Mātiu 11–12; Luke 11

Vakai Fakalūkufuá

Naʻe fakamoʻoniʻi ʻe he Fakamoʻuí te tau lava ʻo ʻiloʻi lelei ange ʻa e Tamai Hēvaní ʻaki ʻetau ako ʻa e sīpinga ʻa Hono ʻAló. Lolotonga ʻEne ngāue fakafaifekaú, naʻá Ne akoʻi ha fono māʻolunga ange pea fakamoʻui ʻi he kakaí. Na’a ne akonaki ‘o pehē, kapau te tau haʻu kiate ia, te Ne fakamaʻamaʻa ʻetau ngaahi kavengá pea ʻomi ʻa e fiemālié kiate kitautolu. Naʻá ne fai ha ngaahi akonaki mahino fekauʻaki mo e ʻaho Sāpaté pea mo e lotú.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Mātiu 11:27; Sione 5:19, 30; Sione 8:18–28

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e tuʻunga ʻo e Tamai Hēvaní mo e ongo ʻokú Ne maʻu kiate kinautolú.

• Teuteu ʻa e tokotaha akó: Fakaafeʻi e kau akó ke nau fakakaukau ki honau vā fetuʻutaki mo e Tamai Hēvaní pea mo e founga te nau lava ʻo fakamālohia ai iá.

• Nāunau maʻá e kau akó: Ngaahi tohinoa akó pe ha laʻipepa maʻá e tokotaha ako takitaha

• Fokotuʻu ki hono akoʻi ʻo e konifelenisi vitioó: ʻI he fakaʻosinga ʻo e lēsoní, fakaafeʻi e kau akó ke nau fakaʻaongaʻi ʻa e fetalanoaʻakí ke vahevahe ha meʻa ne nau tohi fekauʻaki mo e Tamai Hēvaní. Fili ha tokotaha ako naʻá ne fokotuʻu ʻi he fetalanoaʻakí ke vahevahe ha meʻa lahi ange fekauʻaki mo ʻenau fakamatalá. Hili e vahevahe ʻa e tokotaha ako ko ʻení, fakaafeʻi kinautolu ke fili ha fakamatala ʻa ha kaungāako kehe pea tuku ke vahevahe ʻe he tokotaha ako ko iá.

Mātiu 11:28–30

Taumuʻa ʻo e lēsoní: ʻE lava ke fakatupulaki ʻe he lēsoni ko ʻení ʻa e loto falala ʻa e kau akó ʻe tokoniʻi kinautolu ʻe he ʻEikí ʻi honau ngaahi faingataʻaʻiá mo e ngaahi kavengá.

• Teuteu ʻa e tokotaha akó: Fakaafeʻi e kau akó ke nau fehuʻi ki ha mēmipa ʻo e fāmilí pe kaungāmeʻa fekauʻaki mo e founga kuo foaki ange ai ʻe he Fakamoʻuí kiate kinautolu ʻa e melinó mo e fiemālié.

• Meʻa ke fakaʻaliʻali atú: Ko ha fakatātā ʻo e fanga monumanú ʻoku nau fakaʻaongaʻi ha ‘ioke

• Ngaahi Vitiō: “Ha’u ki a Kalaisi: Kaveinga Hiva ‘o e 2014” (4:48); “Vahe 17: Ko e Hola ʻa ʻAlamā mo Hono Kakaí” (1:54; sio mei he taimi 0:01 ki he 1:29)

• Fokotuʻu ki hono akoʻi ʻo e konifelenisi vitioó: Fakakaukau ke fakaʻaliʻali ha fakatātā ʻo ha tokotaha vaʻakau pea fakaʻaongaʻi ha meʻangāue fengāueʻaki, hangē ko e meʻangāue hinehiná, ke lava ʻa e kau akó ʻo hiki ha ngaahi foʻi lea pe tā ha ngaahi fakatātā takatakai ʻi he tokotaha vaʻakaú ke fakafofongaʻi ʻa e ngaahi kavenga mo e ngaahi faingataʻa ʻoku nau fehangahangai mo iá.

Fakataukei Fakatokāteliné: Mātiu 11:28–30

Taumuʻa ʻo e lēsoní: ʻE ʻoange ʻe he lēsoni ko ʻení ki he kau akó ha faingamālie ke fakamatalaʻi ʻenau mahino ki he tokāteliné ʻaki hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga tatau mo e ngaahi aʻusia ʻoku nau maʻu ʻi heʻenau moʻuí.

• Teuteu ʻa e tokotaha akó: Fakaafeʻi e kau akó ke akoako ako maʻuloto ʻa e potufolofola fakataukei fakatokāteliné mo e kupuʻi lea mahuʻinga ki he Mātiu 11:28–30 (pe ko e potufolofolá kakato kapau ʻe lava ʻe he kau akó). Kole ange ke nau fakakaukau ki he founga te nau lava ai ʻo fakaʻaongaʻi e meʻa kuo nau ako fekauʻaki mo e malava ʻe Sīsū Kalaisi ke toʻo ʻenau kavengá kapau te nau haʻu kiate Ia.

• Meʻa ke fakaʻaliʻali atú: Ko e ʻekitivitī fakatauhoa nounou

• Nāunau maʻá e kau akó: Ngaahi laʻipepa ʻe lava ke tohi ʻe he kau akó pea fetohiʻaki

• Fokotuʻu ki hono akoʻi ʻo e konifelenisi vitioó: Fakakaukau ke fakaʻaongaʻi ʻa e ngāue ki hono vahevahe ʻo e screen ke fakaʻaliʻali ʻa e app Fakataukei Fakatokāteliné pea fakaʻaliʻali ki he kau akó ʻa e founga ke hū ai ki he polokalamá. Fakahoko fakataha mo e kalasí ha ʻekitivitī ako maʻuloto.

Maʻake 2:23–3:6

Taumuʻa ʻo e lēsoní: ʻE tokoni ʻa e lēsoni ko ʻení ke mahino lelei ange ki he kau akó ʻa e taumuʻa ʻo e Sāpaté mo e founga ke fakaafeʻi kakato ange ai ʻa e ngaahi tāpuaki ʻa e ʻEikí ki heʻenau moʻuí.

• Teuteu ʻa e tokotaha akó: Fakaafeʻi e kau akó ke nau fakakaukau ki ha founga manako ʻoku nau ʻunu ai ke ofi ange ki he Fakamoʻuí, fakafoʻituitui pe mo honau ngaahi fāmilí, ʻi he ʻaho Sāpaté.

• La’ipepa Tufa: “Ko e ʻAho Sāpaté”

• Vitiō: “Vahevahe Hoʻo Sāpaté” (0:53)

• Fokotuʻu ki hono akoʻi ʻo e konifelenisi vitioó: Fakakaukau ke fakaʻaongaʻi ʻa e chat function ke fakaʻatā ʻa e kau akó ke nau fai ha ngaahi fehuʻi te nau ala maʻu fekauʻaki mo e ʻaho Sāpaté. ʻE ala poupouʻi kinautolu ʻe heʻenau feʻiloaki ʻi heʻenau ngaahi fehuʻí ke nau fetokoniʻaki mo fai ha ngaahi fehuʻi lahi ange.

Luke 11:1–13

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke ʻai ʻenau ngaahi lotú ke mahuʻingamālie ange.

• Teuteu ʻa e tokotaha akó: Fakaafeʻi e kau akó ke nau fakakaukau ki he meʻa kuo nau fai ke toe mahuʻingamālie ange ai ʻenau lotú.

• Meʻa ke fakaʻaliʻali atú: Tā ha laine ʻi he palakipoé, pea tohi ‘a e kupu’i lea ko e ʻOku faingofua ʻa e Lotú ʻi he tafaʻaki ʻe tahá pea tohi ‘a e kupuʻi lea ko e ʻOku faingata’a ʻa e Lotú ʻi he tafaʻaki ʻe tahá

• Fokotuʻu ki hono akoʻi ʻo e konifelenisi vitioó: Fakakaukau ke fai ha savea ke fehuʻi ki he kau akó pe ʻoku nau pehē ʻoku faingofua pe faingataʻa ʻa e lotú, ko ha konga ʻo e ʻekitivitī ʻi he kamataʻanga ʻo e kalasí.