“iVakamacala Taumada ni Vunautaka na Noqu Kosipeli,” Vunautaka na Noqu Kosipeli: E Dua na iDusidusi ena Wasei ni Kosipeli i Jisu Karisito (2023)

“iVakamacala Taumada,” Vunautaka na Noqu Kosipeli

iVakamacala Taumada ni Vunautaka na Noqu Kosipeli

A vakaroti ira na Nona italai na Turaga “dou vunautaka na noqu kosipeli ena Yalo, ko koya na Dauveivakacegui sa talai yani me vakatakila vei kemudou na ka dina” (Vunau kei na Veiyalayalati 50:14).

Vunautaka na Noqu Kosipeli e caka me vukea na nomu rawata nomu inaki vakadaukaulotu. Sa vakanamata ena veika yaga ni daukaulotu. E sega ni sauma taucoko na taro se veidusimaki ena ituvaki kece o na sotava. Ia, sa dua na ivurevure bibi sara mo tubu kina ena kaukauwa vakayalo kei na igu. Vulica ka bulataka na ivunau kei na ivakavuvuli ni kosipeli e kunei ena ivolanikalou kei na ivola oqo.

Joni na Dauveipapitaisotaki e papitaiso taki Jisu Karisito

Vunautaka na Noqu Kosipeli e caka me vukei iko ena veisala oqo:

Kila Na Nomu iNaki Vakadaukalulotu
- Wase 1: Vakayacora Na iNaki ni Nomu Kaulotu
Vulica ka Vakavuvulitaka na iVunau
- Wase 3: Vulica ka Vakatavuvulitaka na Kosipeli i Jisu Karisito
Tubu ena nomu vakatorocaketaki vakayalo kei na saumaki mai vakatamata yadua
Vakavinakataka na nomu kaukauwa mo veisureti ka vukei ira na tamata me ra ciqoma na kosipeli vakalesui mai

Vulica vakawasoma na veiwase oqo ena nomu gauna taucoko ni kaulotu. Dikeva na nomu cakacaka. Vakadavora na takete ka tuvatuvalaki me rawati. Na daukaulotu e vakarautaki koya e veisiga ka vakavinakataki koya e veigauna, ena vakalougatataka na nodra bula o ira e vakavulica ka veiqaravi kina. Era na rawata talega na veivakalougatataki ena nodra bula.

Madigi ni Vuli kei na Kilaka

Na vuli vakavinaka ena nomu gauna ni kaulotu ena vukea mo vaqaqacotaka na nomu ivakadinadina ni kosipeli ka yaco me tisaipeli yalodina i Jisu Karisito.

Na vulici ni ivolanikalou kei na Vunautaka na Noqu Kosipeli ena vukei iko mo veivakavulici ena kaukauwa vakayalo. Ena vukei iko talega mo cakava na nomu veivakavulici me sotava na nodra gagadre na tamata yadua.

Na vuli vakabibi kei na madigi ni kilaka e okati kina na:

Vuli Yadudua.
Vuli vata vakaitokani.
Veisau ni iTokani.
Bose ni matabose ni tikina.
Koniferedi ni iwasewase.
Matabose ni veiliutaki ena kaulotu (baleti ira na iliuliu ni daukaulotu gone).

Ena levu na siga, ena okati ena nodra ituvatuva na nomu daukaulotu na gauna ni vuli yadua kei na vuli vakaitokani. Raica na iVakarau ni Daukaulotu baleti ira na Tisaipeli i Jisu Karisito, 2.4, na itukutuku ni nomu ituvatuva e veisiga.

Na veika o vulica ena nomu vuli yadua ena vukei iko ena vuli vakaitokani kei na madigi ni vuli tale eso sa cavuti e cake. Ena veigauna vakaoqori mo dou “veivakavulici vakai kemudou ena ivakavuvuli ni matanitu” (Vunau kei na Veiyalayalati 88:77).

Vakasama eso me Vakavinakataki cake kina Nomu Vulica na Vunautaka Noqu Kosipeli

Vunautaka Noqu Kosipeli e tali rau vata na ivolanikalou kei na ivakavuvuli ni kosipeli me vukea na nomu kila na iVakabula kei na Nona kosipeli. E kena inaki me veivuke ena nomu umanaki ena ivolanikalou ka vakabulabulataka na nomu vulici ira. Vulica na idusidusi vakaivolanikalou ena iwase yadua ena nomu gauna taucoko ni kaulotu.

Na iwase yadua ena Vunautaka Noqu Kosipeli sa koto kina na kena vakasama kei na itaviqaravi me vukea nomu vulica ka vakayagataka na veika o vulica tiko. Vakayagataka ena nomu vuli yadua kei na vuli vakaitokani (raica na iVakatagedegede ni Daukaulotu, 2.4). Sa rawa talega nio vakayagataka ena matabose ni tikina kei na koniferedi vakayasana. Ena yaga vakalevu cake nomu vuli nio kunea na sala mo vakayagataka kina na ka o vulica.

Ena veivuke me tiko e dua na ituvatuva ni nomu vuli yadua. E rawa nio bulia e dua na nomu ituvatuva vakataki iko ka vakaliuci kina na ivakavuvuli ni kosipeli o vinakata mo kila vakavinaka cake. E rawa talega nio tara na nomu vuli wavokita na iwase eso ena Vunautaka na Noqu Kosipeli. Me vaka, e rawa nio vakayagataka na lesoni eso ena wase e 3 me dusimaka nomu vuli ena ivunau kei na ivakavuvuli ona vakavuvulitaka. Ena gadrevi mo kila vakavinaka na ivunau eso oqo me rawa kina nio veivakavulici ena Yalo ena nomu vosa ga.

Volavola ni o vuli tiko. Vakayagataka na pepa se na ivolaniveisiga vakalivaliva (me vaka na Valenivola ni Kosipeli) me vukea nomu kila vinaka, matata, ka nanuma tiko na veika o vulica.

Dau tekivuna nomu vulica na kosipeli ena nomu masuta na veivuke ni Yalo Tabu. Ena kauta mai vei iko na kila-ka kei na veivakadeitaki ka na vakalougatataki iko ka vakatara mo vakalougatataki ira talega na tani. Dolava nomu vakasama kei na yalomu ki na uqe kei na vakanananu o ciqoma mai Vua. Vola na vakanananu eso oqo.

Vakaraica lesu na nomu ivolaniveisiga me rawa ni ko nanuma lesu na veivakauqeti vakayalo, raica eso na ivakavuvuli vou, ka vakadinadinataka na nomu sa tubucake tiko.

iVakavakayagataki ni Vunautaka Noqu Kosipeli

Vakayagataka na app ni Vunautaka Noqu Kosipeli me vukea nomu vakayagataka na ivakavuvuli o vulica tiko. E tu na app oqo ena nomu iyaya vakalivaliva dau veikauyaki. E tu kina na veika me vukea nomu rawata vakavinaka na nomu inaki vakadaukaulotu. Na veika oqo e oka kina na:

iTukutuku me baleta na nodra gagadre kei na nodra toso na tamata o vakavulica tiko.
E dua na vanua me volai kina na nomu toso ki na veitakete bibi.
Dua na ivolanivula me volai toka kina na nomu ituvatuva kei na itaviqaravi lokuci.
E dua na mape ni nomu vanua ni veiqaravi kei na itukutuku bibi tale eso me vukea nomu rawata nomu takete.

Vunautaka Noqu Kosipeli e okati kina e levu na vakasama ni kena vakayagataki na app me vukea na nomu kunea, vakavulica, ka papitaisotaka na tamata.

Nodra vakayagataka na Vunautaka Noqu Kosipeli na Lewe ni Lotu

Vunautaka Noqu Kosipeli e dua na ivurevure yaga sara, sega walega vei ira na daukaulotu ia vei ira kece sara na lewe ni Lotu. Me vaka, na kena vulici ena vukei ira na lewenilotu mera:

Vulica ka vakavuvulitaka na kosipeli i Jisu Karisito (vulica na wase e 1, 2, 3, kei na 10).
Sauma na taro me baleta na kosipeli (vulica na wase e 3 kei na 5).
Kila eso tale na ka me baleta na vakasaqarai kei na vakararavi ena Yalo Tabu (vulica na wase e 4).
Kila vakavinaka na mana ni iVola i Momani (vulica na wase e 5).
Vakasaqara na iTovonibula Vakarisito (vulica na wase e 6).
Rawata vakavinaka nodra itavi era sa yalayala kina ena nodra bulataka na ivakavuvuli ni loloma, veiwasei, kei na veisureti (vulica na wase e 9 kei na 13).
Tara cake na yalo ni duavata kei ira na daukaulotu tudei (vulica na wase e 13).

Na vulici ni Vunautaka Noqu Kosipeli—vakauasivi na wase e 3—ena veivuke vakalevu vei ira na itabagone kei ira na qase cake era vakarau tiko ki na veiqaravi vakadaukaulotu.