Luke 9:24–26, 57–62

Kau Ākonga ʻo Sīsū Kalaisi

Naʻe akoʻi ʻe Sīsū Kalaisi ha ngaahi moʻoni lahi fekauʻaki mo e founga te tau lava ai ʻo hoko ko ʻEne kau ākongá. ʻE tokoni ʻa e lēsoni ko ʻení ki he kau akó ke nau ʻiloʻi ʻa e ngaahi founga ke hoko ai ko ha ākonga moʻoni ʻo Sīsū Kalaisí.

Ngaahi meʻafoaki fakalaumālié. Kuo tāpuekina koe ʻe he ʻEikí ʻaki ha ngaahi meʻafoaki fakalaumālie mo ha ivi malava ke tokoni ki he moʻui ʻa e kau ako ʻi hoʻo kalasí. Feinga ke ke ʻiloʻi, fakatupulaki, mo fakalahi hoʻo ngaahi meʻafoaki fakalaumālié kae lava ke ke ngāue maʻá e ʻEikí mo faitāpuekina e moʻui ʻa e niʻihi kehé. Ke maʻu ha fakamatala lahi ange ki he ngaahi meʻafoaki fakalaumālié, vakai ki he Molonai 10:8–19 ; Tokāteline mo e Ngaahi Fuakava 46:8–26 ; 1 Kolinitō 12:1–11 .

Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi founga ʻoku nau feinga ai ke muimui ʻia Sīsū Kalaisi.

Ngaahi ʻEkitivitī Ako ʻe Ala Fakahokó

Fakakaukau ke kamata e kalasí ʻaki haʻo kole ki ha tokotaha ako ke ne tataki e kalasí ʻi ha ngaahi ngāue kehekehe pe ngaahi ʻekitivitī faingofua. Hili iá, fakaafeʻi e kau akó ke vahevahe e meʻa naʻá ne fakafaingofuaʻi pe fakafeʻātungia ʻa e muimui ki he takí.

Hoko ko ha ākonga ʻo Sīsū Kalaisi

‘I he kotoa e ngāue fakafaifekau ʻa Sīsū Kalaisí, naʻá Ne fakaafeʻi ʻa e kakaí ke nau muimui ʻiate Ia pea hoko ko ʻEne kau ākonga. Ko e ākongá ko ha taha ia kuo ʻosi papitaiso, muimui ʻia Sīsū Kalaisi, pea feinga ke moʻui ʻo fakatatau ki mo ʻEne ngaahi akonakí. ʻOku tau lau ʻi he Luke 9 , fekauʻaki mo ha ngaahi tefitoʻi moʻoni kehekehe, kapau ʻe muimui ki ai, te ne lava ʻo tokoniʻi kitautolu ke tau hoko ko e ākonga ʻa Sīsū Kalaisí.

• ʻI hoʻo fakakaukau ki he meʻa ʻokú ke ʻilo fekauʻaki mo Sīsū Kalaisí, ko e hā ʻe mahuʻinga lahi ai ke hoko ko ʻEne ākongá?

ʻOange ʻa e laʻipepa tufa ko ʻení ki he kau akó, pea fakaafeʻi ke nau ngāue fakafoʻituitui ki ha taha ʻo e ngaahi ngāué, pe ʻe lava ke vahevahe ʻa e kalasí ki ha ngaahi kulupu pea vahe ha taha ʻo e ngaahi ngāué.

ʻOku nofotaha ʻa e ngaahi vahe takitaha ʻe tolu ko ʻení ʻi he taha ʻo e ngaahi akonaki ʻa e Fakamoʻuí. ʻE lava ke tokoni ʻeni kiate koe ʻi hoʻo feinga ke hoko ko ha ākonga ʻa Sīsū Kalaisí. Lau ʻa e ngaahi kongá, pea fili ha konga ʻe taha pe lahi ange ke fakakakato. Fakaafeʻi ʻa e Laumālie Māʻoniʻoní ke ne ʻomi ha fakahā fakataautaha ki he ngaahi founga te ke lava ai ʻo fakaʻaongaʻi ʻa e meʻa ʻokú ke akó ʻi hoʻo moʻuí.

Toʻo hake hoʻo kolosí

Lau ʻa e Luke 9:23 , ʻo kumi ki he ngaahi makatuʻunga ʻa e Fakamoʻuí ke hoko ai ha taha ko ʻEne ākongá.

• Ko e hā ʻoku akoʻi mai ʻe he veesi ko ʻení fekauʻaki mo e hoko ko ha ākonga moʻoni ʻa Sīsū Kalaisí?

ʻOku ʻuhinga ʻa e veesi ko ʻení ki he kolosi naʻe fua mo mamahi ai ʻa Sīsū Kalaisí kae lava ke fakahoko e finangalo ʻo ʻEne Tamaí. Neongo ʻoku ʻikai kole mai ke tau fua ha kolosi ʻo hangē ko ia naʻe fai ‘e he ʻEikí, ka ʻoku kole mai ke tau muimui kiate Ia ʻaki hono fakakakato ‘a e finangalo ʻa e Tamai Hēvaní maʻatautolú, ʻo aʻu ki he taimi ʻoku faingataʻa aí.

 )

Naʻe fakamatalaʻi ʻe ʻEletā ʻUlise Soalesi ʻo e Kōlomu ʻo e Kau ʻAposetolo ʻe Toko Hongofulu Mā Uá hono ʻuhinga ʻo e toʻo hake hotau kolosí. Mahalo te ke fie mamata ʻi he foʻi vitiō “Fua ʻEtau Kavengá” mei he taimi 3:08 ki he 3:49, ʻoku ʻi he ChurchofJesusChrist.org, pe lau ʻa e fakamatala ʻi laló.

Lomiʻi ʻi heni ke maʻu ʻa e fakamatala ki he vitiō ko ʻení.

ʻOku tau ako mei he folofolá ko kinautolu ʻoku nau loto ke fuesia honau faingataʻaʻiá, ʻoku nau ʻofa ʻia Sīsū Kalaisi ʻi ha faʻahinga founga ʻoku nau fakafisingaʻi ai ʻa e anga taʻe faka-ʻotua pea mo e holi fakamāmani kotoa pē ka nau tauhi ʻEne ngaahi fekaú.

ʻE tokoni ʻetau fakapapauʻi ke siʻaki e ngaahi meʻa kotoa ʻoku ʻikai fenāpasi mo e finangalo ʻo e ʻOtuá pea feilaulauʻi e meʻa kotoa kuo kole mai ke tau foakí pea tau kātaki ‘o muimui ki he ‘Ene ngaahi akonakí ‘e tokoni ke tau kātakiʻi ʻi he hala ʻo e ongoongolelei ʻo Sīsū Kalaisí—neongo e ngaahi faingataʻá, vaivai ʻa hotau laumālié, pe ngaahi mālohi fakasōsiale mo e fakakaukau fakamāmani ʻoku fakafepaki ki Heʻene ngaahi akonakí.

(Ulisses Soares, “Fua ʻEtau Kavengá,” Ensign pe Liahona, Nōvema 2019, 113–14)

Fakalaulauloto ki he ngaahi fehuʻi ko ʻení:

• Ko e hā ʻoku fiemaʻu ai ke ke fakafisingaʻi ha faʻahinga holi taʻe faka-ʻOtua pe fakamāmani ʻi hoʻo moʻuí?

• Ko e hā ha ngaahi founga ʻe lava ke hangē ai hoʻo fakafisingaʻi koe mei he ngaahi holi taʻe faka-ʻOtua pe fakamāmaní ko hano fua ha kolosí?

• ʻOkú ke pehē ʻe tokoni fēfē hono “toʻo hake hoʻo ʻakau mafasiá” ke ke hoko ai ko ha ākonga moʻoni ʻa Sīsū Kalaisi?

Mole hoʻo moʻuí ke toe maʻu ia

Lau ʻa e Luke 9:24–25 , ʻo kumi ki he meʻa naʻe akoʻi ʻe he ʻEikí fekauʻaki mo e hoko ko ʻEne ākongá.

• Ko e hā ʻoku akoʻi mai ʻe he ngaahi veesi ko ʻení fekauʻaki mo e hoko ko ha ākonga moʻoni ʻa Sīsū Kalaisi?

• Ko e hā ha founga ʻokú ke pehē ʻe “mole” ai e moʻui ʻa e kakai ʻoku tokanga taha pe, ki heʻenau ngaahi holi siokitá?

• ʻOkú ke pehē ʻoku ʻuhinga ki he hā ʻa hoʻo fakahaofi hoʻo moʻuí ʻo kapau te ke fakamoleki ia maʻa Sīsū Kalaisi?

Naʻe fakamatalaʻi ‘e Palesiteni Tōmasi S. Monisoni (1927–2018) ʻa e ʻuhinga ke fakamoleki ʻetau moʻuí maʻa Sīsū Kalaisí:

Ko kinautolu ko ia ʻoku nau moʻui siokita peé, ʻoku hangē leva ʻoku hōloa pea iku mole ʻenau moʻuí, ka ko kinautolu ʻoku foaki ʻenau moʻuí ke tokoni ki he niʻihi kehé, ʻoku nau tupulaki mo fakalakalaka—pea nau fakahaofi ai ʻenau moʻuí.

(Thomas S. Monson, “Ko e hā Kuó u Fai Maʻá Ha Taha he ʻAhó ni?” Ensign pe Liahona, Nōvema 2009, 85)

• Ko hai ʻokú ke ʻilo kuo fili ke mole ʻene moʻuí koeʻuhí ko Sīsū Kalaisí? Ko e hā e tokoni kuo fai ʻe he fili ko ʻení ki he tokotahá ni?

• Ko e hā ha ngaahi founga ʻoku tāpuekina ai koe, koeʻuhí ko e moʻui ʻaki ʻe Sīsū Kalaisi ʻa e ngaahi akonaki ʻi he ngaahi veesi ko ʻení?

Ikunaʻi e ngaahi meʻa ʻokú ne tohoakiʻi ʻetau tokangá mo e kumi ʻuhingá

Lau ʻa e Luke 9:57–62 , ʻo kumi ki he meʻa naʻe fie fakahoko ʻe he niʻihi kimuʻa pea nau muimui ki he Fakamoʻuí.

• Ko e hā ʻoku akoʻi mai ʻe he ngaahi veesi ko ʻení fekauʻaki mo e hoko ko ha ākonga moʻoni ʻa Sīsū Kalaisi?

Naʻe ʻikai fakahā mai ʻe Sīsū Kalaisi ʻoku hala, ke tengihia ha mate ʻa ha taha ʻokú ke ʻofa ai pe lea fakamāvae ki he ngaahi kaungāmeʻá mo e fāmilí. Ka naʻá Ne akoʻi kiate kinautolu ha lēsoni mahuʻinga fekauʻaki mo e mahuʻinga ʻo e tuʻunga fakaākongá.

Naʻe fakamatalaʻi ʻe Palesiteni Hauati W. Hanitā (1907–1995) ʻa e talanoa fakatātā ʻo e huo tohó ʻi he Luke 9:62 .

Ke keli ha ʻotu [pe luo] hangatonu, ʻoku fiemaʻu ke tukutaha e tokanga ʻa e tangata palaú ki ha meʻa pau ʻi muʻa ʻiate ia. ʻE nofo maʻu ai ʻi he hala totonú. Ka neongo ia, kapau ʻe faifai peá ne sio ki mui ke sio ki he hala kuó ne fononga mai aí, ʻe lahi ange ʻa e faingamālie ke hē ai mei he halá. Ko hono olá ʻoku pikopiko mo tungotunga ʻa e ngaahi luó. … Kapau ‘e ʻikai tuku taha hotau iví ki mui, kae tuku ki muʻa ʻiate kitautolu—ki he moʻui taʻengatá mo e fiefia ʻo e fakamoʻuí—ko e moʻoni te tau maʻu ia.

(Howard W. Hunter, “Am I a ‘Living’ Member?”Ensign, May 1987, 17)

• Ko e hā ha ngaahi ʻuhinga angamaheni ʻe lava ke ʻomi ʻe he kakai ʻo e ʻaho ní, ki heʻenau fili ke ʻoua te nau muimui ki he ʻEikí?

• ʻE lava fēfē ke ke nofotaha ʻi he meʻa kuo kole atu ʻe he Fakamoʻuí ke ke fai he taimi ni pea ʻi ho kahaʻú?

Hili hono fakakakato ʻe he kau akó e ngaahi ngāué, fakaafeʻi ha niʻihi ʻo e kau akó ke lipooti e meʻa ne nau akó. Ko e founga ʻe taha ke fai ai ʻení ko e tohiʻi ʻi he palakipoé Ke hoko ko ha ākonga moʻoni ʻa Sīsū Kalaisí te tau lava ʻo … pea fakaafeʻi e kau akó ke fakakakato ʻa e kupuʻi leá.

Ko ʻeku sitepu hono hokó

Fakaafeʻi e kau akó ke nau faʻu ha palani ke tokoniʻi kinautolu ʻi heʻenau feinga ke hoko ko e kau ākonga ʻa Sīsū Kalaisí. Fakakaukau ke fakaafeʻi e kau akó ke nau fakatātaaʻi ʻenau palaní. ʻE lava ke tā ʻa e fakatātā ko ʻení ʻi he palakipoé ko ha sīpinga ʻe taha ʻo e founga te nau ala fakahoko ai ʻení.

Tā ha sitepu ʻoku ʻi ai hano sitepu ʻe tolu. Tohiʻi ʻa e Sīsū Kalaisí ʻi ʻolunga ʻi he ngaahi sitepú. Fokotuʻu ha fakatātā ʻi he konga ki lalo ʻo e sitepú ke fakafofongaʻi koe.

Fekumi ki he fakahinohino ʻa e Laumālie Māʻoniʻoní ʻi hoʻo fakakaukau ki hoʻo ngaahi feinga ke hoko ko ha ākonga ʻa Sīsū Kalaisí pea mo e founga ʻe lava ke toe lelei ange ai hoʻo muimui kiate Iá. Manatuʻi ʻe lava ke fakahū ʻe he Laumālie Māʻoniʻoní ha ngaahi fakakaukau ki ho ʻatamaí mo e ngaahi ongo ki ho lotó lolotonga hoʻo fakalaulaulotó (vakai, Tokāteline mo e Ngaahi Fuakava 8:2–3).

Hiki ha ngaahi sitepu ʻe lava ke ke fai ke tokoniʻi koe ʻi hoʻo feinga ke hoko ko ha ākonga ʻa Sīsū Kalaisí. Te ke lava ʻo fili ʻa e ngaahi meʻa ʻokú ke ongoʻi ʻoku finangalo e ʻEikí ke ke faí, pe fakahingoa e ngaahi sitepú ʻi he hokohoko ʻokú ke loto ke ʻahiʻahiʻi ai kinautolú.

• Ko e hā e sitepu hono hoko te ke lava ʻo fai ʻi hoʻo feinga ke hoko ko ha ākonga faivelenga ange ʻa Sīsū Kalaisí?

• ʻOkú ke pehē ʻe fēfē hoʻo fakalakalaká ʻi he taimi te ke fai ai e sitepu ko ʻení?

• ʻOkú ke pehē ko e hā ha ngaahi founga ʻe lava ke tokoniʻi ai koe ʻe he Fakamoʻuí ʻi hoʻo fakahoko ʻeni mo e ngaahi sitepu ʻi he kahaʻú?

Fakamoʻoni ki he ʻofa ʻa Sīsū Kalaisí mo ʻEne finangalo lelei ke tokoniʻi kitautolu ʻi heʻetau feinga ke hoko ko ʻEne kau ākongá.

Fakamatala Fakamahinó mo e Puipuituʻá

Luke 9:24 . ʻOku ʻuhinga ki he hā ke mole hoʻo moʻuí kae lava ke maʻu iá?

Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e lahi ange ʻeku fakakaukau ki aí, ko e lahi ange ia ʻeku fakatumutumu ʻi he anga hono momoi ʻe Sīsū ʻEne moʻuí ki he Tamaí, ʻa ʻEne foaki ʻEne moʻuí ki he finangalo ʻo e Tamaí—ʻi he moʻuí pea ʻi he mate. …

Ko e fekau ko ia ʻa Kalaisi ke muimui kiate Iá ko ha fekau ia ke … foaki ʻetau moʻuí, koeʻuhí ko e moʻui moʻoní, ʻa e moʻui mahinó, ʻa e moʻui ʻoku fakaʻatā ʻe he puleʻanga fakasilesitialé, ʻoku ʻamanaki e ʻOtuá maʻatautolú.

(D. Todd Christofferson, “Ko Hono Maʻu Hoʻo Moʻuí,” Liahona, Māʻasi 2016, 18)

‘Ekitivitī Fakalahi ki he Akó

Anga fakaʻapaʻapá mo e angaʻofá

ʻOku tokolahi ha niʻihi ʻoku nau ngāue ʻaki e fakakikihí mo e fekeʻikeʻí ʻi he taimi ʻoku nau ongoʻi ai ʻoku ngaohikovia kinautolu ʻe he niʻihi kehé. Naʻa mo Sēmisi mo Sione naʻá na loto-mamahi ʻi he taimi naʻe fakafisingaʻi ai ʻe he kakai ʻi ha kolo Samēlia ʻa e Fakamoʻuí. Lau ʻa e Luke 9:51–56 , ʻo kumi ki he pōpoaki ʻa Sīsū Kalaisi kiate kinautolu ʻoku ngaohikovia ʻe he niʻihi kehé. Naʻe mei kehe fēfē ʻa e māmaní kapau ne tau muimui kotoa ki he sīpinga ʻa e Fakamoʻuí mei he talanoa ko ʻení?