Mātiu 3; Maʻake 1; Luke 3

Vakai Fakalūkufuá

Kimuʻa pea kamata e ngāue fakafaifekau ʻa Sīsū Kalaisi ki he kakaí, naʻe feinga ʻa Sione Papitaiso ke teuteuʻi e niʻihi kehé ke nau tali mo muimui ki he Fakamoʻuí. Naʻe fakaafeʻi kinautolu ʻe Sione ke nau fakatomala pea papitaiso. Naʻe papitaiso ʻa Sīsū Kalaisi ʻe Sione, pea naʻe fakamoʻoni fakatouʻosi ʻa e Tamaí mo e Laumālie Māʻoniʻoní kiate Ia. ʻOku kau foki ʻi he naunau ʻo e uike ní ha lēsoni fakataukei fakatokāteline ki he fekumi ki ha mahino lahi ange ʻo fakafou ʻi he ngaahi maʻuʻanga fakamatala kuo fokotuʻu fakalangí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ki he lēsoni takitaha.

Mātiu 3:1–12; Maʻake 1:1–8

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau fakakaukau ki he founga kuo nau tali mo muimui ai ki he Fakamoʻuí, founga te nau lava ai ʻo fakamālohia ʻenau tukupā ke tali mo muimui kiate Iá, mo e founga te nau lava ai ʻo tokoniʻi e niʻihi kehé ke nau mateuteu ke tali mo muimui kiate Iá.

• Teuteu ʻa e tokotaha akó: Fakaafeʻi ‘a e kau akó ke fakalaulauloto ki he meʻa te nau fai mo lea ʻaki ke tokoniʻi ha taha kehe ke ne mateuteu ke tali pea muimui ki he Fakamoʻuí.

• Naunau maʻá e kau akó: Hū ki he ngaahi lea ʻo e konifelenisi lahi fakamuimuitahá

• Fokotuʻu ki hono akoʻí ʻi he konifelenisi vitioó: Hili hono fai ʻe he kau akó ha taha ʻo e ngaahi ʻekitivitī ʻoku fakahingoa ko e A, E, pe F, fakaafeʻi kinautolu ke fakahaaʻiʻaki ʻenau hiki honau ʻuluʻulutuhú ke fakahaaʻi pe naʻa nau fai ʻa e ʻekitivitī ʻuluakí, uá, pe tolú. Fakaafeʻi ʻa e kau akó ke nau vahevahe ʻa e meʻa naʻa nau ako pe ongoʻí.

Luke 3:7–14

Taumuʻa ʻo e lēsoní: ʻE tokoni ʻa e lēsoni ko ʻení ke mahino lelei ange ki he kau akó ʻa e fakatomalá mo e fiefia ʻoku ʻomi maʻu pē ʻe he fakatomalá.

• Teuteu ʻa e tokotaha akó: Fakaafeʻi e kau akó ke nau fakakaukauloto ki honau ʻulungaanga takitaha mo e ngaahi aʻusia ʻi he fakatomalá. ʻE lava ke fehuʻia ʻe he kau akó kiate kinautolu pē ha ngaahi fehuʻi hangē ko ʻení: “Ko e hā ha ngaahi ongo fakaeloto pe ongo ʻokú ke maʻu ʻi he taimi ʻokú ke fakakaukau ai ki he fakatomalá? Ko e hā hono ʻuhingá?” “Ko e hā ha ngaahi meʻa kuó ke aʻusia fekauʻaki mo e fakatomalá?” “Ko e hā ha ngaahi fehuʻi ʻokú ke maʻu fekauʻaki mo e fakatomalá?”

• Ngaahi Vitioó: “Te Tau Lava ʻo Fai Lelei Ange pea Toe Lelei Ange,” mei he taimi 00:50 ki he 3:26, ʻoku maʻu ʻi he ChurchofJesusChrist.org

• Naunau maʻá e kau akó: Ki Hono Fakamālohia ʻo e Toʻu Tupú (tohi tufa, 2011) pe Ngaahi Tefito ʻo e Ongoongoleleí, topics.ChurchofJesusChrist.org

• Meʻa ke fakaʻaliʻali: Ko e ngaahi lea ʻa Palesiteni Lāsolo M. Nalesoni

• Fokotuʻu ki hono akoʻí ʻi he konifelenisi vitioó: ʻI he kamataʻanga ʻo e lēsoní, fakakaukau ke fakaʻaongaʻi ʻa e chat pe ngaahi tekinolosia kehe ʻoku maʻú ke fakaʻatā ʻa e kau akó ke nau vahevahe ʻa e ngaahi meʻa ʻokú ne ʻomi ʻa e fiefiá kiate kinautolu.

Mātiu 3:13–17, Konga 1

Taumuʻa ʻo e lēsoní: ʻE tokoni e lēsoni ko ʻení ke mahino mo fakamatalaʻi ʻe he kau akó ‘a e mahuʻinga ʻo e papitaisó ʻi he ongoongolelei ʻo Sīsū Kalaisí.

• Teuteu ʻa e tokotaha akó:Fakaafeʻi e kau akó ke nau teuteu ki he kalasí, ʻaki ʻenau fakakaukau ki he founga te nau fakamatalaʻi ai e mahuʻinga ʻo e papitaisó ki ha taha ʻoku nau ʻofa ai ʻoku ʻikai ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

• Vitiō: “The Babtism of Jesus Christ” (2:54), ʻoku maʻu ʻi he ChurchofJesusChrist.org

• Meʻa ke fakaʻaliʻali: Ngaahi Mape ʻo e Tohi Tapú, fika 11, “ Ko e Fonua Tapú ʻi he Kuonga ʻo e Fuakava Foʻoú ”; lisi ʻo e ngaahi fehuʻi mo e ngaahi fakamoʻoni fakafolofola fekauʻaki mo e papitaisó

• Fokotuʻu ki hono akoʻí ʻi he konifelenisi vitioó: Fakakaukau ke fakaafeʻi e kau akó ke vahevahe ʻi he fanga kiʻi lokí ʻenau fakamatala ki he mahuʻinga ʻo e papitaisó. ʻE maʻu ai ʻe he tokotaha ako kotoa pē ha faingamālie ke vahevahe ʻenau fakamatalá. Hili iá, fakaafeʻi kinautolu ke nau vahevahe pe naʻe fēfē pea mo e meʻa ne nau ongoʻí.

Mātiu 3:13–17, Konga 2

Taumuʻa ʻo e lēsoní: ʻE tokoni ʻa e lēsoni ko ʻení ke fakaloloto e mahino ʻa e kau akó ki he mēmipa takitaha ʻo e Toluʻi ʻOtuá, ʻa ia te ne lava ʻo liliu ʻenau ngaahi fili ʻi he moʻuí.

• Teuteu ʻa e tokotaha akó: Fakaafeʻi e kau akó ke nau omi mateuteu ki he kalasí ke vahevahe e meʻa ʻoku nau ʻilo fekauʻaki mo e Toluʻi ʻOtuá, founga ʻoku nau ʻiloʻi ai iá, pea ko e hā ha ngaahi fehuʻi te nau ala maʻu.

Ko Hono Maʻu ʻo e ʻIlo Fakalaumālié, Konga 3

Taumuʻa ʻo e lēsoní: ʻE tokoni ʻa e lēsoni ko ʻení ke mahino ki he kau akó ʻa e mahuʻinga ʻo e fekumi ki he moʻoní ʻo fakafou ʻi he ngaahi maʻuʻanga fakamatala kuo ʻomi ʻe he Tamai Hēvaní mo Sīsū Kalaisi maʻatautolú.

• Teuteu ʻa e tokotaha akó: Fakaafeʻi ‘a e kau akó ke nau fakakaukau ki he feituʻu ʻoku nau faʻa maʻu mei ai ha fakamatala ʻi he taimi ʻoku ʻi ai ai haʻanau ngaahi fehuʻi fekauʻaki mo e ʻOtuá pe ko e Siasí. Poupouʻi kinautolu ke nau fakalaulauloto ki he lea ko ʻeni ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku taau mo e ngaahi fehuʻi fakalaumālié ha ngaahi tali fakalaumālie mei he ʻOtuá” (“Siosefa Sāmita,” Ensign pe Liahona, Nōvema. 2014, 28, 30).

• Laʻipepa Tufa: “Ngaahi Fehuʻi ki hono Sivisiviʻi ʻo e Fakamatala Foʻoú”