iTukutuku ni Mataveiliutaki Taumada

Kemuni na iTokani Daukaulotu:

Keitou vakacaucautaki kemuni ena vuku ni madigi cecere e nomuni mo ni daukaulotu ni Lotu i Jisu Karisito ni Yalododonu Edaidai. E sega tale na cakacaka e veivakayarayarataki ka bibi cake mai na vakasokumuni nei Isireli.

Vunautaka na Noqu Kosipeli e kena inaki me vukea nomu vakarau vakavinaka cake, ka daukaulotu matua vakayalo. Sa kena inaki talega me vukei iko mo qasenivuli mana cake. Keitou sa kerei kemuni moni vakayagataka e veisiga ena nomuni vuli yadua vaka kina ena vuli vakaveitokani. Keitou sa vakauqeti kemuni talega moni vakayagataka ena nomuni matabose ni tikina kei na koniferedi vakaiwasewase. Vulica na ivolanikalou dusimaki ka kila na ivunau kei na ivakavuvuli.

Keitou sa sureti kemuni mo ni laveti cake ki na dua na ivakarau vou ni yalodina mo vukea na Tamada mai Lomalagi ena Nona cakacaka lagilagi. Na daukaulotu yadua sa dua na nona itavi bibi me vukea na Turaga ena Nona cakacaka me “vakavuna na tawamate rawa kei na bula tawamudu ni tamata” (Mosese 1:39).

Ena vakalougatataki iko na Turaga ena nomu soli iko ena yalomalumalumu mo qaravi Koya. Mo kunea na reki kei na marau ena nomu cakacaka ena kedra maliwa na luvena na Tamada Vakalomalagi.

Na Mataveiliutaki Taumada