Pōpoaki ʻa e Kau Palesitenisī ʻUluakí

Siʻi Kaungā Faifekau ʻOfeina:

ʻOku mau talamonū atu ʻi he faingamālie maʻongoʻonga ʻokú ke maʻu ke hoko ko e faifekau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻikai ha toe fatongia mafatukituki pe mahuʻinga ange ʻi he tānaki ʻo ʻIsilelí.

ʻOku fakataumuʻa ʻa e Malanga ʻAki ʻEku Ongoongoleleí ke tokoniʻi koe ke ke hoko ko ha faifekau ʻoku toe mateuteu lelei ange mo matuʻotuʻa fakalaumālie ange. ʻOku toe fakataumuʻa foki ia ke tokoni atu ke ke hoko ko ha faiako toe lelei ange. ʻOku mau tapou atu ke ke fakaʻaongaʻi fakaʻaho ia ʻi hoʻomou ako fakafoʻituituí mo fakahoá. ʻOku mau toe poupou atu foki ke ke fakaʻaongaʻi ia ʻi hoʻomou ngaahi fakataha fakavahé mo e konifelenisi fakasouní. Ako e ngaahi fakamoʻoni folofolá pea ako ʻa e ngaahi tokāteliné mo e ngaahi tefitoʻi moʻoní.

ʻOku mau fakaafeʻi kimoutolu ke mou maʻu ha loto tukupā foʻou ke tokoni ki heʻetau Tamai ʻi Hēvaní ʻi Heʻene ngāue nāunauʻiá. ʻOku ʻi ai ha tufakanga mahuʻinga ʻo e faifekau kotoa ʻi he tokoni ki he ʻEikí ʻi Heʻene ngāué “ke fakahoko ʻa e moʻui ta‘e-fa‘amate mo e moʻui taʻengata ʻa e tangatá” (Mōsese 1:39).

ʻE tāpuakiʻi koe ʻe he ʻEikí ʻi hoʻo tokoni ʻosikiavelenga ʻi he loto-fakatōkilalo kiate Iá. Fakatauange ke ke maʻu ha nēkeneka mo ha fiefia lahi ʻi hoʻo ngāue ʻi he lotolotonga ʻo e fānau ʻa e Tamai Hēvaní.

Ko e Kau Palesitenisī ʻUluakí