Kapitulo 3: Adalen 2—Ti Plano ti Pannakaisalakan ti Nailangitan nga Ama
“Kapitulo 3: Adalen 2—Ti Plano ti Pannakaisalakan ti Nailangitan nga Ama,” Ikasaba ti Ebangheliok: Maysa a Pangiwanwan iti Panangibinglay iti Ebanghelio ni Jesucristo (2023)
Kapitulo 3: Adalen 2,” Ikasaba ti Ebangheliok
Kapitulo 3: Adalen 2
Ti Plano ti Pannakaisalakan ti Nailangitan nga Ama
Ladawan
Estatua ni Cristo
Mabalin a Masdaaw dagiti Tao
Ania ti panggep ti biag?
Sadino ti naggapuak?
Adda kadi Dios a maseknan kaniak? Kasano a mariknak a maseknan Isuna kaniak?
Kasano a mamatiak iti Dios no adu ti dakes a mapaspasamak?
Apay a narigat ti biag no dadduma? Kasano a masarakak ti pigsa bayat dagitoy a panawen?
Kasano a makapagbalinak a nasaysayaat a tao?
Ania ti mapasamak kalpasan ti ipapatayko?
Tulongannatayo ti naisubli nga ebanghelio ni Jesucristo a mangsungbat kadagiti napapateg a saludsod ti kararua. Babaen ti ebanghelio, masursurotayo ti maipapan iti nadiosan a kinasiasinotayo ken ti agnanayon a potensialtayo kas annak ti Dios. Daytoy ti mangted kadatayo iti namnama ken tulongannatayo a mangsapul iti talna, ragsak, ken kaipapanan. Ti panagbiag iti ebanghelio ti mangtulong kadatayo a dumur-as ken makasarak iti pigsa bayat ti panangsangotayo kadagiti karit iti biag.
Kayat ti Dios ti kasayaatan para kadagiti annakna ken tarigagayanna nga ited kadatayo dagiti kadakkelan a bendisionna, a saan nga ipapatay ken agnanayon a biag (kitaen iti Moises 1:39; Doktrina ken Katulagan 14:7). Gapu ta ay-ayatennatayo, nangipaay iti maysa a plano tapno maawattayo dagitoy a bendision. Kadagiti nasantuan a kasuratan, naawagan daytoy a plano iti plano ti pannakaisalakan, ti naindaklan a plano ti kinaragsak, ken ti plano ti pannakasubbot (kitaen iti Alma 42:5, 8, 11, 13, 15, 16, 31).
Iti plano ti Dios, tunggal maysa kadatayo ket agdaliasat iti biag sakbay ti yaay ditoy daga, pannakayanak, biag iti daga, ipapatay, ken biag kalpasan ti ipapatay. Impaay ti Dios no ania ti kasapulantayo bayat daytoy a panagdaliasat tapno kalpasan ti ipapataytayo, makasublitayo inton agangay iti imatangna ken umawat iti pakabuklan a rag-o.
Ni Jesucristo ti sentro iti plano ti Dios. Babaen ti Pannubbot ken Panagungarna, pinagbalin ni Jesus a posible para iti tunggal maysa kadatayo nga umawat iti imortalidad ken biag nga agnanayon.
Bayat ti panagbiagtayo ditoy daga, saantayo a malagip ti biagtayo sakbay ti yaay ditoy daga. Saantayo met a naan-anay a maawatan ti biag kalpasan ti ipapatay. Nupay kasta, impalgak ti Dios ti adu a kinapudno maipapan kadagitoy a paset ti agnanayon a panagdaliasattayo. Dagitoy a kinapudno ket mangipaay iti umdas a pannakaammo tapno maawatantayo ti panggep ti biag, tapno mapasarantayo ti rag-o, ken maaddaantayo iti namnama kadagiti nasayaat a banag nga umay. Daytoy a pannakaammo ket maysa a sagrado a gameng a mangiwanwan kadatayo bayat ti kaaddatayo ditoy daga.
Dagiti Singasing para iti Panangisuro
Daytoy a benneg ti mangipaay iti pagarigan a balabala a mangtulong kadakayo nga agsagana a mangisuro. Iramanna pay dagiti pagarigan dagiti saludsod ken awis a mabalinyo nga usaren.
Bayat ti panagsaganayo a mangisuro, sikakararag nga ibilangyo ti kasasaad ken dagiti naespirituan a kasapulan ti tunggal tao. Ikeddeng no anianto ti kangrunaan a makatulong iti panangisuro. Agsagana a mangilawlawag iti kaipapanan dagiti termino a mabalin a saan a maawatan dagiti tao. Agplano segun iti no kasano ti kaadunto ti orasyo, a laglagipenyo a pagtalinaeden nga ababa dagiti adalen.
Pumilikayo kadagiti nasantuan a kasuratan nga usaren bayat ti panangisuroyo. Ti benneg a “Pundasion a Mainaig iti Doktrina” ti adalen ket mangiraman iti adu a makatulong a nasantuan a kasuratan.
Ibilangyo no ania dagiti saludsod a madamag bayat ti panangisuroyo. Mangplano kadagiti awis nga ited a mangparegtanto iti tunggal tao nga agtignay.
Yunay-unay dagiti bendision nga inkari ti Dios, ken ibinglayyo ti pammaneknekyo maipapan iti isursuroyo.
Ladawan
dagiti misionario a mangisursuro iti pamilia
No Ania ti Mabalin nga Isuroyo kadagiti Tao iti 15–25 a Minuto
Mangpili iti maysa wenno ad-adu pay kadagiti sumaganad a pagbatayan maipapan iti plano ti pannakaisalakan nga isuro. Maited ti pundasion a mainaig iti doktrina para iti tunggal pagbatayan kalpasan daytoy a balabala.
Biag Sakbay ti Yaay Ditoy Daga: Ti Panggep ti Dios ken ti Planona para Kadatayo
Espiritu nga annaknatayo amin ti Dios. Pinarsuanatayo iti bukodna a ladawan.
Nagnaedtayo iti denna ti Dios sakbay a nayanaktayo iti daga. Miembrotayo ti pamiliana. Am-ammo ken ay-ayatenna ti tunggal maysa kadatayo.
Nangipaay ti Dios iti plano para iti ragsak ken panagdur-astayo ditoy a biag ken iti kinaagnanayon.
Iti biagtayo sakbay ti yaay ditoy daga, pinilitayo a suroten ti plano ti Dios. Kaipapanan daytoy ti yaay iti daga tapno maaramidtayo ti sumaruno nga addang iti agnanayon a panagrang-aytayo.
Ni Jesucristo ti sentro iti plano ti Dios. Inaramidna a posible para iti tunggal maysa kadatayo nga umawat iti imortalidad ken biag nga agnanayon.
Ti Panagparsua
Babaen ti panangiturong Dios, pinarsua ni Jesucristo ti daga.
Ti Pannakatnag da Adan ken Eva
Da Adan ken Eva ti immuna nga annak ti Dios nga immay ditoy daga. Pinarsua ti Dios dagiti bagida ket impanna ida iti Minuyongan ti Eden.
Naglabsing da Adan ken Eva, napapanawda iti minuyongan, ken naisinada iti imatang ti Dios. Daytoy a pasamak ket maawagan iti Pannakatnag.
Kalpasan ti Pannakatnag, nagbalin a mortal da Adan ken Eva. Kas mortal, nabaelanda ti nagsursuro, dumur-as, ken naaddaan iti annak. Napadasanda met ti ladingit, basol, ken ipapatay.
Ti Pannakatnag ket maysa nga addang nga agturong iti sangataw-an. Ti Pannakatnag ti namagbalin tapno mayanaktayo ditoy daga ken dumur-as iti plano ti Nailangitan nga Ama.
Ti Biagtayo iti Daga
Iti plano ti Dios, kasapulan nga umaytayo ditoy daga tapno umawat kadagiti pisikal a bagi, agsursuro, ken dumur-as.
Ditoy daga, masursurotayo ti magna babaen ti pammati. Nupay kasta, saannatayo a binaybay-an ti Nailangitan nga Ama nga agmaymaysa. Adu ti intedna a sagut ken pangiwanwan a tumulong kadatayo nga agsubli iti imatangna.
Ti Pannubbot ni Jesucristo
Agbasol ti tunggal maysa kadatayo, ket matay ti tunggal maysa kadatayo. Gapu ta ay-ayatennatayo ti Dios, imbaonna ditoy daga ti Anakna, ni Jesucristo tapno subbotennatayo manipud iti basol ken ipapatay.
Gapu iti pangsubbot a sakripisio ni Jesus, mapakawan ken madalusantayo kadagiti basoltayo. Mabalin a mabaliwan ti pusotayo iti nasaysayaat bayat ti panagbabawitayo. Daytoy ti mamagbalin a posible nga agsublitayo iti imatang ti Dios ken umawat iti naan-anay a rag-o.
Gapu iti Panagungar ni Jesus, agungartayonto amin kalpasan ti ipapataytayo. Kayatna a sawen a mapagkaykaysanto manen ti espiritu ken bagi ti tunggal tao, ken tunggal maysa kadatayo ket agbiagto iti agnanayon iti maysa a naan-anay, nagungar a bagi.
Idiayaannatayo ni Jesucristo iti liwliwa, namnama, ken pannakaagas. Ti pangsubbot a sakripisiona ket isu ti kangrunaan a pangipeksaan iti ayatna. Amin a saan a nainkalintegan iti biag ket maaramid nga umno babaen iti Pannubbot ni Jesucristo.
Ti Lubong ti Espiritu
No matay ti pisikal a bagitayo, agtultuloy nga agbiag ti espiritutayo iti lubong ti espiritu. Daytoy ket temporario a kasasaad ti panagsursuro ken panagsagana sakbay ti Panagungar.
Maisuro ti ebanghelio ni Jesucristo iti lubong ti espiritu, ket mabalintayo ti agtultuloy a dumur-as ken rumang-ay.
Ti Panagungar, Pannakaisalakan, ken Pannakaitan-ok
Kalpasan ti panawentayo iti lubong ti espiritu, ti Panagungar ti sumaruno nga addang iti agnanayon a panagdaliasattayo.
Ti Panagungar ket ti panagtipon manen ti espiritu ken bagitayo. Agungarto ti tunggal maysa kadatayo ken maaddaan iti naan-anay a pisikal a bagi. Agbiagtayto nga agnanayon. Maaramid daytoy a posible babaen ti Pannubbot ken Panagungar ti Mangisalakan.
Panangukom ken dagiti Pagarian ti Gloria
Inton mapagungartayo, ni Jesucristo ti agbalin nga ukomtayo. Addaan iti sumagmamano nga eksepsion, umawat amin dagiti annak ti Dios iti lugar iti pagarian ti dayag.
Nupay agungartayonto amin, saantayo amin nga umawat iti maymaysa nga agnanayon a dayag. Ukomennatayonto ni Jesus segun iti pammati, aramid, ken panagbabawitayo iti mortalidad ken iti lubong ti espiritu. Mabalintayo ti agsubli nga agindeg iti imatang ti Dios no napudnotayo.
Dagiti Saludsod a Mabalinyo a Damagen kadagiti Tao
Dagiti sumaganad a saludsod ket pagarigan ti mabalin a damagenyo kadagiti tao. Makatulong dagitoy a saludsod tapno maaddaankayo iti addaan kaipapanan a panagsasarita ken maawatan dagiti kasapulan ken pannirigan ti maysa a tao.
Ania ti mariknam a panggep ti biag?
Ania ti mangisangbay kenka ti ragsak?
Ania dagiti karit a kasapulam a tulongannaka ti Dios?
Ania ti nasursurom manipud kadagiti karit a naipasango kenka?
Ania ti ammom maipapan ken ni Jesucristo? Kasano nga inapektuan ti biag ken misionna ti biagmo?
Makimisakanto kadi a kakuyognakami ita a Domingo tapno maammuam ti ad-adu pay maipapan iti insuromi?
Basaemto kadi ti Libro ni Mormon ken agkararagka tapno maammuam a balikas ti Dios daytoy? (Mabalinyo nga isingasing dagiti masinunuo a kapitulo wenno bersikulo.)
Mabalinmi kadi ti mangyiskediul iti oras para iti sumaruno nga isasarungkarmi?
Ladawan
graphic ti plano ti pannakaisalakan
Pundasion a Mainaig iti Doktrina
Mangipaay daytoy a benneg iti doktrina ken nasantuan a kasuratan nga adalenyo tapno mapatibker ti pannakaammoyo ken pammaneknekyo iti ebanghelio ken tapno matulongannakayo a mangisuro.
Ladawan
dagiti galaksi
Biag Sakbay ti Yaay Ditoy Daga: Ti Panggep ti Dios ken ti Planona para Kadatayo
Annaknatayo ti Dios, ket Nakipagnaedtayo Kenkuana sakbay ti Pannakaipasngaytayo
Ti Dios ket ti Ama dagiti espiritutayo. Datayo dagiti literal nga annakna, a naparsua iti ladawanna. Tunggal maysa kadatayo ket addaan iti nadiosan a kababalin kas maysa nga anak ti Dios. Daytoy a pannakaammo ti makatulong kadatayo kadagiti narigat a panawen ken mabalinnatayo a paregtaen nga agbalintayo a kasayaatan.
Nagnaedtayo iti denna ti Dios kas espiritu nga annakna sakbay a nayanaktayo ditoy daga. Miembrotayo ti pamiliana.
Ladawan
Presidente M. Russell Ballard
“Adda maysa a napateg a pakabigbigan a pagpapadaantayo amin ita ken iti agnanayon, maysa a ditayo koma pulos malipatan, ken maysa a nasken nga pagyamanantayo. Kaipapanan dayta a dakayo ket kanayon nga anak a lalaki wenno anak a babai ti Dios nga addaan kadagiti naespirituan a ramut iti kinaagnanayon.
“… Ti pannakaawat iti daytoy a kinapudno—talaga a pannakaawat iti daytoy ken panangarakup iti daytoy—ket mangbalbaliw iti biag. Mangted daytoy kadakayo iti naisangsangayan a pakabigbigan nga awan ti makaikkat kadakayo. Ngem ad-adda pay ngem dayta, nasken a mangted kadakayo iti napalaus a rikna ti pateg ken pannakarikna iti awan patinggana a pategyo. Kamaudiananna, ipaayna kadakayo ti nadiosan, natan-ok, ken maikari a panggep iti biag” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).
Pinilitayo ti Umay ditoy Daga
Ay-ayatennatayo ti Nailangitan nga Amatayo ket tarigagayanna nga agbalintayo a kas Kenkuana. Isu ket maysa a natan-ok a parsua nga addaan iti natan-ok a pisikal a bagi.
Iti biagtayo sakbay ti yaay ditoy daga, naammuantayo nga adda plano ti Dios para kadatayo nga agbalin a kas Kenkuana. Maysa a paset ti planona ket panawantayo ti nailangitan a pagtaengantayo ket umaytayo ditoy daga tapno umawat kadagiti pisikal a bagi. Kasapulantayo pay ti makagun-od iti padas ken mangpadur-as iti pammati bayat ti panawen nga adayotayo iti imatang ti Dios. Saantayo a malagip ti panagnaedtayo iti denna iti Dios. Nupay kasta, ipaayna ti kasapulantayo tapno makasublitayo a makipagnaed Kenkuana.
Ti kinawaya nga agpili, wenno ti wayawaya ken kabaelan a pumili, ket napateg a paset ti plano ti Dios para kadatayo. Iti biagtayo sakbay ti yaay ditoy daga, pinili ti tunggal maysa kadatayo ti sumurot iti plano ti Dios ken umay ditoy daga tapno maaramidtayo ti sumaruno nga addang iti agnanayon a panagdur-astayo. Naawatantayo a bayat ti kaaddatayo ditoy, addantayto kadagiti baro a gundaway a dumur-as ken mangpadas iti rag-o. Naawatantayo pay a maipasangotayo iti oposision. Mapadasantayo ti sulisog, pannubok, ladingit, ken ipapatay.
Iti panangpilitayo nga umay ditoy daga, nagtalektayo iti ayat ken tulong ti Dios. Nagtalektayo iti planona para iti pannakaisalakantayo.
Pinili ti Nailangitan nga Ama ni Jesucristo a Mangsubbot Kadatayo `
Ni Jesucristo ti sentro iti plano ti Dios. Sakbay ti yaay ditoy daga, ammotayo a saantayo a makasubli iti imatang ti Dios a bukbukodtayo. Pinili ti Nailangitan nga Ama ni Jesucristo, ti inauna nga Anakna, tapno aramidenna a posible a makapagsublitayo Kenkuana ken maaddaan iti agnanayon a biag.
Situtulok nga inawat ni Jesus. Immannugot nga umay ditoy daga ket subbotennatayo babaen ti pangsubbot a sakripisiona. Ti Pannubbot ken Panagungarna ti mangpabalin a matungpal dagiti panggep ti Dios para kadatayo.
Gospel Topics: “Premortality,” “Plan of Salvation”
Ladawan
ilelennek ti init iti taaw
Ti Panagparsua
Ti plano ti Nailangitan nga Ama ket nangipaay iti pannakaparsua ti daga, a pangawatan dagiti espiritu nga annakna kadagiti pisikal a bagi ken manggun-od iti padas. Ti biagtayo ditoy daga ket kasapulan tapno dumur-as ken agbalintayo a kas iti Dios.
Iti babaen ti panangiturong ti Nailangitan nga Ama, pinarsua ni Jesucristo ti daga ken amin a sibibiag a banag. Kalpasanna, pinarsua ti Nailangitan nga Ama ti lalaki ken babai iti bukodna a ladawan. Ti Panagparsua ket maysa a panangyebkas ti ayat ti Dios ken ti tarigagayna a maaddaantayo iti gundaway a dumur-as.
Ipapanaw iti Minuyongan ti Eden, ni Joseph Brickey
Ti Pannakatnag da Adan ken Eva
Sakbay ti Pannakatnag
Da Adan ken Eva ti immuna nga espiritu nga annak ti Nailangitan nga Ama nga immay ditoy daga. Pinarsua ti Dios ti pisikal a bagida iti bukodna a ladawan ket inkabilna ida iti Minuyongan ti Eden. Iti minuyongan awan basolda, ket impaay ti Dios dagiti kasapulanda.
Bayat ti kaadda da Adan ken Eva iti minuyongan, binilin ida ti Dios a saanda a kanen ti bunga ti pannakaammo ti nasayaat ken dakes. No agtulnogda iti daytoy a bilin, mabalinda ti agtalinaed iti minuyongan. Nupay kasta, saanda koma a makapagdur-as babaen ti panagsursuro manipud iti oposison ken kadagiti karit ti mortalidad. Saanda koma a maammuan ti rag-o gapu ta dida mapadasan ti ladingit ken saem.
Sinulisog ni Satanas da Adan ken Eva tapno kanenda ti maiparit a bunga, ket pinilida nga aramiden ti kasta. Gapu iti daytoy a pili, napapanawda manipud iti minuyongan ken naisinada manipud iti imatang ti Dios. Daytoy a pasamak ket maawagan iti Pannakatnag.
Kalpasan ti Pannakatnag
Kalpasan ti Pannakatnag, nagbalin a mortal da Adan ken Eva. Awandan iti kasasaad ti kinainosente, naawatan ken napadasandan ti agpada a naimbag ken dakes. Mabalinda nga usaren ti karbenganda nga agpili iti nagbaetan dagitoy. Gapu ta naipasango da Adan ken Eva iti oposision ken kadagiti karit, nabalinanda ti nagsursuro ken dumur-as. Gapu ta napadasandan ti ladingit, mapadasanda pay ti rag-o. (Kitaen iti 2 Nephi 2:22–25.)
Iti laksid dagiti rigatda, narikna da Adan ken Eva a dakkel a bendision ti panagbalin a mortal. Maysa a bendision ti pannakabaelda a maaddaan kadagiti annak. Daytoy ti nangipaay iti dalan para kadagiti dadduma nga espiritu nga annak ti Dios nga umay ditoy daga ken umawat kadagiti pisikal a bagi.
Maipanggep kadagiti bendision ti Pannakatnag, agpada a nagrag-o da Adan ken Eva. Kinuna ni Eva, “No saan a gapu iti panaglabsingmi saankami koma naaddaan [iti annak], ken pulos koma a dimi naammuan ti naimbag ken dakes, ken ti rag-o iti pannakasubbotmi, ken ti agnanayon a biag nga ited ti Dios kadagiti amin a manangtungpal” (Moises 5:11; kitaen met iti bersikulo 10).
Gospel Topics: “Fall of Adam and Eve,” “Agency and Accountability”
Ti Biagtayo iti Daga
Adu a tattao ti agsalsaludsod, “Apay nga addaak ditoy daga?” Ti biagtayo ditoy daga ket napateg a paset ti plano ti Dios para iti agnanayon a panagdur-astayo. Ti maudi a panggeptayo ket agsagana nga agsubli iti imatang ti Dios ken umawat iti pakabuklan ti rag-o. Naibalabala iti baba ti sumagmamano kadagiti wagas a panangisagana kadatayo ti biag iti daga para iti daytoy.
Ladawan
ubing a lalaki nga umis-isem
Umawat iti Pisikal a Bagi
Maysa a panggep ti yaay ditoy daga ket ti panangawat iti pisikal a bagi a mabalin a pagnaedan ti espiritutayo. Sagrado ti bagitayo, namilagruan a pinarsua ti Dios. Babaen kadagiti pisikal a bagi, maaramid, masursuro, ken mapasarantayo ti adu a banag a saan a kabaelan dagiti espiritutayo. Mabalintayo ti dumur-as kadagiti wagas a ditayo kabaelan kas espiritu.
Gapu ta mortal ti bagitayo, mapasarantayo ti ut-ot, sakit, ken dadduma pay a pannubok. Matulongannatayo dagitoy a padas a makasursuro iti anus, pannakipagrikna, ken dadduma pay a nadiosan a galad. Mabalin a paset dagitoy ti danatayo nga agturong iti rag-o. Ti panagpili iti umno no narigat nga aramiden ket masansan no kasano nga agbalin a paset ti kababalintayo ti pammati, namnama, ken kinamanangngaasi.
Sursuruen nga Usaren a Nainsiriban ti Kinawaya nga Agpili
Ti sabali pay a panggep ti mortalidad ket tapno masursuro nga usaren a nainsiriban ti kinawayatayo nga agpili—tapno agpili no ania ti umno. Napateg ti panagsursuro nga agusar iti kinawayatayo nga agpili a nainsiriban tapno agbalintayo a kas iti Dios.
Isurodatayo ti Nailangitan nga Ama ken ni Jesucristo no ania ti umno ken mangtedda kadagiti bilin a mangiwanwan kadatayo nga agturong iti kinaragsak. Sulisogennatayo ni Satanas nga agaramid iti dakes, a kayatna nga agbalintayo a nakalkaldaang a kas kenkuana. Maipasangotayo iti pagsusupadian iti nagbaetan ti naimbag ken dakes, a kasapulan iti panagsursuro nga agusar iti karbengantayo nga agpili (kitaen iti 2 Nephi 2:11).
Bayat ti panagtungpaltayo iti Dios, dumur-as ken umawattayo kadagiti inkarina a bendision. No agsukirtayo, yadayotayo ti bagitayo Kenkuana ket awatentayo dagiti bunga ti basol. Nupay agparang daytoy no dadduma iti sabali a wagas, ti basol iti agangay ket mangiturong iti kinaliday. Masansan a dagiti bendision ti panagtungpal—ken dagiti epekto ti basol—ket saan a dagus a madlaw wenno makita iti ruar. Ngem siguradoda, gapu ta nalinteg ti Dios.
Uray no aramidentayo ti amin a kabaelantayo, agbasoltayo amin ket “agkurang iti dayag ti Dios” (Taga Roma 3:23). Gapu ta ammona daytoy, nangipaay ti Nailangitan nga Ama iti wagas a makapagbabawitayo tapno makasublitayo Kenkuana.
Ti panagbabawi ti mangisangbay ti bileg ti Mannubbottayo, ni Jesucristo, iti biagtayo (kitaen iti Helaman 5:11). Bayat ti panagbabawitayo, madalusantayo manipud iti basol babaen ti pangsubbot a sakripisio ni Jesucristo ken ti sagut ti Espiritu Santo (kitaen iti 3 Nephi 27:16–20). Babaen ti panagbabawi, mapasarantayo ti rag-o. Naluktan kadatayo ti dalan nga agsubli iti Nailangitan nga Amatayo, ta manangngaasi Isuna. (Kitaen iti “Panagbabawi” iti adalen 3.)
Sursuruen ti Magna babaen ti Pammati
Ti sabali pay a panggep daytoy a biag ket ti pananggun-od iti padas a mabalin nga umay laeng babaen ti pannakaisina iti Nailangitan nga Ama. Gapu ta saantayo a makita Isuna, kasapulan a sursuruentayo ti magna babaen ti pammati (kitaen iti 2 Taga Corinto 5:6–7).
Saannatayo a binaybay-an ti Dios iti daytoy a panagdaliasat. Impaayna ti Espiritu Santo a mangtarabay, mangliwliwa, ken mangpasanto kadatayo. Nangipaay pay kadagiti nasantuan a kasuratan, propeta, kararag, ken ti ebanghelio ni Jesucristo.
Tunggal paset ti mortal a padastayo—dagiti ragsak ken ladingit, dagiti balligi ken pannakapaay—ket matulongandatayo a dumur-as bayat ti panagsaganatayo nga agsubli iti Dios.
Gapu iti Pannakatnag da Adan ken Eva, maipabaklaytayo amin iti basol ken ipapatay. Saantayo a maparmek dagiti epekto ti basol ken ipapatay babaen ti bagbagitayo. Iti plano ti pannakaisalakan ti Nailangitan nga Amatayo, nangipaay isuna iti wagas a mangparmek kadagiti epekto ti Pannakatnag tapno makapagsublitayo Kenkuana. Sakbay a naparsua ti lubong, pinilina ni Jesucristo tapno agbalin a Mangisalakan ken Mannubbottayo.
Ni laeng Jesucristo ti makasubbot kadatayo manipud iti basol ken ipapatay. Isu ti literal nga Anak ti Dios. Nagbiag nga awan basolna, naan-anay a managtungpal iti Amana. Isu ket nakasagana ken situtulok nga agaramid iti pagayatan ti Nailangitan nga Ama.
Ti Pannubbot ti Mangisalakan ket nairaman ti panagsagabana idiay Getsemani, ti panagsagaba ken ipapatayna iti krus, ken ti Panagungarna. Nagsagaba iti labes ti pannakaawat—iti kasta unay a gapu ti panagdarana iti tunggal teterreman (kitaen iti Doktrina ken Katulagan 19:18).
Ti Pannubbot ni Jesucristo ti kadayagan a pasamak iti amin a pakasaritaan ti tao. Babaen ti pangsubbot a sakripisiona, pinagbalin ni Jesus a maipatungpal ti plano ti Ama. Awan koma ti maaramidantayo no awan ti Pannubbot ni Jesucristo gapu ta ditayo maisalakan ti bagbagitayo manipud iti basol ken ipapatay (kitaen iti Alma 22:12–15).
Ti sakripisio ti Mangisalakantayo ket maysa a katan-okan a panangipeksa ti ayat para iti Amana ken para kadatayo. “Ti kalawa, ken kaatiddog, ken kauneg, ken kangato” ti ayat ni Cristo ket mangrimbaw iti pannakaawattayo (Taga Efeso 3:18; kitaen met iti bersikulo 19).
Ladawan
Ti Pannakailansa iti Krus, ni Harry Anderson
Naparmek ni Jesucristo ti Ipapatay para iti Amin
Idi natay ni Jesucristo iti krus, naisina ti espirituna manipud iti bagina. Iti maikatlo nga aldaw, nagtipon manen ti Espiritu ken bagina, a dinto kaano man nga agsina manen. Nagparang Isuna iti adu a tao, a nangipakitaanna kadakuada iti imortal a bagina a nagtagilasag ken tulang. Daytoy a panagtipon manen iti bagi ken espiritu ket maawagan iti Panagungar.
Kas mortal, matay ti tunggal maysa kadatayo. Nupay kasta, gapu ta nagballigi ni Jesus iti patay, agungarto ti tunggal tao a nayanak ditoy daga. Ti Panagungar ket maysa a nadiosan a sagut para iti amin, a naited babaen ti asi ken pangsubbot a parabur ti Mangisalakan. Agtiponto manen ti espiritu ken bagi ti tunggal tao, ket agbiagto ti tunggal maysa kadatayo iti agnanayon iti naan-anay, nagungar a bagi. No saan a gapu ken ni Jesucristo, gibusan koma ti ipapatay ti amin a namnama para iti masakbayan a biag a kadenna ti Nailangitan nga Ama (kitaen iti 2 Nephi 9:8–12).
Pagbalinen ni Jesus a Posible a Madalusantayo Kadagiti Basbasoltayo
Tapno maawatantayo ti namnama a mabalintayo nga awaten babaen ken Cristo, kasapulan a maawatantayo ti linteg ti hustisia. Daytoy ket saan nga agbalbaliw a linteg a mangisangbay kadagiti bunga dagiti aramidtayo. Ti panagtulnog iti Dios ket mangisangbay kadagiti positibo a bunga, ken ti panagsukir mangisangbay kadagiti negatibo a bunga. (Kitaen iti Alma 42:14–18). No agbasoltayo, agbalintayo a narugit iti naespirituan, ket awan ti narugit a banag a makapagnaaed iti imatang ti Dios (kitaen ti 3 Nephi 27:19).
Ladawan
Ni Jesus nga Agkarkararag iti Getsemani, ni Harry Anderson
Kabayatan ti pangsubbot a sakripisio ni Jesucristo, nagtakder Isuna iti lugartayo, nagsagaba, ken nagbayad iti dusa gapu kadagiti basoltayo (kitaen iti 3 Nephi 27:16–20). Ti plano ti Dios ket mangted ken ni Jesucristo iti bileg nga agaramid iti panangibabaet iti biangtayo—nga agtakder iti nagbaetantayo ken ti hustisia (kitaen iti Mosiah 15:9). Gapu iti pangsubbot a sakripisio ni Jesus, mabalinna nga idawat dagiti kalinteganna iti asi iti biangtayo bayat ti panangusartayo iti pammati nga agturong iti panagbabawi (kitaen iti Moroni 7:27; Doktrina ken Katulagan 45:3–5). “Iti kasta mabalin a penken ti asi ti kiddaw ti linteg, ket arakupenna[tayo] iti takiag ti kinatalged” (Alma 34:16).
Babaen laeng ti sagut ti Pannubbot ken panagbabawitayo a makapagsublitayo a makipagnaed iti Dios. Bayat ti panagbabawitayo, mapakawantayo ken madalusantayo iti naespirituan. Mabang-arantayo iti dadagsen ti pannakakonsensia gapu kadagiti basoltayo. Maagasan dagiti nasugatan a kararuatayo. Mapunnotayo iti rag-o (kitaen iti Alma 36:24).
Nupay saantayo a perpekto ken mabalin nga agkurangtayo manen, ad-adu ti parabur, ayat, ken asi ken ni Jesucristo ngem ti pannakapaay, pakapilawan, wenno basol kadatayo. Kanayon a nakasagana ken magagaran ti Dios a mangarakup kadatayo bayat ti panagturongtayo Kenkuana ken agbabawitayo (kitaen iti Lucas 15:11–32). Awan ken awan ti asino man a “makabalin a mangisina kadatayo iti ayat ti Dios, nga adda ken ni Cristo Jesus nga Apotayo” (Taga Roma 8:39).
Inawat ni Jesucristo iti Bagina dagiti Basol, Saem, ken Pagkurangantayo
Iti pangsubbot a sakripisiona, inawat ni Jesucristo iti Bagina dagiti saem, rigat, ken pagkurangantayo. Gapu iti daytoy, ammona “maibatay iti lasag no kasano nga alawenna dagiti taona maibatay kadagiti pagkuranganda” (Alma 7:12; kitaen met iti bersikulo 11). Yawisna, “Umaykayo kaniak,” ket no aramidentayo, ikkannatayo iti inana, namnama, pigsa, pannirigan, ken pannakaagas (Mateo 11:28; kitaen met kadagiti bersikulo 29–30).
Bayat ti panagpannuraytayo ken ni Jesucristo ken iti Pannubbotna, matulongannatayo nga agibtur kadagiti pannubok, sakit, ken saemtayo. Mabalin a mapnotayo iti rag-o, talna, ken liwliwa. Amin a saan a nainkalintegan maipapan iti biag ket maaramid nga umno babaen iti Pannubbot ni Jesucristo.
Gospel Topics: “Jesus Christ,” “Atonement of Jesus Christ,” “Grace”
Ladawan
pamilia a sumarsarungkar iti tanem
Ti Lubong ti Espiritu
Adu a tattao ti agsalsaludsod, “Ania ti mapasamak kalpasan ti ipapatayko?” Ti plano ti pannakaisalakan ti mangipaay iti sumagmamano a napateg a sungbat iti daytoy a saludsod.
Ti ipapatay ket paset ti “manangngaasi a panggep” ti Dios para kadatayo (2 Nephi 9:6). Imbes nga aggibus ti panagbiagtayo, ti ipapatay ti sumaruno nga addang iti agnanayon a panagrang-aytayo. Tapno agbalintayo a kas iti Agnanayon nga Amatayo, nasken a mapadasantayo ti ipapatay ket iti kamaudiananna umawat iti naan-anay, nagungar a bagi.
No matay ti pisikal a bagitayo, agtultuloy nga agbiag ti espiritutayo iti lubong ti espiritu. Daytoy ket temporario a kasasaad ti panagsursuro ken panagsagana sakbay ti Panagungar ken Maudi a Panangukom. Ti pannakaammotayo manipud iti mortal a biag ket agtalinaed kadatayo.
Iti lubong dagiti espiritu, dagiti tao a nangawat ken nagbiag iti ebanghelio ni Jesucristo “maawatda iti kasasaad ti kinaragsak, a maawagan iti paraiso” (Alma 40:12). Maawat met dagiti babassit nga ubbing iti paraiso no matayda.
Makapaginananto a sitatalna dagiti espiritu iti paraiso manipud kadagiti parikutda ken panagleddaangda. Itultuloydanto ti naespirituan a panagdur-asda, nga ar-aramidenda ti trabaho ti Dios ken agministroda kadagiti dadduma. Isurodanto ti ebanghelio kadagiti saan a nakaawat iti daytoy bayat ti mortal a panagbiagda (kitaen iti Doktrina Ken Katulagan 138:32–37, 57–59).
Iti lubong ti espiritu, dagiti tao a saan a nakaawat iti ebanghelio ditoy daga, wenno nangpili a saan a sumurot kadagiti bilin, ket mapadasandanto iti sumagmamano a limitasion (kitaen iti Doktrina ken Katulagan 138:6–37; Alma 40:6–14). Nupay kasta, gapu ta nalinteg ken naasi ti Dios, addaandanto iti gundaway a masuruan iti ebanghelio ni Jesucristo. No awatenda daytoy ken agbabawida, masubbotdanto manipud kadagiti basolda (kitaen iti Doktrina ken Katulagan 138:58; kitaen met iti 138:31–35; 128:22). Mapasangbaydanto iti talna ti paraiso. Umawatdanto iti kamaudianan iti maysa a lugar iti pagarian ti gloria a maibatay kadagiti pili nga inaramidda iti mortalidad ken iti lubong ti espiritu.
Agtalinaedtayo iti lubong ti espiritu agingga nga agungartayo.
Ti Panagungar, Pannakaisalakan, ken Pannakaitan-ok
Panagungar
Ti plano ti Dios ti mamagbalin a posible a dumur-as ken umawattayo iti agnanayon a biag. Kalpasan ti panawentayo iti lubong ti espiritu, ti Panagungar ti sumaruno nga addangtayo iti dayta a panagdur-as.
Ti Panagungar ket ti panagtipon manen ti bagi ken espiritutayo. Agungarto ti tunggal maysa kadatayo. Maaramid daytoy a posible babaen ti Pannubbot ken Panagungar ti Mangisalakan. (Kitaen iti Alma 11:42–44.)
Inton agungartayo, tunggal maysa kadatayo ket maaddaan iti naan-anay a pisikal a bagi, a nawaya iti saem ken sakit. Agbalintayo nga imortal wenno saan a matay, agbibiag iti kinaagnanayon.
Pannakaisalakan
Gapu ta agungartayto amin, maisalakantayo amin—wenno magun-odtayo ti pannakaisalakan—manipud iti pisikal nga ipapatay. Maited daytoy a sagut kadatayo babaen ti parabur ni Jesucristo.
Maisalakantayo met—wenno magun-odtayo ti pannakaisalakan—manipud kadagiti bunga nga idawat a kasapulan ti linteg ti hustisia para iti basbasoltayo. Maaramid pay a posible daytoy a sagut babaen dagiti parabur ken asi ni Jesucristo bayat ti panagbabawitayo. Kitaen iti Alma 43:13–15, 21–25.)
Pannakaitan-ok
Ti pannakaitan-ok, wenno agnanayon a biag, isu ti kangatuan a kasasaad ti ragsak ken gloria iti celestial a pagarian. Ti pannakaitan-ok ket sagut nga adda kondisionna. Insuro ni Presidente Russell M. Nelson, “Dagita a pakaikarian a kasasaad ket mangiraman iti pammati iti Apo, panagbabawi, panagbuniag, panangawat iti Espiritu Santo, ken panagtalinaed a napudno kadagiti ordinansa ken katulagan ti templo” (“Salvation and Exaltation,” Liahona, Mayo 2008, 9).
Ti pannakaitan-ok kayatna a sawen a panagbiag iti denna ti Dios iti agnanayon kadagiti agnanayon a pamilia. Daytoy ti panangammo iti Dios ken ni Jesucristo, panagbalin a kas Kadakuada ken panangpadas iti biag a sagsagrapenda.
Ammuem ti Ad-adu pay maipapan iti Daytoy a Pagbatayan
Pangiwanwan iti Nasantuan a Kasuratan: “Getsemani”
Gospel Topics: “Resurrection,” “Salvation”
Ladawan
ti init a sumingsingising kadagiti ulep
Panangukom ken dagiti Pagarian ti Gloria
Note: No umuna a mangisursuro maipapan kadagiti pagarian ti gloria, mangisuro iti pangrugian a lebel segun kadagiti kasapulan ken pannakaawat ti maysa a tao.
Inton agungartayo, ni Jesucristo ti agbalinto a nalinteg ken naasi nga ukomtayo. Malaksid iti sumagmamano unay nga eksepsion, umawatto ti tunggal maysa kadatayo iti maysa a lugar iti pagarian ti gloria. Nupay agungartayto amin, saantayto nga umawat amin iti maymaysa nga agnanayon a gloria (kitaen iti Doktrina Ken Katulagan 88:22–24, 29–34; 130:20–21; 132:5).
Dagiti indibidual a saan a naaddaan iti gundaway a naan-anay a makaawat ken agtungpal kadagiti linteg ti Dios bayat ti panagbiagda ditoy daga ket maikkandanto iti dayta a gundaway iti lubong ti espiritu. Ukomento ni Jesus ti tunggal tao segun iti pammatina, aramid, tarigagay, ken panagbabawina iti mortalidad ken iti lubong ti espiritu (kitaen iti Doktrina Ken Katulagan 138:32–34, 57–59).
Isuro dagiti nasantuan a kasuratan ti celestial, terrestrial, ken telestial a pagarian ti gloria. Tunggal maysa kadagitoy ket pannakaiparangarang ti ayat, hustisia, ken asi ti Dios.
Dagidiay mangaramat iti pammati ken ni Cristo, agbabawi iti basbasolda, umawat kadagiti ordinansa ti ebanghelio, agtungpal kadagiti katulaganda, umawat iti Espiritu Santo, ket agibtur agingga iti panungpalan ket maisalakandanto iti celestial a pagarian. Daytoy a pagarian ket iramanna pay dagiti tao a saan a naaddaan iti gundaway nga umawat iti ebanghelio bayat ti panagbiagda ditoy daga ngem “inawatda koma daytoy a sipupuso” ken inaramidda dayta iti lubong ti espiritu (Doktrina ken Katulagan 137:8; kitaen met iti bersikulo 7). Dagiti ubbing a natay sakbay ti tawen a kaadda ti sungsungbatan (agtawen iti walo) ket maisalakandanto met iti celestial a pagarian (kitaen ti Doktrina ken Katulagan 137:10).
Kadagiti nasantuan a kasuratan, maidilig ti celestial a pagarian iti dayag wenno kinaraniag ti init. (Kitaen iti Doktrina ken Katulagan 76:50–70.)
Dagiti tao a nagbiag iti nadayaw a biag “a di nangawat iti pammaneknek ni Jesus iti lasag, ngem naawatda kalpasanna” ket umawatdanto iti maysa a lugar iti terrestrial a pagarian (Doktrina ken Katulagan 76:74). Kasta met laeng kadagiti saan a natured iti pammaneknekda ken Jesus. Maipada daytoy a pagarian iti dayag ti bulan. (Kitaen iti Doktrina Ken Katulagan 76:71–80.)
Dagiti nagtultuloy iti basbasolda ken saan a nagbabawi iti daytoy a biag wenno saan a nangawat iti ebanghelio ni Jesucristo iti lubong ti espiritu ket umawatdanto iti gunggonada iti telestial a pagarian. Maipada daytoy a pagarian iti dayag dagiti bituen. (Kitaen iti Doktrina Ken Katulagan 76:81–86.)
Ababa agingga iti Kalalainganna a Balabala ti Adalen
Ti sumaganad a balabala ket maysa a pagarigan a mabalinyo nga isuro iti maysa a tao no ababa laeng ti panawenyo. No us-usarenyo daytoy a balabala, pilien ti maysa wenno ad-adu pay a pagbatayan nga isuro. Ti pundasion a mainaig iti doktrina para iti tunggal pagbatayan ket naited a nasapsapa iti adalen.
Bayat ti panangisuroyo, agsaludsod ken dumngegkayo. Mangtedkayo kadagiti awis a makatulong kadagiti tao a makasursuro no kasano ti umasideg iti Dios. Maysa a napateg nga awis ket makipagkita manen ti tao kadakayo. Agpannurayto ti kaatiddog ti adalen kadagiti saludsod a damagenyo ken iti panagdengngegyo.
No Ania ti Mabalin nga Isuroyo iti Tattao iti 3–10 a Minuto
Espiritu nga annaknatayo amin ti Dios. Miembrotayo ti pamiliana. Am-ammo ken ay-ayatenna ti tunggal maysa kadatayo.
Nangipaay ti Dios iti plano para iti ragsak ken panagdur-astayo ditoy a biag ken iti kinaagnanayon.
Iti plano ti Dios, kasapulan nga umaytayo ditoy daga tapno umawat kadagiti pisikal a bagi, agsursuro, ken dumur-as.
Ni Jesucristo ti sentro iti plano ti Dios. Aramidenna a posible a maaddaantayo iti agnanayon a biag.
Babaen ti panangiturong ti Dios, pinarsua ni Jesus ti daga.
Dagiti padastayo ditoy daga ket nairanta a tumulong kadatayo nga agsagana nga agsubli iti imatang ti Dios.
Agbasol ti tunggal maysa kadatayo, ket matay ti tunggal maysa kadatayo. Gapu ta ay-ayatennatayo ti Dios, imbaonna ditoy daga ti Anakna, ni Jesucristo tapno subbotennatayo manipud iti basol ken ipapatay.
Amin a saan a nainkalintegan iti biag ket maaramid nga umno babaen iti Pannubbot ni Jesucristo.
No matay ti pisikal a bagitayo, agtultuloy nga agbiag ti espiritutayo. Iti kamaudiananna, agungartayonto amin. Kayatna a sawen a mapagkaykaysanto manen ti espiritu ken bagi ti tunggal tao, ken tunggal maysa kadatayo ket agbiagto iti agnanayon iti maysa a naan-anay, nagungar a bagi.
Inton mapagungartayo, ni Jesucristo ti agbalin nga ukomtayo. Malaksid iti sumagmamano nga eksepsion, umawat amin dagiti annak ti Dios iti lugar iti pagarian ti dayag. Mabalintayo ti agsubli nga agindeg iti imatang ti Dios no napudnotayo.