Roma 8:1–17

“Suli-Faatasi ma Keriso” 

I se vaitaimi na leai ai se lotogatasi o tagata o le Ekalesia i Roma ma i ai feeseeseaiga o manatu i mataupu eseese taua, na tusi atu ai Paulo ia i latou e uiga i auala e mafai ai ona latou mulimuli i le Agaga e agavaa ai i le Togiola a Iesu Keriso ma manumalo ai mai lo latou natura o le pa’ū faaletino. Na folafola atu e Paulo afai latou te faia o lea mea, o le a fai i latou ma suli faatasi ma Iesu Keriso i mea uma a le Tama Faalelagi. A o e suesue, saili e faateleina lou naunau e mulimuli i le Agaga Paia ma maua ai mea uma a le Tama Faalelagi. 

Gagana faaleitupa i totonu o tusitusiga paia. E i ai taimi e faaaoga ai e tusitusiga paia faaupuga e pei o le “alii” po o “atalii” pe a ta’ua faamanuiaga o loo ofoina mai e le Atua (tagai i faataitaiga i le Roma 8:14). Ia mautinoa e malamalama tagata aoga e faapea o folafolaga e faavavau a le Tama Faalelagi mo le mauaina o mea uma ua ia te Ia e faatatau lea i alii ma tamaitai (tagai i le Mataupu Faavae ma Feagaiga 25:1).

Sauniuniga a le tagata aoga: Valaaulia tagata aoga e faitau le Mataupu Faavae ma Feagaiga 76:50–70 ma ia omai saunia e faasoa mai pe aisea e latou te manaomia ai ona maua faamanuiaga na faamatalaina mai i nei fuaiupu.

Gaoioiga e ono Mafai Ona Aoao Ai

O le a se mea e te manao ina ia tuufaasolo mai ia te oe e fai ma ou tofi?

A o le’i tuuina atu fesili nei, mafaufau e faaali pe talanoaina nisi o mea taua, uiga, po o ni meaalofa sa tuufaasolo mai ou tua’a.

• A faapea e mafai ona e filifilia se tasi e tuufaasolo mai ai se mea e fai ma ou tofi, o ai se o le a e filifilia? Aisea?

• O le a se mea ua e manao e tuufaasolo e fai ma ou tofi mai lea tagata?

Na tusi atu le Aposetolo o Paulo i le Au Paia i Roma e uiga i le tofi ua ofoina mai e le Tama Faalelagi i Ana fanau taitoatasi. Faitau le Roma 8:16–17, 32,, ma maka mea ua ofoina mai e le Tama Faalelagi ia i tatou. Atonu e aoga ona iloa o se suli o “se tasi ua agavaa e fai mona tofi meaalofa faaletino pe faaleagaga” (O le Taiala i Tusitusiga Paia, “ Suli,” scriptures.ChurchofJesusChrist.org).

• O a upu po o fasifuaitau na e faailogaina?

• O le a sou manatu i le uiga o le avea ma suli-faatasi ma Iesu Keriso?

O se tasi o upu moni o loo fesoasoani mai ai nei fuaiupu ina ia tatou malamalama ai o le finagalo lea o le Tama Faalelagi e faamanuia mai ia te i tatou i mea uma o ia te Ia (tagai foi i le Mataupu Faavae ma Feagaiga 76:55 ; 84:38).

E uiga i le tofi ua finagalo le Tama Faalelagi e faamanuia mai ai i tatou, na aoao mai Peresitene Dieter F. Uchtdorf, a o i ai i le Au Peresitene Sili e faapea:

E le oo le malosi o ou manatu e vaai ai faalemafaufau i mea uma e aafia i lenei folafolaga. Ae ua ou iloa e mataina, e paia, e faavavau, ma e aoga ai a tatou taumafaiga uma i le olaga.

(Dieter F. Uchtdorf, “O Faalagiga e Fa,” Ensign po o le Liahona, Me 2013, 60)

Faaaoga sina taimi e mafaufau ai po o le a le uiga o le mautofi i mea uma ua i le Tama Faalelagi, ma mafaufau po o a ni au fesili e ono i ai e uiga i lenei upumoni. Mafaufau po o a ni amio, uiga, ma ni isi faamanuiaga e te manao e tuufaasolo mai e fai ma ou tofi mai le Tama Faalelagi. A o faaauau au suesuega o le aso, saili mo ni upumoni e mafai ona fesoasoani e te malamalama atili ai i le tofi ua finagalo le Tama Faalelagi e faamanuiaina ai oe ma mea e mafai ona e faia e te agavaa ai.

Aoaoina atili e uiga i le tofi mai le Tama Faalelagi

Faaali le siata lenei i le laupapa. Mafaufau pe aoga le suesueina o fuaiupu nei e le tagata aoga lava ia, i ni vaega toalaiti, pe o le vasega atoa.

Fatufatu le siata lenei i lau api talaaga mo suesuega:

O faamanuiaga ua finagalo le Tama Faalelagi ina ia fai ma o tatou tofi	O mea e mafai ona tatou faia e agavaa ai mo lenei tofi

I le tatou tisipenisione, ua faaalia atili mai e le Alii e uiga i le tofi o loo finagalo le Tama Faalelagi e foai mai ia te i tatou. O se vaega o le faaaliga na tuuina atu i le Perofeta o Iosefa Samita ma tusifaamaumauina i le tusi ua ta’ua nei o le Mataupu Faavae ma Feagaiga 76, na faamatala mai ai e le Alii i latou o le a i ai se aso o le a fai ai ma o latou tofi le malo selesitila.

Suesue i le Mataupu Faavae ma Feagaiga 76:50–70 faapea ma ni isi o aoaoga a Paulo i le Roma 8:1, 5–9, 13–14, e aofia ai ma le Faaliliuga a Iosefa Samita mo le Roma 8:8–9, o loo maua i vae faamatalaga. A o e suesue, faaopoopo i lau siata folafolaga e te faitauina ma mea o loo ta’ua mai i fuaiupu e mafai ona e faia e te agavaa ai i na folafolaga. Ia manatua e ui lava ona ta’ua i nei fauiupu faaupuga e pei o “atalii” ma “alii”, O folafolaga a le Atua e faatatau tutusa i fanau uma a le Tama Faalelagi (tagai Mataupu Faavae ma Feagaiga 25:1). Atonu e aoga foi ona iloa o le faaupuga lea o le “loto i le tino”, o loo ta’ua i le Roma 8, e faatatau lea i se tasi e taula’i i mea faalelalolagi po o mea faaletino. E mafai foi ona faatatau i tuinanau o le tino (tagai i le O le Taiala i Tusitusiga Paia, “ Faaletino,” scriptures.ChurchofJesusChrist.org).

A maea ona suesue tagata aoga, mafaufau pe valaaulia ni volenitia e faaopoopo nisi o o latou malamalamaaga i le siata o i luga o le laupapa. Faaaoga fesili e pei o nei ina ia anoa ai se talanoaga e uiga i mea ua aoaoina e tagata aoga.

• O a fuaiupu mai au suesuega na aupito sili ona anoa ia te oe? Aisea?

• O le a se mea na aoga ai nei fuaiupu e te malamalama atili ai i le tofi o loo finagalo le Atua e tuuina atu mo oe? O le a se mea e mafai ona e faia e te agavaa ai mo lena tofi?

I le siata na e tusia i lau api talaaga mo suesuega, toe faamanatu mea na e tusia, e aofia ai ma faamanuiaga ua finagalo le Tama Faalelagi e fai ma ou tofi.

• O le a se mea ua fesoasoani nei faamanuiaga folafolaina ia e malamalama ai e uiga i le Tama Faalelagi ma Iesu Keriso?

• O le a le matafaioi a le Faaola e faatino e fesoasoani ai ia i tatou ia maua lea tofi? (tagai Mataupu Faavae ma Feagaiga 76:69).

E mafai faapefea ona aafia ai lou olaga?

Mafaufau mo sina taimi pe faapefea ona aafia lou olaga ma au filifiliga i lou malamalama i le tofi ua finagalo le Tama Faalelagi e tuuina mai ia te oe.

Faaali atu vaaiga faataitai ma faatonuga o loo mulimuli ane ai i vaaiga faataitai. Nai lo le tuu atu i tagata aoga e tusi se faamatalaga i le tagata o loo i le tulaga faataitai latou te filifilia, e mafai ona vaevae le vasega i ni vaega toalaiti, ma tuu atu i vaega taitasi se tasi o tulaga faataitai. Ona mafai lea ona faaaoga e tagata aoga fesili o loo mulimuli mai i tulaga faataitai e faatalanoa ai pe faapefea ona fesoasoani i tagata o loo i ai i tulaga faataitai.

Mafaufau nei pe faapefea ona aafia le tupulaga talavou o loo i tulagga faataitai nei i upumoni ua e suesueina i le aso:

1. Ua tele faafitauli na feagai ma Estelle i lona olaga ma ua ia lagona le lotovaivai. Ua ia tau mafaufau pe aoga ona ia alu pea i le lotu ma tausia pea poloaiga.

2. E fiafia tele Calvin i tekonolosi ofoofogia o loo i ai i le lalolagi. E tele lona taimi e faaalu e taalo ai i taaloga vitio, ma faaaoga faasalalauga faaagafesootai, pe matamata vitio.

3. E tele ina tauivi Liz ma ona lagona o le maualalo o lona taua faale-tagata ma ia tau mafaufau pe alofa moni ea se isi ia te ia.

Filifili se tasi o tulaga faataitai o loo i luga (pe mafaufau se isi tulaga faataitai ese). Tusi se faamatalaga puupuu i le tagata o loo i le tulaga faataitai na e filifilia, ma faasoa atu i ai ni upumoni ma ni mau na e suesueina i lenei lesona e fesoasoani ai i le tagata ma lona tulaga. Atonu e aoga ona e mafaufau i fesili nei ao tusia lau faamatalaga:

• O le a le uiga ia te oe o le mafai ona tatou maua mea uma ua i le Tama Faalelagi ma Iesu Keriso?

• E faapefea ona fesoasoani le malamalama i lenei tofi i le tagata o loo i le tulaga faataitai na e filifilia?

• O a ni mea na faia e le Tama Faalelagi ma Iesu Keriso ina ia mafai ai ona tatou maua nei faamanuiaga?

• O a ni mea faigofie e mafai ona amata ona fai e le tagata i lau tulaga faataitai o le a fesoasoani ai ia te ia?

Valaaulia ni tagata aoga naunautai e faasoa mai a latou faamatalaga i le vasega. Faafetai i tagata aoga mo a latou taumafaiga, ma molimau i le alofa o le Tama Faalelagi mo latou ma Lona finagalo e tuuina atu ia te i latou nei faamanuiaga. Faamalosiau ia i latou e mulimuli i le Agaga Paia i aso uma a o latou taumafai e agavaa mo nei faamanuiaga.

Manatu ma Talaagag o Faamatalaga

E mafai faapefea e le manatuaina o lo tatou tofi ona fesoasoani ia i tatou?

Na faasoa mai e Peresitene Elaine S. Dalton, o le sa avea ma Peresitene Aoao o Tamaitai Talavou, se tala i se tupu o loo faapupula mai ai lenei lesona:

Sa i ai i [le tupu] se malamalama e le maluelue o lona faasinomaga. A o avea o ia ma alii talavou, sa ave faamalosia o ia e tagata amioleaga o ē sa faoa le nofoalii o lona tama, o le tupu. Sa iloa e nei tagata leaga afai e mafai ona latou lepetia lona tulaga mama, o le a le avea o ia ma suli i le nofoalii. E ono masina sa latou taumafai ai e faagaua’i o ia i mea faatiapolo uma o le olaga, ae sa lei gauai atu lava o ia i nei uunaiga. O lenei mea na iso ai i latou na ave faamalosia o ia, ma ina ua uma ona latou faia o mea uma sa mafai ona latou mafaufau i ai, sa latou fesili atu ia te ia pe aisea lava ua i ai ia te ia lea malosiaga amiomama tele. Sa faigofie lana tali. Faimai o ia, “Ou te le mafai ona faia mea ua outou fai mai ai, aua na ou fanau mai e avea ma tupu” [tagai Vaughn J. Featherstone, “The King’s Son,” New Era, Nov. 1975, 35].

E faapei o le atalii o le tupu, ua tofu outou ma se tofi tautupu. Ua tofu outou ma se tupuaga paia.

Elaine S. Dalton, “Manatua Pe O Ai Oe!,” Ensign po o le Liahona, Me 2010, 121)

O le a le ituaiga taumafaiga e manaomia ina ia mulimuli ai pea lava pea i le Agaga Paia ma maua mea uma ua i le Tama Faalelagi?

A o avea o ia ma se tasi o Fitugafulu, sa faamatala mai e Elder Bruce C. Hafen:

Afai tatou te mananao i “mea uma ua i ai i [le] Tama” [ Mataupu Faavae ma Feagaiga 84:38 ], ua finagalo mai le Atua i mea uma ua ia i tatou. Ina ia agavaa ai mo sea ’oa matagofie, e tatau ona tatou foai atu i le auala na foai mai ai e Keriso—o mea uma lava sa ia te Ia: “Ma o le uiga ese o le tiga e te lei iloa, ioe, o le faigata ona onosai e te lei iloa” [ Mataupu Faavae ma Feagaiga 19:15 ]. Fai mai Paulo, “Afai tatou te tiga faatasi ma ia,” o “suli faatasi i tatou ma Keriso” [ Roma 8:17 ; na faaopoopo le faamamafa]. O Lona finagalo atoa, ma o tatou loto atoatoa.

(Bruce C. Hafen, “O Le Togiola: O Mea Uma mo Tagata Uma,” Ensign po o le Liahona, Me 2004, 98)

Aisea na aoao mai ai Paulo e moomia ona avea i tatou ma atalii o le Atua ae o tatou uma o Lana fanau?

E ui lava o tagata uma o fanau faaleagaga a matua faalelagi, o aoaoga a Paulo e uiga i “le Agaga e avea ai ma tamafai” ma le avea ai ma “atalii [ma afafine] i latou o le Atua” (tagai Roma 8:14–15) e fesoasoani tatou te malamalama ai e mafai ona tatou toe fanauina faaleagaga, pe fai ma tamafai, ma atalii ma afafine o Keriso i le feagaiga o le talalelei (tagai O le Taiala o Tusitusiga Paia, “ Feagaiga,” scriptures.ChurchofJesusChrist.org).

Na oo i le nuu o le Tupu o Peniamina lea ituaiga toe fanauina faaleagaga, na mafua ai ona maitauina e Peniamina, “Ma o lenei, ona o le feagaiga ua outou faia, o le a ta’ua ai outou o le fanau a Keriso, o ona atalii, ma ona afafine; ona faauta, o le aso ua fanauina ai e ia outou faaleagaga” ( Mosaea 5:7). O le avea ma atalii ma afafine o Iesu Keriso e ala i le toe fanauina faaleagaga e taua mo le agavaa i mea uma o i le Tama Faalelagi (tagai Mosaea 27:25-26).

Gaoioiga Faaopoopo e Aoao Ai

Faaaogaina o Autu a le Korama Perisitua Arona ma Tamaitai Talavou

Valaaulia tagata aoga e sailiili i le Autu a le Korama Perisitua Arona ma le Autu a Tamaitai Talavou (ChurchofJesusChrist.org) ma faailoa upumoni e tutusa pe fesootai ma upu na aoaoina i le Roma 8:1–17 .

O ni isi o upumoni e ono maua e tagata aoga e aofia ai: e ia i tatou se natura ma se faasinomaga paia; i le avea ai ma soo o Iesu Keriso, tatou te taumafai ina ia tatou faapei o Ia; ma e taumafai soo o Keriso ina ia avea atili faapei o Ia i aso uma.

Valaaulia tagata aoga e faasoa mai po o a ni tulaga talitutusa o loo faapupula mai i le va o autu ma le Roma 8:1–17 e uiga i le taua o nei upumoni i le talalelei a Iesu Keriso. Valaaulia tagata aoga e faasoa mai a latou molimau i auala e musuia ai i latou e nei upumoni i latou e mulimuli latalata atili i le Faaola.

Autu o le Talalelei, “Avea Faapei o le Atua,” ChurchofJesusChrist.org

Afai e aoga i tagata aoga le malamalama atili i aoaoga a le Ekalesia e faatatau i le gafatia paia o tagata soifua e avea ai faapei o le Atua, valaaulia i latou e fai mai ni fesili e uiga i le mataupu faavae e mafai ona avea tatou faapei o le Tama Faalelagi ma mauaina mea uma o ia te Ia (tagai Roma 8:16–17). Tusi a latou fesili i luga o le laupapa, ma valaaulia i latou e saili tali i le suesueina o le tala i Autu o le Talalelei “Avea Faapei o le Atua,” lea e mafai ona maua i le polokalama faatekonolosi o le Potutusi o le Talalelei po o luga o le ChurchofJesusChrist.org. Valaaulia tagata aoga e faasoa mai mea na latou maua.