Actor portraying Jesus Christ is standing on a hillside as the sun rises over the horizon.
ʻE lava ke hā ngali kehe pe fakapuputuʻu he taimi ʻe niʻihi ʻa e tohi Fakahaá koeʻuhí ko hono fakaʻaongaʻi ʻo e fakataipé. Ko e moʻoni ʻoku fonu ʻa e tohi Fakahaá ʻi he fakataipe ʻokú ne ʻai hano ngaahi konga ke faingataʻa ai ke mahino kiate kitautolu. Ka neongo ia, ko e ngaahi pōpoaki lahi ʻi he tohi ʻa Fakahaá ko ha ngaahi moʻoni mahinongofua ia fekauʻaki mo e ngaahi meʻa hangē ko e ngaahi fatongia ʻo Sīsū Kalaisí, ngaahi meʻa ʻe hoko ʻi he Hāʻele ʻAnga Ua Maí, pea mo hono ikunaʻi taupotu taha ʻe he leleí ʻa e koví. Naʻe hiki ʻa e tohí ʻe he ʻAposetolo ko Sioné pea ʻoku fakataumuʻa ia ki ha ngaahi haʻofanga lotu ʻe fitu ʻo e Siasí ʻi ʻĒsia Mino (Toake he taimi ní). Hangē ko ha niʻihi tokolahi he ʻahó ni, naʻe mamahi ʻa e kau muimui faivelenga ko ʻeni ʻo Sīsū Kalaisí koeʻuhí ko ʻenau tui kia Sīsū Kalaisí pea naʻe fakafiemālieʻi kinautolu ʻe he ngaahi pōpoaki mo e fakatātā naʻe hiki ʻe Sioné. ʻOku fakataumuʻa ʻa e lēsoni ko ʻení ke tokoni ke mahino kiate koe ha niʻihi ʻo e ngaahi fakataipe ʻi he tohi Fakahaá pea mo e meʻa te ne lava ʻo akoʻi atu fekauʻaki mo Sīsū Kalaisí.
Mahino e ngaahi fakataipé. ʻOku faʻa fakaʻaongaʻi e ngaahi fakataipé ʻi he folofolá ke akoʻi ha ngaahi moʻoni fakalaumālie ʻoku mahuʻingamālie. Tuku ha taimi ke tokoni ki he kau akó ke nau fakaʻaongaʻi e ngaahi founga kehekehe ʻo hono fakaʻuhingaʻi e ngaahi fakataipe ko ʻení. ʻE tokoni hono fai iá ke mahino lelei ange kiate kinautolu ʻa e tohi ʻa Fakahaá.
Teuteu ʻa e tokotaha akó: Fakaafeʻi e kau akó ke nau lau ʻa e “ Fakahā kia Sioné ” ʻi he Fakahinohino ki he Ngaahi Folofolá, maʻu ʻi he scriptures.ChurchofJesusChrist.org, pea omi mateuteu ke vahevahe ʻa e meʻa ʻoku nau saiʻia ke ako ki aí pea mo hono ʻuhingá.
Ngaahi ʻEkitivitī Ako ʻOku Ala Fakahokó
Mata meʻa-hā-mai ʻa Sioné
Fakaʻaliʻali e fakatātā ko ʻení pea fakaafeʻi e kau akó ke nau aleaʻi e meʻa ʻoku nau sio ʻoku hoko aí mo ha faʻahinga fehuʻi pē ʻoku nau maʻu fekauʻaki mo ia.
Pe, fakakaukau ke kamata e lēsoní ʻo hangē ko ʻení: Kimuʻa pea kamata e kalasí, tuku ha meʻa ʻi ha tēpile pe sea ʻi muʻa he kalasí. ʻUfiʻufiʻi e meʻa ko iá ke ʻoua ʻe lava e kau akó ʻo ʻiloʻi pe ko e hā ia. ʻI he kamata e kalasí, fakaafeʻi e kau akó ke nau mateʻi pe ko e hā e meʻá. Hili ha ngaahi fakamahamahalo, fakaafeʻi ha tokotaha ako ke haʻu ki muʻa ʻi he kalasí ʻo ueʻi hake e tafaʻaki ʻe taha ʻo e ʻufiʻufí ke lava toko taha pē ʻo sio ki he meʻa ko iá. Kole ki he tokotaha ako ko ʻení ke ne fakamatalaʻi e meʻa ko iá ki he kalasí ʻo ʻikai lea ʻaki pe ko e hā ia. Fakaafeʻi e tokotaha akó ke tangutu. Fakakaukau ke fehuʻi ange e ngaahi fehuʻi ko ʻení:
ʻOku fakafofongaʻi fēfē nai ʻe he tokotaha ako naʻá ne fakamatalaʻi e meʻá ʻa e fatongia ʻe taha ʻo e kau palōfitá mo e kau ʻaposetoló?
ʻĪmisi
Book of Revelation Transparencies
ʻI he hoko ʻa e tohi Fakahaá ko e “Fakahā ʻa Sīsū Kalaisí” ( Fakahā 1:1), ‘oku faʻa ui ia he taimi ʻe niʻihi ko e “ʻApokalipisí”, ʻa ia ʻoku ʻuhinga ʻi he lea faka-Kalisí ko e “kuo fakahaaʻi, pe kuo tatala ʻa e ʻufiʻufí” (vakai ki he Fakahinohino ki he Ngaahi Folofolá, “ Fakahā kia Sioné ”).
ʻOku fakahā ʻe he tohí ni ʻa e ʻEiki ko Sīsū Kalaisí pea mo Hono mafaí, mālohí, mo e tefitoʻi fatongia ʻi he palani ʻa e Tamaí ki he fakamoʻuí. ʻOku fakahā foki ʻi he tohí ni ha fakamatala mahuʻinga fekauʻaki mo e ngaahi meʻa ʻe hoko ʻo aʻu ki he Hāʻele ʻAnga Ua Maí pea mo e Nofotuʻí.
Ko e ʻAposetolo ko Sioné, ʻa e ākonga ʻofeina ʻo Sīsū Kalaisí, naʻá ne hiki e tohi ko ʻení. Naʻe hiki ‘e Sione ‘a e tohi Fakahaá mei he motu ko Patimosí, ʻi ha taimi naʻe fehangahangai ai ʻa e kau Kalisitiané mo e ngaahi akonaki halá, fakafiefiemālié, pea mo ha fakatanga lahi (vakai ki he Fakahā 1:9 ; 2:4, 10, 14–15 ; 3:16 ; 6:9).
ʻOku fakapapauʻi mai ʻe he Tohi ʻa Molomoná naʻe tomuʻa fakanofo ʻa Sione ke ne hiki e ngaahi meʻa ʻoku ʻi he tohi ʻo e Fakahaá (vakai ki he 1 Nīfai 14:18–27 ; ʻEta 4:16).
ʻE lava ke hoko ʻeni ko ha taimi lelei ke fakaafeʻi ai e kau akó ke vahevahe ʻenau ngaahi fakakaukaú mei he ʻekitivitī teuteu ʻa e tokotaha akó.
Lau ʻa e Fakahā 1:1–3 pea fakatokangaʻi e meʻa naʻe akoʻi ʻe Sione fekauʻaki mo e fakahā naʻá ne maʻú. (Fakatokangaʻi ange ʻoku pehē ‘e he Liliu ‘a Siosefa Sāmitá, “Monūʻia ʻa kinautolu ʻoku nau laú, mo kinautolu ʻoku fanongo pea ʻiloʻi ʻa e ngaahi folofola ʻo e kikité ni.”)
Ko e hā ʻoku makehe kiate koe ʻi he ngaahi veesi ko ʻení?
Ko e hā ʻoku pehē ʻe Sione kuo pau ke fai ʻe ha taha kae tāpuekina ia ʻe he meʻa ʻoku fakamatala ʻi he tohi Fakahaá?
Lau ʻa e Liliu ʻa Siosefa Sāmita ʻo e Fakahā 1:4–8 pea kumi e meʻa naʻe fiemaʻu ʻe Sione ke ʻilo mo ongoʻi ʻe he Kāingalotu ko ʻení fekauʻaki mo Sīsū Kalaisí.
Vakai ki he konga “Ngaahi Fakamatala Fakamahinó mo e Puipuituʻá” ki ha ngaahi fakakaukau fekauʻaki mo e “ngaahi tuʻí mo e kau taulaʻeikí” mo e “ʻĀlifá mo e ʻŌmeká.”
Ko e hā naʻá ke maʻu ʻi he Fakahā 1:4–8 naʻe fiemaʻu ʻe Sione ke ʻilo mo ongoʻi ʻe he Kāingalotú fekauʻaki mo Sīsū Kalaisí?
Ko e fē ʻi he ngaahi moʻoni ko ʻeni fekauʻaki mo Sīsū Kalaisí ʻe ʻaonga ki he Kāingalotu ko ʻeni naʻa nau faingataʻaʻia ʻi he fakatangá?
Fakakaukau ke hiki ʻi he palakipoé ʻa e ngaahi moʻoni naʻe maʻu ʻe he kau akó.
ʻE tokoni fēfē nai ʻa e ngaahi moʻoni ko ʻení kiate koe ʻi hoʻo fehangahangai mo e ngaahi faingataʻa ʻi he moʻuí?
Ko e mata meʻa-hā-mai fakataipe ʻa Sioné
Naʻe fanongo ʻa Sione ki he leʻo ʻo Kalaisí ʻi heʻene mata meʻa-hā-maí (vakai ki he Fakahā 1:10–11). ʻI he taimi naʻá ne tafoki ai ki he leʻo ʻo e Fakamoʻuí, naʻá ne mamata ki ha ngaahi fakatātā fakataipe ʻoku faitatau mo e fakatātā ʻoku hā ʻi he kamataʻanga ʻo e lēsoní.
ʻI he folofolá, naʻe fakaʻaongaʻi ʻe he kau palōfitá ʻa e fakataipé ke fakaloloto e mahino fekauʻaki mo Sīsū Kalaisi mo ʻEne ongoongoleleí. ʻE lava ke hoko ʻa e fakataipé ko ha meʻangāue fakafaiako lelei koeʻuhí he ʻe lava ke mahino ia ki he kakai ʻo e ngaahi lea fakafonua, anga fakafonua, mo e toʻutangata kehekehe. ʻE lava foki ʻe he fakataipé ke fetuʻutaki ha ngaahi pōpoaki kehekehe. ʻIkai ngata aí, ʻe lava ke fakatupulaki ʻe he fakataipé ʻa e mahinó ʻaki ha ngaahi fakakaukau mo ha ngaahi ongo fakalaumālie ʻoku faingataʻa ke fetuʻutaki ʻataʻatā pē ‘i he leá.
ʻOkú ke falala fēfē nai ki hoʻo malava ke maʻu ha mahino ki he ʻuhinga ʻo e ngaahi fakaʻilongá ni ʻi he folofolá?
Fakakaukau ki ha niʻihi ʻo e ngaahi fakataipe ʻoku fakaʻaongaʻi ʻi he Fuakava Foʻoú ke fakamatalaʻi ʻa Sīsū Kalaisí (hangē ko e lamí, maá, vaí, maká, mo e tauhi-sipí). ʻOku tokoni fēfē ʻa e ngaahi fakataipe ko ʻení ke mahino lelei ange Ia kiate koé?
Lau ʻa e Fakahā 1:12–18 pea kumi ha toe ngaahi fakaikiiki mo ha ngaahi fakataipe ʻi he mata meʻa-hā-mai ʻa Sione kia Sīsū Kalaisí.
Te ke fakatokangaʻi ʻi he saati ko ʻení ha niʻihi ʻo e ngaahi fakataipe naʻe lave ki ai ʻi he mata meʻa-hā-mai ʻa Sioné. Ko e founga mahuʻinga ʻe taha ke mahino ai e ngaahi fakataipe ʻi he folofolá ko hono fakaʻaongaʻi e ngaahi folofola kehé.
Fakakaukau ke teuteu ha tatau ʻo e laʻipepa tufa ko ʻení maʻá e tokotaha ako takitaha. Fakaafeʻi kinautolu ke lau e folofolá pea hiki ʻa e ʻuhinga ʻo e ngaahi fakataipé. ʻE ala tokoni ki he kau akó ke nau ngāue tauhoa ʻi he laʻipepa tufá, ʻi ha fanga kiʻi kulupu iiki, pe fakakalasi.
ʻE lava ke maʻu ha ngaahi fakakaukau fekauʻaki mo ha ngaahi fakaʻilonga kehe ʻoku ʻikai maʻu ʻi he sātí ʻi he konga ki he “Ngaahi Fakamatala Fakamahinó mo e Puipuituʻá”.
Tuku ke vahevahe ʻe he kau akó ʻa e ngaahi meʻa naʻa nau maʻú mo ha faʻahinga fehuʻi pē ʻoku nau maʻu.
ʻI heʻetau fakakaukau ki he nāunau ʻo Sīsuú mo e ngaahi ʻuhinga ʻe malava ke hoko ai e ngaahi fakataipe ʻi he mata meʻa-hā-mai ʻa Sioné, toe vakai ki he fakatātā naʻe fakaʻaliʻali ʻi he kamataʻanga ʻo e lēsoní.
Te ke fakamatalaʻi fēfē ʻa e ʻīmisí ni mo e meʻa ʻokú ne fakafofongaʻí?
Ko e hā ha ngaahi moʻoni te tau lava ʻo ako fekauʻaki mo e vā fetuʻutaki ʻo Sīsū Kalaisi mo ʻEne kau muimui faivelengá?
Ko e moʻoni ʻe taha te tau lava ʻo ako mei he ngaahi fakataipe ko ʻení ʻoku tokangaʻi mo tokanga ʻa Sīsū Kalaisi ki Heʻene kau muimui faivelengá.
Naʻe hoko fēfē nai ʻa e moʻoni mo e ngaahi fakataipe ko ʻení ko ha tāpuaki ki he Kāingalotu ʻo e ngaahi siasi ʻe fitú?
Ko e hā ha ngaahi tūkunga ʻe ala hoko ai e foʻi moʻoni pe fakatātā fakataipe ko ʻeni ʻo Kalaisí ko ha fakafiemālieʻanga ki ha taha taʻu hongofulu tupu he ʻahó ni?
Kuo tokoniʻi fēfē koe ʻe he fakataipe ʻo e vahe ko ʻení ke mahino lelei ange kiate koe ʻa e Fakamoʻuí pea mo Hono tuʻunga totonú?
Ko e hā naʻá ke ako fekauʻaki mo e fakataipé ʻe lava ʻo tokoni kiate koe ʻi he hokohoko atu hoʻo ako e tohi ʻa Fakahaá?
Fakakaukau ke vahevahe hoʻo fakamoʻoni ki he ngaahi meʻa naʻá ke ongoʻi fekauʻaki mo Sīsū Kalaisí mo e founga ʻokú Ne tokangaʻi ʻaki ʻEne kau muimui faivelengá. ʻE lava ke fakaafeʻi e kau akó ke nau fai e meʻa tatau.
Fakamatala Fakamahinó mo e Puipuituʻá
Fakahā 1:6 . Ko e hā e ʻuhinga ʻa Sione ʻi heʻene pehē kuo ngaohi kitautolu ʻe Sīsū ko e “ngaahi tuʻi mo e kau taulaʻeiki”?
Naʻe faiako ʻa Palesiteni Siosefa F. Sāmita (1838–1918) ʻo pehē:
ʻĪmisi
Portrait of Joseph F. Smith
Ko e taumuʻa ʻo ʻetau moʻui ʻi māmaní ke tau lava ʻo maʻu ʻa e kakato ʻo e fiefiá, pea ke tau hoko ko e ngaahi foha mo e ngaahi ʻofefine ʻo e ʻOtuá, ʻi hono tuʻunga kakato moʻoní, ʻo hoko ai ko e kau ʻea-hoko ʻo e ʻOtuá pea kaungā-ʻea-hoko fakataha mo Sīsū Kalaisi [vakai ki he Loma 8:14–17 ], ‘o hoko ko e ngaahi tuʻi mo e kau taulaʻeiki ki he ʻOtuá, ʻo maʻu ʻa e nāunau, pule, hākeakiʻi, ngaahi nofoʻa fakatuʻi, ʻa e mālohi mo e ʻulungaanga kotoa ne fakatupulaki mo maʻu ʻe heʻetau Tamai Hēvaní. Ko e taumuʻa ʻeni ʻoku tau moʻui ai ʻi māmaní. Koeʻuhí ke tau lava ʻo aʻusia ʻa e tuʻunga hākeakiʻi ko ʻení, ʻoku mahuʻinga leva ke tau foua ʻa e ngaahi meʻa ʻoku hoko fakamatelié, pe siviʻi kitautolu, ke tau lava ai ʻo fakamoʻoniʻi ʻoku tau taau, ʻo fou ʻi he tokoni ʻa hotau tokoua lahi ko Sīsuú.
(Ngaahi Akonaki ʻa e Kau Palesiteni ʻo e Siasí: Siosefa F. Sāmita [1998], 173)
Portrait of President Joseph Fielding Smith sitting in a black leather chair in front of a book shelf. He is holding a copy of the scriptures in his hands.
Kuo talaʻofa ki he [kau faivelengá] te nau hoko ko e ngaahi foha mo e ngaahi ʻofefine ʻo e ʻOtuá, hoko ko e kau ʻea-hoko fakataha mo Sīsū Kalaisi, pea kapau kuo nau tauhi moʻoni ki he ngaahi fekau mo e ngaahi fuakava kuo foaki mai ʻe he ʻEikí kiate kitautolú, te nau hoko ko e ngaahi tuʻi mo e kau taulaʻeiki mo e ngaahi kuini mo e kau taulaʻeiki fefine, ʻo maʻu ʻa e kakato ʻo e ngaahi tāpuaki ʻo e puleʻanga fakasilesitialé.
(Joseph Fielding Smith, Answers to Gospel Questions, comp. Joseph Fielding Smith Jr. [1963], 4:61)
Fakahā 1:8 . Ko e hā ʻoku tau ako mei he huafa ʻo Sīsū Kalaisi ko e “Māfimafí”?
Ko e huafa “Māfimafí” ko e liliu faka-Pilitānia ia ʻo e foʻi lea faka-Kalisi Pantokrator, ‘a ia ʻokú ne fokotuʻu mai ko ha taha ʻokú ne puleʻi mo fakalele e meʻa kotoa pē. Ko e kaveinga ʻe taha ʻo e tohi Fakahaá neongo ʻoku fehangahangai e kakai ʻo e ʻOtuá ʻi he kuonga kotoa pē mo e fakatangá mo e faingataʻá, ka ʻoku pule moʻoni e ʻOtuá ʻi he ngaahi meʻa kotoa pē pea te Ne fakangata e kovi kotoa pē ʻi ha ʻaho. ʻOku fakamālohia ʻe he ngaahi fakatātā mei he ngaahi ʻuluaki vahe ʻo e Fakahaá ʻa e fatongia ʻo e Fakamoʻuí “ko e Māfimafí” ( Fakahā 1:8): ʻOku fakataipe ʻEne folofolá ʻe ha “heletā māsila ʻo fakatoumata” ( Fakahā 1:16), ʻokú Ne maʻu “ʻa e ngaahi kī ʻo hētesi mo e maté” ( Fakahā 1:18), pea ʻokú Ne ʻafioʻi e ngaahi ngāue ʻa e kakaí (vakai ki he Fakahā 2:2, 9, 13, 19).
Fakahā 1:8 . ʻOku ʻuhinga ki he hā ko Sīsū ʻa e “ʻĀlifá mo e ʻŌmeká”?
Naʻe akoʻi ʻe ʻEletā Pulusi R. Makongikī (1915–1985) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
Head and shoulders portrait of Elder Bruce R. McConkie.
Ko e ongo foʻi lea ko ʻení, ko e mataʻitohi ʻuluaki mo e mataʻitohi fakaʻosi ia ʻo e ʻalafapeti faka-Kalisí, ʻoku fakaʻaongaʻi ia ke akoʻi ʻaki e natula tuʻuloa mo taʻengata ʻo e moʻui ʻa hotau ʻEikí, ʻa ia “ʻokú ne tatau mei he taʻengatá ki he taʻengatá, pea ʻoku ʻikai ke ngata ʻa hono ngaahi taʻú” [ Tokāteline mo e Ngaahi Fuakava 76:4 ].
(Doctrinal New Testament Commentary [1973], 3:439)
Ko e hā hono ʻuhinga ʻo e tuʻunga maama ʻi he mata meʻa-hā-mai ʻa Sioné?
Naʻe akoʻi ʻe ʻEletā Pulusi R. Makongikī (1915–1985) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
Head and shoulders portrait of Elder Bruce R. McConkie.
ʻOku ʻave ʻe he ngaahi tuʻunga māmá ʻa e māmá; ʻoku ʻikai ke nau fakatupu ia. Ko honau fatongiá ke fakafaingofuaʻi ia, kae ʻikai ke fakahoko ia. Ko ia, ʻi hono fakaʻaongaʻi ko ia ʻo e ngaahi tuʻunga maama ʻe fitú ke fakafofongaʻi e ngaahi siasi ʻe fitu ko ia ʻoku ʻamanaki ke naʻinaʻi ki ai ʻa Sioné, ʻoku fakahā mai ai ʻe he ʻEikí ʻoku totonu ke ʻave ʻe heʻene kāingalotu he māmaní ʻa ʻene māmá ki māmani. Ko Kalaisi ʻa e Maama ʻo e māmaní ( Sione 8:12). “Hiki hake hoʻomou māmá ke ulo atu ki he māmaní. Vakai ko au ʻa e maama ke mou hiki haké—mou fai ʻa e meʻa kuo mou mamata naʻá ku faí” [ 3 Nīfai 18:24 ; Mātiu 5:14–16 ].
(Doctrinal New Testament Commentary [1990], 3:442)
Ngaahi ʻEkitivitī Fakalahi ki he Akó
Ko e puipuituʻa ‘o e tohi Fakahā
Ke fakafeʻiloaki e puipuituʻa ʻo e tohi Fakahaá, fakakaukau ke faʻu ha kiʻi sivi ʻoku fehuʻi ai pe ko hai naʻe fai ki ai e tohi ko ʻení, ne faí mei fē, pea mo e ʻuhinga naʻe hiki ai e tohi ko ʻení. ʻE lava ke lau ʻe he kau akó ʻa e Fakahā 1:4, 9 ke maʻu e ngaahi talí.
ʻUluaki Mata Meʻa-Hā-Mai ‘a Sioné mo e Tohi ʻa Molomoná
ʻE lava ke fakaʻaongaʻi e ngaahi veesi ko ʻení ke fakahaaʻi naʻe mahuʻinga feʻunga ʻa e mata meʻa-hā-mai ʻa Sioné ke akoʻi ʻe he kau palōfita ʻo e Tohi ʻa Molomoná. Fakaafeʻi e kau akó ke nau lau ʻa e 1 Nīfai 14:18–29 pea kumi ʻa e meʻa naʻe mamata ki ai ʻa Nīfaí mo e ʻuhinga naʻe ʻikai ke ne tohi ai kau ki he ngaahi konga ʻo ʻene mata meʻa-hā-maí. ʻE lava foki ke lau ʻe he kau akó ʻa e ʻEta 4:16 ke kumi ki he meʻa naʻe folofola ʻaki ʻe he ʻEikí fekauʻaki mo hono fakahoko ʻo e mata meʻa-hā-mai ʻa Sioné.