Zbulesa 14

“Pashë Një Engjëll Tjetër … që Kishte Ungjillin e Përjetshëm”

The Melbourne Australia Temple angel Moroni.

Mendo rreth Ardhjes së Dytë të Jezu Krishtit. Në ç’mënyrë po të ndihmon Kisha e Jezu Krishtit e Shenjtorëve të Ditëve të Mëvonshme ta kuptosh dhe të përgatitesh për të? Apostulli Gjon profetizoi për ngjarjet që do të ishin një prelud për Ardhjen e Dytë ngadhënjimtare të Shpëtimtarit, duke përfshirë Rivendosjen e Kishës së Tij dhe ndarjen e të drejtëve nga të ligjtë. Ky mësim ka për qëllim të të ndihmojë të kuptosh se si Shpëtimtari dhe Kisha e Tij e rivendosur mund ta ndihmojnë botën – përfshirë edhe ty – të përgatitesh për Ardhjen e Tij të Dytë.

Mësimdhënia me fjalën e Perëndisë. Sa herë që del mundësia, frymëzojini nxënësit të drejtohen te shkrimet e shenjta dhe te fjalët e profetëve për udhërrëfim, përgjigje për pyetjet dhe përkrahje. Teksa nxënësit e bëjnë këtë gjë, “fjalët e Krishtit do [t’u] tregojnë [atyre] të gjitha gjërat që [ata] duhet të bë[jnë]” ( 2 Nefi 32:3).

Përgatitja e nxënësve: Ftojini nxënësit të bëjnë një listë të asaj që mendojnë se janë tre ose katër prej qëllimeve më të rëndësishme të Kishës së Jezu Krishtit të Shenjtorëve të Ditëve të Mëvonshme.

Veprimtari të Mundshme të të Mësuarit

Qëllimi i Kishës

Veprimtaria vijuese mund të jetë një interpretim me role, ose si klasë, ose në grupe të vogla.

Përfytyro sikur je në një orë mësimi në shkollë ku përmendet tema e fesë së organizuar. Një shok klase komenton se gjithnjë e më pak njerëz i përkasin ose e frekuentojnë një kishë ngaqë mendojnë se kishat nuk shërbejnë në të vërtetë për ndonjë qëllim. Ky koment të bën të mendosh rreth të gjitha qëllimeve për të cilat shërben Kisha e Jezu Krishtit e Shenjtorëve të Ditëve të Mëvonshme.

Cilat janë disa gjëra që ti e ndien se të tjerët duhet t’i kuptojnë rreth mënyrës përse Jezu Krishti e organizoi Kishën e Tij?

Kisha e Jezu Krishtit e Shenjtorëve të Ditëve të Mëvonshme shërben për shumë qëllime të rëndësishme që mund të të kenë ardhur në mendje. Plaku D. Tod Kristoferson, i Kuorumit të Dymbëdhjetë Apostujve, shpjegoi një nga shumë qëllimet e rëndësishme të Kishës së Jezu Krishtit të Shenjtorëve të Ditëve të Mëvonshme:

“Kisha e Jezu Krishtit e Shenjtorëve të Ditëve të Mëvonshme është fuqizuar dhe autorizuar në mënyrë të pashoqe për të kryer përgatitjet e nevojshme për Ardhjen e Dytë të Zotit; me të vërtetë, ajo u rivendos për atë qëllim”.

(D. Tod Kristoferson, “Duke u Përgatitur për Kthimin e Zotit”, Ensign ose Liahona, maj 2019, f. 82)

Si mund të ndikojë kuptueshmëria e këtij qëllimi në këndvështrimin se si ti dhe të tjerët e shihni dhe merrni pjesë në Kishë?

Gjej një çast për të reflektuar për bekimet e Kishës së Shpëtimtarit dhe ungjillit të Tij të rivendosur në jetën tënde. Teksa studion, dëgjoji nxitjet dhe mbresat nga Fryma e Shenjtë për të të ndihmuar t’i përdorësh këto bekime për t’u përgatitur më mirë për Ardhjen e Dytë të Shpëtimtarit.

Gjoni sheh një vegim të Rivendosjes në ditët e mëvonshme

Si pjesë e vegimit të tij të shënuar në librin e Zbulesës, Gjoni dëshmoi shumë ngjarje të rëndësishme që do të ndodhnin përpara Ardhjes së Dytë të Shpëtimtarit. Ai pa 144 000 priftërinj të lartë besnikë nga të gjitha fiset e Izraelit që u shuguruan për të administruar ungjillin dhe për t’i sjellë njerëzit në Kishë (shih Zbulesa 7:4–8 ; 14:1–5 ; Doktrina e Besëlidhje 77:11). Ai dëshmoi gjithashtu shumë engjëj që punojnë për ta përgatitur botën për kthimin e Shpëtimtarit (shih Zbulesa 14:6–20).

Merreni parasysh të paraqitni një figurë të statujës së engjëllit Moroni teksa nxënësit përsiatin për pyetjen vijuese.

Angel Moroni on the Meridian Idaho Temple during winter at sunrise.

A e ke pyetur ndonjëherë veten se përse shumica e tempujve tanë kanë një statujë të Moronit në majë?

Këto statuja simbolizojnë predikimin e ungjillit të rivendosur anembanë botës. Lajmëtarët qiellorë, duke përfshirë Moronin, luajtën një rol të rëndësishëm në Rivendosjen e ungjillit nëpërmjet Profetit Jozef Smith. Te Zbulesa 14 , Gjoni iu referua rolit të rëndësishëm që Moroni dhe engjëjt e tjerë do të luanin për të ndihmuar në përgatitjen e botës për kthimin e Shpëtimtarit.

Lexo te Zbulesa 14:6 , duke kërkuar atë që mëson nga përshkrimi i Gjonit, që të kujton Moronin dhe misionin e tij.

Çfarë gjete? (Nëse dëshiron të mësosh më shumë për rolin e Moronit në Rivendosje, shih Joseph Smith – Historia 1:29–54 .)

Përveç Moronit, engjëlli i përmendur te Zbulesa 14:6 mund të përfaqësojë gjithashtu lajmëtarët e shumtë qiellorë që ndihmuan për ta rivendosur ungjillin e Jezu Krishtit. Lexoje sa vijon për të përcaktuar engjëjt e tjerë që luajtën një rol në rivendosjen e ungjillit:

Merreni parasysh t’i lejoni nxënësit të punojnë në dyshe ose grupe të vogla për të shqyrtuar një nga këto fragmente dhe për të përcaktuar engjëjt e tjerë që luajtën një rol në Rivendosjen.

Doktrina e Besëlidhje 13 , kreu i seksionit

Doktrina e Besëlidhje 110:11–16

Doktrina e Besëlidhje 128:20–21

Lexo te Zbulesa 14:7 , duke kërkuar atë që tha engjëlli.

Fraza “ora e gjyqit të tij erdhi” i referohet kohës kur Jezu Krishti do t’i gjykojë të gjithë njerëzit në tokë. Gjykimet e Tij do të ndodhin si në Ardhjen e Dytë (shih Malakia 3:1–5), edhe në Gjykimin Përfundimtar (shih 2 Nefi 9:15). Me ndihmën e lajmëtarëve qiellorë, Jezu Krishti e rivendosi ungjillin e Tij për të ndihmuar në përgatitjen e botës për Ardhjen e Tij të Dytë.

Cilat janë disa mënyra se si ungjilli i rivendosur i Zotit dhe Kisha e Tij ndihmojnë në përgatitjen e botës për Ardhjen e Tij të Dytë? Shpjegoji përgjigjet e tua.

Nëse nxënësve u duhet ndihmë për t’iu përgjigjur pyetjes së mëparshme, merreni parasysh t’i drejtoni ata te disa nga vargjet vijuese: Malakia 4:5–6 ; Doktrina e Besëlidhje 84:19–22 ; Doktrina e Besëlidhje 87:8 ; Doktrina e Besëlidhje 115:5–6 ; Doktrina e Besëlidhje 133:8–11 .

Çfarë të mësojnë përpjekjet e Zotit për të na përgatitur për Ardhjen e Tij të Dytë rreth Tij dhe dëshirave të Tij për ty?

Roli ynë në përgatitjen e botës për Ardhjen e Dytë

Gjoni e përmbylli këtë pjesë të shkrimeve të tij duke përshkruar një vegim që pati të dikujt “[të] ngjashëm me një Bir njeriu” ( Zbulesa 14:14). Lexo te Zbulesa 14:14–15 , duke kërkuar atë që Gjoni dëshmoi.

Këto vargje mund të përdoren për t’i ndihmuar nxënësit ta ndiejnë urgjencën dhe rëndësinë e pjesëmarrjes me Zotin në mbledhjen e Izraelit. Mund të jetë e dobishme të paraqitni figurën e një drapri ose të vizatoni një në tabelë ndërkohë që shpjegoni domethënien e draprit në dorën e Shpëtimtarit ( vargu 14).

Një drapër është një teh i mprehtë, i harkuar, që përdoret për të prerë dhe korrur (ose mbledhur) të korrat e mbjella. Kur Jezusi dha mësim për shëmbëlltyrën e grurit dhe egjrës (shih te Mateu 13:24–30, 36–43), Ai tha se gruri (njerëzit e drejtë) do të ndaheshin nga egjra (njerëzit e padrejtë) “në mbarimin e botës” ( Mateu 13:40). Në vegimin e tij, Gjoni dëshmoi për mbledhjen e të drejtëve nga të ligjtë në përgatitjen për shkatërrimin e të ligjve (shih Zbulesa 14:16–20). Fraza “vër dorë mbi drapërin tënd dhe korr” te Zbulesa 14:15 mund të nënkuptojë t’i grumbullosh shpirtrat te Jezu Krishti.

Si mendon se ftesa e përshkruar në vargun 15 mund të zbatohet tek anëtarët e Kishës sot? (Shih Doktrina e Besëlidhje 4:4 ; 33:7 .)

Jezu Krishti na fton të marrim pjesë në mbledhjen e shpirtrave tek Ai në përgatitje për Ardhjen e Tij të Dytë. Shpesh kësaj i referohemi si mbledhja e Izraelit.

Merr pak kohë për t’i shqyrtuar mësimet e fundit të profetëve dhe apostujve të Zotit në lidhje me pjesëmarrjen në mbledhjen e Izraelit. Për ta bërë këtë, ti mund të bësh kërkim për temën “Mbledhja” në fjalimet nga konferenca të përgjithshme të fundit në ChurchofJesusChrist.org ose në programin kompjuterik Gospel Library [Biblioteka e Ungjillit]. Përndryshe, ti mund të shqyrtosh një ose disa nga mesazhet vijuese të Presidentit Rasëll M. Nelson dhe Motrës Uendi W. Nelson. Teksa studion, kërko thënie që e përshkruajnë rolin tonë për të ndihmuar në mbledhjen e Izraelit dhe për përgatitjen e botës për Ardhjen e Dytë.

Merreni parasysh t’u jepni nxënësve kopje të sa vijon që mund të mos kenë mundësinë t’i përdorin ato elektronikisht. Jepuni kohë nxënësve të studiojnë dhe më pas t’i tregojnë thëniet që gjetën nga studimet e tyre.

“Shpresa e Izraelit” (takim shpirtëror mbarëbotëror për rininë me Rasëll M. Nelsonin dhe Uendi W. Nelsonin, 3 qershor 2018), material shtesë për revistat New Era dhe Ensign, ChurchofJesusChrist.org

“Pjesëmarrja e Motrave në Mbledhjen e Izraelit”, Ensign ose Liahona, nëntor 2018, f. 68–70

“Lejojeni Perëndinë të Triumfojë”, Ensign ose Liahona, nëntor 2020, f. 92–95

Cila është një thënie që gjete rreth mbledhjes së Izraelit që ishte veçanërisht kuptimplotë për ty? Pse?
Cilat janë disa gjëra të veçanta që do t’i bësh për ta përgatitur veten dhe të tjerët për kthimin e Shpëtimtarit? Si do të të ndihmojnë këto gjëra që të jesh i përgatitur?

Komente dhe Informacion për Rrethanat

Veprimtari Plotësuese të të Mësuarit

Zbulesa 13

Nëse nxënësit do të përfitonin nga një kuptueshmëri më e mirë e betejës që Satani vazhdon të bëjë me njerëzit që janë mbi tokë, merreni parasysh t’i ftoni ata të lexojnë te Zbulesa 13 , duke kërkuar fjalët dhe frazat që i përshkruajnë karakteristikat dhe veprimet e bishës. Çfarë ju mësojnë këto fjalë dhe fraza rreth Satanit, mënyrës se si ai punon dhe asaj që ai po përpiqet të bëjë? Si mund t’ju ndihmojë të kuptuarit e këtyre hollësive ta dalloni më mirë dhe ta luftoni ndikimin e tij?