“Wase 3: Vulica ka Vakatavulica na Kosipeli i Jisu Karisito,” Vunautaka Noqu Kosipeli: E Dua na iDusidusi ena Wasei ni Kosipeli i JIsu Karisito (2023)

“Vulica ka Vakatavulica na kosipeli i Jisu Karisito,” Vunautaka Noqu Kosipeli

iVakatakilakila

Na Papitaiso nei Karisito, mai vei Joseph Brickey

Wase 3

Vulica ka Vakatavulica na Kosipeli i Jisu Karisito

Na lesoni ena iwase oqo e lewena na ivunau, ivakavuvuli, kei na ivakaro veiganiti ni kosipeli i Jisu Karisito. Na veilesoni oqo era sa dusimaka vei iko na parofita kei na iapositolo bula mo vakavulica. Era sa soli tu eke me rawa nio vukei ira eso mera kila vakamatata na vunau i Karisito.

Na imatai ni wasewase ena iwase oqo na veisureti ni papitaiso. Na vo ni wase e lewena na va na lesoni ka tarava:

Vulica na ivolanikalou ka tugana na ivunau ena lesoni yadua. Ni vakakina, ena vakadinadinataka na veidina o vulica na Yalo. Ena vukei iko o Koya mo kila na ka mo tukuna ka cakava mo vukei ira kina eso tale me rawata e dua na ivakadinadina bula ni ka dina. (Raica na Vunau kei na Veiyalayalati 84:85)

Ena yaco mera kila vakataucoko na iVakabula o ira na tamata nira cakava na veika sa sureti ira kina o Koya mera cakava. Veisureti ena veilesoni yadua, ka vukei ira na tamata me ra maroroya na nodra yalayala. Nira maroroya na tamata na nodra yalayala, sa tekivu me ra bulataka na kosipeli i Jisu Karisito ka vakarau me ra veiyalayalati kei na Kalou.

Vakavulica na lesoni taucoko ni bera ka vakakina ni sa oti na papitaiso. O ira na daukaulotu tudei era na liu ena vakavulici ni lesoni ena gauna ruarua. O ira na daukaulotu ni tabanalevu kei ira na lewenilotu tale eso era na vakaitavi ena gauna e rawa kina. Raica na wase e 10 kei na13 baleta na itukutuku ni nodra okati na lewenilotu ena veivakavulici.

Vakavakarau mo Veivakavulici

Nio vakarau mo veivakavulici, railesuva na itukutuku ni tamata yadua ena parokaramu ni Vunautaka Noqu Kosipeli. Cakava e dua na ituvatuva ni lesoni me yavutaki ena veika e gadreva na tamata oqori. Vakasamataka na veika e dodonu me kila ka vakila o koya ena nomu veisiko ni veivakavulici. Ena vakalevulevuya na nomu igu na Yalo nio taura na gauna mo vakavakarau ka tuvatuva kina.

Oqo eso na taro vei iko kei nomu itokani me vakasamataki ena masumasu ni drau vakarau me veivakavulici.

Na veisureti cava edaru na cakava me vukea na tamata oqo me tara cake nona vakabauti Karisito ka tubu? Na veisureti sai koya na sala mo vukea kina na tamata me veivutuni ka vakila na “nona kaukauwa na Dauveivueti” (Ilamani 5:11). Vakasamataka na nona toso, nona ituvaki, kei na nona gagadre. Qai okata e dua se sivia na veisureti ena nomu ituvatuva ni lesoni.
Na ivunau kei na ivakavuvuli cava ena vukea na tamata oya me maroroya na yalayala edaru sa sureti koya kina me cakava? Vakatulewataka ena masumasu na ivunau kei na ivakavuvuli ena vukei ira na tamata me ra kila na vuna sa rui bibi kina vei ira vakakina vua na Turaga na nodra maroroya na nodra yalayala.
Edaru na vukea vakacava na tamata oqo me vulica na ivunau? Nio vakarau mo vulica na ivunau, tuva ka umana vata na veika o na vakavulica ni o vakayagataka na lesoni 1–4. Raica na taro, ivolanikalou, ivakaraitaki kei na tabana vakaitukutuku e veiganiti me vukea na tamata me kila na ka o vakavulica. Raica na wase e 10 me baleta na itukutuku ni ivakarau mo vakavinakataka cake kina nomu veivakavulici.
Na veivakalougatataki cava sa yalataka na Kalou ena kena ciqomi ka maroroi na yalayala? Nio vulica na ivunau, raica na veivakalougatataki sa yalataka na Kalou. Nio veivakavulici, yalataka na veivakalougatataki ka wasea kina na nomu ivakadinadina.
Na lewenilotu cava e rawa ni veivakavulici? Ena bose ni veisoli itukutuku vakamacawa, vakatulewataka kina na lewenilotu e rawa ni veivuke ena nomu vakavulica ka tokona na tamata oya. Ni se bera na lesoni, veivosakitaka na nodra vakaitavi. Raica na wase e 10.
Na cava edaru rawa ni cakava medaru vukei ira kina na tamata me ra maroroya na nodra yalayala? Taumuria ena nomu veisiko vakalekaleka mo vukei ira na tamata me ra maroroya na nodra yalayala. Vaqara na sala mo vakaitavitaki ira kina na lewenilotu ena nodra vukei o ira o vakavulica tiko me ra maroroya na nodra yalayala. Na veitaratara oqo e rawa ni oka kina me wiliki e dua na wase mai na iVola i Momani se so tale na ivolanikalou. Kevaka e dua e sega ni maroroya tiko e dua na yalayala sa cakava oti, ena vinaka cake beka mo vukei koya mada ena kena oya ni se bera ni qai soli tale e dua. Raica na wase e 11.
Ena rawa beka vakacava ni da vukei ira vakavinaka cake ena gauna ka tarava? Ni oti na veigauna kece ni veivakavulici, vakasamataka na veika era sotava na tamata o vakavulica tiko. Sa tubu tiko beka na nodra vakabauti Karisito? Era sa vakila tiko li na Yalo? Era sa veivutuni tiko beka ka cakava ka maroroya tiko na nodra yalayala? Era sa masu tiko beka, vulica na iVola i Momani, ka lako tiko i Lotu? Cakava e dua na ituvatuva mo vukei ira kina.

Veivakavulici mai Vu ni Yalomu ena Veituberi ni Yalo

Ni ratou vosa tiko vei ira na italatala kei na daukaulotu yalewa, eratou kaya kina na Mataveiliutaki Taumada kei na Kuoramu ni iApositolo Le Tinikarua:

“Sa noda inaki meda na vakavulica na itukutuku ni kosipeli vakalesuimai ena dua na kena iwalewale me rawa ki vua na Yalo me veidusimaki vei rau na daukaulotu kei ira era vakavulici tiko. Sa ka bibi me vulici na vakasama ni [lesoni], ia na kena oqo e sega ni dodonu me vakavulici ena vakasama tale eso. Sa soli tu na galala vei daukaulotu me vakayagataka na nona vosa ga vakai koya ni sa vakauqeti mai vua na Yalo. E sega ni dodonu me solia ena dua na cavuqaqa, ia me vosa ga mai yalona ena nona vosa ga. Sa rawa vua me vakatikitiki mai na ituvatuva ni lesoni, ka solia na ka sa vakauqeti kina, me vaka na ka era taleitaka ka gadreva na [tamata]. Ni vosa tiko mai vu ni yalona ena nona vosa ga, e dodonu vua me vakadinadinataka na dina ni nona ivakavuvuli.”

Na iNaki ni Cavuqaqa

Mo rawa ni cavuqaqataka na veitaravi ni ivakavuvuli ena veilesoni yadua. Kakua ni cavuqaqataka na veivosa yadua ena lesoni.

Kevaka o vulica tiko e dua tale na vosa ni vanua, raica me gole tiko nomu vakanamata ena vakavulici ni lesoni ni o vulica tiko na vosa. Mo cavuqaqataka na vosa, malanivosa, ituvatuva ni yatuvosa, kei na veiyatuvosa leleka ni ivunau ena lesoni. Nio kila vinaka na lesoni lesoni 1–3 ena veivuke sara vakalevu. Na veika o cavuqaqataka e dodonu me rawa ni yaco me vakaibalebale vei iko.

Vakasamataka mo rawa ni cavuqaqataka na ivolanikalou bibi vakaivunau mo vakayagataka ena nomu veivakavulici kei na nomu bula vakai iko. E rawa ni yaco mai na kaukauwa levu ena kena cavuqaqataki na ivolanikalou. Na ivolanikaoou eso oqo e rawa ni vaqaqacotaki iko laveti iko ka solia na vakacegu. E rawa ni uqeti iko mo veisau. Nio rawa ni cavuqaqataka na ivolanikalou, na Yalo e rawa ni vakananuma lesu vei iko ena gauna o gadreva kina.

iVakatakilakila

era vakavulica tiko na daukaulotu e dua na tagane

Veivakavulici ka Veisureti me vaka na Gagadre ni Tamata Yadua

O galala mo vakavulica na lesoni ena iwalewale cava ga me vukea nodra vakavakarau vakavinaka na tamata ki na papitaiso kei na veivakadeitaki. Na lesoni mo vakavulica, na gauna me vakavulici kina, kei na levu ni gauna me soli kina ena vakatulewataki vakavinaka duadua mai na veika e gadreva na tamata o vakavulica kei na veituberi ni Yalo. Me vaka, nio vakavulica na tamata e sega ni vakabauta Vakarisito, mo tekivu beka ena nomu vukea me semati koya vakalevu vei Tamada Vakalomalagi ka kila vinaka na Nona ituvatuva (raica na “Vakavulici ni Tamata Sega ni Vakabauta Vakarisito” ena wase e 10).

Me tuberi iko na Yalo ena veisureti cava me caka kei na gauna me caka kina. Na veisureti ena kena gauna donu e rawa ni uqeta na tamata me cakava na ka ena tara cake nona vakabauta. Na iwalewale oqo e rawa ni vakavuna na veisau levu ni yalo (raica na Mosaia 5:2; Alama 5:12–14).

Vakavulica na lesoni e rawarawa, matata, ka lekaleka. E vinaka, na veisiko ni veivakavulici me kakua ni balavu cake mai na 30 na miniti, e rawa ni o vakavulica e dua na tamata ena 5 ga na miniti.

E vakawasoma nio na dau gadreva e levu na sota mo vakavulica kina na ivakavuvuli ena dua na lesoni. E vakavuqa ni ra na dau kila vakavinaka cake na tamata na nomu itukutuku kevaka o vakavulica na lesoni leleka, veivakavulici vakawasoma, ka vakavulica vakalalai na veika me vulici.

Vulici ni iVolanikalou

Na cava o sa dusimaki mo na vakavulica?

Na cava na vuna e bibi kina mo vulica na ivunau ena lesoni?