“Wase 7: Vulica na Nomu Vosa ni Kaulotu,” Vunautaka na Noqu Kosipeli: iDusidusi ki na Wasei ni Kosipeli i Jisu Karisito (2023)
“Wase 7” Vunautaka na Noqu Kosipeli
iVakatakilakila
kuila kei na vuravura
Wase 7
Vulica na Nomu Vosa ni Kaulotu
Vakasamataka Oqo
Meu na vaqaqacotaka vakacava na noqu vakabauta na Turaga me vukei au meu vulica na vosa ni dua na vanua vou?
Na cava e dodonu kina vei au meu dau vakatorocaketaka tikoga na noqu rawa ni vuli vosa?
Ena rawa vakacava meu vakatorocaketaka na noqu rawa ni vosa ka veivakatavulici ena noqu vosa ni kaulotu?
Ena rawa vakacava meu rawata na isolisoli ni vosataka na vosa tani eso?
Vakarautaki Iko Vakayalo
Na Turaga sa vakaraitaka, “Era na rogoca kina na taucoko ni kosipeli ko ira na tamata kecega ena nodra vosa, kei na nodra ivosavosa, mai vei ira era sa tabaki ki na kaukauwa oqo” (Vunau kei na Veiyalayalati 90:11).
Sa volai toka e ra na veisala o rawa ni vaqaqacotaka kina na nomu vakabauta na Turaga ena rawa ni vukei iko mo veivakavulici ka soli ivakadinadina ena nomu vosa ni kaulotu:
Vakabauta ni ko sa kacivi mai vua na Kalou mai vua edua na parofita.
Kerea na veivuke ni Kalou ni ko masu ena yalodina.
Cakacaka vagumatua ena vulici, vakatovotovotaki, kei na vakayagataki ni nomu vosa ni kaulotu e veisiga.
Mo kilikili kaya na veitokani ni Yalo Tabu ena nomu maroroya na ivakaro ka bulataka na ivakatagedegede ni kaulotu.
Vakasavasavataka na lomamu ena nomu lomana na Kalou kei na nomu lomani ira na Luvena ka vinakata mo vakalougatataki ira.
Mo Yalodina ka Gugumatua
Na vulici ni veivakavulici me vakayacoka ena nomu vosa ni kaulotu, e gadreva na sasaga vagumatua kei na isolisoli ni Yalo. Kua ni kurabui ke na rairai dredre na itavi. Ena taura na gauna. Mo dau vosoti iko vakai iko. Ni ko soli iko ki na vulici ni vosa, o na rawata na kila e gadrevi mo rawata kina na nomu inaki vakadaukaulotu.
O ni sega ni tu duadua ena vulici ni nomu vosa ni kaulotu. Erau na vukei iko o Tamada Vakalomalagi kei Jisu Karisito ni ko kerea na Nodrau veivuke. Kerea ka dolavi iko ki na nona veivuke o nomu itokani, ira na lewenilotu, ira o vakavulica tiko, ira na daukaulotu kei na tamata tale eso.
Vakarorogo matua ka vosataka na vosa ena veigauna ga e rawa. Kua ni rere mo vakayacora na cala. O ira kece era vulica edua na vosa vou era dau cakava na cala. Era na kila na tamata, ka ra na marautaka na nomu sasaga mo vulica na nodra vosa.
Vakatorocaketaka tikoga na nomu kila-ka vakavosa me yacova ni cava na nomu kaulotu. Ni tubu na nomu rawa ni vosataka na vosa, era na rogoca vakalevu cake na tamata na ka o tukuna mai na sala o tukuna kina. Ena lailai cake na nomu lomaleqataka na ivalavala ni nomu veitaratara, ka na rawa vakavinaka cake vei iko mo sotava na nodra gagadre na tani.
iVakatakilakila
Elder Jeffrey R. Holland
“Eda … nuitaka ni o ira kece na daukaulotu era vulica tiko edua na vosa vou … mera na kila vakavinaka ena veisala kecega e rawa. … Ni o kitaka vakakina, na nomu kila ni [veivakavulici] kei na soli ivakadinadina ena vakatorocaketaki. O na ciqomi vakalevu cake ka qoroi vakayalo vakalevu cake mai vei ira [na tamata o vakavulica tiko]. …
“Mo kua ni lomavinaka ga ena ka eda vakatoka me ivosavosa ga ni kaulotu. Cakacaka vakaukauwa mo kila na vosa, ena qai rawarawa na nomu tara na lomadra na tamata” (Jeffrey R. Holland, missionary satellite broadcast, Oko. 1998).
Tomana tiko na nomu vakayagataka na nomu vosa ni kaulotu ni ko sa lesu i vale. Na Turaga sa nuitaki iko sara vakalevu, ka na rawa ni tu na yaga ni nomu kila-ka vakavosa ena gauna ni nomu bula mai muri.
Vuli Vosa Vakavalagi
Kevaka o sega ni dau vosa vaka Valagi, e dodonu mo na vulica me vaka ni ko daukaulotu. Oqo ena vakalougatataki iko ena gauna ni nomu kaulotu kei na nomu bula taucoko. Na vulici ni vosa Vakavalagi ena vakalougatataka tale ga na nomu matavuvale.
Tuva na takete mo vakatorocaketaka na nomu kila na vosa, ka dau moica vagauna. Tauyavutaka edua na ituvatuva ni vuli vosa. Vakayagataka na vosa ena veigauna kece e rawa.
Me Vakaibalebale na Nomu Vuli
Vakayagataka na ka o vulica ki na veika e yaco dina tiko ena bula oqo kei na nomu itavi e veisiga. Vakanamata ki na vosa ena vukei iko mo tukuna na ka e gadrevi vei iko mo tukuna.
Vakasaqara mo Veitalanoa
Drau vosataka na vosa kei nomu itokani ena kena levu ga e rawa. Vakayagataka na veimadigi kecega mo vuli ka vakatovotovotaka. Me ivakaraitaki, o na rawa ni taroga edua na lewenilotu lesu mai na kaulotu se dua o vakavulica tiko me vukei iko ena vosa. E sega ni rawa ni vakaisosomitaki na veitalanoa vata kei ira na itaukei dina ni vosa.
Kakua ni Dau Veivakatautauvatataki
Kakua ni vakatautauvatataka na nomu kila vakavosa kei nomu itokani se dua tale na kaulotu. Na veivakatautauvatataki edau veimuataki ki na qaciqacia se veivakayalolailaitaki.
Vulica Vakavinaka Sara Na Veivakasama Vovou
Dau taleva lesu vakawasoma na veika o sa vulica oti, ka vakatovotovotaki ira ena veituvaki vovou. Oqo ena vukei iko mo nanuma lesu ka vakayagataka na veika o sa vulica tiko.
iVakatakilakila
raica tiko na ivola na tagane
Tauyavutaka edua na iTuvatuva ni Vuli Vosa
Na ituvatuva ni vuli vosa e vukei rau ruarua na daukaulotu vou kei koya ka sa matau, me rau vakanamata ki na ka erau rawa ni cakava ena veisiga yadua me vakatorocaketaki na nodrau rawa ni vosataka na nodrau vosa ni kaulotu. Na nomu ituvatuva me na okati kina na cava o na cakava ena gauna ni nomu vuli vosa, kei na loma ni siga taucoko.
Na veikalawa e ra, e vakaraitaka na sala o rawa ni tauyavutaka kina edua na ituvatuva ni vuli vosa ni vakayagataki na iwalewale ni tuva-takate mai na wase e 8. Moica na iwalewale oqo kevaka e gadrevi.
Tuva-takate ka caka ituvatuva ena masumasu. Tuva na takete vakamacawa kei na takete ni veisiga mo vakatorocaketaka kina na nomu rawa ni veitalanoataka ka vakavulica na kosipeli. Okata kina na veika o vinakata mo dau cavuqaqataka, me vaka na vosa, malanivosa, ivolanikalou, kei na veitikina eso.
Vola ka tuvalaka. Vakatulewataka se iyaragi cava ni vuli-vosa ena vukei iko mo rawata na nomu takete. Na iyaragi ni vuli-vosa e rawa ni okati kina na ivolanikalou, ivolavosa, ivola eso ni lawa ni vosa, na app na TALL Embark, kei na so tale. Tuvalaka na gauna ena gadrevi mo vulica ka vosataka kina na vosa. Me ivakaraitaki, ena rawa mo tuva mo wiliwili e cake mai na iVola i Momani me 15 na miniti ena gauna ni vakasigalevu e veisiga.
Cakacakataka na nomu ituvatuva. Na Turaga e taleitaka na gugumatua, o koya mo qai cakacaka vagumatua mo rawata kina na nomu takete. Taqomaka na gauna ni nomu vuli vosa ka tosoya ki na dua tale na gauna ki muri ke tubu na veisaqasaqa.
Taleva lesu ka talemuria. Dau taleva lesu vakawasoma na nomu ituvatuva mo dikeva kina se toso vinaka tiko se sega. Sureta na nomu itokani, iliuliu ni kaulotu, lewenilotu, kei ira tale eso ena nomu iwasewase mera soli vakatutu ena sala mo vakatorocaketaki kina. Vakaitavi vakawasoma ena veitarogi ni vosa ka sa tuvai tu, me laurai kina na nomu toso ka raici eso na sala mo vakatorocaketaki kina.
Wasea vakatautauvata na nomu vuli vosa, ena kedrau maliwa na takete balavu me tauyavutaki edua na yavu ni vuli vosa, kei na takete leleka me baleta eso na itaviqaravi digitaki kei ira na tamata o vakavulica tiko.
Ena gauna vakarautaki ni nomu vuli vosa, wasei ira vakatautauvata na nomu takete kei na ituvatuva me kovuta na vei iwase bibi ni vosa ka vakaraitaki toka e ra. Digitaka na ka mona vulica ena loma ni siga taucoko.
kila ka ni vakarorogo
kila ka ni wilivola
lawa ni vosa
kila ka ni vosa
kila ka ni volavola
uma vosa
Vuli Yadua se Vuli Vata Vakaitokani
Taura edua na gauna e veimacawa mo railesuva na nomu vuli vosa ena nomu taroga na veitaro e ra:
Au a vulica beka na noqu vosa ni vanua ni kaulotu e veisiga ena macawa oqo? Na cava au rawa ni cakava e veigauna meu vakatorocaketaka kina na noqu vosa ni vanua ni kaulotu?
E vukei au tiko beka na noqu ituvatuva meu kunea, veivakavulici ka cakacaka vata vakavinaka cake kei ira na lewenilotu? Na veisau cava soti au gadreva meu cakava ki na noqu ituvatuva?
Na cava au marautaka vakalevu me baleta na noqu vuli vosa? Na cava au rawa ni cakava meu marautaka vakalevu cake kina?
Na cava na ilevu ni gauna e dodonu meu vakayagataka ena vakarorogo, wilivola, volavola, kei na vosataka? Ena rawa vakacava meu na vulica vakavinaka cake na iuma vosa, lawa ni vosa, kei na kena icavucavuti?
Na itaviqaravi kei na ivurevure cava soti au vakayagataka tiko meu vulica kina na vosa? O cei vei ira e vukei au vakalevu duadua? Na veiivurevure kei na itaviqaravi cava soti ena rawa ni veivuke?
Na cava e gadrevi me golevi vakalevu cake?
Ni sa saumi oti na veitaro oqo, veisautaka na ituvatuva ni nomu vuli ka raica kevaka era toroya cake na kena macala. Na Yalo ena dusimaki iko ni ko tomana tiko mo vakasaqara mo vakatorocaketaka na nomu vulica na vosa.
Vuli vata kei Ira na Nomu iTokani
Vukei ira na nomu itokani mera rawa-ka ka lomadei ena vulici ni vosa ni kaulotu se ena vulici ni vosa vaka Valagi. Dau vakacaucautaki ira vagauna ena yalodina na nomu itokani kei ira na vo ni daukaulotu ena nodra toso.
Vakarautaka na ivakamacala ni toso e rawarawa ka rawa ni cakacakataki ena yalo loloma. Solia vei ira e levu na madigi me toroi cake kina na nodra veivakavulici kei na soli ivakadinadina. Raica ena italanoa dina ka tarava na nona vukea na nona itokani e dua na daukaulotu matua.
Au a se qai yaco ga yani ki na ikarua ni noqu iwasewase ka tukuna sara vei au na noqu itokani ni sa noqu tiko na vakasama vakayalo ena dua na iloku ni vakayakavi. E dau marautaka sara na imatai ni noqu itokani me dau veivakavulici, ka sa matau tu ga vei au meu dau solia e dua na iwase lailai ga ni lesoni ka mai vakarorogo tu yani.
Au a tovolea meu uqeti noqu itokani ni dodonu vua me solia na vakasama vakayalo, ia e a vakayaloqaqataki au meu ciqoma na ilesilesi. Au a vakatovotovo ka vukei au kina o koya.
Ni sa yaco mai na kena gauna, au a dolava na noqu ivolanikalou ka wiliwili mai na 3 Nifai 5 kei na 7. E a dredre ia e a rawa niu vakamacalataka na vuna au kila ni bibi kina na veitikina au a digitaka, kau yalovakacegu ni au vosa oti. Ni a tarogi mai e dua na taro, au a raici noqu itokani sara me sauma, ia e a sega sara ni dolava na gusuna. Oqori na gauna au a kurabuitaki au kina ni au sauma ena vosa vaka-Varanise ka matata vinaka dina. Au a kurabui cake sara vakalevu ni a sega ni vakila na lewenilotu o ya na noqu sega soti ni se lomadei ena noqu kila vakavinaka na veivosaki. Au a lomadei cake kau kila ni vinaka cake sara na noqu vosa vaka-Varanise mai na ka au a dau nanuma tu.
Sa mai oti yani na veimacawa, ka vakalaivi au tikoga na noqu itokani meu veivakavulici—ena gauna mada ga au nanuma kina niu na sega ni rawata, se me rairai nanuma beka o koya seu rawa ni cakava. Au a vakila niu sa yaco me dua na iyaya ni cakacaka nei Tamada Vakalomalagi ka sega ni dua walega na itokani galugalu.
Vuli Yadua se Vuli Vata Vakaitokani
Cakacaka vata kei ira na vo ni daukaulotu me vukei iko mo vulica na nomu vosa ni kaulotu.
Kevaka o cakacaka vata tiko kei na dua na daukaulotu vou, o na vukea vakavinaka cake vakacava na nomu itokani me vulica na vosa se vulica na vosa vaka Valagi?
Kevaka o dua na daukaulotu vou, na mataqali veivuke cava soti o na rawa ni kerea mai vua na nomu itokani?
iVakatakilakila
vakavulica tiko e dua na marama na daukaulotu
iTovo Vakavanua kei na Vulici ni Vosa
Na itovo ni vanua kei na kena vosa erau veiwekani voleka sara. Na kena kilai vakavinaka na itovo ni dua na matatamata ena vukea na kena vakamacalataki na sala e vakayagataki kina na vosa. Na kila oqo ena vukei iko tale ga mo tukuna na veika matalia ka tiko ena itukutuku ni Veivakalesui Mai, ena sala ena matata vinaka vei ira na tamata.
E dua na ka levu duadua o rawa ni cakava mera nuitaki iko ka lomani iko kina na tamata sai koya mo doka ka vakamareqeta na nodra itovo vakavanua ena sala e veiganiti. E levu na daukaulotu cecere era sa cakava oti na ka oqo (raica na 1 Koronica 9:20–23).
Vuli Yadua se Vuli Vata Vakaitokani
Vakayagataka na vakasama ka toka e ra me vukei iko ena nomu vakavakarau mo na vakavulica e dua ka duatani na nona itovo vakavanua se ivakarau ni bula.
Vakasamataka na itovo vakavanua kei na ivakarau ni nodra bula vakalotu na tamata o vakavulica. Mo kila edua na tiki ni nodra ivakarau ni bula ka vakavuna me dredre na nodra kila vakavinaka kina edua na ivakavuvuli ni kosipeli. Tuvanaka na veisala eso mo vakavulica kina vakamatata na ivakavuvuli oqo.
Na iSolisoli ni Vosataka na Vosa Tani
Na iSolisoli ni Yalo era sa dina. Na isolisoli ni vosataka na vosa tani kei na kena vakadewataki e levu tu na kena ivakaraitaki. Eso vei ira oqo e okati kina na vosataka, kila vakavinaka, kei na vakadewataka na veimataqali vosa. Nikua na isolisoli ni vosataka na vosa tani edau vakaraitaki vakavuqa ena veikavulici kei na vuli mai vua na Yalo, me vukei ira na daukaulotu mera vulica na vosa ni vanua ni nodra kaulotu.
Na Yalo Tabu e rawa ni vakatakila na dina ni nomu ivakadinadina veitalia ke vakalatilati na sega ni veikilai ivosavosa kei ira o vakavulica tiko. E vakatalega kina, na Yalo Tabu e rawa ni vakananumi iko ena vosa kei na veimalanivosa ka vukei iko mo kila vakavinaka na cava era tukuna tiko na tamata mai vuniyalodra.
Ka dau vakavuqa, o na sega ni rawata na veisolisoli oqo ke sega na sasaga. O na gadreva mo vakasaqarai ira vagumatua mo vakalougatataki ira kina na tani (raica na Vunau kei na Veiyalayalati 46:8–9, 26). E tiki ni nomu vakasaqara na isolisoli ni vosataka na vosa tani sai koya mo cakacaka ka cakava na ka kece o rawata mo vulica kina na vosa. Mo vosota tiko ni ko vulica ena masumasu ka vakatotovotaka tiko na vosa. Vakabauta ni na vukei iko na Yalo ni ko sasaga vakaukauwa. Mo vakabauta ni rawa ni ko rawata na isolisoli ni vosataka na vosa tani mo vukei kina kei ira o vakavulica.
Ni ko vakila ni via dredre na nomu via vakamacala vakamatata sara me vaka o gadreva, nanuma ni na Yalo sa rawa ni vosa ki yalodra kecega na luve ni Kalou. A vakavulica o Peresitedi Thomas S. Monson:
“E tiko e dua na vosa … ka ra kila vinaka tu na daukaulotu yadua—o ya na vosa ni Yalo. E sega ni vulici mai na veivola era vola na vuku, se me rawati mai na wili ivola kei na kena cavuqaqataki. Na vosa ni Yalo e lako vei koya e vakasaqaqara e vuni yalona taucoko me kila na Kalou ka muria na Nona ivakaro kece vakalou. Na kilai vakavinaka ni vosa oqo ena rawata kina edua me voroka na ilati, rawa na veika e veivakataotaki, ka tara sara na yalo ni tamata” (“The Spirit Giveth Life,” Ensign, June 1997, 2).
Vuli Yadua se Vuli Vata Vakaitokani
Vakayagataka na veiyatuvosa e ra mo vakadikeva kina na nomu sasaga ni vakasaqara na isolisoli ni vosataka na vosa tani. Vola na nomu nanuma kei na takete me vukei iko mo vakatorocaketaka na nomu vuli vosa.
Au vakabauta ni au kacivi mai vua na Kalou, mai vua na Nona parofita, meu vunautaka na kosipeli ena dua na vosa vou. (Vunau kei na Veiyalayalati 90:11)
Au segata meu bula kilikili kaya na Yalo Tabu ena noqu maroroya na ivakaro, bulataka na ivakatagedegede ni kaulotu, ka veivutuni e veisiga. (Vunau kei na Veiyalayalati 46:9, 33)
Au vulica, vakatovotovotaka, ka vosataka na vosa ni kaulotu ena veigauna e rawa kina e veisiga. (1 Korinica 12:31)
Vakatutu ni Vuli kei na kena Bulataki
Vuli Yadudua
Talevalesu na ivurevure ni vuli vosa ena Missionary Portal (Mataveilawa ni Daukaulotu). Vakaraica edua na ka o se bera ni tovolea, ka tuva edua na takete mona cakava ena vica na siga ka tarava.
Ena nomu bose ni tikina ka tarava, taroga e dua na daukaulotu matua ka vinaka tu na nona kila-ka vakavosa, ena cava a cakava me vulica kina na vosa.
Vuli vata Vakaitokani kei na Veisau ni iTokani
Vakatovotovotaka mo drau veivakavulici vakai kemudrau ena lesoni ni kaulotu ena nomudrau vosa ni kaulotu. Taumada, e rawa vei ira na daukaulotu vou mera veivakavulici vakarawarawa, wasea na ivakadinadina rawarawa, ka cavuqaqataka na ivolanikalou. Ni toro cake na nodra lomadei kei na rawa ka, sa na rawa vei ira mera vakaitavi vakataucoko sara ena veivakavulici.
Taleva lesu na veivakasama eso ena iwase oqo kei na ivurevure ni vuli vosa ena Missionary Portal. Veitalanoataka se vakatutu cava drau rawa ni vakayagataka ena vuli vata vakaitokani ena loma ni macawa ka tarava.
Kerei nomu itokani me vakarogoca na nomu cavuta na vosa ka vukei iko mo vakavinakataka. Kerei koya me dau vola na veituvaki eso o sega ni dau matata vinaka kina. Cakava e dua na lisi ni vosa, malanivosa, se lawa ni vosa ena veivuke. Vakamacalataka ka vakatovotovotaka na ivakavakayagataki ni veika e tiko ena lisi ena veitaviqaravi ka vakarau vakayacori.
Vakatovotovotaka na vakarorogo matua. Tuvana edua na gauna ena loma ni siga mo vakarorogo matua ka tomika na uma vosa kei na vei ivakarau eso o sa vulica oti. Ni ko rogoca edua na malanivosa ni cavuti ka duidui mai na sala o na cavuta kina, vola ka vakatovotovotaka.
Vola edua na lisi ni veika era rawa ni cavuta na tamata ena siga oya. Tuvana ka vakatovotovotaka na sala o rawa ni sausaumi kina.
Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu
Sureti ira na itaukei ni vosa mera tiko ena dua vei ira na soqoni oqo. Lesi ira na daukaulotu mera vakavulici ira vakailawalawa lalai. Kerei ira na itaukei ni vosa mera volavola ka soli itukutuku ena nodra kila-ka vakavosa na daukaulotu.
Lesia taumada edua se rua na daukaulotu me rau tukuna na nodrau rawa-ka ena vulici ni vosa.
Lesia edua na daukaulotu matua me vakaraitaka vakalekaleka eso na tiki ni vosa ka dau dredre vei ira na daukaulotu. Me qai vakaraitaka o koya eso na ivakavakayagataki vinaka ni vosa, mera qai vakatovotovotaka na daukaulotu.
Me qai soli vei ira na daukaulotu era itaukei ni vanua mera wasea na nodra raititobu.
Liuliu ni Tabana ni Kaulotu kei na iVukevuke ni Liuliu ni Tabana ni Kaulotu
Vakabibitaka na bibi ni kena vulici tiko na vosa e veisiga vakayadua.
Vakauqeti ira na daukaulotu mera vosataka na vosa ni kaulotu ena veigauna kece e rawa.
Vakarautaka na lewe ni ituvatuva ni vuli-vosa ni kaulotu ena dua na ituvatuva ni vuli vakaivakarau. Taleva lesu oqo ena veibose ni matabose ni tikina.
Vaqara na madigi eso mo veivosaki kina kei ira na daukaulotu ena vosa era vulica tiko. Dau vakatarogi ira vagauna ena vosa oqo.
Kerei ira na iliuliu kei ira na lewenilotu ena vanua oya, ena veivakasama eso mera vakatorocaketaka kina na daukaulotu na nodra rawa-ka vaka vosa.
Solia na veidusimaki ena koniferedi ni iwasewase se ena bose ni veiliutaki ni tabana ni kaulotu, ena cala ka dau vakayacori vakawasoma mai vei ira na daukaulotu, era vulica tiko na nomu vosa ni kaulotu.
Vakavulica vei ira na daukaulotu na veika me baleta na isolisoli vakayalo.
Vakadikevi ira na daukaulotu ni ra veivakavulici ena vosa ni kaulotu.