Ngaahi Uiuiʻi Fakafaifekaú
Vahe 7: Ako ʻa e Lea Fakafonua Ho Misioná

“Vahe 7: Ako ʻa e Lea Fakafonua Ho Misioná,” Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí (2023)

“Vahe 7,” Malanga ʻAki ʻEku Ongoongoleleí

foʻi kolope mo e ngaahi fuka

Vahe 7

Ako ʻa e Lea Fakafonua Ho Misioná

Fakakaukau‘i ‘Eni

  • Te u lava fēfē ʻo fakamālohia ʻeku tui ki he ʻEikí ke tokoniʻi ai au ʻi he ako ʻo e lea fakafonua foʻoú?

  • Ko e hā ʻoku totonu ai ke hokohoko atu ʻa ʻeku fakalakalaka ʻi he lea fakafonuá?

  • Te u lava fēfē ʻo fakalakalaka ʻa ʻeku lea mo faiako ʻi he lea ʻo e fonua ʻoku ou ngāue aí?

  • Te u lava fēfē ʻo maʻu ʻa e meʻafoaki ʻo e leá ʻi he ngaahi lea kehekehé?

Teuteuʻi Fakalaumālie Koe

Naʻe folofola ʻa e ʻEikí, “ʻE fanongo ʻa e tangata kotoa pē ki hono kakato ʻo e ongoongoleleí ʻi hono ʻelelo ʻoʻoná, pea ʻi heʻene lea ʻaʻaná, ʻiate kinautolu kuo fakanofo ki he mālohí ni” (Tokāteline mo e Ngaahi Fuakava 90:11).

ʻOku hiki atu ʻi lalo ha ngaahi founga te ke lava ke fakamālohia ai ʻa hoʻo tui ʻe tokoniʻi koe ʻe he ʻEikí ke ke faiako mo ke fakamoʻoni ʻi he lea ʻo e fonua ʻokú ke ngāue aí:

  • Tui kuo ui koe ʻe he ʻOtuá ʻi ha palōfita.

  • Kolea e Tokoni ʻa e ʻOtuá ʻi he lotu fakamātoato.

  • Ngāue faivelenga ʻaki hono ako, ako lea ʻaki, mo fakaʻaongaʻi ʻi he ʻaho takitaha ʻa e lea fakafonua ho misioná.

  • Moʻui taau ke maʻu ʻa e takaua ʻo e Laumālie Māʻoniʻoní ʻaki hoʻo tauhi ʻa e ngaahi fekaú mo moʻui ʻaki ʻa e ngaahi tuʻunga moʻui ʻo e ngāue fakafaifekaú.

  • Fakahaohaoaʻi hoʻo ngaahi taumuʻá ʻaki hoʻo ʻofa ki he ʻOtuá mo ʻofa ki Heʻene fānaú mo fakaʻamu ke tāpuakiʻi kinautolu.

Ngāue Mateaki mo Faivelenga

ʻOku fiemaʻu ʻi he feinga ke faiako lelei ʻi he lea fakafonua ho misioná ʻa e ngāue faivelengá mo e ngaahi meʻafoaki ʻo e Laumālié. ʻOua naʻá ke ofo kapau ʻe ngali faingataʻa ʻa e ngāué. ʻOku fiemaʻu ki ai ha taimi lahi. Faʻa kātaki. ʻI hoʻo līʻoa koe ke ako ʻa e lea fakafonuá, te ke maʻu ʻa e ngaahi poto ʻoku fiemaʻu ke fakahoko hoʻo taumuʻa ko e faifekaú.

ʻOku ʻikai te ke tuʻu toko taha pē ʻi hono ako e lea ʻo e fonua ʻokú ke ngāue aí. ʻE tokoniʻi koe ʻe he Tamai Hēvaní mo Sīsū Kalaisi ʻi haʻo kolea ʻa ʻEna tokoní. Kole pea tali ʻa e tokoni ho hoá, kāingalotú, kinautolu ʻokú ke akoʻí, kau faifekau kehé, mo e kakai kehé.

Fanongo tokanga mo lea ʻaki ʻa e lea fakafonuá ʻi he faingamālie kotoa pē. ʻOua te ke manavasiʻi naʻá ke fai ha fehālaaki. ʻOku fehālaaki ʻa e tokotaha kotoa pē ʻokú ne ako ha lea fakafonua foʻou. ʻE mahino pē ia ki he kakaí, pea te nau houngaʻia ʻi hoʻo feinga ke ako ʻenau leá.

Feinga pē ke fakalakalaka hoʻo poto ʻi he leá kae ʻoua kuo ʻosi hoʻo ngāue fakafaifekaú. ʻI he tupulaki ko ia hoʻo malava ke fakaʻaongaʻi ʻa e lea fakafonuá, ʻe fanongo lahi ange ʻa e kakaí ki he meʻa ʻokú ke lea ʻakí kae ʻikai ko e anga hoʻo leá. ʻE siʻi ange haʻo hohaʻa pe te ke fetuʻutaki fēfeé ka ke lava lelei ange ʻo tokoni ki he ngaahi fiemaʻu ʻa e niʻihi kehé.

ʻEletā Jeffrey R. Holland

“ʻOku mau fakaʻamu ange … ʻe poto lelei ʻa e faifekau kotoa pē ʻokú ne ako ha lea foʻou, ʻi he tafaʻaki kotoa pē ʻe lavá. … Pea ʻi hoʻo poto [lava iá], ʻe toe lelei ange ai ʻa ho poto ʻi he [akoʻí] mo e fakamoʻoní. ʻE toe tali lelei ange koe ʻe he kakai [ʻokú ke akoʻí] mo nau ongoʻi [fakalaumālie] ange. …

“ʻOua te ke fiemālie pē ʻi he meʻa ʻoku tau ui ko e lea fakafaifekaú. Feinga ke ke ako ʻa e meʻa kotoa te ke lava ʻi he lea fakafonuá pea te ke maʻu ai ha faingamālie lahi ange ki he loto ʻo e kakaí” (Jeffrey R. Holland, fakamafola fakasatelaite maʻá e kau faifekaú, ʻAokosi 1998).

Hoko atu ʻi hono fakaʻaongaʻi ʻo e lea fakafonua ho misioná ʻi he hili hoʻo foki ki ʻapí. Kuo tāpuekina lahi koe ʻe he ʻEikí, pea mahalo pē te Ne toe fiemaʻu ke fakaʻaongaʻi hoʻo poto he lea fakafonua ko iá, ki ha ngaahi meʻa kehe ʻamui ange ʻi hoʻo moʻuí.

Ako e Lea Faka-Pilitāniá

Kapau ʻoku ʻikai te ke lea faka-Pilitānia pea ta ʻoku totonu leva ke ke ako ia ʻi hoʻo hoko ko e faifekaú. Te ne tāpuekina koe lolotonga hoʻo ngāue fakafaifekaú pea ʻi hono kotoa ʻo hoʻo moʻuí. ʻE toe tāpuakiʻi foki ho fāmilí ʻe he ako ʻo e lea faka-Pilitāniá.

Ki ha tokoni lahi ange ʻi he ako ʻo e lea faka-Pilitāniá, vakai, EnglishConnect for Missionaries.

fefine ʻoku tohi ʻi ha tohinoa

Ngaahi Tefitoʻi Moʻoni ʻo e Ako ha Lea Fakafonuá

Fatongia ʻAki

Fokotuʻu ha ngaahi taumuʻa ke fakaleleiʻi hoʻo lava ke lea ʻi he lea fakafonuá, pea fakaleleiʻi maʻu pē ia. Faʻu ha palani ako ki he lea fakafonuá. Fakaʻaongaʻi ʻa e lea fakafonuá ʻi he faingamālie kotoa pē.

ʻAi Hoʻo Akó ke Mahuʻingamālie

Fakaʻaongaʻi ʻa e meʻa ʻokú ke akó ki he ngaahi tūkunga moʻoni ʻo e moʻuí pea ʻi hoʻo ngaahi ʻekitivitī fakaʻahó. Tokanga taha ki he lea fakafonua ko ē ʻe tokoni ke ke lea ʻaki ʻa e meʻa ʻoku fiemaʻu ke ke lea ʻakí.

Feinga ke Fetuʻutaki

Talanoa mo ho hoá ʻi he lea fakafonuá ki he lahi taha ʻe lavá Ngāue ʻaonga ʻaki ʻa e faingamālie kotoa ke ako mo fakaʻaongaʻi aí. Hangē ko ʻení, te ke ala kole ki ha mēmipa ʻoku foki mai pe taha ʻokú ke lolotonga akoʻi ke tokoni atu ʻi he leá. ʻOku ʻikai ha meʻa ia ʻe toe lelei ange ʻi he talanoa mo kinautolu ʻoku ʻanautolu ʻa e lea fakafonuá.

ʻOua ʻe Fakatatau

ʻOua ʻe fakatatau hoʻo poto ʻi he leá ki ho hoá pe kau faifekau kehé. Ko e fakatataú ʻoku fakaiku ia ki he hīkisia pe loto-foʻi.

Ako Kakato ha Ngaahi Fakakaukau Foʻou

Toutou toe vakaiʻi maʻu pē ʻa e meʻa kuó ke akó, mo ako fakahoko ia ʻi ha ngaahi tūkunga foʻou. ʻE tokoni ʻeni ke ke manatuʻi ai mo fakaʻaongaʻi ʻa e meʻa ʻokú ke akó.

tangata ʻoku sio ki ha tohi

Faʻu ha Palani ki Hono Ako ʻo e Leá

ʻOku tokoni ha palani ki hono ako ʻo e leá ki he kau faifekau foʻoú mo e kau faifekau taukeí fakatouʻosi ke nau nofotaha ki he meʻa te nau lava ʻo fakahoko ʻi he ʻaho takitaha ke fakaleleiʻi ʻenau malava ke lea ʻi he lea fakafonua honau misioná. ʻE kau ʻi hoʻo palaní ʻa e meʻa te ke fai ʻi he lolotonga ho taimi ako leá pea ʻi he ʻahó kakato.

ʻOku fakahaaʻi ʻe he ngaahi sitepu ko ʻení ʻa e founga te ke lava ke faʻu ai ha palani ako ʻaki hano fakaʻaongaʻi ʻo e founga fokotuʻu taumuʻa mei he vahe 8. Fakafenāpasi ʻa e founga ko ʻení fakatatau mo hono fiemaʻú.

  1. Fokotuʻu ʻi he faʻa lotu ʻa e ngaahi taumuʻá mo e faʻu ʻo e ngaahi palaní. Fokotuʻu ha ngaahi taumuʻa fakauike ke fakaleleiʻi fakalūkufua hoʻo lava ke fetuʻutaki mo akoʻi ʻa e ongoongoleleí. Fakakau ʻa e ngaahi meʻa ʻokú ke tukupā ke manatuʻí, hangē ko ha ngaahi foʻi lea, ngaahi kupuʻi lea, ngaahi potufolofola, mo ha ngaahi fakamatala.

  2. Lekooti mo fakataimi-tēpileʻi Fakakaukauʻi pe ko e fē ʻa e tokoni fakaelea ʻe tokoni ke ke lavaʻi ai hoʻo ngaahi taumuʻá. ʻE lava ke kau ʻi he ngaahi tokoni fakaeleá ʻa e ngaahi folofolá, tikisinalí, tohi kalamá, polokalama TALL Emnark, mo ha niʻihi kehe. Fakataimi-tēpileʻi ha taimi te ke ako fakalelei ai mo fakaʻaongaʻi ʻa e lea fakafonuá. Hangē ko ʻení, te ke ala fakataimi-tēpileʻi ke lau leʻo lahi ʻa e Tohi ʻa Molomoná ʻi he miniti ʻe 15 ʻi he ʻaho kotoa pē ʻi he lolotonga ʻo e taimi kai hoʻataá.

  3. Ngāueʻi hoʻo palaní. ʻOku hōifua ʻa e ʻEikí ʻi he feingá, ko ia, ngāue faivelenga ke fakahoko hoʻo ngaahi taumuʻá. Maluʻi hoʻo taimi ako lea fakafonuá pea toe fakataimi-tēpileʻi ki ʻamui kapau ʻoku ʻi ai ha fepaki.

  4. Toe vakaiʻi mo muimuiʻi Toutou vakaiʻi hoʻo palani akó ke fakafuofuaʻi pe ʻoku ngāue lelei. Fakaafeʻi ho hoá, kau taki fakamisioná, kāingalotú, mo ha niʻihi kehe ʻi homou feituʻú ke nau fokotuʻu atu ha ngaahi founga te ke lava ai ʻo fakalakalaka. Kau ʻi he fakafuofuaʻi ʻo e lea fakafonuá kuo toutou fakataimi-tēpileʻí ke muimuiʻi hoʻo fakalakalaká mo ʻilo ʻa e ngaahi founga ke fakaleleiʻí.

Fakapalanisi hoʻo ako lea fakafonuá, ʻi he ngaahi taumuʻa taimi lōloa ki he faʻu ha tuʻunga lea fakafonuá mo e ngaahi taumuʻa taimi nounou, ki ha ngaahi ʻekitivitī paú pea mo e kakai ʻokú ke akoʻí.

ʻI he lolotonga ʻo e taimi ʻo hoʻo ako lea totonú, ʻai ke palanisi hoʻo ngaahi taumuʻá mo e ngaahi palani ʻi he ngaahi tetitoʻi feituʻu ʻo e leá ʻoku hā atu ʻi laló. Fakakaukauʻi pe ko e hā te ke ako ʻi he foʻi ʻahó kakato.

ngaahi poto fakaefanongó

ngaahi poto fakaelaukongá

kalamá

ngaahi poto fakaeleá

ngaahi poto fakaetohí

ngaahi foʻi leá

Ako Fakatāutahá pe Ako mo e Hoá

Tuku ha taimi ʻi he uike kotoa ke ke vakaiʻi ai hoʻo ako lea fakafonuá ʻaki haʻo fai ʻa e ngaahi fehuʻi ko ʻení:

  • Naʻá ku ako nai ʻa e lea fakafonua ʻo hoku misioná ʻi he ʻaho takitaha ʻo e uike ko ʻení? Ko e hā te u lava ʻo fai ke fakaleleiʻi maʻu pē ʻeku lea fakafonua ʻi hoku misioná?

  • ʻOku tokoni nai ʻeku palaní kiate au ke kumi, akoʻi, mo ngāue lelei ange mo e kāingalotú? Ko e hā ha ngaahi liliu ʻoku fiemaʻu ke u fai ki heʻeku palaní?

  • Ko e hā ʻoku ou fiefia lahi taha ai ʻi heʻeku ako lea fakafonuá? Ko e hā te u lava ʻo fai ke u fiefia lahi ange ai?

  • Ko e hā ʻa e lahi ʻo e taimi ʻoku totonu ke u fakaʻaongaʻi ke fakaangaanga e fakafanongó, laukongá, tohí, pea mo leá? Te u lava fēfē ke ako lelei ange ai ʻa e ngaahi foʻi leá, kalamá, mo hono puʻakí?

  • Ko e hā ʻa e ngaahi ʻekitivitī mo e ngaahi maʻuʻanga tokoni ʻoku ou fakaʻaongaʻi ki hono ako ʻo e leá? Ko e fē ʻoku tokoni lahi taha kiate aú? Ko e hā ha toe ngaahi maʻuʻanga tokoni pe ʻekitivitī ʻe ala ʻaonga?

  • Ko e hā ʻokú ne fiemaʻu lahi ange ha tokangá?

Hili hono tali ʻo e ngaahi fehuʻi ko ʻení, kiʻi fulifulihi hoʻo palani akó mo vakaiʻi pe ʻoku nau fakaleleiʻi hoʻo ngaahi olá. ‘E tataki koe ʻe he Laumālié ʻi he hokohoko atu hoʻo feinga ke fakaleleiʻi hoʻo ako leá.

Ako mo Ho Ngaahi Hoá

Tokoniʻi ho hoá ke ne aʻusia ha ola lelei mo maʻu ha loto-lahi ʻi he ako ʻo e lea fakafonua ho misioná pe ʻi he ako ʻo e lea faka-Pilitāniá. Toutou fakamālōʻiaʻi fakamātoato ho ngaahi hoá mo e kau faifekau kehé ʻi heʻenau fakalakalaká.

ʻOange ha fanga kiʻi fakamatala mahino mo faingofua ke fai ʻi he angaʻofa. ʻOange kiate kinautolu ha ngaahi faingamālie lahi ke nau faiako ai mo fakamoʻoni lelei. Hanga ʻo fakatokangaʻi ʻi he fakamatala moʻoni ko ʻení, ʻa e founga hono tokoniʻi ʻe ha faifekau taukei ange ʻa hono hoá.

Ko ʻeku toki aʻu atu pē ia ki he feituʻu hono ua ke u ngāue aí mo e tala mai ʻe hoku hoá ko au te u fai ʻa e poupou fakalaumālie ʻi he feituʻu te ma maʻu meʻatokoni ai he efiafi ko iá. Naʻe fiefia maʻu pē hoku hoa kimuʻá ke ne fai ʻa e akoʻí, pea naʻá ku anga ki hono fai pē ha kiʻi konga siʻisiʻi ʻo e lēsoní peá u fanongo ai pē ka ne fai ʻe ia e lēsoní pea fanongó.

Naʻá ku feinga ke fakalotoʻi hoku hoá ke ne fai ʻa e poupou fakalaumālié ka naʻá ne fakalotolahiʻi au ke u fai pē ia. Naʻá ku akoako ka ne hanga ʻo tokoniʻi au.

ʻI he hokosia ʻa e momeniti ko iá, naʻá ku fakaava ʻeku folofolá ʻo lau mei he 3 Nīfai 5 mo e 7. Naʻe faingataʻa ka naʻe lava pē ke u fakamatalaʻi hono ʻuhinga naʻá ku ongoʻi ai naʻe mahuʻinga ʻa e ngaahi potufolofola ne u filí, pea ne tau ʻeku mānavá ʻi he taimi naʻe ʻosi aí. Ko e taimi pē naʻe fai mai ai ha fehuʻi, naʻá ku sio atu ki hoku hoá ke ne tali, ka naʻe ʻikai lea ia. Ko e taimi ia ne u ʻohovale ai ʻi he lava ke u tali mahino e fehuʻí ʻi he lea faka-Falaniseé. Naʻá ku toe ʻohovale lahi ange ʻi he hangē naʻe ʻikai ke fakatokangaʻi ʻe he mēmipá ia ʻa ʻeku manavasiʻí koeʻuhí ko ʻeku ngaahi pōtoʻi fetuʻutakí. Naʻe maʻu hoku lotó peá u ʻiloʻi ta naʻe sai ange ʻeku lea faka-Falaniseé ʻi he meʻa naʻá ku fakakaukau atu ki aí.

Naʻe ʻosi atu mo ha ngaahi uike, mo e hokohoko pē hono tuku mai ʻe hoku hoá ke u faiakó—ʻo aʻu ki he taimi ne u pehē ai he ‘ikai ke u lava ʻo faiakó, pea naʻa mo e taimi mahalo naʻe fifili ai pe te u lava koā ʻo fai ia. Naʻá ku ongoʻi kuó u hoko ko ha meʻangāue ʻa ʻetau Tamai ʻi he Langí kae ʻikai ko ha hoa fakalongolongo pē.

Ako Fakatāutahá pe Ako mo e Hoá

Ngāue mo e kau faifekau kehé ke tokoni atu ke ke ako ʻa e lea fakafonua ho misioná.

  • Kapau ʻokú ke ngāue mo ha faifekau foʻou, te ke lava fēfē ʻo tokoni lelei ange ki ho hoá ke ne ako ʻa e lea fakafonuá pe ako ʻa e lea faka-Pilitāniá?

  • Kapau ko ha faifekau foʻou koe, ko e hā ha faʻahinga tokoni te ke ala kole ki ho hoá?

ongo faifekau ʻokú na akoʻi ha fefine

Ko Hono Ako ʻo e Anga Fakafonuá mo e Leá

ʻOku fekauʻaki vāofi ʻa e anga fakafonuá mo e lea fakafonuá. ʻE tokoni ʻa e mahino ʻo e anga fakafonua ʻo e kakaí ke fakamatalaʻi ʻa e anga hono fakaʻaongaʻi ʻo e leá. ʻE toe tokoni foki ʻa e mahino ko ʻení ke ke fakamatalaʻi ʻa e ngaahi tafaʻaki makehe ʻo e pōpoaki ʻo e Fakafoki mai ʻo e Ongoongoleleí ʻi ha founga ʻe mahino ki he kakaí.

Ko e taha ʻo e ngaahi meʻa mahuʻinga taha te ke lava ʻo fai ke maʻu ai ʻa e falala mo e ʻofa ʻa e kakaí, ko haʻo fakaʻapaʻapaʻi mo tali honau anga fakafonuá ʻi he ngaahi founga ʻoku taau. Kuo ʻosi fakahoko ʻeni ʻe ha kau faifekau lelei tokolahi (vakai, 1 Kolinitō 9:20–23).

Ako Fakatāutahá pe Ako mo e Hoá

Ngāue ʻaki ʻa e foʻi fakakaukau ʻi laló ke tokoni atu ke ke teuteu ke akoʻi ha taha ʻoku kehe hono anga fakafonuá pe puipuituʻá.

  • Fakakaukau ki he tupuʻanga ʻo e kakai ʻokú ke akoʻí, ʻi honau anga fakafonuá mo ʻenau tui fakalotú. ʻAi ke ke ʻilo ha tafaʻaki ʻo honau puipuituʻá te ne ala ʻai ke faingataʻa ke mahino kiate kinautolu ha tefitoʻi moʻoni ʻo e ongoongoleleí. Palani ha ngaahi founga ke akoʻi mahino ai ʻa e tefitoi moʻoni ko ʻení.

Ko e Meʻafoaki ʻo e Lea ʻi he Ngaahi Lea Kehekehé

ʻOku moʻoni ʻa e ngaahi meʻafoaki ʻo e Laumālié. Ko e meʻafoaki ʻo e lea kehekehé mo e fakaʻuhingaʻi ʻo e lea kehekehé ʻoku lahi honau fakafōtungá. Ko hanau niʻihi ʻoku kau ai hono lea ʻakí, mahino, pea mo e fakaʻuhingaʻi ʻo e leá. Ko e ʻaho ní, ko e meʻaʻofa ʻo e lea ʻi he lea kehekehé ʻoku meimei ke faʻa hāsino lahi taha ia ʻi he ʻilo mo e ako ʻoku faitokonia ʻe he Laumālié ke tokoni ke ako ʻe he kau faifekaú ʻa e lea fakafonua ʻi honau misioná.

ʻE lava ke fakasino ʻe he Laumālie Māʻoniʻoní ʻa e moʻoni ʻo hoʻo fakamoʻoní, neongo ʻe kei ala hoko ha faingataʻa fakafetuʻutaki ʻiate koe mo kinautolu ʻokú ke akoʻí. Ko e meʻa tatau pē, ʻe lava ke ʻomai ʻe he Laumālie Māʻoniʻoní ha ngaahi foʻi lea mo ha ngaahi kupuʻi lea ki hoʻo manatú mo tokoni ke mahino kiate koe ʻa e meʻa ʻoku lea ʻaki ʻe he kakaí, mei honau lotó.

Ko hono fakakātoá, he ʻikai ke ke lava ʻo maʻu ʻa e ngaahi meʻafoaki ko ʻení taʻe kau ai ha ngāue. ʻOku fiemaʻu ke ke fekumi maʻu pē ki ai, ke tāpuakiʻi ʻa e kakai kehé (vakai Tokāteline mo e Ngaahi Fuakava 46:8–9, 26). Ko e konga ʻo e fekumi ki he meʻafoaki ʻo e lea ʻi he ngaahi lea kehekehé ko e ngāue mo e fakahoko ʻa e meʻa kotoa ʻokú ke lavá ke ako ʻa e lea fakafonuá. Faʻa kātaki ʻi hoʻo ako ʻi he faʻa lotu mo ako fakahoko ʻa e lea fakafonuá. Falala ʻe tokoniʻi koe ʻe he Laumālié ʻi hoʻo feinga faivelengá. Tui te ke lava ʻo maʻu ʻa e meʻafoaki ʻo e lea ʻi he ngaahi lea kehekehé pea mo kinautolu ʻokú ke akoʻí.

Ko e taimi ʻokú ke faingataʻaʻia ai he feinga ke fakamatalaʻi hoʻo fakakaukaú, manatuʻi ʻoku lava ke lea ʻa e Laumālié ki he loto ʻo e fānau kotoa ʻa e ʻOtuá. Naʻe akoʻi ʻe Palesiteni Tōmasi S. Monisoni:

“ʻOku ʻi ai ha lea fakafonua ʻe taha ʻoku maheni mo e faifekau kotoa pē—ko e lea fakafonua ʻa e Laumālié. ʻOku ʻikai ako ia mei ha ngaahi tohi naʻe faʻu ʻe he kau tangata potó, pe maʻu mei he lautohí pe ako maʻulotó. ʻOku hoko mai e lea ʻo e Laumālié ki he taha ko ē ʻokú ne fekumi ʻaki hono lotó kotoa ke ʻiloʻi e ʻOtuá mo tauhi ʻEne ngaahi fekau fakalangí. ʻOku lava ʻe he poto ʻi he leá ni ʻo fakaʻatā ha taha ke ne holoki e ʻā vahevahé, ikunaʻi e ngaahi faingataʻá mo ueʻi ʻa e loto ʻo e tangatá” (“The Spirit Giveth Life,” Ensign, Sune 1997, 2).

Ako Fakatāutahá pe Ako mo e Hoá

Fakaʻaongaʻi ʻa e ngaahi fakamatala ko ʻení ke fakafuofuaʻi hoʻo fekumi ki he meʻafoaki ʻo e lea ʻi he ngaahi lea kehekehé. Lekooti hoʻo ngaahi ongó mo e ngaahi taumuʻá ke tokoni atu ke fakaleleiʻi hoʻo ako ʻa e lea fakafonuá.

Ngaahi Fakakaukau ki he Akó mo e Moʻui ʻAkí

Ako Fakatāutahá

  • Toe vakaiʻi ʻa e ngaahi maʻuʻanga tokoni ki he lea fakafonuá ʻi he Missionary Portal. ʻAi ke ke ʻiloʻi ha faʻahinga meʻa kuo teʻeki ai ke ke ʻahiʻahiʻi, pea fokotuʻu ha taumuʻa ke ʻahiʻahiʻi ai ʻi he ngaahi ʻaho siʻi ka hokó.

  • ʻI hoʻomou fakataha fakavahe hono hokó, fehuʻi ki ha faifekau kuo taukei pea lelei ʻene leá, pe ko e hā kuó ne fai ke ako ʻa e leá.

Ako mo e Hoá mo e Vilo Hoá

  • Mo feakoʻiʻaki ʻa e ngaahi lēsoni fakafaifekaú ʻi he lea fakafonua homou misioná. ʻI he kamataʻangá, mahalo ʻe faiako nounou pē ʻa e kau faifekau foʻoú, mo vahevahe ha fakamoʻoni nounou, mo lau ha ngaahi potufolofola naʻe ʻosi maʻuloto. Ka ʻi he tupulaki ʻo ʻenau loto-lahí mo e meʻa ʻoku nau lavá, te nau lava leva ke kau kakato ange ʻi he akoʻí.

  • Vakaiʻi ʻa e ngaahi fakakaukau ʻi he vahe ko ʻení pea mo e maʻuʻanga tokoni lea fakafonua ʻi he Missionary Portal. Aleaʻi pe ko e ngaahi fokotuʻu fē te mo ala fakaʻaongaʻi ʻi he ako mo e hoá he lolotonga ʻo e uike hokó.

  • Kole ki ho hoá ke ne fanongo ki hoʻo puʻaki leá mo tokoni ke ke fakalakalaka. Kole ange ke ne fakatokangaʻi ʻa e ngaahi tūkunga ʻoku ʻikai mahino ai hoʻo leá. ʻAi ha lisi ʻo e ngaahi foʻi lea, ngaahi kupuʻi lea, pe kalama ʻe tokoní. Fakamatalaʻi mo ako fakahoko ʻa e founga ke fakaʻaongaʻi ai ʻa e meʻa ʻoku ʻi he lisí ʻi he ngaahi ʻekitivitī hoko maí.

  • Akoako ke fakafanongo lelei. Palani ha taimi ʻi he lolotonga ʻo e ʻahó ke fakafanongo lelei ai ke ʻiloʻi ʻa e foʻi lea mo e ngaahi sīpinga kuó ke ʻosi akó. Ko e taimi pē ʻokú ke fanongo ai ʻi hono puʻaki keheʻi ha kupuʻi lea mei he founga te ke puʻaki aí, tohiʻi ia peá ke ako puʻaki ia.

  • ʻAi ha lisi ʻo e ngaahi meʻa ʻe ala lea ʻaki ʻe he kakaí he ʻaho ko iá. Palani pea akoako ʻa e ngaahi founga te ke lava ʻo tali aí.

Fakataha Alēlea Fakavahé, Ngaahi Konifelenisi Fakasouní, mo e Fakataha Alēlea Fakatakimuʻa ʻo e Misioná

  • Fakaafeʻi ha kau lea fakafonua moʻoni ke nau kau ʻi ha taha ʻo e ngaahi fakataha ko ʻení. Fokotuʻutuʻu ke akoʻi kinautolu ʻe he kau faifekaú ʻi ha fanga kiʻi kulupu iiki. Kole ki he kakai lea fakafonua moʻoni ko ʻení ke nau hiki mo ʻomi ha fakamatala ki he tuʻunga ʻo e kau faifekaú ʻi he lea fakafonuá.

  • Tomuʻa vahe pē kimuʻa ki ha faifekau ʻe toko taha pe toko ua ke na fakamatala ki he ola lelei ʻo ʻena ako ʻa e leá.

  • Vahe ki ha faifekau kuo taukei ke ne fakamatalaʻi nounou ha ngaahi konga ʻo e lea fakafonuá ʻoku faʻa faingataʻa ki he kau faifekaú. ʻAi ke ne fakamatalaʻi ha ngaahi sīpinga ʻo hono fakaʻaongaʻi lelei ʻo e lea fakafonuá, pea tuku ke ako fakahoko ia ʻe he kau faifekaú.

  • ʻAi ʻa e kau faifekau ‘oku tupuʻi fonuá ke nau vahevahe ʻenau ngaahi ʻiló.

Kau Taki Misioná mo e Kau Tokoni Misioná

  • Fakamamafaʻi hono mahuʻinga ʻo e ako maʻu pē ʻa e lea fakafonuá ʻi he ʻaho takitahá.

  • Fakalotolahiʻi ʻa e kau faifekaú ke nau fakaʻaongaʻi ʻa e lea fakafonua ʻo e misioná ki he lahi taha ʻe lavá.

  • ʻOange ʻa e ngaahi ʻelemēniti ʻo ha palani ako lea fakafonua ʻa ha misiona ʻi ha taimi-tēpile ako pau. Toe fakamanatu ʻeni ʻi he ngaahi fakataha alēlea fakavahé.

  • Kumi ha ngaahi faingamālie ke talanoa ai mo e kau faifekaú ʻi he lea fakafonua ʻoku nau akó. Toutou ʻinitaviu kinautolu ʻi he lea fakafonua ko ʻení.

  • Fehuʻi ki he kau taki fakalotofonuá mo e kāingalotú ha founga ʻe lava ke fakatupulaki ai ʻe he kau faifekaú ʻenau lava ke lea he lea fakafonuá.

  • Fai ha fakahinohino ʻi he konifelenisi fakasouní pe fakataha alēlea fakatakimuʻá ʻi he ngaahi fehālaaki angamaheni lahi taha ʻoku fai ʻe he kau faifekau ʻoku nau ako ʻa e lea fakafonua homou misioná.

  • Ko e akoʻi ʻo e kau faifekaú ʻi he ngaahi meʻafoaki fakalaumālié.

  • Vakaiʻi ʻa e kau faifekaú ʻi he taimi ʻoku nau faiako ai ʻi he lea fakafonua ʻo e misioná.