Faaaliga 8–11

O Le Tatalaina o le Faamaufaailoga Lona Fitu

Ua saunia e tusitusiga paia le tele o avanoa e aoao ai lesona taua mai ia i latou o e sa ola i le taimi ua tuanai. Latou te aoao mai foi ia i tatou e uiga i mea na valoia o le a tutupu i le lumanai. I le Faaaliga 8–11, na tusifaamaumauina ai e Ioane ia valoaga e uiga i mea taua ma faigata o le a tutupu a o lei oo i le Afio Mai Faalua o Iesu Keriso. O lenei lesona ua faamoemoe e fesoasoani ia te oe e lagona ai le mana o le Alii ma Lona gafatia e puipuia ai i tatou mai mala ma mea leaga o aso e gata ai.

O le aloese ai mai taumatematega. E ui ua tuuina mai e le Alii ia i tatou ni valoaga taua e uiga i Lona Afio Mai Faalua, ae e tele auiliiliga e lei faaalia mai e Ia. O le aloese mai taumatematega e uiga i faamatalaga e le o mailoa.

Sauniuniga a le tagata aoga: Mafaufau e faasoa atu le saunoaga a Peresitene Russell M. Nelson mai le amataga o lenei lesona ma valaaulia tagata aoga e suesue e uiga i ni isi o galuega maoae o le a faatinoina e le Alii a o lei oo i Lona Afio Mai Faalua. O tusiga “ Aso e Gata Ai, Aso e Gata Ai ” i le Taiala i Tusitusiga Paia ma le “ Aso e Gata Ai ” (o loo maua i le scriptures.ChurchofJesusChrist.org) e mafai ona avea ma punaoa aoga mo lenei mea.

Gaoioiga E Ono Mafai Ona Aoao Ai

O mea ofoofogia e tutupu i aso e gata ai

Mafaufau e valaaulia tagata aoga e faasoa mai tali i le fesili lenei a o lei faitauina le saunoaga a Peresitene Russell M. Nelson.

• O a ni isi o galuega maoae na faia e le Alii i le taimi ua tuanai, a le mo isi po o i lou lava olaga?

Sa faasoa e Peresitene Russell M. Nelson se malamalamaaga taua e uiga i mea o le a tutupu a o lei oo mai le Afio Mai Faalua o le Faaola:

O lo tatou Faaola ma le Togiola, o Iesu Keriso, o le a faatinoina ni isi o Ana galuega mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga.

(Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 96) 

• O a ni mafaufauga ma ni lagona sa ia te oe a o e faitau i lenei faamatalaga?

• O a ni isi o galuega maoae ua e iloa o le a faatinoina e le Alii a o lei oo i Lona Afio Mai Faalua?

Mai le saunoaga a Peresitene Nelson, ua tatou aoao ai e faapea, o le a faatino e le Alii ni isi o Ana galuega silisili ona mamana a o lei toe afio mai o Ia. I lenei lesona o le a e suesue ai e uiga i ni isi o nei galuega maoae. Ia gauai atu ao e suesue i mea ua e aoaoina e uiga i le Atua, Lona mana, ma Lona alofa mo i tatou.

Ua vaai Ioane i le tatalaina o le faamaufaailoga lona fitu

Atonu e te manatua i lana faaaliga o loo tusia i le tusi o Faaaliga, na vaai ai Ioane i se tusi e fitu ona faamaufaailoga. O faamaufaailoga taitasi e faatusa i se vaitau e 1,000 tausaga i le lalolagi (tagai i le Faaaliga 5 ; Mataupu Faavae ma Feagaiga 77:6–7). O le ata lenei e mafai ona fesoasoani ia te oe e vaai faalemafaufau ai i le faamamafa na tuu e Ioane i nei vaitau taitasi.

Mafaufau e tuu atu i tagata aoga se kopi o le ata lenei po o le faaali atu i totonu o le vasega.

• Aisea e ono fesoasoani ai ia te oe le iloa na taulai atu e Ioane le tele o ana tusitusiga i mea na tutupu e faatatau i le Afio Mai Faalua o le Faaola, nai lo o mea na tutupu e faatatau i faamaufaailoga na muamua atu?

I le Faaaliga 11 , na muaivaai ai Ioane i se taimi na i ai se autau malosi le toatele o “tagata ma ituaiga ma gagana ma atunuu” ( Faaaliga 11:9) o le a taumafai e faaumatia Ierusalema (tagai foi Esekielu 38:4–6, 14–16 ; Ioelu 2:1–9 ; Faaaliga 9:16–17 ; 11:2). Ae o tusiga a Ioane ua ta’u mai ai o molimau e toalua na auina mai le Atua o le a taofia ai lenei autau mai le faataunuuina o lona faamoemoega mo le 42 masina (tagai i le Faaaliga 11:2–3).

Faitau le Faaaliga 11:3–6 ma le Mataupu Faavae ma Feagaiga 77:15 , ma vaavaai mo faamatalaga e uiga i nei molimau e toalua.

• O le a se mea sa e aoaoina e uiga i nei molimau toalua?

• O le a se faamaoniga ua e vaaia o le a faatasi le mana o le Atua ma i laua ?

Faitau le Faaaliga 11:7–10 , ma vaavaai mo le mea na valoia e Ioane o le a tupu i nei perofeta e toalua pe a uma la la’ua auaunaga i tagata Iutaia.

• O a mea o tau faailo mai e nei fuaiupu e uiga i le tulaga faaleagaga o le toatele o e o le a ola i le lalolagi i lena taimi?

Ua ta’u mai i tusitusiga paia e faapea i le “tolu aso ma le vaeluagalemu o le aso” ( Faaaliga 11:9) pe a taatitia nei perofeta ua maliliu i magaala, o le a toe taulai atu le vaai a le autau malosi i le faatoilaloina o Ierusalema (tagai i le Sakaria 14:2).

Faaali atu se ata o le Mauga o Olive, pe valaaulia tagata aoga e sue le ata o le Tusi Paia 11, “ Mauga o Olive ,” i a latou tusitusiga paia po o i le scriptures.ChurchofJesusChrist.org.

O se ata lenei o le Mauga o Olive i Ierusalema. I luga o lenei mauga, sa puapuagatia ai le Faaola i le Faatoaga o Ketesemane o se vaega o Lana Togiola (tagai i le Luka 22:39–44). O le Mauga o Olive o le nofoaga foi lea o le a “afio atu le Faaola, e tau ma ia nuu” ( Sakaria 14:3–4) o loo saili e faaumatia tagata Iutaia a o lei faaali atu o Ia i le lalolagi uma.

Fuafua e vaevae le vasega i ni vaega toalaiti. E mafai e vaega taitasi ona suesue se tasi o fuaitau nei o tusitusiga paia ma aotele mea sa latou aoaoina mo le vasega.

Faitau fuaitau nei, ma vaavaai mo faamatalaga e uiga i galuega maoae o le a faia e le Alii i Ierusalema ma i le Mauga o Olive a o lei oo i Lona Afio Mai Faalua.

Faaaliga 11:11–13

Sakaria 14:3–5

Mataupu Faavae ma Feagaiga 45:48–53

• O le a se aafiaga o mea na tutupu ua tusifaamaumauina i nei fuaitau i luga o tagata o e oo i ai nei mea?

• O a ni mea ua fesoasoani nei mea na valoia e te malamalama ai pe lagona ai e uiga i le Faaola?

• Aisea e taua ai mo oe le malamalama ma lagona nei mea e uiga i le Faaola i le taimi nei i lou olaga?

Puipuiga mo le Au Paia a le Atua

E ui o le amioleaga, taua, ma le faatafunaga o le a iai a’o lei oo i le Afio Mai Faalua, ae e taua foi le manatua ua folafola mai e le Alii le fesoasoani ma le puipuiga faaleagaga ia i latou o e filifili e mulimuli ia te Ia (tagai i le Faaaliga 17:14 ; 1 Nifae 22:16–17). O se tasi nofoaga o le filemu, sulufaiga, ma le saogalemu o Siona, le Ierusalema Fou, lea o le a faatuina i le konetineta o Amerika (tagai i le Mataupu Faavae ma Feagaiga 45:66 ; Mataupu Faavae o le Faatuatua 1:10). E lei faaalia mai lava e le Alii le tele o faamatalaga e faatatau i lenei aai i le lumanai, ae ua Ia aoao mai e uiga i le puipuiga o le a maua ai iina.

Faitau le Mataupu Faavae ma Feagaiga 45:66–71 , ma vaavaai pe o faapefea ona faamatala e le Alii le aai o Siona.

Afai e i ai ni isi fesili a tagata aoga e uiga ia Siona, mafaufau e faaaoga le “O le a le Siona?” i le vaega o “Tala Auiliili ma Faamatalaga o Talaaga” o lenei lesona.

• O a upu po o fasifuaitau na e iloaina e taua mai nei fuaiupu?

• Mai fea o le a o mai ai tagata amiotonu o Siona?

• O le a le mea o loo faia nei e le Alii e saunia ai i tatou mo lenei taimi i le lumanai ma ia puipui ai i tatou mai mea leaga ma mea matautia o o tatou aso?

Mafaufau i mea na e aoaoina

Tagai i le saunoaga a Peresitene Nelson i le amataga o le lesona, ma mafaufau e uiga i mea ua e suesueina i le asō e uiga i galuega maoae o le a faatinoina e le Alii.

Mafaufau e faaali atu uunaiga nei o ni ulutala i vaega eseese o le laupapa ma valaaulia le toatele o tagata aoga e filifili se uunaiga e faamae’a. Ona mafai lea ona valaaulia tagata aoga e faasoa mai pe aisea na latou tusia ai mea na latou faia.

O ni isi o mea na sili ona tulaga ese ia te au mai a’u suesuega i le asō o le …

O le asō sa ou aoaoina pe lagonaina ai e faapea o le Alii …

Ona o mea sa ou lagona ma suesueina i le aso, ou te manao e …

Tala Auiliili ma Faamatalaga o Talaaga

Gaoioiga Faaopoopo e Aoao Ai

Faaaliga 10 . Misiona a Ioane

Mafaufau e tusi upu Suamalie ma le Oona i luga o le laupapa ona fai atu lea i tagata aoga e mafaufau ma faasoa mai ni aafiaga i le olaga e mafai ona manatu i ai e suamalie ma oona.

Valaaulia tagata aoga e faitau le Faaaliga 10:1–3, 8–11 ma le Mataupu Faavae ma Feagaiga 77:14 , ma vaavaai mo mea na tuuina mai ia Ioane, le mea sa ia faia i ai, ma po o le a le mea na faatusa i ai lenei faatinoga. Faailoa atu, na faamanuiaina Ioane o le a le oo le oti ia te ia, ina ia mafai ona ia aumaia tagata i le Faaola (tagai i le Mataupu Faavae ma Feagaiga 7:1–4).

• E mafai faapefea e mea o le a tutupu i aso e gata ai ia na valoia e Ioane ona faamatalaina e faapea e suamalie ma oona?

• O a tiutetauave e ono tuuina mai e le Alii ia i tatou e mafai ona taitai atu ai i aafiaga suamalie ma oona?

• Aisea e te manatu ai e finagalo le Alii ia tatou oo i mea uma e lua?