Fakahā 1–5

Vakai Fakalūkufuá

Ko e hā ha ngaahi fakakaukau ʻokú ke fakakaukau ki ai ʻi hoʻo fakakaukau ki he tohi Fakahaá? Naʻe pehē ʻe he ʻAposetolo ko Sioné, ʻa ia naʻá ne hiki ʻa e tohí, “Monūʻia ʻa kinautolu ʻoku nau laú, mo kinautolu ʻoku fanongo pea ʻiloʻi ʻa e ngaahi folofola ʻo e kikité ni” (Liliu ‘a Siosefa Sāmitá, Fakahā 1:3 [ʻi he Fakalahi ki he Liliu ʻa Siosefa Sāmitá]). Te ke maʻu ʻi he tohi Fakahaá ha ngaahi fakataipe mo ha fakatātā lelei te ne akoʻi koe fekauʻaki mo Sīsū Kalaisi, ko e palani ʻa e Tamai Hēvaní, mo e Hāʻele ʻAnga Ua Mai ʻa e Fakamoʻuí. Te mou mamata foki ki he founga ʻoku ikunaʻi ai ʻe Sīsū Kalaisi mo Hono kau muimuí ʻa Sētane mo e ngaahi puleʻanga ʻo e tangatá. Naʻe tohi ʻa e tohi Fakahaá ki he ngaahi siasi ʻe fitu ʻi ʻĒsiá lolotonga ha taimi ʻo e fakatanga lahi, ʻe lava ke tokoniʻi koe ʻe he tohi Fakahaá ke ke ikunaʻi faivelenga ʻa e ngaahi faingataʻa ʻo e ngaahi ʻaho fakaʻosí pea teuteu ki he liuaki mai ʻa e Fakamoʻuí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha:

Fakahā 1

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ha niʻihi ʻo e ngaahi fakataipe ʻi he tohi Fakahaá pea mo e meʻa te ne lava ʻo akoʻi kiate kinautolu fekauʻaki mo Sīsū Kalaisí.

Teuteu ʻa e tokotaha akó: Fakaafeʻi e kau akó ke nau lau ʻa e “ Fakahā kia Sioné ” ʻi he Fakahinohino ki he Ngaahi Folofolá, maʻu ʻi he scriptures.ChurchofJesusChrist.org, pea haʻu mateuteu ke vahevahe ʻa e meʻa ʻoku nau saiʻia ke ako ki aí pea mo hono ʻuhingá.

Meʻa ke fakaʻaliʻalí: Ko e ʻīmisi ʻo Sīsuú ʻi he lotolotonga ʻo e ngaahi teʻelangó
Laʻipepa Tufa: Teuteu ha ngaahi tatau feʻunga ʻo e laʻipepa tufa ko e “Ngaahi Fakataipe ʻi he Mata Meʻa-Hā-Mai ʻa Sioné” maʻá e kau akó.

Fakahā 2–3, Konga 1

Taumuʻa ʻo e lēsoní: ʻE lava ke fakaʻaiʻai ʻe he lēsoni ko ʻení ʻa e kau akó ke nau fanongo ki he leʻo ʻo e Fakamoʻuí ʻi hono fakahaaʻi ʻenau ngaahi ngāue leleí mo ʻoange kiate kinautolu ʻa e fakatonutonu ʻoku fiemaʻú.

Teuteu ʻa e tokotaha akó: Fakaafeʻi e kau akó ke nau feinga ke ʻiloʻi ʻa e ngaahi tafaʻaki ʻi heʻenau moʻuí ʻoku nau ongoʻi ʻe hōifua ki ai ʻa e Fakamoʻuí. ʻE lava ke lotu ʻa e kau akó ko ha konga ʻo e fakaafe ko ʻení pea kole ki he Tamai Hēvaní ke tokoni ke nau ʻiloʻi ʻa e meʻa ʻoku nau fakahoko leleí. Te nau lava foki ʻo kole ki heʻenau mātuʻá ke tokoni ange kiate kinautolu.

Meʻa pe ʻīmisi ke fakaʻaliʻali: Teuteu ke fakaʻaliʻali ʻa e fakatātā ʻo Sīsū ʻi he Matapaá (Tohi Fakatātā ʻo e Ongoongoleleí [2009], fika 65) mo e mape ʻo e ngaahi siasi ʻe fitú.
Vitiō: “Mrs. Peitoni—ko e Hoko Atu e Talanoá” (16:09; mamata mei he taimi 15:08 ki he 15:55)

Fokotuʻu ki hono akoʻi ʻi he konifelenisi vitioó: ʻI he fekumi ʻa e kau akó ki he ngaahi ngāue lelei naʻe fakatokangaʻi ʻe Sione naʻe fai ʻe he ngaahi siasi ʻe fitú mo e fakatonutonu naʻá ne ʻoange kiate kinautolú, fakaafeʻi e kau akó ke taipeʻi e meʻa ʻoku nau maʻú ʻi he fetalanoaʻakí. Hili ha taimi feʻunga, kole ki he kalasí ke nau fekumi ʻi he fetalanoaʻakí pea fili ha fakakaukau ʻe taha mei ha kaungā-ako te nau fie aleaʻi fakaikiiki ange. ʻE lava ke kole ki he tokotaha ako naʻá ne fokotuʻu e fakakaukaú ke ne fakamatalaʻi e meʻa naʻá ne tohí. Fai ha ngaahi fehuʻi ke tokoni ki he kalasí ʻi hono aleaʻi e mahuʻinga ʻo e tefito kuo filí.

Fakahā 2–3, Konga 2

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó ha holi lahi ange ke ikunaʻi e ngaahi faingataʻá mo maʻu e ngaahi tāpuaki ʻoku talaʻofa ʻe he Fakamoʻuí ke ʻomí.

Teuteu ʻa e tokotaha akó: Fakaafeʻi e kau akó ke kole ki ha mēmipa ʻo e fāmilí pe ha kaungāmeʻa falalaʻanga ke vahevahe ange ha aʻusiaʻo ha taimi kuo nau ikunaʻi ai ha fakafeʻātungia ʻi he tokoni ʻa e Fakamoʻuí.

Vitiō: “Te Ke Lava ke Tānaki ʻa ‘Isileli!” (10:53; sio mei he taimi 4:48 ki he 5:22)
Meʻa ke fakaʻaliʻalí: Fakakaukau ke fakaʻaliʻali ʻa e saati ʻoku ʻi ai e ngaahi fakamoʻoni fakafolofolá mo e ngaahi fakaʻuhinga ʻoku hiki ʻi lalo ʻi he sātí. ʻE ala tokoni foki ke fakaʻaliʻali ʻa e ngaahi fili ʻoku maʻu ʻi he ʻekitivitī akó ki he ikuná ke fili mei ai e kau akó.

Fokotuʻu ki hono akoʻi ʻi he konifelenisi vitioó: ʻE ala tokoni ke faʻu ha fakaʻaliʻali slide pe fakaʻaongaʻi ha ngaahi founga kehe ke fakaʻaliʻali ai ʻa e ngaahi fakaʻuhinga ki he ʻekitivitī kumi folofolá mo e ngaahi founga ako ki he ʻekitivitī fakaʻosí. Fakakaukau ke tā ha ngaahi fasi langaki moʻui lolotonga hono fakakakato ʻe he kau akó ʻa e ongo ʻekitivitī ko ʻení.

Fakahā 5

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke fakatupulaki ʻenau holi ke moihū ki he Tamai Hēvaní mo Sīsū Kalaisi ʻi he ʻofa mo e loto-fakamātoato ange.

Teuteu ʻa e tokotaha akó: Fakaafeʻi e kau akó ke nau talanoa mo ha mēmipa ʻo e fāmilí pe taki ʻo e Siasí fekauʻaki mo e ʻuhinga ʻo e moihū ki he Tamai Hēvaní mo Sīsū Kalaisí.

Vitiō: “Ko e Ngaahi Tapuaki ‘o e Moihuú” (11:28; mamata mei he taimi 3:34 ki he 4:45 pea mei he 8:54 ki he 11:14)
Meʻa ke fakaʻaliʻalí: Ko e fakamatala ʻa Pīsope Tīni M. Teivisí, pea kapau ʻe fiemaʻu, ko e ngaahi fehuʻi ʻe nima ʻi he fakaʻosinga ʻo e lēsoní.

Fokotuʻu ki hono akoʻi ʻi he konifelenisi vitioó: Mahalo ʻe tokoni ke fakaʻaliʻali ʻa e lea ʻa Pīsope Tīni M. Teivisi lolotonga iá ʻoku aleaʻi ʻe he kau akó ʻa e meʻa ʻoku nau ako fekauʻaki mo e moihuú mei he kupuʻi lea ko iá.

Toe Vakaiʻi Hono 24 ʻo e Fakataukei Fakatokāteliné

Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau akoako fakaʻaongaʻi ha niʻihi ʻo e ngaahi potufolofola fakataukei fakatokāteliné ki ha ngaahi tūkunga kehekehe ʻoku moʻoní.

Teuteu ʻa e tokotaha akó: Fakaafeʻi e kau akó ke fakaʻaongaʻi ʻa e app Fakataukei Fakatokāteliné pe ngaahi founga kehe ke ako maʻuloto ai ʻa e ngaahi fakamoʻoni fakafolofola ʻo e fakataukei fakatokāteline ʻo e Fuakava Foʻoú mo e ngaahi kupuʻi lea mahuʻingá. Kole ange ke nau haʻu mateuteu ki he kalasí ke vahevahe ha potufolofola kuo nau aʻusia ʻi hono fakaʻaongaʻí.

Meʻa ke fakaʻaliʻalí: Ko e laʻipepa tufa ʻoku ui ko e “Fakataukei Fakatokāteline ʻo e Fuakava Foʻoú: 1 Kolinitō–Fakahā”

Fokotuʻu ki hono akoʻi ʻi he konifelenisi vitioó: ʻI he taimi ʻoku vahevahe ai ʻe he kau akó ha ngaahi tūkungá, ʻe lava ke fakaafeʻi kinautolu ke nau fakaʻaongaʻi ʻa e founga fetalanoaʻakí (chat). ʻE lava leva ke fakaafeʻi e kalasí ke nau lau ʻa e ngaahi tūkungá, kumi ha ngaahi potufolofola fakataukei fakatokāteline ʻoku fekauʻaki mo e ngaahi tūkungá, pea fakamatalaʻi e founga ʻoku nau fakaʻaongaʻi aí.