Wase 13: Duavata kei Ira na iLiuliu kei na Lewenilotu me Tauyavutaki na Lotu
“Wase 13: Duavata kei Ira na iLiuliu kei na Lewenilotu me Tauyavutaki na Lotu,” Vunautaka na Noqu Kosipeli: E Dua na iDusidusi ki na Wasei ni Kosipeli i Jisu Karisito (2023)
“Wase 13,” Vunautaka na Noqu Kosipeli
iVakatakilakila
Mo Rogoci Koya, mai vei Simon Dewey
Wase 13
Duavata kei Ira na iLiuliu kei na Lewenilotu me Tauyavutaki na Lotu
Vakasamataka Oqo
Me’u na cakacaka vata vakacava kei ira na iliuliu ni tabanalevu kei na lewenilotu me tauyavutaki kina na Lotu?
Na cava na nodra itavi na iliuliu ni iteki kei na tabanalevu ena cakacaka ni kaulotu?
Na cava e dodonu me yaco ena bose ni veivakacokotaki vakamacawa vata kei ira na iliuliu ni tabanalevu?
Me’u na tokoni ira vakacava na iliuliu ena nodra wasea na kosipeli ka vaqaqacotaki ira na lewenilotu vou kei ira na sa lesu tale mai?
Era cakacaka vata na daukaulotu kei ira na iliuliu vakaitaukei kei na lewenilotu me ra kunei ira na tamata me vakavulici ka liutaki ira kivua na iVakabula. O ni sa duavata ena nomuni lomana na Kalou kei ira na Luvena. Ena vakalevulevuya na nomu sasaga ki na ivakatagedegede o cakacaka vata kina kei ira na iliuliu kei na lewenilotu. Cakava na cakacaka vata kei ira me dua na tiki bibi ni nomu takete kei na lalawa.
Ni ko sa mai kilai ka lomani ira na iliuliu kei na lewenilotu vakaitaukei, o na raica na sala eso mo tokoni ira kina ena nodra veikacivi kei na sasaga ni kaulotu. Solia na nomu isolisoli kei na taledi ena sala ka na laveti ka vaqaqacotaki ira.
Na iwase oqo e vakamacalataka na sala mo cakacaka vata kina kei ira na lewenilotu ena wasei ni kosipeli ka vaqaqacotaki ira na lewenilotu vou kei ira sa lesu tale mai. Me baleta na ikuri ni ivakamacala, raica na wase 23 ena iVoladusidusi Raraba.
Vuli Yadua se Vuli Vata Vakaitokani
Railesuva na italanoa ni nona saumaki na Tui o Lamonai, na watina, kei ira na nona tamata ena Alama 18–19.
Na cava na itavi nei Apisi ena saumaki oqo? Na cava a rawa ni cakava o koya ka sega ni cakava rawa o Amoni?
Na cava o vulica mai na nona ivakaraitaki me baleta na nodra cakacaka vata na lewenilotu kei na daukaulotu?
Vakasamataka mada na ivakaraitaki tale eso oqo ni lewenilotu era veivuke tiko ena cakacaka ni kaulotu:
E rawa vakacava ni o vakayaloqaqataki ira na iliuliu kei na lewenilotu me ra muria na nodra ivakaraitaki?
Taracake na Veimaliwai kei Ira na iLiuliu Vakaitaukei kei na Lewenilotu
O ira na iliuliu ni Lotu kei na lewenilotu era sa nomu itokani ena cakacaka ni Kalou. Taracake na veimaliwai ena vukei iko mo cakacaka vata mo kauta mai na kosipeli vakalesuimai vei ira na luvei Tamada Vakalomalagi. Na veimaliwai oqo ena rawa ni vakalougatataki iko ena vo ni nomu bula taucoko.
Taracake na veivakabauti kei na veitokani dina kei ira na iliuliu kei na lewenilotu. Sikovi ira ka vulica na veika me baleta na nodra matavuvale, ituvaki, veika taleitaki, kei na veika sotavi ena Lotu. Mo kauwaitaka dina na nodra bula.
Ni o veisiko, cakava ena dua na inaki. Vakaraitaka ni o sa vakaitavi vagumatua tiko ena cakacaka ni kunekunei kei na veivakavulici. Rokova na nodra gauna kei na nodra ituvatuva.
Ni o sota se vakavulica na kosipeli ena nodra itikotiko, vakasaqara mo vukei ira me ra vaqaqacotaka na nodra vakabauta. Vakasaqara ena masumasu me tiko vata kei iko na Yalotabu. Wasea na veika o sa sotava ena cakacaka ni kaulotu ena nomu iwasewase.
iVakatakilakila
bose vakailawalawa
Tokoni Ira na iLiuliu Vakaitaukei ena Nodra iTavi
Eso na veikacivi ni veiliutaki e tiko na nodra itavi me baleta na cakacaka ni kaulotu. Na kilai vakavinaka ni itavi oqo ena vukei iko mo tokoni ira na iliuliu oqo. Na ivakamacala eso oqo e tauri mai na wase 23 ena iVoladusidusi Raraba.
Peresitedi ni iteki: Taura tu na idola ni matabete ena iteki me baleta na wasei ni kosipeli kei na vaqaqacotaki ni lewenilotu vou kei ira sa lesu tale mai. O koya kei rau na nona daunivakasala eratou na veidusimaki raraba yani ena sasaga oqo.
Matabisopi: Cakacaka vata kei na mataveiliutaki ni kuoramu ni italatala qase kei na iSoqosoqo ni Veivukei ni ra liutaka na sasaga ni tabanalevu me wasei na kosipeli ka vaqaqacotaki ira na lewenilotu vou kei ira era sa lesu tale mai.
Mataveiliutaki ni kuoramu ni italatala qase kei na iSoqosoqo ni Veivukei: Liutaka na sasaga ni tabanalevu ena veisiga me wasei na kosipeli ka vaqaqacotaki ira na lewenilotu vou kei ira era sa lesu tale mai. Era cakacaka vata me liutaki na sasaga oqo vata kei na matabose ni tabanalevu, ena veivakacokotaki nei bisopi. Raica na iVoladusidusi Raraba, 8.2.3 kei na 9.2.3.
iLiuliu ni kaulotu ena tabanalevu (kevaka e kacivi): Cokonaka na nodra cakacaka na lewe ni tabanalevu kei na iliuliu, daukaulotu ni tabanalevu, kei ira na daukaulotu tudei. Kevaka e sega ni kacivi e dua na iliuliu ni kaulotu ena tabanalevu, ena vakatawana na ilesilesi oqo e dua na lewe ni mataveiliutaki ni kuoramu ni italatala qase. Raica na iVoladusidusi Raraba, 23.5.3.
Tarogi iko vakawasoma, “Au sa veivakalougatataki tiko beka vei ira na iliuliu vakaitaukei?” Taracake e dua na ivakarau ni “Au na veivuke beka vakacava?”
Vuli Vata Vakaitokani
Tuvanaka na gauna mo sikova vakalekaleka kina e dua na iliuliu ena tabanalevu. Taroga na sala mo tokoni koya vakavinaka cake kina. Tuvanaka mo vakavinakataka cake.
iVakatakilakila
bose ni matabose
Bose ni Veivakacokotaki Vakamacawa
Na cakacaka vata kei ira na iliuliu vakaitaukei—oka kina na iliuliu ni itabagone—e sa bibi sara ki na duavata ena nomu sasaga ni kaulotu. Kevaka sa kacivi e dua na iliuliu ni kaulotu ena tabanalevu, ena liutaka o koya na bose ni veivakacokotaki vakamacawa. Kevaka e sega, na lewe ni mataveiliutaki ni kuoramu ni italatala qase e vakatawana na ilesilesi oqo e veiliutaki.
Ena bose lekaleka oqo, o ira na iliuliu vakaitaukei kei iko me vakacokotaka na sasaga ni kena wasei na kosipeli ka vaqaqacotaki ira na lewenilotu vou kei ira era sa lesu tale mai (raica na iVoladusidusi Raraba, 23.5.7). Na veisoqoni oqo e rawa me vakayacori vakatamata se vakatikitiki. Na veivakacokotaki e rawa talega ni yaco ena veisala tale eso, oka kina na qiri ena talevoni, teks, kei na imeli.
iVakatakilakila
Elder Quentin L. Cook
“E dua na sasaga vata kei na vakanamata ka na rawa ni veivuke sara me rawati kina na cakacaka ni vakasoqoni Isireli ni ra cokotivata na tuvanaki kei na vakotori ni takete ni kaulotu vata kei na kena ena tabanalevu se tabana” (Quentin L. Cook, “Purpose and Planning,” semina ni veiliutaki ni kaulotu, Jiune 25, 2019).
Vakavakarau ki na Bose ni Veivakacokotaki Vakamacawa
Tokoni ira na iliuliu ni tabanalevu ena vakavakarau mai mo vakaitavi ena bose ni veivakacokotaki vakamacawa. Ni bera na bose, taura na gauna ena nomudrau vuli vakaitokani mo veivosakitaka kina na sala mo vakaitavi vakavinaka kina.
Vakavoutaka na nomu ivolatukutuku ena app ni Vunautaka na Noqu Kosipeli me tiko kina vei ira na iliuliu na itukutuku oqo me baleti ira o cakacaka vata tiko. Vakavakarau mo ripotetaka na ilesilesi eso mai na bose sa oti.
Vakaitavi ena Bose ni Veivakacokotaki Vakamacawa
Na bose ni veivakacokotaki vakamacawa e nakiti me vakanamata ki na nodra gagadre na tamata yadua. Ena gauna ni bose, solia na sala mo tokoni ira kina na lewe ni tabanalevu, oka kina na itabagone, me veivuke ena kena sotavi na nodra gagadre na tamata yadua.
Na bose ni veivakacokotaki vakamacawa e dau kovuta na va na ulutaga oqo:
Eda na vukei ira vakacava era vakavulici tiko? Na veika e rawa ni veivosakitaki:
O cei na lewenilotu e rawa ni vakaitavi ena lesoni ena macawa mai oqo? O cei ena sureti ira me ra vakaitavi?
Na cava eso na bolebole vei ira era vakavulici tiko? Me ra na veivuke beka vakacava na lewenilotu?
Na cava na nodra gagadre o ira sa tiko na nodra tikinisiga ni papitaiso? Sa tuvanaki beka na papitaiso? (Raica na “Na Lotu ni Papitaiso” ena wase 12.)
Eda na vukei ira vakacava era se qai papitaiso wale tikoga oqo? Na veika e rawa ni veivosakitaki:
O cei so na lewenilotu vou ena imatai ni yabaki ni nodra lewenilotu era dau tiko ena soqoni ni sakaramede? Eda na vukei ira vakacava o ira era sega ni dau tiko rawa?
O cei so na lewenilotu vou e tiko na nodra itokani ena tabanalevu? Me ra na veivuke beka vakacava na turaga kei na marama dauveiqaravi? Me ra na veivuke beka vakacava na kuoramu kei na kalasi ni itabagone?
O cei so na lewenilotu vou e tiko na nodra ilesilesi se veikacivi?
Me da na vukei ira vakacava na lewenilotu vou me ra tekivu vakadikeva na nodra qase e liu era sa mate me rawa ni vakayacori kina na cakacaka vakalotu ni valetabu ena vukudra? E sa tiko beka na nodra ivolatara ni valetabu na lewenilotu vou? Kevaka e tu voleka e dua na valetabu, eda na vukei ira vakacava me ra lako ki na valetabu me ra papitaisotaki me baleti ira na tubudra?
Na lesoni cava so mai na wase 3 e se gadrevi me vakavulici tale? Me ra na vakaitavi beka vakacava na lewenilotu?
Railesuva na nodra toso ena Noqu Salatu ni Veiyalayalati na lewenilotu vou yadua.
Me da na vukei ira vakacava na lewenilotu era sa lesu mai? Na veika e rawa ni veivosakitaki:
O cei so na vuvale lewenilotu-vakatikina e rawa ni rau sikova ka vakavulica na daukaulotu?
O cei so na lewenilotu sa lesu tale mai e rawa ni rau sikova ka vakavulica na daukaulotu?
O cei so na lewenilotu sa lesu tale mai e tiko na nodra itokani ena tabanalevu kei na madigi me veiqaravi?
Eda na vukei ira beka vakacava na lewenilotu oqo?
Eda na kunei ira vakacava e levu cake na tamata me ra vakavulici? Na veika e rawa ni veivosakitaki:
Eda vukei ira vakacava na tamata yadua, oka kina na itabagone, kei na matavuvale me ra vakayagataka na ivakavuvuli ni loloma, wasea, kei na sureta? (Raica na “Duavata kei Ira na Lewenilotu” ena wase 9.)
Eda na vukei ira vakacava na lewenilotu, oka kina na iliuliu ni Lalai, me sureti ira na itokani ki na itaviqaravi ni tabanalevu?
Vuli Vata Vakaitokani
Sarava na vidio ni dua na bose ni veivakacokotaki vakamacawa ena iVoladusidusi Raraba, 23.5.7. Na cava o sa vulica o na rawa ni vakayagataka ena bose ni veivakacokotaki vakamacawa ka tarava? O na rawa vakacava ni vakavakarau vakavinaka cake mo veivosakitaka na gagadre eso ka tuvanaka vata kei ira na iliuliu ni tabanalevu? Ena nomu soqoni ni tuvatuva e tarava, tuvanaka na takete me baleta na sala o na vakavinakataka cake kina.
Tokona na iTuvatuva ni Tabanalevu ni Wasei ni Kosipeli
E tauyavutaka na matabose ni tabanalevu e dua na ituvatuva rawarawa ni kena wasei na kosipeli (raica na iVoladusidusi Raraba, 23.5.6). Vakamatautaki iko ki na ituvatuva oqo. Ena vei bose ni veivakacokotaki vakamacawa, vakaraica na sala eso me vukei ira na iliuliu me ra cakacakataka na nodra takete. Tukuna tiko vei ira na iliuliu na veika o sa cakava tiko mo tokoni ira na lewenilotu ena wasei ni kosipeli.
Kevaka o sureti mo tiko ena bose ni matabose ni tabanalevu, vakarautaki iko mo solia e dua na itukutuku lekaleka ni nodra toso o ira o vakavulica tiko kei na ilesilesi cava ga o a ciqoma (raica na iVoladusidusi Raraba, 29.2.5). Raica na madigi oqo vaka dua na gauna me taraicake kina na nodra yalodei kei na veivakabauti na iliuliu ni tabanalevu.
iVakatakilakila
era lululu tiko na tamata
Moica ki na Gagadre ni iWasewase Vakaitaukei.
Na tabanalevu se tabana yadua e tiko na kena gagadre duatani mo na vakamatautaki iko kina. O na veiqaravi beka ena dua na tabana lailai se dua na tabanalevu ni itabagone qase cake, se vuqa na tabanalevu. Eso na iliuliu era na kilaka vakalevu cake ka so era lailai sobu. Eso na iliuliu e levu cake na nodra gauna mai vei ira eso tale.
Vakaraica na sala eso mo vukei ira kina na iliuliu vakaitaukei. Era na kerei iko beka mo vukei ira na lewenilotu ena nodra ilesilesi ni veiqaravi. Era na kerei iko beka mo vakayaloqaqataki ira na lewenilotu vou me ra sureti ira na nodra itokani me ra lako mai lotu. E rawa ni o vakarautaka na vakasama yaga me baleta na cakacaka ni kaulotu ni ra vulica na iliuliu kei ira na lewenilotu na sala eso me ra wasea kina na kosipeli.
Na vanua e se vou kina na Lotu, era na kerei iko beka na iliuliu ni tabana mo vukei ira na lewenilotu vou me kila vakavinaka na sala sa tauyavutaka kina na Turaga na Nona Lotu.
Ena duidui beka na nomu cakacaka vata kei ira na iliuliu ena veivanua duidui eso, ia na itaviqaravi kece oqo era sa ka bibi sara me ra vakalougatataki kina na tamata yadua kei na tauyavutaki ni Lotu ni Turaga.
Vukei ira na Lewenilotu kei na iLiuliu me ra Loloma, Wasea, ka Sureta
Vakauqeti ira na lewenilotu mera wasea na kosipeli ena sala e matau ka rawarawa. Na iVoladusidusi Raraba e vakarautaka na ivakasala kei na vidio me vukei ira na lewenilotu kei na iliuliu me ra cakava oqo ena nodra bulataka na ivakavuvuli ni loloma, wasea, kei na sureta (raica na iVoladusidusi Raraba, 23.1.1, 23.1.2, kei na 23.1.3). Nanuma tiko na ivakavuvuli oqo ni o cakacaka vata kei ira na iliuliu.
O na dua na veivakalougatataki vei ira na iliuliu ni o tokona na nodra sasaga ena cakacaka oqo. Ena vakakina, ni nodra ivakaraitaki ena vukei ira na lewenilotu me ra vakaitavi vakalevu cake ena kena wasei na kosipeli ka vaqaqacotaki ira na lewenilotu vou kei ira era sa lesu tale mai.
Raica na “Duavata kei Ira na Lewenilotu” ena wase 9 me baleta na vakasama ni nodra tokoni na lewenilotu ena nodra sasaga me ra wasea na kosipeli.
Vulici ni iVolanikalou
Vulica na veitikina eso oqo. Era a loloma, wasea, ka sureta vakacava beka na iVakabula kei ira na tisaipeli oqo? Na ivalavala cava e vakauqeta na ivakaraitaki oqo ena nomu veivakavulici? O na vukei ira vakacava na lewenilotu me ra wasea na kosipeli ena sala e matau ka rawarawa?
Ena veigauna kece o vuli kina, vola na veika o vulica.
iVakatakilakila
veivosaki tiko na tagane
Tokoni Ira na iLiuliu Vakaitaukei ena Nodra Vaqaqacotaki na Lewenilotu Vou
Ni ra sa papitaiso ka vakadeitaki na tamata, era sa yaco me “sa koro vata ga kei ira era sa lotu, ka [ra] sa lewe ni vale ni Kalou” (Efeso 2:19; raica talega na 1 Korinica 12:12–27). Cakacaka vata kei ira na iliuliu vakaitaukei me vukei ira na lewenilotu vou me ra “vakani ena vosa vinaka ni Kalou, me ra tiko ga kina ena sala dodonu, … ka vakararavi tabakidua ki na loloma i Karisito” (Moronai 6:4).
iVakatakilakila
Elder Ulisses Soares
“Era curu mai ki na Lotu na [saumaki mai] ena nanamaki ena veika era sa kunea. Sa dodonu me da cakacakataka na nanamaki oqori ena gauna vata ga oya. … Era rawa ni veivuke na daukaulotu ena nodra vakatakilai ka semati ira na tamata era vakavulica kei ira na saumaki vou vei ira na lewenilotu yalodina era na dodoliga yani vei ira, vakarorogo vei ira, dusimaki ira, ka kidavaki ira e valenilotu ni bera mada ga ni ra papitaiso. … Ni da [veiqaravi] vei ira era curuma na wai ni papitaiso, eda na raica e vuqa tale na luve ni Kalou ni ra vosota me yacova na ivakataotioti ka ciqoma na bula tawamudu” (Ulisses S. Soares, “Convert Retention,” semina ni veiliutaki ni kaulotu, Jiune 25, 2018).
Vukei Ira na Lewenilotu Vou Mera Tiko ena Soqoni ni Sakaramede
Sa tiko e dua na nomu itavi bibi mo vukei ira na lewenilotu vou me ra lako ki lotu. Cakacaka vata kei ira na iliuliu mo raica ni o iko se o ira na lewe ni tabanalevu ena vukei ira me ra tiko kina. Na ivakatakilakila bibi e vakaraitaka tiko na nona tiko e dua na lewenilotu vou ena soqoni ni sakaramede ena rawa ni vukei iko kei ira na iliuliu ni tabanalevu me raica na gauna ena gadreva kina o koya eso tale na veivakauqeti.
Era na rawa vakalevu cake ni tomana tikoga na lewenilotu vou na tiko ena soqoni ni sakaramede ka vakaivotavota ena sakaramede ni ra sa tiko na nodra itokani ena tabanalevu. Vukei ira me ra vakila na nodra ciqomi, vakabibi ena imatai ni yabaki ni nodra bulataka tiko na kosipeli. (Raica na Vunau kei na Veiyalayalati 84:106,108.)
Vakavulica Tale na Lesoni ena Wase 3
Vukei ira na lewenilotu vou me ra tomana tikoga na nodra vaqaqacotaka na nodra vakabauta na iVakabula o Jisu Karisito kei na Nona kosipeli. Na dina kei na ivakavuvuli ni kosipeli ena kadre vakatitobu cake ni ra tomana tiko na lewenilotu vou na nodra vuli ena Yalotabu.
Ni oti na veivakadeitaki, vakavulica tale na lesoni ni kaulotu. Mo liutaka na veivakavulici. Ia, cakacaka vata kei ira na iliuliu ni tabanalevu me rawa ni ra vakaitavi kina na daukaulotu ni tabanalevu se so tale na lewenilotu. Na vakavulici tale ni lesoni ena wase 3 e sa dua na sala bibi me vukei ira na lewenilotu vou me ra “vakani ena vosa vinaka ni Kalou” (Moronai 6:4). Ni o veivakavulici, vakayaloqaqataki ira na lewenilotu vou me ra maroroya na yalayala kece sara ena lesoni.
Wilika na ivolanikalou vata kei ira na lewenilotu vou, vakabibi na iVola i Momani, ka vakavulica na ivakavuvuli ni kosipeli. Vukei ira me ra wasea na kosipeli vei ira na nodra itokani kei na matavuvale. Na lewenilotu vou yadua e tiko na nona gagadre vakatabakidua, ka rawa ni o vukei koya me vakila ni sa lomani ka ciqomi tu.
Ripote ni Toso ena Salatu ni Veiyalayalati kei na Noqu Salatu ni Veiyalayalati
Sa tu vei ira na iliuliu vakaitaukei na ivurevure me baleta na nodra sasaga ni kaulotu me vakataki iko ga. E dua vei ira oqo oya na ripote ni Toso ena Salatu ni Veiyalayalati, ka kunei ena app ni Member Tools se na Leader and Clerk Resources. Na ripote oqo ena rawa kina vei ira na iliuliu vakaitaukei me raica na veika bibi e gadrevi vua e dua na tamata me toso tikoga ena salatu ni veiyalayalati ni se bera se sa papitaiso oti.
Noqu Salatu ni Veiyalayalati e dua na ivurevure me vukei ira na lewenilotu vou me ra “tudei ena [nodra] vakabauti Jisu Karisito ka vakila na vakacegu ena Lotu” (Noqu Salatu ni Veiyalayalati, iv). E vakatakilai ira na lewenilotu vou ki na itaviqaravi kei na madigi eso, me vaka na tuvakawa kei na nodra vukei na tubuda era sa mate me ra ciqoma na cakacaka vakalotu tabu ena valetabu. Vakauqeti ira na lewenilotu vakaitaukei me ra dusimaki ira na lewenilotu vou ena veika oqo. Solia na veitokoni me vaka e kerei.
Vuli Yadua se Vuli Vata Vakaitokani
Vulica na Noqu Salatu ni Veiyalayalati. Na cava o sa vulica me baleta na nomu itavi ena nomu vukei ira na lewenilotu me ra vaqaqacotaki ira na saumaki mai? E rawa vakacava ni o tokona na sasaga ni matabose ni tabanalevu? Ena veigauna kece o vulica kina na wase oqo, vola na veika o vulica.
Tokoni Ira na iLiuliu Vakaitaukei ena Nodra Vaqaqacotaki na Lewenilotu Vou Era sa Lesu Mai
Eso na lewenilotu era digitaka me ra sa kakua ni vakaitavi ena Lotu. Me ra segata na iliuliu vakaitaukei kei ira na lewenilotu tale eso me ra tara cake na veimaliwai kaukauwa kei ira ka dolele yani vei ira. Na iVakabula e a kaya:
“Mo ni qaravi koya tikoga, ni dou sa sega ni kila de ra na saumaki mai ka veivutuni ka lako mai vei au ena lomadra taucoko, ka’u na vakabulai ira; ia ko ni sa vu ni nodra vakabulai.” (3 Nifai 18:32).
Era na kerei iko na iliuliu vakaitaukei mo vukei ira na lewenilotu era sa lesu tale mai mera taracake na nodra vakabauta. E vakavuqa ni ilesilesi oqo e dau baleti ira na vuvale lewenilotu-vakatikina. Vakasamataka ena masumasu na sala mo sureta kina na Yalotabu ki na nodra itikotiko na lewenilotu era sa lesu mai ni o vakavulica vei ira na ivakavuvuli ni kosipeli ka sureti ira me ra cakacakataka. Dau veikauwaitaki ka yalololoma me baleta na veika era lomaleqataka tu.
Kevaka e rawa, vakavulica na kosipeli vei ira ena vuvale era se bera ni papitaiso. Na nomu loloma kei na veitokoni ena rawa ni vukei ira me ra vakatitobutaka na nodra vakabauti Karisito ka vakalevutaka cake na nodra gagadre me ra cakava ka maroroya na veiyalayalati.
Veitaratara kei ira na iliuliu vakaitaukei ni o cakacaka vata kei ira na lewenilotu era sa lesu tale mai. Na sasaga eso oqo ena rawa ni vakilai vakadede tu vei ira na tamata yadua kei na ivavakoso vakaitaukei.
Vulici ni iVolanikalou
Na cava a vakavulica o Jisu Karisito me baleta na nodra vukei o ira era sotava tiko na dredre?
Rau a vakavulica o Alama kei Amuleki e vuqa era a lutu tani mai na Lotu. Na cava o rawa ni vulica mai na veika rau sotava me baleta na nodra vaqaqacotaki na lewenilotu era sa lesu tale mai?
Vakayagataka na app ni Vunautaka na Noqu Kosipeli mo tuvanaka kina mo vosa vei ira na lewenilotu era se qai lesu ga mai qo ka ra sa veisautaka tiko na nodra bula ka lako tiko ki lotu. Na cava e sa vukei ira vakalevu duadua? Vola ena nomu ivolaniveisiga ni vuli na nomu nanuma me baleta na veika era sa sotava. Na cava o sa vulica ka na vukei iko mo cakacaka vata kina kei ira o vakavulica tiko ena gauna oqo?
Wilika ka veivosakitaka na wase 23 ena iVoladusidusi Raraba. O na tokoni ira vakacava na iliuliu vakaitaukei ena nodra itavi?
Ena gauna ni bose ni veivakacokotaki vakamacawa, tarogi ira na iliuliu ni tabanalevu ke tiko eso na lewenilotu sa lesu tale mai ena nomu iwasewase era vinakata mo sikova ena macawa oqo. Ni o sikovi ira, segata mo taracake na nodra vakabauti Jisu Karisito.
Vakaraici ira kece mai o ira era a papitaiso ka vakadeitaki ena yabaki sa oti. Railesuva na itukutuku ni dua vei ira ka veivosakitaka na sala mo cakacaka vata kina kei ira na iliuliu ena bose ni veivakacokotaki veimacawa e tarava mo vukei koya kina na tamata oqo. Vola na nomu vakasama kei na vakatutu eso ena app ni Vunautaka na Noqu Kosipeli. Tokaruataka oqo me baleti ira kece na saumaki vou mai ena nomu iwasewase.
Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu
Sureta e dua na bisopi se dua tale na iliuliu ni tabanalevu me vosa me baleta na nodra vaqaqacotaki na lewenilotu vou kei ira era sa lesu tale mai. Kerei koya oqo me vakabibitaka na sala e rawa ni ra veivuke kina na daukaulotu.
Veivosakitaka na vosa vakatautauvata ni sipi ka yali, tiki ni siliva ka yali, kei na gone cidroi (raica na Luke 15). Sureti ira na daukaulotu me ra wasea na veika era sa vulica tiko kei na sala e rawa ni ra vakayagataka kina ena nodra cakacaka ni kaulotu.
Liuliu ni Kaulotu kei na Daunivakasala ni Kaulotu
Cakacaka vata kei ira na iliuliu vakaitaukei me vakayaloqaqataki ira me ra vukei ira na lewenilotu vou me ra:
Tabaki ki na dua na itutu ni matabete (me baleti ira na tagane ena yabaki veiganiti).
Lesi me dauveiqaravi turaga (kei na dauveiqaravi marama vei ira na yalewa).
Ciqoma e dua na ivolatara ni valetabu me ra papitaiso ena valetabu me baleti ira na tubuda era sa mate.
Vakarautaka e dua na yacai tubudra sa mate me ra kauta ki na valetabu.
Ciqoma e dua na ilesilesi se veikacivi me ra veiqaravi ena nodra tabanalevu se tabana.
Ni o cakacaka vata kei na peresitedi ni iteki, vakavulici ira na iliuliu vakaitaukei ena sala ni kena vakayacori vakavinaka na bose cokovata vakamacawa.
Dau talemuri ira vagauna na lewenilotu vou mo kila se ra sa vakacava tiko kei na sala e rawa ni ra veivuke kina na daukaulotu kei na lewenilotu.
Sureti ira na lewenilotu vou me ra vosa vei ira na daukaulotu ka wasea na veika era sa sotava ena Lotu.