Nga erdhe përpara se të lindeshe në tokë? Si mund të ndikojë kjo njohuri në jetën tënde? Ndërkohë që përshkruan vegimin e tij për “gjërat që duhet të ndodhin pas këtyre gjërave” ( Zbulesa 4:1) për sa i përket ditëve të fundit dhe Ardhjes së Dytë të Jezu Krishtit, Gjoni tregoi edhe hollësi të ekzistencës sonë paratokësore, duke përfshirë “luftë[n] në qiell” ( Zbulesa 12:7) dhe kundërshtimin e Satanit ndaj ndjekësve të Jezu Krishtit në vdekshmëri. Ky mësim ka për qëllim të ndihmojë për rritjen e zotimit tënd për ta ndjekur Jezu Krishtin duke të të ndihmuar ta kuptosh zgjedhjen tënde paratokësore për të ndjekur Shpëtimtarin dhe refuzuar Satanin.
Dhënia e kohës që nxënësit të përsiatin. Jepuni nxënësve mundësi për ta përsiatur atë që dinë dhe besojnë dhe mënyrën se si ndihen rreth asaj që po mësojnë. Kjo gjë mund t’i rritë gjasat që ata të marrin mësime nga Shpirti. Mund t’i ndihmojë ata të dallojnë përparimin e tyre shpirtëror aktual dhe atë që mund të duhet të bëjnë për të ndryshuar dhe për t’u rritur.
Përgatitja e nxënësve: Pak ditë para këtij mësimi, ftojini nxënësit që t’u kushtojnë vëmendje mënyrave se si e shohin Satanin të luftojë kundër Jezu Krishtit dhe ndjekësve të Tij. Nxitini ata të përgatiten për të dhënë shembuj të veçantë të asaj që vunë re.
Veprimtari të Mundshme të të Mësuarit
Çfarë ndryshimi do të sillte?
Në një takim mbarëbotëror për rininë, Motra Uendi W. Nelson, bashkëshortja e Presidentit Rasëll M. Nelson, dha thënien vijuese. Përpiqu ta imagjinosh atë që ajo po të fton të përfytyrosh dhe ndiesh. Nëse dëshiron, mund të shikosh materialin filmik “Shpresa e Izraelit” (1:01:34), në dispozicion në ChurchofJesusChrist.org, nga kodi kohor 20:52–21:37, ose të lexosh thënien vijuese.
Merreni parasysh t’i tregoni paragrafët vijues një e nga një dhe t’i lejoni nxënësit të diskutojnë thënien e Motrës Nelson. Ata mund të përsiatin se si mund të ketë qenë jeta jonë paratokësore dhe se si mund të ndihesh po të kesh përvojën për të cilën Motra Nelson flet.
Pamja
Portrait of Wendy Watson Nelson, wife of President Russell M. Nelson. December 2016.
“Sa do të doja të mund të shihnit një material filmik 10-minutësh nga Youtube për jetën tuaj para lindjes.
Profeti Jozef Smith dha mësim se nëse do të mund t’ia ngulnit sytë qiellit pesë minuta, do të dinit më shumë nga sa do të dinit për një temë po ta studionit atë për gjithë jetën. Ndaj, thjesht përfytyrojeni sikur të mund ta kundronit për 10 minuta jetën tuaj para lindjes!
Sigurisht, ne e kuptojmë se Zoti ka hedhur me mençuri një vel mbi ato kujtime. Por, thjesht për një çast, përfytyrojeni efektin që do të kishte në jetën tuaj në këtë çast po të lejoheshit të shihnit 10 minuta nga jeta juaj paratokësore.”
(Uendi W. Nelson, “Shpresa e Izraelit” [takimi shpirtëror mbarëbotëror, 3 qershor 2018], material shtesë New Era dhe Ensign, f. 4–5, ChurchofJesusChrist.org)
Nëse do të mund ta përfytyroje veten tënde në ekzistencën paratokësore, cilat gjëra të veçanta do të shpresoje të shihje, mësoje, ndieje ose kuptoje nga pasja e kësaj përvoje?
Si mendon, çfarë ndryshimi mund të sjellë kjo në jetën tënde?
Te Zbulesa 12 , Gjoni shkroi rreth Luftës paratokësore në Qiell. Teksa studion, kërko hollësi rreth marrëdhënies tënde paratokësore me Jezu Krishtin. Mendo se si të kuptuarit e kësaj marrëdhënieje mund të ndikojë në aftësinë tënde për ta ndjekur Atë dhe për ta mposhtur Satanin në jetën tënde tani.
Lufta paratokësore në Qiell
Përmbajtja vijuese ka për qëllim t’i ndihmojë nxënësit të kuptojnë simbolet dhe gjuhën e figurshme nga vegimi i Gjonit në mënyrë që ata të mund të kuptojnë Luftën në Qiell më vonë në mësim. Mbajeni nën kontroll kohën që nxënësit shpenzojnë me këto vargje për të lejuar kohë të mjaftueshme për veprimtaritë më vonë në mësim.
Për të të ndihmuar të përgatitesh për të studiuar mësimet e Gjonit rreth Luftës në Qiell, mund të jetë e dobishme që të studiosh vargjet te Zbulesa 12:1–5 dhe më pas të shikosh figurën më poshtë që përshkruan disa nga simbolet në këto vargje. Përdore tabelën vijuese për të të ndihmuar të kuptosh atë që këto simbole përfaqësojnë.
Pamja
Book of Revelation Transparencies
Merreni parasysh ta paraqitni informacionin vijues për nxënësit.
Për të mësuar rreth Luftës në Qiell, bëj një tabelë si ajo në vijim në ditarin tënd të studimit. Lexo Përkthimi prej Joseph Smith-it, Zbulesa 12:7–11 (në shtojcën e Përkthimit prej Joseph Smith-it). Vër re se “Mikaeli dhe engjëjt e tij” ( Zbulesa 12:7) janë Adami dhe fëmijë të tjerë shpirtërorë të drejtë të Perëndisë.
Merreni parasysh ta krijoni tabelën vijuese në dërrasë që nxënësit ta vizatojnë në ditarin e tyre të studimit. Krahas plotësimit të tabelës në ditarin e tyre të studimit, nxënësit mund të shkruajnë përgjigje që nuk janë shumë personale në copa letre të vogla dhe t’i publikojnë ato në tabelë pranë pyetjes së duhur.
Lufta në Qiell
Përkthimi prej Joseph Smith-it, Zbulesa 12:7–11 (në shtojcën e kombinimit tresh)
Unë mësova se Satani …
Unë mësova se Jezu Krishti …
Unë mësova se unë …
Reflekto për atë që ke lexuar dhe atë që ke shkruar në tabelën tënde.
Çfarë të bën përshtypje? Çfarë pyetjesh ke?
Çfarë të ndihmon vargu 11 të kuptosh rreth mënyrës se si ke qenë në ekzistencën paratokësore? Çfarë roli luajti Shpëtimtari për të të ndihmuar ta mposhtësh Satanin?
Duke dhënë mësim për jetën paratokësore dhe veprimet tona atje, Presidenti Dallin H. Ouks, i Presidencës së Parë, theksoi sa vijon:
Pamja
Official Portrait of President Dallin H. Oaks taken March 2018.
“Në Këshillin në Qiell, të gjithë fëmijëve shpirtërorë të Perëndisë iu paraqit plani i Atit, përfshirë pasojat dhe sprovat e tij në vdekshmëri, ndihmat e tij qiellore dhe fatin e tij të lavdishëm. Ne e kuptuam mbarimin që nga fillimi. E gjithë moria e njerëzve të vdekshëm që kanë lindur në këtë tokë, e zgjodhën planin e Atit dhe luftuan për të në ndeshjen qiellore që pasoi.”
(Dallin H. Ouks, “Plani i Madh”, Ensign ose Liahona, maj 2020, f. 93)
Çfarë po mëson që mund ta ndërtojë besimin tënd në Jezu Krishtin dhe të të ndihmojë ta ndjekësh Atë?
Një e vërtetë që mbase po mëson nga studimi yt është se ti e mposhte Satanin në jetën paratokësore nëpërmjet Shlyerjes së Jezu Krishtit dhe duke i qëndruar besnik dëshmisë sate.
Si ndikon të kuptuarit e kësaj të vërtete në mënyrën se si ti e sheh veten dhe të tjerët?
Si të ndihmon kjo e vërtetë të kuptosh rreth fuqisë së Shpëtimtarit dhe Shlyerjes së Tij?
Kujtohu që pas rebelimit të Satanit, ai dhe ndjekësit e Tij u “hodh[ën] mbi tokë” ( Zbulesa 12:9). Lexo te Zbulesa 12:12, 17 , duke kërkuar se kundër kujt Satani doli në luftë pasi u dëbua nga qielli. Merre parasysh t’i shtosh idetë e tua në tabelën që krijove.
Përpara se të bësh pyetjen e radhës, kujtoji nxënësit për ftesën nga veprimtaria e përgatitjes së nxënësve.
Si e sheh luftën që Satani nisi kundër ndjekësve të Krishtit, e cila vazhdon sot?
Si mund të të ndihmojë njohja e të vërtetave që mësove rreth Luftës paratokësore në Qiell në këtë luftë kundër Satanit sot?
Shqyrtoje atë që ke renditur në ditarin tënd të studimit dhe merre parasysh të përsiatësh dhe të lutesh në heshtje për besimin tënd vetjak në ekzistencën paratokësore dhe realitetet e luftës ndërmjet Satanit dhe atyre që e ndjekin Jezu Krishtin. Merre parasysh se si ajo që ke mësuar sot mund të të ndihmojë ta kuptosh më mirë mirëbesimin tënd paratokësor në Jezu Krishtin dhe mbështetjen tek Ai. Si mund të kesh mirëbesim dhe të mbështetesh tek Ai në mënyrë më të plotë këtu në vdekshmëri? Shënoji mendimet dhe mbresat e tua në ditarin tënd të studimit.
Komente dhe Informacion për Rrethanat
Veprimtari Plotësuese të të Mësuarit
Mënyra të tjera për të filluar mësimin
Si një alternativë për atë që sugjerohet në fillim të mësimit, nxënësit mund të përfitojnë duke i diskutuar përvojat e tyre të të jetuarit në një kohë kur luftërat ziejnë anembanë botës. Ata mund të diskutojnë për disa prej luftërave me më tepër ndikim ose aktuale dhe efektet e atyre luftërave përpara se të diskutojnë për betejat ose luftërat shpirtërore dhe pasojat e tyre. Gjithashtu, mund t’u kërkoni nxënësve ta përsëritin shpejt, skicojnë ose tregojnë atë që dinë rreth planit të shpëtimit dhe më pas të mendojnë për jetën paratokësore. Ata mund të diskutojnë atë që dinë, besojnë ose do të donin të dinin për këtë pjesë të planit.
Gruaja në shkretëtirë
Kujtojuni nxënësve se “gruaja” e përmendur te Zbulesa 12 përfaqëson “kishën e Perëndisë” ( Përkthimi prej Joseph Smith-it, Zbulesa 12:7 [në shtojcën e Përkthimit prej Joseph Smith-it]). Pasi të lexojnë rreth Luftës në Qiell te Zbulesa 12:7–11 , mund të jetë e dobishme të lexojnë te Zbulesa 12:8–17 , duke kërkuar atë që Satani dëshiron t’i bëjë Kishës së Shpëtimtarit. Për t’i ndihmuar nxënësit të kuptojnë mësimet simbolike të Gjonit në këto vargje, merreni parasysh të bëni pyetje si ato në vijim: “Si mendoni, çfarë mund të përfaqësojë gruaja që fluturon në shkretëtirë pasi përndiqet nga dragoi?” (Shih Zbulesa 12:13–14 ; shih edhe Doktrina e Besëlidhje 86:1–3 .)
