Seminelí
Mātiu 9-10; Maʻake 5; Luke 9

Mātiu 9-10; Maʻake 5; Luke 9

Vakai Fakalūkufuá

ʻI he ngāue fakaetauhi ʻa Sīsū ʻi Kālelí, naʻe fakamoʻui ha fefine naʻe ʻau toto ʻaki ʻene ala ki Hono kofú. Naʻe fokotuʻu ʻe he ʻEikí ʻa e ʻofefine ʻo Sailosí meí he maté. Naʻe fakamafaiʻi pea fekau ʻe Sīsū Kalaisi ʻa e Kau ʻAposetolo ʻe Toko Hongofulu Mā Uá ke nau ʻalu atu ʻo malanga, ngāue fakaetauhi, pea fakamoʻui ʻa e mahakí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Maʻake 5:24–34;

Mātiu 9:20–22

Taumuʻa ʻo e lēsoní: ʻE tokoni e lēsoni ko ʻení ke mahino ki he kau akó e founga ke maʻu ai e mālohi ʻo e Fakamoʻuí ʻi heʻenau moʻuí ʻaki hono fakaʻaongaʻi ʻenau tui kiate Iá.

  • Teuteu ʻa e tokotaha akó: Fakaafeʻi e kau akó ke nau fakakaukau ki ha taimi ne nau tafoki ai kia Sīsū Kalaisi ke maʻu ha tokoni. Te nau ala fakakaukau foki ki ha aʻusia ʻa ha taha kehe.

  • Fokotuʻu ki hono akoʻi ʻo e konifelenisi vitioó:Huluʻi e vitiō ”Ko Hono Fakamoʻui ʻe Sīsū ha Fefine ʻo e Tuí” (1:38). Kapau ʻoku fakaʻatā ia ʻe he polokalama fakakomipiuta ʻokú ke fakaʻaongaʻí, fakakaukau ke fakaafeʻi e kau akó ke nau ngāue ʻi he ngaahi fanga kiʻi loki ke aleaʻi e ngaahi fehuʻi ko ʻení: Ko e hā te ke lava ʻo fai ke fakahaaʻi ko hoʻo holi lahi tahá ke maʻu e tokoni ʻa e Fakamoʻuí? Naʻe mei kehe fēfē nai hoʻo moʻuí kapau naʻá ke toutou fakaʻaongaʻi e mālohi ʻo Sīsū Kalaisí?

Maʻake 5:21–24, 35–43

Taumuʻa ʻo e lēsoní: ʻE tokoniʻi ʻe he lēsoni ko ʻení ʻa e kau akó ke ngāue ʻaki ʻenau tuí mo tui kia Kalaisi ʻi he taimi ʻo e tailiilí mo e taʻepaú.

  • Teuteu ʻa e tokotaha akó: Fakalotolahi ki he kau akó ke ako maʻuloto e kupuʻi lea “ʻOua te ke manavahē, ka ke tui pē” ( Maʻake 5:36). Kole ange ke nau fakalaulauloto ki he founga ʻe lava ke tokoniʻi ai kinautolu ʻe he kupuʻi lea ko ʻení lolotonga e ngaahi taimi ʻo e ʻahiʻahí.

  • Vitiō: “Fakamo’ui ‘e Sisū ‘a e ‘Õfefine ‘o Sailosi” (3:25)

  • Nāunau maʻá e kau akó: Kapau ʻe lava, ʻomi ha ngaahi nāunau fakaʻaati ke fakaʻaongaʻi ʻe he kau akó ke faʻu ʻaki ha fakatātā mo e kupuʻi lea “ʻOua te ke manavahē, ka ke tui pē.”

  • Fokotuʻu ki hono akoʻi ʻo e konifelenisi fakavitioó: Fakaafeʻi e kau akó ke nau vahevahe ʻi he chat ha ngaahi potufolofola pe ngaahi fakamatala mei he konifelenisi lahí fekauʻaki mo e ʻoua ʻe ilifiá. ʻE lava leva ke fakaafeʻi ha kau ako pau ke nau vahevahe ha potufolofola naʻa nau maʻu ʻaki hono share ʻenau screen pea fakaʻaliʻali ʻa e potufolofola meí he (Gospel Library) ʻi he ʻinitanetí pe ko e Gospel Library app.

Mātiu 9:36–38; Mātiu 10

Taumuʻa ʻo e lēsoní: ʻE tokoni ʻa e lēsoni ko ʻení ke mahino ki he kau akó ʻa e uiuiʻi mo e taumuʻa ʻo e Kau ʻAposetoló ʻi heʻenau hoko ko e kau fakafofonga mo e kau fakamoʻoni ʻo Sīsū Kalaisí.

  • Teuteu ʻa e tokotaha akó: Fakaafeʻi e kau akó ke nau fakakaukau ki heʻenau ngaahi aʻusia mo e kau ʻAposetolo ʻa e ʻEikí ʻaki hono fai e ngaahi fehuʻi ko ʻení: Kuo ʻomi fēfē koe ʻe he kau ʻAposetolo ʻa e Fakamoʻuí ke ofiange kia Sīsū Kalaisí? Ko e hā ‘okú ke ofo ai kau kiate kinautolú? Ko e hā haʻo ngaahi fehuʻi fekauʻaki mo e fatongia ʻo ha ʻAposetolo? Fakakaukau ki he fakakaukau ʻe taha ʻo e teuteu ʻa e tokotaha akó ʻa ia ʻoku vahevahe ʻi he konga “Ngaahi ʻEkitivitī Tokoni Ki he Akó”.

  • Meʻa ke fakaʻaliʻali atú: Teuteu ke fakaʻaliʻali, pe tufa ha laʻipepa tufa, ʻa e lea ʻa Palesiteni Nalesoní mo e ngaahi fehuʻi ke vakaiʻi ʻaki ʻe he kau akó ʻenau ngaahi ongó mo e tōʻonga fakakaukau ki he Kau ʻAposetolo ʻa Sīsū Kalaisí.

  • Ngaahi maʻuʻanga tokoni maʻáe kau akó: Fakakaukau pe ko e fē ngaahi maʻuʻanga tokoni mei he kau ʻAposetolo ʻo onopōní te ke ʻoange ki hoʻo kau akó.

Luke 9:24–26, 57–62

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ʻiloʻi ʻa e ngaahi founga ke hoko ai ko ha ākonga moʻoni ʻa Sīsū Kalaisí.

  • Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi founga ʻoku nau feinga ai ke muimui ʻia Sīsū Kalaisi.

  • Fokotuʻu ki hono akoʻi ʻo e konifelenisi vitioó: Ke tokoni ke lipooti ʻe he kau akó e meʻa ne nau akó, fakakaukau ke fakaʻaongaʻi e palakipoe hinehiná pe meʻa tatau mo iá. ʻE lava ke fakakakato ʻe he kau akó ʻa e kupuʻi lea “Ke hoko ko ha ākonga moʻoni ʻa Sīsū Kalaisí, te tau lava ʻo …”

Ngaahi Fakamanatu ʻo e Fakataukei Fakatokāteliné Hono 3

Taumuʻa ʻo e lēsoní: ʻE tokoni ʻa e lēsoni ko ʻení ke fakatupulaki e mahino ʻa e kau akó pea tuku ke nau akoako fakamatalaʻi ʻa e tokāteline ʻoku akoʻi ʻi he ngaahi potufolofola fakataukei fakatokāteline ko ʻení: Mātiu 5:14–16 ; Luke 2:10–12 ; Sione 3:5 ; mo e Sione 3:16 .

Fakatokangaʻi ange: Mahalo ʻe fiemaʻu ke akoʻi ha lēsoni fakataukei fakatokāteline ʻo fetongiʻaki e lēsoni fakamanatu ko ʻení. Vakai ki he taimitēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻotineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí.

  • Teuteu ʻa e tokotaha akó: Fakaafeʻi e kau akó ke fili ha taha ʻo e ngaahi potufolofola fakataukei fakatokāteline meia Mātiu, Luke, pe Sione ʻoku mahuʻingamālie kiate kinautolú. Kole ange ke nau fakakaukau ki he ʻuhinga ʻoku mahuʻingamālie ai kiate kinautolu ʻa e potufolofola ko ʻení pea haʻu mateuteu ke vahevahe ʻenau ngaahi fakakaukaú ʻi he kalasí.

  • Meʻa ke fakaʻaliʻali atú: Fakakaukau ke fakaʻaliʻali ʻa e lisi ʻo e ngaahi founga ako ʻe fakaʻaongaʻi ʻe he kau akó ke vakaiʻi ʻaki ʻa e ngaahi founga ʻoku tokoni kiate kinautolu ke nau ako lelei tahá.

  • Ngaahi meʻa: Toe vakaiʻi ʻa e ngaahi ʻekitivitī ʻokú ne fakamamafaʻi e ngaahi founga kehekehe ʻo e akó, pea fakapapauʻi ʻa e ngaahi nāunau ʻe ala fie maʻu ʻe hoʻo kau akó kae lava ke fakakakato lelei ʻa e ʻekitivitī ʻoku nau filí.

  • Fokotuʻu ki hono akoʻi ʻo e konifelenisi vitioó: Fakakaukau ke ʻoange ki he kau akó ha ngaahi meʻa mo e meʻangāue mei honau ʻapí te nau lava ʻo fakaʻaongaʻi ʻi heʻenau fakakakato ʻa e ʻekitivitī akó. Fakaafeʻi e kau akó ke vahevahe ʻenau ngaahi fakakaukaú mo e kalasí.

Paaki