne fie papitaiso?
Fakakaukau ke fakaafeʻi ‘a e kau akó ke nau tali ‘a e fehuʻi ko ʻení, ʻaki hono hiki ‘a e ngaahi foʻi tuhu lahi feʻunga ʻi honau nimá.
Ko e hā ha meʻa te ke fie ʻilo lahi ange fekauʻaki mo e papitaisó, ke ke ongoʻi mateuteu ange ai ke fakamatalaʻi hono mahuʻingá?
Fakatokangaʻi ange ʻa e ngaahi tafaʻaki ʻo e papitaisó ʻe fie ʻilo lahi ange ki ai ʻa e kau akó. Lolotonga hoʻo faiakó, feinga ke fakamamafaʻi ha faʻahinga naunau ʻi he lēsoní ʻe tokoni ke tali ʻenau ngaahi fehuʻí.
ʻI he lēsoni ʻo e ʻaho ní, te ke maʻu ai ʻa e faingamālie ke ako ʻa e tokāteline ʻo e papitaisó mo fai ha ngaahi fehuʻi kehekehe fekauʻaki mo e kaveingá. Te ke toe maʻu foki ha faingamālie ke akoako hono fakamatalaʻi ʻo e meʻa ʻokú ke akó.
Naʻe papitaiso ʻa Sīsū Kalaisi ke fakahā mai kiate kitautolu ʻa e halá
Fakakaukau ke fakaʻaliʻali ‘a e mape 11, “ Ko e Fonua Talaʻofá ʻi he Taimi ʻo e Fuakava Foʻoú,” ʻi he konga ʻo e Ngaahi Mape ʻi he Tohi Tapú ʻi he pulusinga ʻa e Kāingalotú ‘i he liliu ʻa Kingi Sēmisí, pe fakaafeʻi e kau akó ke kumi ia ʻi heʻenau folofolá.
Naʻe fononga lalo ʻa Sīsū mei Kāleli ki Petapala, ke papitaiso ia ʻe Sione Papitaiso (vakai, Mātiu 3:13 ; Sione 1:28 ; 1 Nīfai 10:9). Naʻe maʻu ʻe Sione ʻa e ngaahi kī ʻo e Lakanga Taulaʻeiki Faka-ʻĒloné pea naʻá ne papitaiso ʻa e kakaí ʻi he Vaitafe Soataní (vakai, Ko e Fakahinohino ki he Ngaahi Folofolá, “ Sione Papitaiso,” scriptures.ChurchofJesusChrist.org). Fakaʻaongaʻi ha taha ʻo e ngaahi meʻafua ʻi he mapé ke fakafuofuaʻi ai ʻa e mamaʻo naʻe fononga ai ʻa e Fakamoʻuí.
Ko e hā ʻe lava ke akoʻi atu ʻe he feinga ko ia ʻa e Fakamoʻuí ke papitaiso Ia ʻe Sioné, fekauʻaki mo Ia mo e papitaisó?
Lau ʻa e Mātiu 3:13–17, pea fakakaukauloto ʻokú ke ʻi he papitaiso ʻo e Fakamoʻuí. Fekumi ki ha ngaahi fakaikiiki mahuʻinga fekauʻaki mo e Fakamoʻuí mo e papitaisó te ke fie fakamanatuʻí. ʻOku ʻuhinga ʻa e foʻi lea “tuku” ʻi he veesi 15 “ke fakangofua pe fakaʻatā.” Mahalo te ke fie mamata foki ʻi he foʻi vitiō “Ko e Papitaiso ʻo Sīsuú” (2:54), maʻu ʻi he ChurchofJesusChrist.org, pea muimui ki ai ʻi hoʻo folofolá.
Kapau naʻá ke ʻi he papitaiso ʻo e Fakamoʻuí, ko e hā ha meʻa te ke fie manatuʻi mei he aʻusia ko iá?
ʻOkú ke pehē ko e hā ha meʻa naʻá ke mei ako fekauʻaki mo e Fakamoʻuí mo e papitaisó?
ʻE lava ke fakatefito ha niʻihi ʻo e ngaahi moʻoni ʻe ala ʻilo ʻe he kau akó ʻi he Toluʻi ʻOtuá. Kapau ʻe akoʻi ‘a e “Mātiu 3:13–17, Konga 2” ʻi he lēsoni hokó, fakakaukau ke talaange ki he kau akó ʻe toki aleaʻi fakaikiiki ange ai ʻa e Toluʻi ʻOtuá.
Fakakaukau ki ha meʻa te ke lava ʻo vahevahe mo ho kaungāmeʻá pe mēmipa ʻo e fāmilí fekauʻaki mo e papitaiso ʻo Sīsū Kalaisí ʻe ala tokoni kiate ia.
Mahalo ʻe ʻaonga foki ke fakakaukau ki he ngaahi fehuʻi ʻe ala maʻu ho kaungāmeʻá pe mēmipa ʻo e fāmilí fekauʻaki mo e papitaisó. ʻE lava ke tali ha niʻihi ʻo ʻenau ngaahi fehuʻí ʻi he Mātiu 3 . ʻIkai ngata aí, ko e Tohi ʻa Molomoná ko ha maʻuʻanga tokoni fakalaumālie ia ʻokú ne fakamahinoʻi ha ngaahi moʻoni lahi fekauʻaki mo e papitaisó. Ko e ngaahi fehuʻi ko ʻení ko ha ngaahi sīpinga ia ʻo e ngaahi fehuʻi ʻe ala ‘eke ʻe ha taha ʻoku ʻikai mahino ki ai ‘a e mahuʻinga ʻo e papitaisó. Fili ha fehuʻi ʻe taha ʻokú ke pehē ʻe ‘eke ho kaungāmeʻá pe mēmipa ʻo e fāmilí. Hili iá pea ke ako ʻa e ngaahi veesi ʻoku fekauʻaki mo ia ʻi he Tohi ʻa Molomoná, pea vakai ki he founga te nau ala tokoni atu ai ke ke tali ʻa e fehuʻi ko iá.
Fakakaukau ke hiki ‘a e ngaahi fehuʻi mo e ngaahi fakamoʻoni fakafolofola ko ʻení he palakipoé.
Ko e hā ha ‘uhinga te u fie papitaiso aí ? Ko e hā ha ngaahi tāpuaki te u maʻu ? (Vakai, 2 Nīfai 31: 12–13, 17–18 .)
Naʻe ʻalu ʻa Sīsū kia Sione Papitaiso ke papitaiso Ia. Ko hai ‘e lava ke ne papitaiso aú? (Vakai, 3 Nīfai 11:19–22 .)
Naʻe papitaiso ʻa Sīsū ʻi he Vaitafe Soataní, pea naʻe ʻalu hake ia mei he vaí. Kuo pau nai ke u hifo kakato ki lalo ʻi he vaí, pe ʻoku ʻi ai ha toe founga ke papitaiso ai au? (Vakai, 2 Nīfai 31:13 ; 3 Nīfai 11:23–26 .)
Kapau ʻoku papitaiso au ke fakamaʻa au mei he angahalá, ko e hā naʻe papitaiso ai ʻa Sīsuú? ʻIkai naʻe taʻeangahala Ia? (Vakai, 2 Nīfai 31:5–11 .)
Fakaʻaongaʻi ʻa e meʻa kuó ke ako mei he Mātiu 3:13–17 mo e Tohi ʻa Molomoná, ke hiki ʻa e founga te ke fakamatalaʻi ai ʻa e mahuʻinga ʻo e papitaisó ki he mēmipa ho fāmilí pe kaungāmeʻá.
ʻI he ʻosi ‘a e ako ʻa e kau akó, ʻai ke nau fakatātaaʻi ‘a e founga te nau fakamatalaʻi ai ‘a e mahuʻinga ʻo e papitaisó ki honau ngaahi kaungāmeʻá pe kau mēmipa honau fāmilí.
Kapau ʻokú ke ongoʻi ʻoku ueʻi fakalaumālie koe, fakakaukau ke vahevahe hoʻo fakamatalá mo haʻo kaungāmeʻa pe mēmipa ʻo e fāmilí kuo teʻeki ai ke papitaiso ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻE lava foki ke hoko ʻa e vahevahe mo ha taha kuo ʻosi papitaisó ko ha ʻekitivitī ʻaonga.
Fakamatala Fakamahino mo e Puipuituʻá
Mātiu 3:13 . Ko e hā naʻe ʻalu ai ʻa Sīsū kia Sione ke papitaisó?
Half-length frontal portrait of the Prophet Joseph Smith, Jr. Joseph’s head is turned to the side in a three-quarter view, right hand on hip and his left hand holds sheets of papers. He is depicted wearing a dark brown suit and a white shirt and tie.
Ko Sione pē ʻa e pule fakalao ki he ngaahi meʻa ‘o e puleʻangá naʻe ʻi māmani ʻi he taimi ko iá, mo ne lolotonga maʻu ʻa e ngaahi kī ki he mālohí. Naʻe pau ke talangofua ʻa e kakai Siú ki heʻene ngaahi fakahinohinó pe te nau malaʻia, ʻi heʻenau lao pē ʻanautolú. … Naʻe maʻu ʻe he foha ʻo Sākalaiá ʻa e ngaahi kií, mo e puleʻangá, mo e mālohí, ʻa e nāunaú mei he kakai Siú, ʻi he pani māʻoniʻoni mo e tuʻutuʻuni ʻo e hēvaní.
Te tau ʻiloʻi fēfē nai ʻoku mahuʻinga ‘a e papitaisó?
Naʻe akonaki ʻa e Fakamoʻuí fekauʻaki mo e natula mahuʻinga ʻo e papitaisó ʻi Heʻene fakahā kia Nikotīmasi ‘oku fie maʻu ‘a e meʻá ni kae toki hū ki he puleʻanga ʻo e ʻOtuá (vakai, Sione 3:5). Naʻe toe akonaki foki ‘e he Palōfita ko Siosefa Sāmitá ʻoku mahuʻinga ʻa e papitaisó ki he fakamoʻuí:
ʻĪmisi
Half-length frontal portrait of the Prophet Joseph Smith, Jr. Joseph’s head is turned to the side in a three-quarter view, right hand on hip and his left hand holds sheets of papers. He is depicted wearing a dark brown suit and a white shirt and tie.
Fakatomala mei hoʻomou ngaahi angahala kotoa pē, pea papitaiso ʻi he vaí ke fakamolemoleʻi ʻa kinautolu, ʻi he huafa ʻo e Tamaí, pea mo e ʻAló, pea mo e Laumālie Māʻoniʻoní, pea maʻu ʻa e ouau ʻo e hilifaki ʻo e nima ʻo ia kuo fakanofo mo fakamaʻu ki he mālohí ni, koeʻuhí ke mou lava ʻo maʻu ʻa e Laumālie Māʻoniʻoni ʻo e ʻOtuá; pea ʻoku fakatatau ʻeni ki he Ngaahi Folofola Māʻoniʻoní, pea mo e Tohi ʻa Molomoná; pea ko e founga pē ia ʻe lava ai ke hū ʻa e tangatá ki he puleʻanga fakasilesitialé.
ʻE fakapapauʻi fēfē nai ʻe he Tohi ʻa Molomoná ʻa e tokāteline ʻo e papitaisó ʻa ia ʻoku akoʻi ʻi he Tohi Tapú?
Naʻe akoʻi ʻe ʻĒletā Tad R. Callister ʻo e Kau Palesitenisī ʻo e Kau Fitungofulú ‘o pehē:
ʻĪmisi
Brother Tad R. Callister, Sunday school General President. Official Portrait 2018.
ʻOku toutou hoko ‘a e Tohi ʻa Molomoná ko ha fakamoʻoni ʻokú ne fakapapauʻi, fakamaʻalaʻala mo fakatahatahaʻi ‘a e tokāteline naʻe akoʻi ʻi he Tohi Tapú ke ʻi ai ʻa e “ʻEiki pē ‘e taha, ko e tui pē taha, ko e papitaiso pē taha.” …
ʻOku lahi e ngaahi founga kehekehe ʻo e papitaisó ʻi māmani he ʻahó ni neongo naʻe fakahā mai ʻe he Tohi Tapú ʻa e founga ne papitaiso ai e Fakamoʻuí, ʻa hotau Faʻifaʻitakiʻanga tuʻukimuʻá: “Naʻe ʻalu hake leva ia mei he vaí” ( Mātiu 3:16). Te Ne lava nai ke ʻalu hake mei he vaí tukukehe kapau naʻá ne tomuʻa ʻalu hifo ki he vaí? Koeʻuhí ke ʻoua naʻa ʻi ai ha fakakikihi ʻi he kaveingá ni, naʻe fakangata ia ʻe he Tohi ʻa Molomoná ʻaki e fakamatala fakahangatonu ko ʻeni ʻo e tokāteline totonu ki he founga ʻo e papitaisó: “Pea te mou toki fakangalo hifo ʻa kinautolu ʻi he vaí” ( 3 Nīfai 11:26).
(Tad R. Callister, “Ko e Tohi ‘a Molomoná —ko ha Tohi mei he ‘Otuá,” Ensign pe Liahona,Nōvema 2011, 75–76)
Ngaahi ʻEkitivitī Fakalahi ki he Akó
Ngaahi founga kehe ke kamata ʻaki e lēsoní
Fili 1Fakakaukau ke faʻu ha hala fihifihi ke fakakakato ʻe he kau akó ʻi ha laʻipepa pe ʻi he palakipoé ʻa ia ko e hala pē ʻe taha ʻe lava ke fou aí. ʻE lava ke fakaafeʻi e kau akó ke nau fakakaukau ki he ngaahi lēsoni fakalaumālie ʻe lava ke ako mei he ʻekitivitī ko ʻení. Ko e hā hono mahuʻinga ʻo e hala pē ʻe taha ke fakakakato ai ʻa e hala fihifihí? Fakakaukau ke fakaʻaongaʻi ʻa e fakamatala ʻi he palakalafi ko ʻení ke fakafeʻiloakiʻaki ʻa e kaveinga ʻo e papitaisó ko ha konga mahuʻinga ʻo e hala ke foki ai ki hotau ʻapi fakalangí.Neongo ʻe kehekehe ʻaupito e ngaahi tūkunga ʻi heʻetau moʻuí, ka ko e hala pē ʻe taha ke foki ai ki heʻetau Tamai Hēvaní, pea ʻoku malava e hala ko iá ʻi hotau Fakamoʻui ko Sīsū Kalaisí (vakai, Sione 14:6 ; Mōsaia 3:9, 17). Naʻe fakahaaʻi ʻe Sīsū Kalaisi ʻi Heʻene sīpingá mo e ngaahi akonakí, ko e konga mahuʻinga ʻo ʻetau fonongá ko e ouau ʻo e papitaisó (vakai, Sione 3:5 ; Tokāteline mo e Ngaahi Fuakava 76:50–55).
Fili 2Tohiʻi e foʻi lea ko e Papitaiso he palakipoé. Fakaafeʻi ‘a e kau akó ke nau hiki e ngaahi fehuʻi fekauʻaki mo e papitaisó ʻo kamata ʻaki e ngaahi lea Ko hai, Ko e hā, Ko e fē taimi, Ko e fē feituʻu ʻ, Ko e hā e ‘uhinga, mo e ʻE anga fēfē. Fakaafeʻi ‘a e kau akó ke kumi e tali ki he ngaahi fehuʻi ko ʻení lolotonga hono ako e papitaiso ʻo Sīsū Kalaisí.
Fakaʻaongaʻi e folofola ʻa e Fakamoʻuí ʻi he Tohi ʻa Molomoná ke akoʻi ʻaki ‘a e papitaisó
Fakakaukau ke fakaafeʻi e kau akó ke nau fakaʻaongaʻi e folofola ʻa e Fakamoʻuí ke fakamatalaʻi e ouau ʻo e papitaisó. ʻE lava ke kole ki he kau akó ke nau kumi ʻi he Tohi ʻa Molomoná ʻa e meʻa naʻe akoʻi ʻe Sīsū Kalaisi fekauʻaki mo e papitaisó. ʻE lava ke fakaʻaongaʻi e ngaahi potufolofola ko ʻení: 3 Nīfai 11:21–28 ; 3 Nīfai 27:20 .
Ko hono fakaʻaongaʻi ʻo e tokāteline mo e ngaahi ʻulungaanga ʻo Sīsū Kalaisí ke fakamahinoʻiʻaki ʻa e papitaisó
Fakakaukau ke fakaʻaliʻali ʻa e ngaahi tūkunga ko ʻení pea fakaʻatā e kau akó ke nau fili ha taha te nau lava ʻo tokoniʻi ke fakaleleiʻi ‘a ‘ene hohaʻa ki he papitaisó.
ʻOku loto ʻa Nouele ke papitaiso, ka ʻoku ʻikai maʻu ʻe ha taha ʻi hono fāmili ofí ʻa e Lakanga Taulaʻeiki Faka-ʻĒloné pe Faka-Melekisētekí.
ʻOku loto ʻa Makai ke papitaiso ka ʻokú ne ilifia ʻi he fakauku ki lalo ʻi he vaí. ʻOkú ne loto fiemālie pē ke fakangalo hifo ki lalo ʻi he vaí, tukukehe pē hono ʻulú.
Kuo fakaafeʻi ʻe he ongo faifekaú ʻa Meisoni ke papitaiso. ʻOku ʻikai mahino kiate ia e ʻuhinga ʻoku mahuʻinga ai e papitaisó.
ʻOku fie ʻilo ʻa Nikola ki he ʻuhinga ʻoku papitaiso ai e kakaí. Ko e hā hano lelei?
ʻE lava ke ngāue toko taha pe ʻi ha fanga kiʻi kulupu iiki ʻa e kau akó ke ako ʻa e Mātiu 3:13–17 ; 2 Nīfai 31:5–12, 17–18 ; mo e 3 Nīfai 11:19–22, ʻo kumi e ngaahi moʻoni ʻe ala tokoni ki he niʻihi fakafoʻituitui ʻi he ngaahi tūkungá.
ʻOange ha faingamālie ki he kau akó ke vahevahe ʻenau ngaahi tali ki he ngaahi tūkungá.
