Faaaliga 12

“Taua i le Lagi”

O fea na e sau mai ai ae e te lei fanau mai i le lalolagi? E mafai faapefea e le iloa o lenei mea ona aafia ai lou olaga? A o faamatalaina lana faaaliga vaaia o “mea e tatau ona mulimuli mai” ( Faaaliga 4:1) e faatatau i aso e gata ai ma le Afio Mai Faalua o Iesu Keriso, sa faasoa mai foi e Ioane ni faamatalaga auiliili o lo tatou muai olaga, e aofia ai se “taua i le lagi” ( Faaaliga 12:7) ma le tetee o Satani i soo o Iesu Keriso i le olaga nei. O lenei lesona ua faamoemoe e fesoasoani e faateleina ai lau tautinoga e mulimuli ia Iesu Keriso e ala i le fesoasoani ia te oe ia malamalama i lau filifiliga i le muai olaga e mulimuli i le Faaola ae teena Satani.

O le tuuina atu o le taimi i tagata aoga e mafaufau loloto ai. Tuu atu ni avanoa mo tagata aoga e mafaufau loloto ai i mea latou te iloa ma talitonu i ai ma o latou lagona e uiga i mea ua latou aoaoina. O le faia ai o lenei mea e mafai ona faateleina ai le le avanoa e aoaoina ai e le Agaga. E mafai ona fesoasoani ia i latou e iloa ai lo latou alualu i luma faaleagaga i le taimi nei ma mea atonu latou te manaomia ona fai e suia ai ma tuputupu ae ai.

Sauniuniga a le tagata aoga: I ni nai aso a o lumanai lenei lesona, valaaulia tagata aoga e gauai atu i auala latou te vaai ai o faasagatau Satani ia Iesu Keriso ma Ona soo. Fautuaina i latou e sauni e faasoa mai ni faataitaiga patino o mea na latou maitauina.

Gaoioiga E Ono Mafai Ona Aoao Ai

O le a se eseesega o le a tupu mai ai?

I se faigalotu i le lalolagi atoa mo le autalavou, na faasoa mai ai e Sister Wendy W. Nelson, le faletua o Peresitene Russell M. Nelson, le saunoaga lenei. Taumafai e vaai faalemafaufau i mea o loo ia valaauliaina oe e vaai faalemafaufau i ai ma lagonaina. Atonu e te manao e matamata le “Faamoemoe o Isaraelu” (1:01:34), o loo maua i le ChurchofJesusChrist.org, mai le faailotaimi 20:52–21:37, pe faitau le faamatalaga lenei.

Mafaufau e faasoa atu palakalafa nei taitasi i le taimi ma tuu atu i tagata aoga e talanoaina le saunoaga a Sister Nelson. E mafai ona latou mafaufau loloto pe faape’i o tatou foliga i le muai olaga ma pe faape’i ona lagona le mauaina o se aafiaga lea e pei ona talanoa mai ai Sister Nelson.

Maimau e pe ana mafai ona e matamata i se vitio e 10-minute i luga o le YouTube o lou olaga i le muai olaga.

Sa aoao mai e le Perofeta o Iosefa Samita ana mafai ona e pulato’a a’e i le lagi mo se lima minute, o le a e iloa atili ai e uiga i se mataupu nai lo o lou suesue i ai i lou olaga atoa. O lea la, mafaufau faapea afai e mafai ona e pulatoa a’e i le lagi mo le 10 minute i lou olaga i le muai olaga!

E moni ua tatou iloa sa tosoina ma le poto e le Alii se veli i luga o na manatuaga. Ae, mo na o sina taimi itiiti, vaai faalemafaufau i le aafiaga i lou olaga i le taimi nei pe ana faapea na faataga ona e matamata mo se 10 minute i lou olaga i le muai olaga.

(Wendy M. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Ensign, 4–5, ChurchofJesusChrist.org)

• Afai e mafai ona e vaai ia te oe lava i le muai olaga, o a ni mea patino o le a e faamoemoe e vaai i ai, aoao, lagona, pe malamalama mai le mauaina ai o lena aafiaga?

• O le a se eseesega e te manatu o le a faia e lenei mea i lou olaga?

I le Faaaliga 12 , na tusia ai e Ioane e uiga i le Taua i le muai olaga i le Lagi. A o e suesue, vaavaai mo faamatalaga e uiga i lau sootaga i le muai olaga ma Iesu Keriso. Mafaufau pe mafai faapefea e le malamalama ai i lenei sootaga ona aafia ai lou gafatia e mulimuli ia te Ia ma faatoilalo Satani i lou olaga i le taimi nei.

O le Taua o le muaiolaga i le Lagi

O le anotusi lenei ua faamoemoe e fesoasoani i tagata aoga ia malamalama i faatusa ma ata mai le faaaliga vaaia a Ioane ina ia mafai ai ona latou malamalama i le Taua i le Lagi i se taimi mulimuli mai o le lesona. Faasoasoa le taimi e faaalu e tagata aoga i nei fuaiupu ina ia lava ai se taimi mo gaoioiga i se taimi mulimuli mai o le lesona.

Ina ia fesoasoani ia te oe e saunia e suesue i aoaoga a Ioane e uiga i le Taua i le Lagi, atonu e aoga mo oe le suesue le Faaaliga 12:1–5 ona vaai lea i le ata o loo i lalo o loo faaalia ai ni isi o faailoga i nei fuaiupu. Faaaoga le siata lenei e fesoasoani ia te oe e malamalama ai po o a mea e faatusa i ai nei faailoga.

Mafaufau e faaali atu faamatalaga nei mo tagata aoga.

Faatusa	O le mea o loo faatusaina mai
O se fafine ( Faaaliga 12:1)	“O le ekalesia a le Atua” (tagai i le Faaliliuga a Iosefa Samita, Faaaliga 12:7 [i le faaopoopoga i le Tusi Paia])
O le tama a le fafine ( Faaaliga 12:2)	“O le malo o lo tatou Atua ma lana Keriso” (tagai i le Faaliliuga a Iosefa Samita, Faaaliga 12:7 [i le faaopoopoga i le Tusi Paia])
O se tarako ( Faaaliga 12:3)	Satani (tagai i le Faaliliuga a Iosefa Samita, Faaaliga 12:8 [i le faaopoopoga i le Tusi Paia])

Ina ia aoao e uiga i le Taua i le Lagi, fai se siata e pei o lenei i lau api faamaumau mo suesuega. Faitau le Faaliliuga a Iosefa Samita, Faaaliga 12:7–11 (i le faaopoopoga i le Tusi Paia). Manatua o “Mekaeli ma ana agelu” ( Faaaliga 12:7) o Atamu lea ma isi fanau agaga amiotonu a le Atua.

Mafaufau e fatu le siata lenei i luga o le laupapa mo tagata aoga e tusi ai i totonu o a latou api talaaga mo suesuega. E faaopoopo atu i le faamaeaina o le siata i a latou api faamaumau mo suesuega, e mafai e tagata aoga ona tusi tali e le maaleale patino tele i luga o pepa laiti ma faapipii i luga o le laupapa i autafa o le uunaiga talafeagai.

O le Taua i le Lagi Faaliliuga a Iosefa Samita, Faaaliga 12:7-11 (i le faaopoopoga i le Tusi Paia)
Sa ou aoaoina e faapea o Satani …
Sa ou aoaoina e faapea o Iesu Keriso …
Sa ou aoaoina e faapea ou te …

Mafaufau i mea ua e faitauina ma mea na e tusia i lau siata.

• O le a se mea e tumatila ia te oe? O a ni au fesili o i ai?

• O le a se mea ua fesoasoani le fuaiupu 11 e te malamalama ai e uiga i le tulaga sa e i ai i le muai olaga? O le a le matafaioi a le Faaola i le fesoasoani atu ia te oe e faatoilalo Satani?

I le aoao atu e uiga i le muai olaga ma a tatou faatinoga iina, sa faamamafa mai ai e Dallin H. Oaks o le Au Peresitene Sili mea nei:

I le Aufono i le Lagi, sa folasia mai ai i fanau agaga uma a le Atua le fuafuaga a le Tama, e aofia ai ona taunuuga faaletino ma tofotofoga, o ana fesoasoaniga faalelagi, ma lona taunuuga mamalu. Na tatou vaaia le i’uga mai le amataga. O le anoai uma o tagata ola o eua fananau mai i lenei lalolagi na filifilia le fuafuaga a le Tama ma tau mo lea fuafuaga i le taua i le lagi na sosoo ai.

(Dallin H. Oaks, “O Le Fuafuaga Sili,” Ensign po o le Liahona, Me 2020, 93)

• O le a se mea ua e aoaoina e mafai ona tapue ai lou faatuatua ia Iesu Keriso ma fesoasoani ia te oe e mulimuli atu ia te Ia?

O se tasi o upumoni atonu o loo e aoaoina mai lau suesuega e faapea, na e faatoilaloina Satani i le muai olaga e ala i le Togiola a Iesu Keriso ma e ala i le tumau faamaoni i lau molimau.

• E mafai faapefea e lenei malamalama ona aafia le auala e te vaai ai ia te oe lava atoa ma isi?

• O le a se mea ua fesoasoani lenei upumoni ia te oe e malamalama ai e uiga i le mana o le Faaola ma Lana Togiola?

Manatua ina ua mavae le fouvale a Satani, o ia ma ana ’au sa “lafo ifo i le lalolagi” ( Faaaliga 12:9). Faitau le Faaaliga 12:12, 17 , ma vaavaai po o ai na alu i ai Satani e tau faasaga i ai ina ua lafo ifo o ia mai le lagi. Mafaufau e faaopoopo ou malamalamaaga i le siata na e fatuina.

A o lei faia le isi fesili, faamanatu i tagata aoga le valaaulia mai le gaoioiga sauniuni a le tagata aoga.

• O faapefea ona e vaaia le taua na amata e Satani e faasaga i soo o Keriso i lona faaauauina ai pea i aso nei?

• E mafai faapefea e le iloaina o upumoni na e aoaoina e uiga i le Taua i le muai olaga i le Lagi ona fesoasoani ia te oe i lenei taua e faasaga ia Satani i aso nei?

Toe faamanatu mea ua e lisiina i lau api faamaumau mo suesuega, ma manatu e mafaufau loloto ma tatalo e uiga i lou talitonuga patino i lou olaga i le muai olaga ma mea moni o le taua i le va o Satani ma i latou o e mulimuli ia Iesu Keriso. Mafaufau pe mafai faapefea e mea ua e aoaoina i le aso ona fesoasoani ia te oe e malamalama atili ai i lou faatuatuaina i le muai olaga ma le faalagolago ia Iesu Keriso. E mafai faapefea ona e faatuatuaina atoatoa ma faalagolago ia te Ia iinei i le olaga nei? Tusifaamaumau ou mafaufauga ma ou lagona i lau api faamaumau mo suesuega.

Tala Auiliili ma Faamatalaga o Talaaga

Gaoioiga Faaopoopo e Aoao Ai

O isi auala e mafai ona amata ai le lesona

I le avea ai o se isi auala i mea o loo fautuaina atu i le amataga o le lesona, e ono mafai ona aoga i tagata aoga e ala lea i le talanoaina o o latou aafiaga o le ola ai i se taimi o loo sasao ai taua i le lalolagi atoa. E mafai ona latou talanoaina ni isi o taua e sili ona ogaoga pe o loo i ai i le taimi nei ma aafiaga o na taua a o lei talanoaina fetauiga faaleagaga, po o taua, ma o latou aafiaga. E le gata i lea, e mafai foi ona talosagaina tagata aoga e toe faamanatu faapuupuu, tusifaaata, pe faasoa mai mea ua latou iloa e uiga i le ata o le faaolataga ona mafaufau lea e uiga i le olaga i le muai olaga. E mafai ona latou talanoaina mea latou te iloa, talitonu, pe fia iloaina e uiga i lenei vaega o le fuafuaga.

O le fafine i le vao

Faamanatu i le vasega o le “fafine” o loo ta’ua i le Faaaliga 12 e faatusa “i le ekalesia a le Atua” ( Faaliliuga a Iosefa Samita, Faaaliga 12:7 [i le faaopoopoga i le Tusi Paia]). A uma ona faitau e uiga i le Taua i le Lagi i le Faaaliga 12:7–11 , atonu e aoga le faitau o le Faaaliga 12:8–17 , ma vaavaai mo mea e manao Satani e fai i le Ekalesia a le Faaola. Ina ia fesoasoani ia malamalama tagata aoga i aoaoga faafaatusa a Ioane i nei fuaiupu, mafaufau e fai atu fesili e pei o nei: “O le a sou manatu o le a le mea e faatusa i ai le fafine na lele atu i le vao ina ua uma ona sauaina e le tarako?” (Tagai i le Faaaliga 12:13–14 ; tagai foi i le Mataupu Faavae ma Feagaiga 86:1–3 .)