Ngaahi Fakamanatu ʻo e Fakataukei Fakatokāteliné Hono3

Mahino pea Fakamatalaʻi

ʻOku mahuʻinga ke maʻu e mahino ki he ngaahi potufolofola pau mo e malava ke fakamatalaʻi ʻa e ngaahi moʻoni ʻoku nau akoʻí ki hono maʻu ʻo e fakataukei fakatokāteliné. ʻOku fakataumuʻa ʻa e lēsoni ko ʻení ke tokoni ke mahino lelei ange kiate koe mo ke akoako hono fakamatalaʻi ʻo e tokāteline ʻoku akoʻi ʻi he ngaahi potufolofola fakataukei fakatokāteline ko ʻení: Mātiu 5:14–16; Luke 2:10–12; Sione 3:5; Sione 3:16.

Faka’aonga’i ha ngaahi founga mo e ngaahi sīpinga kehekehe. ʻE lava ke tokoni hono fakaʻaongaʻi ha ngaahi founga fakafaiako kehekehé ke tokoniʻi e kau ako ʻoku ako ‘i ha ngaahi founga kehekehé.

Teuteu ʻa e tokotahaakó: Fili ha potufolofola fakataukei fakatokāteline mahuʻinga ʻe taha meí he Fuakava Foʻoú. Teuteu ke vahevahe mo e kalasí ʻa e ʻuhinga ʻoku mahuʻingamālie ai kiate koe ʻa e potufolofola ko ʻení.

Ngaahi ʻEkitivitī Ako ʻOku Ala Fakahokó

Mahalo ʻe fiemaʻu ke akoʻi ha lēsoni fakataukei fakatokāteline ʻo fetongiʻaki e lēsoni fakamanatu ko ʻení. Vakai ki he taimitēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻotineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí.

Ko e hā e founga ʻokú ke ako lelei taha aí?

ʻOku lahi ha ngaahi founga ke ako ai, pea ʻoku tau ako mo tauhi e fakamatalá ʻi ha ngaahi founga ekhekehe.

Fakakaukau ke fakaʻaliʻali ange ʻa e ngaahi fehuʻi ko ʻení. Fakaafeʻi e kau akó ke nau lau ʻa e ngaahi founga ako ko ʻení pea fokotuʻutuʻu kinautolu ʻi heʻenau tohinoa akó meí he 1 ki he 4, ʻo ngāue ʻaki ʻa e 1 ki he meʻa ʻoku lahi taha ʻenau fakaʻaongaʻí, pea 4 ki he meʻa ʻoku siʻisiʻi taha ʻenau fakaʻaongaʻí.

• Fakakaukauloto: ʻOku ou ako ʻaki ʻeku mamata mo fakakaukaulotó. ʻOku tokoni ʻa e tā fakatātaá, valivalí, sātí, kalafi mo e mītiá ke u ako mo puke maʻu ʻa e fakamatalá.

• ʻOku tokoni ʻa e vahevahe mo e niʻihi kehé: ʻOku tokoni ʻa e tohi mo e talanoa mo e niʻihi kehé ke u ngāue mo ako lahiange.

• Ako tauʻatāina: ʻOku ou saiʻia ange ke ako ʻiate au pē, pea ʻoku ou ongoʻi loto-falala ʻi heʻeku fakakaukauʻi tauʻatāina e ngaahi meʻá.

• Ako ʻi hono Fakahokó: ʻOku ou ako lelei taha ʻi heʻeku fakaʻaongaʻi ha ngaahi ongo kehekehe, hangē ko e ala, nanamu, fanongo, mo ueʻi hoku sinó.

Fakakaukau ki he founga naʻe fakafeʻungaʻi ai ʻe he Fakamoʻuí ʻEne akonakí ke feau e ngaahi fiemaʻu ʻa kinautolu naʻá Ne akoʻí.

• ʻOkú ke pehē ko e hā naʻe fakaʻaongaʻi ai ʻe he Fakamoʻuí ha ngaahi founga kehekehe ke akoʻi ʻaki e niʻihi kehé? Ko e hā ‘oku akoʻi atu ʻe he meʻá ni ‘o kau kia Sīsuú?

Fulihi ʻa e ngāue ko ʻení ʻo makatuʻunga ʻi he lahi mo e ngaahi potufolofola ʻe ʻaonga ki he kau akó ʻi hono toe vakaiʻí.

Ko hono fakaʻaongaʻi hoʻo founga akó ki he fakataukei fakatokāteliné

Fakaʻaongaʻi ha kiʻi taimi ke lau ai ʻa e ngaahi fakamoʻoni fakafolofola fakataukei fakatokāteline ko ʻeni ʻo e Fuakava Foʻoú. Vakai angé pe te ke lava ʻo manatuʻi e kupuʻi lea mahuʻinga ʻoku fekauʻaki mo iá.

• Mātiu 5:14–16

• Luke 2:10–12

• Sione 3:5

• Sione 3:16

Kapau naʻe fakakakato ʻe he kau akó ʻa e teuteu ʻa e tokotaha akó ki he lēsoni ko ʻení, fakakaukau ke fakaafeʻi kinautolu ke vahevahe ʻa e ngaahi potufolofola ʻoku mahuʻingamālie kiate kinautolú pea mo hono ʻuhingá.

• Ko e fē ʻi he ngaahi potufolofola ko ʻení ʻokú ke ongoʻi ʻoku mahino lelei kiate koé? Ko e fē te ke loto ke mahino lelei ange kiate koé?

Fakakakato ʻa e ʻekitivitī A, E, F, pe H ʻo fakaʻaongaʻi ha taha ʻo e ngaahi potufolofola fakataukei fakatokāteline kimuʻá (pe ko ha potufolofola fakataukei fakatokāteline kehe mei he Fuakava Foʻoú) te ke fiemaʻu ke mahino lelei ange kiate koe. Kapau ʻoku ʻi ai ha taimi feʻunga, fakakakato ha ngaahi ʻekitivitī lahi ʻaki ha ngaahi potufolofola fakataukei fakatokāteline kehekehe.

A: Fakakaukaulotó

Faʻu ha fakatātā, fakatahatahaʻi ha ngaahi fakatātā meme, word art, word cloud, pe ngaahi fakatātā kehe ʻokú ne fakahaaʻi e meʻa ʻoku akoʻi ʻe hoʻo potufolofolá. Lomiʻi ʻi he ngaahi fehokotakiʻanga ko ʻení ki ha ngaahi sīpinga:

Word artMemes

E: Ko e vahevahe mo e niʻihi kehé

Faʻu ha palani ke akoʻi hoʻo potufolofolá. Fakakaukau ki ha ngaahi fehuʻi te ke fai ke tokoni ke mahino kiate kinautolu ʻokú ke akoʻí ʻa e potufolofolá, faʻu ha foʻi vitiō ʻo fakamatalaʻi e ʻuhinga ʻo e ngaahi foʻi lea mo e kupuʻi lea mahuʻingá, pe fakaʻaongaʻi e hivá ke akoʻi ʻaki e niʻihi kehé.

F: Ako tauʻatāina

Fili ha ngaahi foʻi lea mahuʻinga mei he potufolofolá ke ako. Lekooti e ngaahi fakaʻuhinga, ngaahi potufolofola fakafekauʻaki, pe ngaahi fakamatala meí he kau taki ʻo e Siasí ʻokú ne fakaloloto hoʻo mahinó.

H: Ako ‘i hono fakahokó

Faʻu pe ʻai ke ʻiloʻi ha ngaahi meʻa pe ngaahi sīpinga te nau lava ʻo fakafofongaʻi ʻa e potufolofolá pe ngaahi foʻi lea pe kupuʻi lea pau meí he potufolofolá. Hangē ko ʻení, ki he Mātiu 5:14–16, te ke lava ʻo fakaʻaongaʻi ha ngaahi maʻuʻanga maama kehekehe ke fakatātaaʻi ʻaki e fakaafe ʻa Kalaisí ke “tuku ke ulo atu hoʻomou māmá.”

Fakakaukau ke fakaafe‘i e kau akó ke nau tautau toko ua pe ʻi ha ngaahi kulupu iiki ʻo vahevahe ʻa e me’a ne nau ako. Fakaʻaliʻali leva e meʻafua mo e ngaahi fehuʻi ko ʻení ke fakakaukau e kau akó ki heʻenau aʻusia fakaakó.

(A) Loto ki ai (E) ʻIkai fuʻu loto ki ai (F) ʻIkai loto pe taʻeloto ki ai (H) Taʻeloto ki ai

1. ʻOku mahino lelei ange kiate au ʻa e (ngaahi) potufolofola naʻá ku filí.

2. ʻOku ou maʻu he taimí ni ha loto falala lahi ange ki heʻeku malava ke fakamatalaʻi e (ngaahi) potufolofola ne u filí ki ha taha kehe ʻo kapau ʻe fiemaʻu ke u fai ia.

3. ʻOku ou tui ʻe ʻaonga kiate au hono fakaʻaongaʻi ha founga tatau ki hono ako mo fakamanatu e ngaahi potufolofola fakataukei fakatokāteline kehé.

Fakaafeʻi e kau akó ke fakalaulauloto ki heʻenau ngaahi tali ki he fehuʻi ko ʻení. Tokoni ke mahino kiate kinautolu ʻoku fakafou mai ʻenau tupulakí ʻia Sīsū Kalaisi mo ʻEne tokoni fakalangí. Fakaafeʻi e kau akó ke nau fekumi ki he Tamai Hēvaní ki ha tokoni fakatāutaha ʻi he kotoa ʻo ʻenau akó.