Toe Faaamanatu 25 o le Atamai i Aoaoga Faavae

Malamalama ma Faaaoga

A woman is sitting against a tree reading her scriptures. It is a nice sunny day with clouds in the sky. She has a flower in her hair.

O se tasi o faamoemoega o le atamai i aoaoga faavae o le fesoasoani lea ia te oe ia malamalama ma faaaoga fuaitau o le atamai i aoaoga faavae i ou lava tulaga pe a o e fesoasoani ai i isi tagata. O lenei lesona o le a tuuina atu ia te oe se avanoa e faalolotoina ai lou malamalama ma faaaoga ai upumoni o loo maua i fuaitau e 13 o le atamai i aoaoga faavae mai le afa lona lua o le Feagaiga Fou.

Sauniuniga a le tagata aoga: Mafaufau e tuu atu i tagata aoga se kopi o le pepa e tufa atu o loo aofia ai i lenei lesona. Valaaulia i latou e toe faamanatu tusi faasino o mau ma fasifuaitau autu o mau ma mafaufau i tulaga e ono fesoasoani ai le malamalama i na fuaitau.

Gaoioiga E Ono Mafai Ona Aoao Ai

E ono manaomia ona aoaoina se lesona o le fuaitau o le atamai i aoaoga faavae e suitulaga ai i lenei lesona toefaamanatu. Tagai i le faasologa faatulagaina o lesona ua saunia e le faatonu o le eria po o le risone po o le taitai faamaopoopo ina ia mautinoa o lesona o fuaitau o le atamai i aoaoga faavae taitasi o le a aoaoina a o faaauau taualumaga o le seminare.

O le faamalosia e ala i upumoni o le talalelei

Sa ta’ua e Peresitene M. Russell Ballard o le Korama a Aposetolo e Toasefululua e faapea o se tasi o faamoemoega o le atamai i aoaoga faavae o le taulai atu lea i le “fausiaina ma le faamalosia o lo tatou faatuatua ia Iesu Keriso ma faamalosia [i tatou] i le faateleina o le tomai e ola ai ma faaaoga le talalelei i o tatou olaga” (“O Avanoa ma Tiutetauave o Faiaoga o le OAE i le Seneturi 21” [afiafi faatasi ma se Pulega Aoao, 26 Fep., 2016], broadcasts.ChurchofJesusChrist.org). I se isi faaupuga, o fuaitau o le atamai i aoaoga faavae ua faamoemoeina e faamalosia atili ai lou faatuatua!

Manatu faapea e i ai ni au uo e fai atu ia te oe pe a uma le seminare i se tasi aso e faapea ua latou lagona o le atamai i aoaoga faavae e maumau ai le taimi. Latou te lagona o fuaitau o le atamai i aoaoga faavae e le aoga ma ua latou le iloa pe faapefea ona fesoasoani ia i latou i o latou olaga.

I le faaaogaina o le siata ua saunia, mafaufau i fuaitau na e suesueina i le afa lenei o le Feagaiga Fou. Mafaufau loloto po o le fea o fuaitau ua fai ma se faamanuiaga po o se fesoasoani ia te oe.

Atamai i Aoaoga Faavae mo le Feagaiga Fou: 1 Korinito–Faaaliga

Tusi Faasino o Mau	Fasifuaitau Autu o Mau
1 Korinito 6:19–20	“O lo outou tino o le malumalu lea o le Agaga Paia.”
1 Korinito 11:11	“E leai se tane pe a le o i ai le fafine, e leai foi se fafine pe a le o i ai le tane, i le Alii”
1 Korinito 15:20–22	“Aua faapei ona oti uma ia Atamu, e faapea foi ona faaolaina uma ia Keriso.”
1 Korinito 15:40–42	I le Toetutu, e i ai tikeri e tolu o le mamalu.
Efeso 1:10	“Ina ia na faaopoopoina ia Keriso i le sauniga i le faaatoaga o tausaga, o i latou uma lava o i le lagi, atoa ma i latou o i le lalolagi.”
Efeso 2:19–20	O le Ekalesia o loo ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.”
2 Tesalonia 2:1–3	“O le aso o Keriso … e le oo mai lena aso, seia muai ona taunuu o le tete’a ese.”
2 Timoteo 3:15–17	“O Tusi Paia, e mafaia ona faapoto ai ia te oe e iu ai i le ola i le faatuatua.”
Eperu 12:9	O lo tatou Tama Faalelagi o “le Tamā o tatou agaga.”
Iakopo 1:5–6	“A e afai ua leai se poto i so outou, ina ole atu ia i le Atua.”
Iakopo 2:17–18	“O le faatuatua, pe afai e le i ai galuega, e mate lava.”
1 Peteru 4:6	“Na folafola atu foi le talalelei i e ua oti.”
Faaaliga 20:12	“Ona faamasinoina ai lea o e na oti … e tusa ma a latou amio.”

New Testament Seminary Teacher Manaul - 2023

Ua faapefea ona faamanuiaina, faamalosia, pe faamausaliina oe e soo se fuaitau o le atamai i aoaoga faavae na e suesueina i lenei tausaga?

Ina ia valaaulia le Faaola e fausia, faamalosia, ma faamausaliina i tatou e ala i fuaitau o le atamai i aoaoga faavae, e ao ona faateleina lo tatou malamalama ma le tomai e faaaoga ai upumoni o loo maua i fuaitau. O gaoioiga nei ua faamoemoe e fesoasoani ia te oe e faia ai lenei mea.

O le malamalama ai ma le manatuaina o upumoni o le talalelei

O se tasi auala e malamalama atili ai ma manatua upumoni o loo maua i fuaitau o le atamai i aoaoga faavae o le faatusatusa lea o i latou i mea faitino ma tulaga o aso uma.

Filifili ni fuaitau se lua e te manao e malamalama atili i ai, ma toe faamanatu a latou fasifuaitau autu o mau.

E faalagolago i manaoga o tagata aoga ma le taimi avanoa, e mafai e tagata aoga ona filifili le sili atu ma le lua ni fuaitau mo lenei gaoioiga.

a) Tusi pe pue se ata o se mea faitino po o se tulaga ua e lagona e fesootai i le fasifuaitau autu o le mau i le fuaitau. (Mo se faataitaiga, mo le Iakopo 1:5–6 e mafai ona e tusia se ata o se tasi o tatalo. Mo le 1 Korinito 15:40–42 e mafai ona e tusia pe pue se ata o le la, masina, po o fetu.)

e) Tusi se faamalamalamaga puupuu pe faapefea ona fesootai lau ata i le upumoni o loo aoaoina i le fuaitau.

Mafaufau e valaaulia tagata aoga e faasoa atu a latou ata na tusi po o ata na pue, faatasi ai ma a latou faamatalaga, i se paga po o i se vaega toalaiti. Atonu e aoga foi le valaaulia o ni nai tagata aoga e faasoa mai a latou ata ma faamalamalamaga i le vasega.

Faaaogaina o upumoni o le talalelei

Na aoao mai e Elder David A. Bednar o le Korama a Aposetolo e Toasefululua se upumoni e mafai ona fesoasoani ia i tatou e faaaoga ai fuaitau o le atamai i aoaoga faavae. Na ia aoao mai o mataupu faavae o le talalelei e maua ai “le vaaiga taua o le upumoni e faavavau a o tatou faatautaia tulaga eseese, luitau, faaiuga, ma aafiaga o le olaga faitino” (“O Mataupu Faavae o La’u Talalelei,” Liahona, Me 2021, 123–24). O mataupu faavae o loo maua i fuaitau o le atamai i aoaoga faavae e mafai ona fesoasoani ia i tatou i le tele o tulaga i o tatou olaga.

Filifili ni fuaitau se lua o i ai ni mataupu faavae e te manao e iloa pe faapefea ona faaaoga i lou olaga. Atonu o fuaitau lava ia e tasi na e filifilia muamua, pe atonu foi e ese.

E faalagolago i manaoga o tagata aoga ma le taimi avanoa, e mafai e tagata aoga ona filifili le sili atu ma le lua fuaitau mo lenei gaoioiga.

Mo fuaitau taitasi, faamatala se tulaga o le a mafai ai e se tasi ona faaaoga le upumoni o loo aoaoina i le fuaitau. Mo se faataitaiga, atonu e sili atu ona faaosofia se tagata talavou e auai i le faatinoina o le galuega o talafaasolopito o aiga e ala i le faateleina o a latou molimau i le aoaoga faavae o le faaolataga mo e ua maliliu o loo aoaoina i le 1 Peteru 4:6 .

Faamatala pe mafai faapefea e le faaaogaina o le upumoni na aoaoina i fuaitau taitasi na e filifilia ona fesoasoani i le tagata ia maua le fesoasoani a le Faaola.

Mafaufau e tuu atu i tagata aoga taitasi se kata po o se fasipepa ma fai atu ia i latou e tusi le tusi faasino o le atamai i aoaoga faavae, le tulaga, ma le faamalamalamaga pe mafai faapefea e le upumoni o loo aoaoina i le fuaitau o le atamai i aoaoga faavae ona fesoasoani i se tasi. Atonu o le a punouai ma aoga le aoina mai loa o kata po o fasi pepa ma faitau ia tulaga, valaaulia le vasega e mate mai po o le fea o fuaitau atonu e sili ona aoga i tulaga taitasi ma faamalamalama pe aisea. Afai e faailoa mai e se tagata aoga se fuaitau e ese mai nai lo le fuaitau o loo tusia i luga o le pepa, valaaulia lena tagata aoga e faamatala mai pe mafai faapefea ona fesoasoani le fuaitau sa latou ta’ua.

E mafai e tagata aoga ona mate faatasi o se vasega, i ni paga pe i ni vaega toalaiti, pe taitoatasi.

Gaoioiga Faaopoopo e Aoao Ai

Tauloto

Afai e mafai ona faaaoga e tagata aoga ni isi faataitaiga e tauloto ai fasifuaitau autu o mau ma tusi faasino o le atamai i aoaoga faavae, mafaufau e fai ni isi po o gaoioiga uma nei:

Faaali atu tusi faasino uma o mau o le atamai i aoaoga faavae ma fasifuaitau autu o mau e le o faatulagaina i le faasologa sa’o. Valaaulia tagata aoga e vaai pe fia ni tusi faasino o mau ma fasifuaitau autu o mau e mafai ona latou faafetauia sa’o. Ona valaaulia lea o tagata aoga e siaki a latou galuega e faaaoga ai a latou tusitusiga paia.
Faaali atu tau lava o se vaega o fasifuaitau autu o mau, ma valaaulia tagata aoga e faauma ma tuu i ai tusi faasino o mau.
Amata ona faitau lemu ia fasifuaitau autu o mau, e taitasi le upu i le taimi. A manatu loa tagata aoga ua latou iloa pe o le fea o fasifuaitau autu o le mau o loo faitauina, e mafai ona latou susue loa i lena fasifuaitau i a latou tusitusiga paia.
Afai e maua, mafaufau e valaaulia tagata aoga e faaaoga le polokalama o le Atamai i Aoaoga Faavae e faataitai ai le taulotoina.

Tala faatino

Sa faapea mai Sister Joy D. Jones, o lē sa auauna atu o se Peresitene Aoao o le Peraimeri, o faataitaiga faatino “e mafai ona faamalosia ai fanau ina ia saunia i se nofoaga luigata” (“Talatalanoaga E Tatau Ai,” Liahona, Me 2021, 13). E mafai ona valaaulia tagata aoga e faailoa mai se tulaga e mafai ai ona fesoasoani se upumoni mai se fuaitau o le atamai i aoaoga faavae. Ona mafai lea ona latou faatino faataitai le tali atu i le tulaga e faaaoga ai le upumoni mai le fuaitau o le atamai i aoaoga faavae.