Fakahā 2–3, Konga 1

“ʻOku Ou ʻIloʻi Hoʻo Ngaahi Ngāué”

PAINTING BY GREG Olson of Christ knocking on a door

ʻOku ʻafioʻi ʻe Sīsū Kalaisi ʻa kitautolu kotoa. ʻOkú Ne ʻafioʻi ʻa e meʻa ʻoku tau fakahoko leleí, pea ʻokú Ne ʻafioʻi ʻa e meʻa te tau lava ʻo fai lelei ange ke tau hoko ai ʻo hangē ko Iá. Naʻe lekooti ʻe Sione ʻi ha ngaahi pōpoaki kehekehe ki he ngaahi siasi takitaha ʻe fitu ʻi ʻĒsiá, ʻa e leʻo ʻo Sīsū Kalaisí ʻo fakahaaʻi e ngaahi ngāue lelei ʻa e Kāingalotú mo fakatokanga kiate kinautolu ʻa e ngaahi meʻa naʻe fiemaʻu ke nau liliú. ʻE lava ke poupouʻi koe ʻe he lēsoni ko ʻení ke ke fanongo ki he leʻo ʻo e Fakamoʻuí ʻi hono fakahaaʻi hoʻo ngaahi ngāue leleí mo ʻoatu ʻa e fakatonutonu ʻokú ke fiemaʻú.

Tokanga ki hono tokoniʻi ʻo e kau akó. Lolotonga hono teuteuʻi e lēsoní, tokanga taha ki he kau akó kae ʻikai ko e naunau fakalēsoní pē. Fehuʻi loto pē “Ko e hā ʻe fai ʻe he kau akó ʻi he kalasí he ʻaho ní?” pe “ʻE ʻilo fēfē ʻe he kau akó ʻa e ngaahi moʻoni ʻe mahuʻingamālie kiate kinautolú?”

Teuteu ʻa e tokotaha akó: Fakaafeʻi e kau akó ke nau feinga ke ʻiloʻi ʻa e ngaahi tafaʻaki ʻi heʻenau moʻuí ʻoku nau ongoʻi ʻe hōifua ki ai ʻa e Fakamoʻuí. ʻE lava ke lotu ʻa e kau akó ko ha konga ʻo e fakaafe ko ʻení pea kole ki he Tamai Hēvaní ke tokoni ke mahino kiate kinautolu ʻa e meʻa ʻoku nau fakahoko leleí. Te nau lava foki ʻo kole ki heʻenau mātuʻá ke tokoni ange kiate kinautolu.

Ngaahi ʻEkitivitī Ako ʻOku Ala Fakahokó

Fakatokangaʻi ange ʻoku kau foki ʻi he ngaahi pōpoaki ʻa Sioné ʻa e ngaahi talaʻofa ʻa e Fakamoʻuí kiate kinautolu ʻoku nau ikunaʻi ʻa e ngaahi faingataʻa mo e ngaahi pole ʻo e moʻui fakamatelié. ʻE fakamatalaʻi fakaikiiki lahi ange ʻeni ʻi he lēsoni hokó.

Fanongo ki he leʻo ʻo e Fakamoʻuí

Fakaʻaliʻali ha fakatātā ʻo e tukituki ʻa Sīsū ʻi ha matapaá lolotonga e fakakaukau ʻa e kau akó ki he fehuʻi ko ʻení.

Jesus Christ depicted knocking on a door. Christ is portrayed wearing red and white robes. The painting illustrates the concept of Christ “knocking on the door,” as described in scripture. There is no doorknob depicted in the painting, symbolizing that the door must be opened from within.

Ko e hā e ngaahi ongo te ke lava maʻu kapau naʻá ke fanongo ki ha tukituki he matapā ʻi ho ʻapí pea ʻiloʻi ko e Fakamoʻuí? Ko e hā hono ʻuhingá?

ʻI he pōpoaki ʻa Sione ki he kāingalotu ʻo e Siasí ʻi Leotisiá (ʻa ia naʻe fokotuʻu ai ha taha ʻo e ngaahi siasi ʻe fitu naʻe tohi ki ai ʻa Sione ʻi ʻĒsiá; vakai ki he Fakahā 1:11), naʻá ne fakaʻosi ʻaki ha fakaafe meia Sīsū Kalaisi.

Lau ʻa e Fakahā 3:20 pea feinga ke ʻiloʻi ʻa e fakaafe ʻa e Fakamoʻuí.

Tuku ha taimi ke tokoni ke mahino ki he kau akó ʻa e fakataipe ʻo e tuʻu ʻa Sīsū ʻi he matapaá ʻo tukitukí. Fakakaukau ke aleaʻi e ʻuhinga ʻo ʻEne tukitukí mo ʻEne hāʻele mai ke taumafa mo kitautolu ʻi hotau kuongá ni. Hangē ko ʻení, ʻi heʻetau fakaafeʻi ʻa e Fakamoʻuí ki heʻetau moʻuí, te Ne lava ʻo ʻomi ha ivi, fafangaʻi, mo fakafiemālieʻi hotau laumālié.

ʻOkú ke pehē ko e hā e ʻuhinga ʻo e fakataipe ʻi he Fakahā 3:20 ?
ʻOkú ke pehē ko e hā ʻoku tukituki ai e Fakamoʻuí ʻi he matapaá kae ʻikai hū pē ki lotó?
Te ke fakaava fēfē ʻa e matapaá kia Sīsū Kalaisi pea feinga ke ke fanongo lelei ange ki Hono leʻó?
Ko e hā kuó ke fai kimuí ni mai ke fanongo ki Hono leʻó mo fakaava ʻa e matapaá?

Neongo ko Sione ʻa e talafekaú, ka ko Sīsū ʻa e leʻo ʻo e ngaahi pōpoaki ki he ngaahi siasi ʻe fitú. ʻI hoʻo ako e ngaahi pōpoaki ʻi he Fakahā 2–3, fakafanongo ki he leʻo ʻo Sīsū Kalaisi kiate koé. Fakakaukau ki ha ngaahi founga te ke lava ai ʻo fakaava ʻa e matapaá ke lava ʻa e Fakamoʻuí ʻo nofoʻia mo fakamālohia koé.

Neongo ʻoku makehe ʻa e ngaahi pōpoaki takitaha ʻe fitú, ka ʻoku ʻi ai foki mo ha ngaahi faitatau.

ʻE maʻu ʻe he kau akó ʻa e faingamālie ke ako fakaikiiki ange ʻa e ngaahi veesi ko ʻení ʻamui ange ʻi he lēsoní. ʻI he ʻekitivitī ko ʻení, fakaafeʻi pē kinautolu ke nau feinga ke ʻiloʻi pea aleaʻi ʻa e mahuʻinga ʻo e kupuʻi lea “ʻOku ou ʻiloʻi hoʻo ngaahi ngāué.”

Kumi pea fakakaukau ke fakaʻilongaʻi ʻa e kupuʻi lea “ʻOku ou ʻiloʻi hoʻo ngaahi ngāué” ʻi he Fakahā 2:2, 9, 13, 19 ; 3:1, 8, 15 . ʻOku lekooti ʻe Sione ʻi he ngaahi veesi ko ʻení ʻa e leʻo ʻo Sīsū Kalaisí, ʻa ia ʻokú ne toe fakafofongaʻi foki ʻa e finangalo ʻo e Tamai Hēvaní.

Ko e hā ʻe mahuʻinga ai ke mahino ʻoku ʻafioʻi ʻe he Tamai Hēvaní mo Sīsū Kalaisi “[hoʻo] ngaahi ngāué”?

Ko e foʻi moʻoni ʻe taha te tau maʻu ʻi he Fakahā 2–3, koeʻuhí ʻoku ʻafioʻi takitaha kitautolu ʻe he Tamai Hēvaní mo Sīsū Kalaisi, te Na lava ʻo fakahaaʻi ʻetau ngaahi ngāue leleí mo fakatokanga mai fekauʻaki mo e ngaahi liliu ʻoku fiemaʻú. Fekumi ki ha fakamoʻoni ʻo e moʻoni ko ʻení ʻi hoʻo ako ʻa e faleʻi ki he ngaahi siasi ʻe fitú.

Faleʻi ki he ngaahi siasi ʻe fitú

Fakaʻaliʻali ʻa e mape mo e ngaahi fakamoʻoni fakafolofola ko ʻení. Fakakaukau ke mou ako fakakalasi ha taha ʻo e ngaahi siasi ʻe fitú ke fakatātaaʻi e founga ke tali ʻaki e ngaahi fehuʻi ʻoku muimui mai ʻi he ngaahi fakamoʻoni fakafolofolá. ʻE lava leva ke vahevahe ʻa e toenga ʻo e ngaahi siasí ki he kalasí. Fakaafeʻi e kau akó ke nau ako e ngaahi vēsí pea tali ʻa e ngaahi fehuʻí ʻiate kinautolu pē pe ʻi ha ngaahi kulupu iiki. Talanoa mo e kau akó ʻi heʻenau akó pea fai ha tokoni ʻo ka fiemaʻu.

ʻE lava ke tokoni ʻa e fakamatala ʻi he ngaahi fakamoʻoni fakafolofola ko ʻení mo e konga “Fakamatala Fakamahinó mo e Puipuituʻá” ke mahino ki he kau akó e ngaahi foʻi lea mo e kupuʻi lea faingataʻá.

Sio ki he mape ʻo e ngaahi siasi ʻe fitú pea fili ha siasi ʻe ua pe lahi ange ke ako ki ai. Kumi ki he ngaahi ngāue lelei ʻoku fakahaaʻi ʻe Sīsū Kalaisi ʻi he niʻihi ʻo e ngaahi siasí mo e fakatonutonu ʻokú Ne fai ki he siasi takitaha.

ʻEfesō ( Fakahā 2:1–7): Ko e kau Nikolaitaní ko ha kulupu fakalotu naʻa nau pehē te nau lava ʻo fakahoko ha angahala fakasekisuale taʻe ʻi ai hano tautea koeʻuhí ʻe fakahaofi kinautolu ʻe he ʻaloʻofa ʻa e ʻOtuá.
Simana ( Fakahā 2:8–11)
Peakamosi ( Fakahā 2:12–17): ʻOku ʻuhinga e tokāteline ʻa Pēlamí ki hono maumauʻi e ngaahi fekau ʻa e ʻOtuá ke fakatōliʻa e ngaahi holi fakamāmaní pe fekumi ki he fakaʻapaʻapa ʻa e tangatá (vakai ki he 2 Pita 2:15). Fakatokangaʻi ange ʻa e ʻuhinga ʻo e kau Nikolaitaní ʻi ʻolungá.
Taiataila ( Fakahā 2:18–29)
Sātisi ( Fakahā 3:1–6)
Filatelifia ( Fakahā 3:7–13): ʻOku fakahaaʻi pē ʻe he pōpoaki ko ʻení ʻa e ngaahi ngāue leleí.
Leotisia ( Fakahā 3:14–22): ʻOku fakatonutonu pē ʻe he pōpoakí ni ʻa e ngaahi ngāue taʻehaohaoá. Fakatokangaʻi ange ʻoku ʻuhinga ʻa e māmāfana pē ki he ʻikai ke tukupā kakato ki he ongoongolelei ʻo Sīsū Kalaisí.

Ko e hā ha ngaahi ngāue lelei naʻe fakahaaʻi ʻe Sīsū Kalaisi? Kuó ke mamata fēfē ki ha ngaahi ngāue lelei tatau ʻi he kāingalotu ʻo e Siasí ʻi hotau kuongá?
Ko e hā e fakatonutonu pe faleʻi naʻe fai ʻe Sīsū ki he siasi naʻá ke filí? Ko e hā ʻoku toe hoko ai ʻeni ko ha faleʻi lelei ki he Siasí he ʻaho ní?

Hili ha taimi feʻunga, fakaafeʻi e kau akó ke vahevahe mo e kalasí e meʻa ne nau akó. Fakakaukau ke ʻai ha lisi ʻo e ngaahi ngāue leleí mo e ngaahi fakatonutonu ʻoku fiemaʻu ke faí ʻi he palakipoé. ʻI hono aleaʻi e fehuʻi hokó, ʻe lava ke fakaafeʻi e kau akó ke vahevahe ʻenau ngaahi aʻusia mei he ʻekitivitī teuteú.

Ko e hā ʻoku taau makehe ai pē ʻa Sīsū Kalaisi ia ke ʻafioʻi ʻa e meʻa ʻoku tau fai leleí pea mo e founga ʻoku fiemaʻu ai ke tau fakalakalaká?

Faleʻi ki hoʻo moʻuí

Naʻe poupou ʻa Palesiteni Tōmasi S. Monisoni (1927–2018) ki he kāingalotu ʻo e Siasí ke fakaava e matapaá pea fakaʻatā e Fakamoʻuí ki heʻenau moʻuí. Lau ʻa e fakamatala ko ʻení pe mamata ʻi he vitiō “Mrs. Peitoni—ko e Hoko Atu e Talanoá” mei he taimi 15:08 ki he 15:56, ʻoku maʻu ʻi he ChurchofJesusChrist.org.

2:3

ʻOku ou fakamoʻoni ʻaki e mālohi kotoa hoku laumālié, ʻoku ʻofa ʻetau Tamai Hēvaní ʻiate kitautolu hono kotoa. ʻOkú Ne ongoʻi e ngaahi lotu ʻo e loto-fakatōkilaló; ʻokú Ne ongoʻi ʻetau tautapa ki ha tokoní. … Kuo folofola mai Hono ʻAló ʻa hotau Fakamoʻuí mo e Huhuʻí, kiate kitautolu he ʻahó ni: “Vakai ʻoku ou tuʻu ʻi he matapaá mo tukituki: kapau ʻe fanongo ʻe ha taha ki hoku leʻó, mo toʻo ʻa e matapaá, te u hū atu kiate ia” [ Fakahā 3:20 ].

Te tau fakafanongo nai ki he tukituki ko iá? Te tau fanongo nai ki he leʻo ko iá? Te tau fakaava nai ʻa e matapaá ki he ʻEikí, kae lava ke tau maʻu e tokoni ʻokú Ne mateuteu ke ʻomí? ʻOku ou lotua te tau fai ia.

(Thomas S. Monson, “Mrs. Peitoni—ko e Hoko Atu e Talanoá,” Ensign pe Liahona, Nōvema 2007, 24)

Toe vakai ki he fakatātā ʻo e tukituki ʻa Sīsū ʻi he matapaá pea fakakaukau ki he meʻa kuó ke akó.

Fakakaukau ke ‘oange ha taimi ki he kau akó ke nau fakalaulauloto ai ki he ngaahi fehuʻi ko ʻení pea tali ʻi heʻenau tohinoa akó.

ʻOkú ke pehē ko e hā ʻoku fiemaʻu ʻe he Fakamoʻuí ke ke ʻiloʻi ʻokú ke fai leleí?
Ko e hā ʻoku ueʻi fakalaumālie koe ʻe he Fakamoʻuí ke ke liliu ʻi hoʻo moʻuí?

Fakamatala Fakamahinó mo e Puipuituʻá

Ko e hā ʻa e “ʻuluaki ʻofá” ʻoku lau ki ai ʻi he Fakahā 2:4 ?

Naʻe valokiʻi e Kāingalotu ʻi ʻEfesoó ʻi heʻenau taʻetokanga ki he fekau ke ʻofa ki he ʻOtuá (vakai ki he Mātiu 22:37–38).

Fakahā 2:9 . ʻE founga fēfē haʻatau aʻusia ʻa e masivá mo kei tuʻumālié?

Naʻe fakahaaʻi ʻe he Fakamoʻuí ʻa e tui ʻa e Kāingalotu ʻi Simaná mo fakapapauʻi ange kiate kinautolu ʻa e koloa taʻengata naʻe talaʻofa maʻanautolu ʻoku nau tauhi ʻEne ngaahi fekaú (vakai foki ki he Sēmisi 2:5 ; Tokāteline mo e Ngaahi Fuakava 11:7).

Fakahā 2:14 . Ko hai ʻa Pēlami?

“Ko Pēlamí ko ha palōfita ia ʻi he Fuakava Motuʻá, naʻe lekooti ʻene ngaahi ngāué ʻi he Nōmipa 22–24 ; 31:16 . Naʻá ne ʻuluaki hā ke moʻoni ki he ʻEikí mo Hono kakaí, ʻo toutou fakafisingaʻi e kole ʻa Pēlaki ke fakamalaʻiaʻi ʻa ʻIsilelí. Ka neongo ia, ne faifai pea moʻulaloa ʻa Pēlami ki he fokotuʻu ʻa Pēlaki ke ʻoange e ngaahi koloá pea akoʻi kia Pēlaki e founga ke fakavaivaiaʻi ai e kau tau ʻa ʻIsilelí ʻi he angahala fakasekisualé mo e tauhi ʻotua tamapuá (vakai ki he Nōmipa 25:1–5 ; 31:13–16). Naʻe kau ʻi he palaní ʻa hono fakataueleʻi ʻe he kau fafine Moapé ʻa e kau tangata ʻo ʻIsilelí mo fakalotoʻi kinautolu ke fai ha ngaahi feilaulau ki he ngaahi ʻotua hītení, pea naʻe pehē hono fakaʻauha fakalaumālie kinautolú” (New Testament Student Manual [2014], 534).

Fakahā 3:14 . Ko e hā ʻoku ui ai ʻa Sīsū ko e “ʻĒmení”?

“ʻOku ʻuhinga e foʻi lea ko e ‘ʻēmeni’ ʻi he lea faka-Hepeluú mo faka-Kalisí ki he moʻoni, fakapapau, pe faivelenga. ʻOku fakamatalaʻi ʻi he Fakahā 3:14 , ‘a e faivelenga mo e moʻoni ʻa Kalaisí ʻo hangē ko e ‘ʻĒmeni’ maʻongoʻongá ko ha fakafehoanaki ki he ngaahi tōʻonga fakataʻetaʻetui ʻa e kau Leotisiá [vakai foki ki he Fakahā 3:15–16 ]” (New Testament Student Manual [2014], 536).

Te u lava fēfē ʻo fakaafeʻi e ʻOtuá ke vahevahe ʻEne fakangofuá mo e fakatonutonú mo aú?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

ʻI hoʻo sivisiviʻi hoʻo moʻuí lolotonga e ouau ʻo e sākalamēnití, fakatauange ʻoku nofo taha hoʻo fakakaukaú he ngaahi fehalaaki kuó ke fakahokó kae pehē foki ki he ngaahi meʻa kuó ke fakahoko totonú—ʻa e ngaahi taimi kuó ke ongoʻi ai naʻe hōifua ʻa e Tamai Hēvaní mo e Fakamoʻuí kiate koe. Te ke lava foki ʻo fakaʻaongaʻi ha kiʻi taimi lolotonga e sākalamēnití ke kole ai ki he ʻOtuá ke tokoniʻi koe ke ke ʻiloʻi e ngaahi meʻa ko ʻení. Kapau te ke fai ia, ʻoku ou palōmesi atu te ke ongoʻi ha meʻa. Te ke ongoʻi ha ʻamanaki lelei.

(Henry B. Eyring, “Manatu Maʻu Ai Pē Kiate Ia,” Ensign pe Liahona, Fēpueli 2018, 5)