Roma 7–12
“O Le Faaola … Na Te Faateaeseina Le Amio Faalematau”
O nisi taimi i la tatou faigamalaga i le olaga, atonu tatou te lagona le faavaivai pe le fiafia pe a tatou le ausia le ituaiga tagata e ao ona avea ai i tatou. Faatasi ai ma lagona talitutusa o le le fiafia, na alaga ai le Aposetolo o Paulo, “Aue o a’u le tagata malaia!” (Roma 7:24). E ui lava i vaivaiga tatou te oo i ai i le olaga nei, e mafai ona tatou maua le faamoemoe ma le filemu a o tuu atu lo tatou faatuatuaga ia Iesu Keriso. O lenei lesona o le a fesoasoani ia te oe e faatino ai le faatuatua sili atu ia Iesu Keriso ina ia faatoilaloina ai ou vaivaiga.
Faaaogaina o le Tusi a Mamona. Sa aoaoina Nifae o le Tusi a Mamona ma isi tusitusiga paia o aso e gata ai o le a oo mai e “faatuina ai le moni” o le Tusi Paia ( 1 Nifae 13:40). O le valaauliaina o tagata aoga e suesue fuaitau o le Tusi a Mamona faatasi ai ma isi o loo i le Tusi Paia e mafai ona fesoasoani ia i latou e iloa manino atili ai upumoni o le talalelei a Iesu Keriso.
Sauniuniga a le tagata aoga: Valaaulia tagata aoga e faitau le Roma 7:14, 18–19, 24–25, faatasi ai ma le 2 Nifae 4:17–20, 26–32 . Fai atu ia i latou e o mai saunia e faasoa mai pe na faapefea ona faaopoopo pe faamanino mai e lenei fuaitau o le Tusi a Mamona lo latou malamalama i mea o loo aoao mai i le Roma e 7. Faamanatu i tagata aoga e aumai foi se kopi patino o le Tusi a Mamona i le vasega.
Gaoioiga e Ono Mafai Ona Aoao Ai
Taulimaina o vaivaiga o le olaga faaletino
Mafaufau e fetuunai le vaaiga faataitai lenei e faatatau i manaoga o tagata aoga pe valaaulia tagata aoga e fai a latou lava tulaga faataitai e uiga i se talavou ua lagona le lotovaivai ona o ona vaivaiga.
O Trey o se tagata o Le Ekalesia a Iesu Keriso o le Au Paia o Aso e Gata Ai. E manao o ia e mulimuli ia Iesu Keriso ae ua ia lagona na te le o faia lelei mea e ao ona ia faia i le tele o taimi. E masani ona ia lagona le tausalaina ona o ona vaivaiga ma e popole ina nei le lava lona lelei.
Mafaufau e uiga i ou lagona i nisi taimi e te faapei ai o Trey.
-
E mafai faapefea e nei lagona ona aafia ai lau sootaga ma le Tama Faalelagi ma Iesu Keriso, faapea foi ma isi tagata?
-
Aisea e taua ai le sailia o le fesoasoani mai le Tama Faalelagi ma Iesu Keriso e faatoilalo ai ou vaivaiga ma ou le atoatoa?
Na aoao mai Peresitene Russell M. Nelson e faapea “e malamalama le Alii i o tatou vaivaiga faaletino. E i ai taimi tatou te vaivai uma ai lava. Ae ua Ia silafia foi o tatou gafatia tele” (“Ua Toetu Keriso; O le Faatuatua ia te Ia o le a Aveesea ai Mauga,” Liahona, Me 2021, 102). A o e suesue i lenei lesona, manatua le mea na aoao mai e Peresitene Nelson ma vaavaai mo upumoni e mafai ona fesoasoani ia te oe pe a ua e iloaina vaivaiga faaletino. Mafaufau loloto pe mafai faapefea e nei upumoni ona faateleina lou faatuatua e mafai ona fesoasoani Iesu Keriso ia te oe.
Na oo foi le Aposetolo o Paulo i lagona o le vaivai ma le tauiviga i le va o le “tino” ( Roma 7:18), po o tuinanau faaletino, ma “le tagata i totonu” ( fuaiupu 22), po o le faaleagaga.
Faitau le Roma 7:14, 18–19, 24–25 ma le Faaliliuga a Iosefa Samita mo nei fuaiupu o loo maua i le Faaliliuga a Iosefa Samita o loo i le faasinotusi o le Tusi Paia. Vaavaai mo upu ma fasifuaitau o loo faamatala ai mafaufauga ma lagona o Paulo. Mafaufau e faailoga mea e te mauaina. Manatua i le fuaiupu 24 o “lenei oti” e faasino i le oti faaleagaga, po o le vavaeeseina mai le Atua, ona o le agasala.
-
E faapefea ona talitutusa manatu ma lagona o Paulo ma manatu atonu sa ia te oe?
-
O a upumoni na aoao atu e Paulo?
O se tasi o upumoni atonu na e faailoa mai i nei fuaiupu e faapea E mafai e Iesu Keriso ona laveai i tatou mai le faatagataotauaina e le agasala. Atonu e te manao e tusi lenei upumoni latalata ane i le Roma 7:24–25 .
-
E pei foi ona faia ia Paulo, aisea e mafai ai e le manatuaina o lenei upumoni pe a e tauivi ma ou lava vaivaiga ona fesoasoani e te lagona atili ai le faamoemoe?
O le Tusi a Mamona o se meafaigaluega mamana e mafai ona tatou faaaogaina e faamalosia ai lo tatou malamalama i upumoni o loo aoao mai i le Tusi Paia (tagai i le 1 Nifae 13:40 ; 2 Nifae 3:12).
Mo se faataitaiga, i le 2 Nifae 4, na faasoa ai e Nifae ni aoaoga e talitutusa ma ia ua e aoaoina mai ia Paulo i le Roma 7 . Ia iloa o vaefaamatalaga i le Roma e 7 o loo i ai mau faasino uiga tutusa i le 2 Nifae 4. O le faaaogaina o vaefaamatalaga o se auala e mafai ona fesoasoani e sailia ai fuaitau i le Tusi a Mamona e fesootai ma mea o loo e suesueina i le Tusi Paia.
Faitau le 2 Nifae 4:17–20, 26–32, ma vaavaai pe na faapefea ona faaalia e Nifae lagona e faapei o lagona o Paulo.
-
O le fea o upu po o fasifuaitau a Nifae sa sili ona anoa ia te oe? Aisea?
-
E ono mafai faapefea e aoaoga a Nifae ona fesoasoani e te lagona ai le latalata atili atu i le Tama Faalelagi ma Iesu Keriso pe a o e tauivi ma vaivaiga po o le masalosalo ia te oe lava ia?
Faaaogaina o le Tusi a Mamona e malamalama lelei ai i upumoni
Afai e i ai se taimi o totoe i le lesona, mafaufau e faaaoga mea nei e fesoasoani ai i tamaiti aoga e saili ai isi sootaga i le va o aoaoga mai ia Paulo ma le Tusi a Mamona.
E pei ona faalautele e le 2 Nifae 4 lau suesuega o aoaoga a Paulo i le Roma 7, e tele isi fuaitau i le Tusi a Mamona e mafai ona fesoasoani ia te oe e malamalama ma talisapaia atili ai aoaoga a Paulo.
Faataitai le faaaogaina o le Tusi a Mamona e faalautele ai lou malamalama i aoaoga a Paulo e ala i le filifilia o ni fuaitau se lua pe sili atu mai le Roma e faitau. Ona faatusatusa lea i fuaitau o le Tusi a Mamona e faatatau i ai (pe sue au lava fuaitau e faaaoga ai le Taiala i Autu po o le Taiala i Tusitusiga Paia). Vaavaai pe faapefea ona faamautuina pe faamaninoina mai e fuaitau o le Tusi a Mamona ia upumoni o loo aoao mai i le Roma.
Faaali atu le siata lenei mo tamaiti aoga e vaai i ai ma faaaoga. Uunaia i latou e sue foi a latou lava fuaitau faamanino i le Tusi a Mamona pe a mafai ona latou faia.
|
Roma |
Tusi a Mamona |
-
Na faapefea ona faamalosia e fuaitau mai le Tusi a Mamona lou malamalama i aoaoga a Paulo i le Roma?
Tomanatu i lou aafiaga o le vaaia o le auala e mafai ona fesoasoani ai le Tusi a Mamona ia te oe i lau suesuega o le Tusi Paia. Saili e faaaoga le Tusi a Mamona e fesoasoani ia te oe a o faaauau lau suesuega o le Feagaiga Fou.
Manatu ma Talaaga o Faamatalaga
E mafai faapefea e Iesu Keriso ona fesoasoani ia te au e faatoilalo o’u vaivaiga i le olaga nei?
A o tautua ai i le Au Peresitene Sili, na aoao mai Peresitene Dieter F. Uchtdorf:
E toatele tagata e lagona le lotovaivai ona latou te le ausia i le tele o taimi mea ua faamoemoeina. Latou te iloaina mai o latou lava aafiaga e faapea “ua manao i ai le loto, a o le tino ua vaivai” [ Mataio 26:41 ]. Latou te alalaga faatasi ma Nifae e folafola atu, “Ua faanoanoa lo’u agaga ona o a’u amioletonu” [ 2 Nifae 4:17 ]. …
A ou mafaufau i le mea na faia e le Faaola mo i tatou lea na sosoo ma lena uluai Aso Sa o le Eseta, ou te manao ai e sii ae lo’u leo ma alaga i viiga i le Atua Silisili Ese ma Lona Alo, o Iesu Keriso!
Ua matala faitotoa o le lagi!
Ua matala pupuni o le lagi!
O le asō ma aso uma lava o loo ua avanoa ai le alofa tunoa o le Atua i tagata uma o e ua momomo o latou loto ma ua salamo o latou agaga [tagai i le 3 Nifae 9:19–20 ]. Ua faaavanoaina e Iesu Keriso le auala mo i tatou e o a’e ai i mea maualuluga ia e le malamalama i ai o tatou mafaufau faaletino [tagai i le 1 Korinito 2:9 ].
(Dieter F. Uchtdorf, “O le Meaalofa o le Alofa Tunoa,” Ensign po o le Liahona, Me 2015, 110)
O tatou o ni Kerisiano pe afai tatou te faaaogāina isi tusi e ese mai i le Tusi Paia?
I le vitio “Are We Christians?” (faailo taimi 0:00 i le 2:15), na faamatalaina ai e Elder Gary J. Coleman, a o auauna atu o se tasi o Fitugafulu, le ala na fesoasoani ai le Tusi a Mamona ia te ia ia malamalama atili i le upumoni ma faamautu ai lona faaKerisiano. O loo maua lenei vitio i le ChurchofJesusChrist.org.
E faapefea ona galulue faatasi le Tusi Paia ma le Tusi a Mamona ma faaalia ai le alofa o le Atua mo i tatou?
Na faamatala mai e Peresitene Harold B. Lee (1899–1973) e faapea:
O lo tatou Tama Faalelagi e faavavau, o le e popole i taimi uma i le manuia faaleagaga o Lana fanau, ua tuuina mai ia i tatou se soa tusi o tusitusiga paia, ua ta’ua o le Tusi a Mamona, e fai ma puipuiga mo upumoni o le Tusi Paia na tusia ma tautalagia e perofeta e pei ona faatonuina ai e le Alii. …
… Mai lenei molimau lona lua e mafai ai ona tatou iloa atili ma le mautinoa le uiga o aoaoga a perofeta anamua ma, e moni lava, a le Matai ma Ona soo a o latou soifua ai ma aoao atu i tagata. O lenei mea e tatau ona musuia ai i latou uma o le a avea ma tagata sailiili faamaoni i upumoni e tuufaatasia nei tusitusiga paia e lua ma suesue i ai o se tusi e tasi, malamalama ai, e pei ona tatou faia, i lo laua sootaga moni.
(Harold B. Lee, O Outou o le Malamalama o le Lalolagi [1974], 89, 91)
Aisea na fai mai ai Paulo e na o le taʻutaʻu atu o le suafa o Iesu e faaolaina ai?
O le Roma 10:1–13 e masani ona sii mai e puipui ai le tulaga e faapea e na o le tatou taʻutaʻu atu o le suafa o Iesu Keriso e faaolaina ai. Peitai, sa patino lava le fetalai mai o le Faaola e tetee i lenei aoaoga faavae ina ua Ia fetalai mai, “E le sao atu i le malo o le lagi i latou uma o e fai mai ia te au, Le Alii e, le Alii e; a o le na te faia le finagalo o lo’u Tama o i le lagi” ( Mataio 7:21).
E le gata i lea, sa faamamafa atu e Paulo le taua o le sauniga o le papatisoga i le amataga o lana tusi i Roma (tagai i le Roma 6:1–6) ma aoao atu foi le taua o galuega lelei ma le loto liua (tagai i le Roma 2:1, 3, 6–13, 25–29).
I le ma lenei, o le upu “tautino” i le Roma 10:9 e mafai ona faaliliuina o le “feagaiga,” ma o le fasifuaitau “valaau atu” i le Roma 10:13 e mafai ona faaliliuina o le “tuuina atu se igoa i luga” (tagai i le James Strong, The New Strong’s Exhaustive Concordance of the Bible, e pei ona maua i le http://lexiconcordance.com/greek/3670.html; http://lexiconcordance.com/greek/1941.html). O nei upu e mafai ona faasino i le osia o feagaiga ma tauave i o tatou luga le suafa o Keriso, lea e fetaui ma isi aoaoga a Paulo (tagai i le Kalatia 3:27 ; Roma 6:14–22) faapea foi e pei o ni fuaitau fesootai i le Tusi a Mamona, e pei o le Mosaea 5:1–9 .
O Gaoioiga Faaopoopo e Aoao Ai
Roma 9 ma le 11: “E lē o Isaraelu uma i latou, o tagata Isaraelu” ( Roma 9:6)
Mafaufau e fetuunai le taulaiga o le lesona i le aoaoga faavae o le filifiliga ma le muai faauuga. E mafai ona suesue tagata aoga i le Roma 9:1–7 ma le 11:1–5, 25–32 faatasi ai ma tusitusiga i le Taiala i Tusitusiga Paia “ Filifiliga ” ma le “ Muaifaauuga ” (i le “Fesoasoani mo Suesuega” i le scriptures.ChurchofJesusChrist.org). E mafai ona latou sailiili i le lauga o le konafesi a Peresitene Nelson ua faaautuina “Ia Faamuamua le Atua” (Ensign po o le Liahona, Nov. 2020, 92–95) ma faasoa mai ni malamalamaga latou te maua e uiga i auala e faatatau ai nei upumoni ia i latou (tagai i le Roma 8:14–15).
O se isi taulaiga mo le lesona
Mafaufau e taulai atu lenei lesona i le fesoasoani ai i tagata aoga ia malamalama i nisi o mafuaaga ua tatou maua ai le Tusi a Mamona e faaopoopo atu i le Tusi Paia. Mafaufau e amata i le faamatalaina o se vaaiga faataitai lea e i ai i tagata aoga se uo ua lafoina i luga o faasalalauga faaagafesootai e uiga i lona le iloa ai o se mea e tatau ai ona i ai isi tusitusiga paia faaopoopo e ese mai i le Tusi Paia ma fesili pe aisea ua iloa ai e se tagata se manaomia o le Tusi a Mamona.
E mafai e tagata aoga ona matamata i le “The Book of Mormon—a Book from God,” e maua i le ChurchofJesusChrist.org, mai le faailotaimi 4:28 i le 5:41. I lenei vitio, sa faamalamalama mai ai e Elder Tad R. Callister, a o i le Au Peresitene o Fitugafulu, nisi o mafuaaga e taua ai le i ai o le Tusi a Mamona e faaopoopo atu i le Tusi Paia.
Ona mafai lea e tagata aoga ona faaaoga mau o loo faasino i ai i lenei lesona e vaai ai pe faapefea ona faamanino ma faamautu e le Tusi a Mamona upumoni i le Tusi Paia ma tusi ai se tali i le uo.
