“Kapitulo 3: Adalen 3—Ti Ebanghelio ni Jesucristo,” Ikasaba ti Ebangheliok: Maysa a Pangiwanwan iti Panangibinglay iti Ebanghelio ni Jesucristo (2023)
“Kapitulo 3: Adalen 3,” Ikasaba ti Ebangheliok
Kapitulo 3: Adalen 3
Ti Ebanghelio ni Jesucristo
Ladawan
Ti Maikadua a Yaay, ni Harry Anderson
Mabalin a Masdaaw dagiti Tao
Asino ni Jesucristo? Kasano a matulongannak ken ti pamiliak?
Ania ti kayat a sawen ti maaddaan iti pammati ken ni Jesucristo? Kasano a maparaburan ti kaadda ti pammatik Kenkuana ti biagko?
Ania ti kaipapanan ti agbabawi?
Kasano a mariknak ti talna ken pammakawan ti Dios kalpasan a nakaaramidak kadagiti dakes a pili?
Ania ti panggep ti panangbuniag?
Ania ti sagut ti Espiritu Santo?
Ania ti kayat a sawen ti agibtur agingga iti panungpalan?
Ti ebanghelio ni Jesucristo ket no kasano nga umaytayo ken ni Cristo. Simple laeng daytoy ta maawatan uray ti maysa a bassit nga ubing daytoy. Maipamaysa daytoy nga adalen iti ebanghelio ken doktrina ni Cristo, agraman ti pammati ken ni Cristo, panagbabawi, panagbuniag, panangawat iti sagut ti Espiritu Santo, ken panagibtur agingga iti panungpalan. Ipamaysana pay no kasano a bendisionan ti ebanghelio dagiti amin nga annak ti Dios.
Ti balikas nga ebanghelio literal a kayatna a sawen ti “naimbag a damag.” Naimbag a damag ti ebanghelio ni Jesucristo gapu ta ipaayna ti doktrina—ti agnanayon a kinapudno—nasken nga umasidegtayo Kenkuana ken maisalakan (kitaen iti 1 Nephi 15:14). Isuronatayo ti ebanghelio no kasano ti agbiag iti nasayaat, napnuan iti kaipapanan a panagbiag. Ti naimbag a damag ti ebanghelio ket mangipaay iti wagas tapno mapakawantayo kadagiti basol, mapasanto, ken makapagsublitayo iti imatang ti Dios.
Dagiti Singasing para iti Panangisuro
Daytoy a benneg ti mangipaay iti pagarigan a balabala a mangtulong kadakayo nga agsagana a mangisuro. Iramanna pay dagiti pagarigan dagiti saludsod ken awis a mabalinyo nga usaren.
Bayat ti panagsaganayo a mangisuro, sikararag nga ibilangyo ti kasasaad ken dagiti naespirituan a kasapulan ti tunggal tao. Ikeddeng no anianto ti kangrunaan a makatulong iti panangisuro. Agsagana a mangilawlawag iti kaipapanan dagiti termino a mabalin a saan a maawatan dagiti tao. Agplano segun iti no kasano ti kaadunto ti orasyo, a laglagipenyo a pagtalinaeden nga ababa dagiti adalen.
Pumilikayo kadagiti nasantuan a kasuratan nga usaren bayat ti panangisuroyo. Ti benneg a “Pundasion a Mainaig iti Doktrina” ti adalen ket mangiraman iti adu a makatulong a nasantuan a kasuratan.
Ibilangyo no ania dagiti saludsod a madamag bayat ti panangisuroyo. Mangplano kadagiti awis nga ited a mangparegtanto iti tunggal tao nga agtignay.
Yunay-unay dagiti bendision nga inkari ti Dios, ken ibinglayyo ti pammaneknekyo maipapan iti isursuroyo.
Ladawan
dagiti misionario a mangisursuro iti pamilia
No Ania ti Mabalin nga Isuroyo kadagiti Tao iti 15–25 a Minuto
Mangpili iti maysa wenno ad-adu pay kadagiti sumaganad a pagbatayan nga isuro. Maited ti pundasion a mainaig iti doktrina para iti tunggal pagbatayan kalpasan daytoy a balabala.
Ti Nadiosan a Mision ni Jesucristo
Imbaon ti Dios ditoy daga ti Ay-ayatenna nga Anakna, ni Jesucristo, tapno subbotennatayo manipud iti basol ken ipapatay.
Gapu iti pangsubbot a sakripisio ni Jesus, madalusantayo iti basbasoltayo ken mapasantotayo no agbabawitayo.
Kalpasan ti pannakailansa iti krus ni Jesus, nagungar Isuna. Gapu iti Panagungarna, agungartayonto amin kalpasan ti ipapataytayo. Kayatna a sawen a mapagkaykaysanto manen ti espiritu ken bagi ti tunggal tao, ken tunggal maysa kadatayo ket agbiagto iti agnanayon iti maysa a naan-anay, nagungar a bagi.
Pammati ken ni Jesucristo
Ti pammati ti umuna a pagbatayan ti ebanghelio ni Jesucristo.
Ti pammati ken ni Jesucristo iramanna ti kaadda ti panagtalek nga Isu ti Bugbugtong nga Anak ti Dios ken panagtalek kenkuana kas Mangisalakan ken Mannubbottayo.
Ti pammati ken ni Jesucristo ket maysa a pagbatayan ti aramid ken bileg.
Mapapigsatayo ti pammatitayo babaen ti panagkararag, panagadal kadagiti nasantuan a kasuratan, ken panagtungpal kadagiti bilin.
Panagbabawi
Ti pammati ken ni Jesucristo ti mangiturong kadatayo nga agbabawi. Ti panagbabawi ket ti proseso ti panagturong iti Dios ken panangtallikud iti basol. Bayat ti panagbabawitayo, agbalbaliw dagiti aramid, tarigagay, ken panunottayo tapno ad-adda a maitunos iti pagayatan ti Dios.
No sipupudno nga agbabawitayo, pakawanennatayo ti Dios. Posible ti pannakapakawan gapu ta sinubbot ni Jesucristo dagiti basoltayo.
Bayat ti panagbabawitayo, mariknatayo ti talna no maagasan ti basol ken ladingittayo.
Ti panagbabawi ket agtultuloy a proseso iti tungpal biag. Awatennatayo manen ti Dios tunggal agbabawitayo. Iti kaano man saanto a sumuko kadatayo.
Panagbuniag: Ti Umuna a Katulagantayo iti Dios
Ti panagbuniag ket no kasano nga umuna a sumrektayo iti natulagan a relasion iti Dios.
Adda dua a paset ti panagbuniag: panagbuniag babaen ti danum ken babaen ti Espiritu. No mabuniagan ken makumpirmaantayo, madalusantayo iti basbasoltayo, a mangmangted kadatayo iti baro a pangrugian iti biag.
Mabuniagantayo babaen ti pannakairarem, a mangsursurot iti pagwadan ni Jesus.
Saan a mabuniagan dagiti ubbing agingga a saanda nga agtawen iti walo. Dagiti ubbing a matay sakbay dayta nga edad ket masubbot babaen ti Pannubbot ni Jesucristo.
Makiranudtayo iti sakramento iti tunggal lawas tapno lagipen ti sakripisio ni Jesus ken tapno pabaruen dagiti katulagantayo iti Dios.
Ti Sagut ti Espiritu Santo
Ti Espiritu Santo ti maikatlo a miembro ti Kinadios.
Kalpasan ti pannakabuniagtayo, awatentayo ti sagut ti Espiritu Santo babaen iti ordinansa ti kumpirmasion.
No awatentayo ti sagut ti Espiritu Santo, maaddaantayo ti panangkadkaduana iti unos ti panagbiagtayo no napudnotayo.
Ti Espiritu Santo ti mangpasanto kadatayo, mangtarabayto kadatayo, mangliwliwanto kadatayo, ken mangtulongto kadatayo a mangammo iti kinapudno.
Agibtur agingga iti Panungpalan
Ti panagibtur iramanna ti agtultuloy a panangaramat iti pammati ken Cristo iti inaldaw. Itultuloytayo ti agtungpal kadagiti katulagantayo iti Dios, agbabawi, agkalikagum a manggun-od iti panangkadkadua ti Espiritu Santo, ken makiranud iti sakramento.
Bayat ti sipupudno a panagkalikagumtayo a sumurot ken ni Jesucristo, ikari ti Dios a maaddaantayto iti agnanayon a biag.
Bendisionan ti Ebanghelio ni Jesucristo Amin nga Annak ti Dios
Ti panagbiag iti ebanghelio ti mangpalaus kadagiti ragsaktayo, mangparegta kadagiti aramidtayo, ken mangpabaknang kadagiti relasiontayo.
Kaaduanna a naragsaktayo—agpadpada a kas indibidual ken kas pamilia—no agbiagtayo babaen kadagiti pannursuro ni Jesucristo.
Babaen iti ebanghelio ni Jesucristo, mabendisionan dagiti pamilia iti daytoy a biag ken mabalinda ti agkaykaysa iti agnanayon ken agbiag iti imatang ti Dios.
Dagiti Saludsod a Mabalinyo a Damagen kadagiti Tao
Dagiti sumaganad a saludsod ket dagiti pagarigan ti mabalin a damagenyo kadagiti tao. Makatulong kadakayo dagitoy a saludsod tapno maaddaankayo iti napnuan kaipapanan a panagsasarita ken maawatanyo dagiti kasapulan ken pannirigan ti maysa a tao.
Ania ti ammom maipapan ken ni Jesucristo?
Ania ti kayat a sawen para kenka ti maaddaan iti pammati ken ni Jesucristo?
Ania dagiti panagbalbaliw a kayatmo nga aramiden iti biagmo?
Ania ti maawatam iti panagbabawi?
Ania ti maawatam iti panagbuniag? Ania ti maaramidmo itan nga agsagana para iti panagbuniag?
Kasano a matulongannaka ti Espiritu Santo iti panagdaliasatmo nga agsubli iti imatang ti Dios?
Ania ti karit a sangsanguenyo wenno ti pamiliayo? Mabalin kadi nga ibinglaymi ti sumagmamano a wagas a makatulong ti ebanghelio ni Jesucristo?
Dumar-aykanto kadi iti simbaan iti daytoy a Domingo tapno masursurom ti ad-adu pay maipapan iti insuromi?
Basaemto kadi ti Libro ni Mormon ken agkararagka tapno maammuam a balikas ti Dios daytoy? (Mabalinmo nga isingasing dagiti masinunuo a kapitulo wenno bersikulo.)
Mabalinmi kadi ti mangyiskediul iti oras para iti sumaruno nga isasarungkarmi?
Pundasion a Mainaig iti Doktrina
Mangipaay daytoy a benneg iti doktrina ken nasantuan a kasuratan nga adalenyo tapno mapatibker ti pannakaammo ken pammaneknekyo iti ebanghelio ken tapno matulongannakayo a mangisuro.
Ladawan
Dagitoy Sangapulo-ket-dua nga Imbaon ni Jesus, ni Walter Rane
Ti Nadiosan a Mision ni Jesucristo
Imbaon ti Nailangitan nga Ama ditoy daga ti Ay-ayatenna nga Anakna, ni Jesucristo, tapno aramidenna a posible a mapasarantayo amin ti rag-o iti daytoy a lubong ken agnanayon a biag iti lubong nga umay. “Ket daytoy ti ebanghelio,… ti naimbag a damag, nga immay [ni Jesucristo] iti lubong … mangimet kadagiti basol ti lubong, ken mangpasanto iti lubong, ken mangugas itoy manipud iti amin a kinadakes; a babaen kenkuana mabalin a maisalakan ti amin” (Doktrina ken Katulagan 76:40–42).
Kas mortal, agbasoltayo amin, ken mataytayo amin. Ti basol ken ipapatay ti manglapped kadatayo a maaddaan iti agnanayon a biag iti denna ti Dios malaksid no addaantayo iti Mannubbot (kitaen iti 2 Nephi 9). Sakbay a naparsua ti lubong, pinili ti Nailangitan nga Amatayo ni Jesucristo a mangsubbot kadatayo. Iti katan-okan a panangipeksa iti ayat, immay ni Jesus ditoy daga ket impatungpalna daytoy a nadiosan a mision. Inaramidna a posible a masubbottayo manipud kadagiti basoltayo, ken siniguradona nga agungartayto amin kalpasan ti ipapataytayo.
Nagbiag ni Jesucristo iti awan basolna a biag. Iti gibus ti panangministrona iti daga, inawatna iti Bagina ti basbasoltayo babaen ti panagsagabana iti Getsemani ken idi nailansa Isuna iti krus (kitaen iti 1 Nephi 11:33). Nakaro ti panagsagaba ni Jesus a nakaigapuan “nga aggarigenggen gapu iti saem, ken agdara iti tunggal teterreman” (Doktrina ken Katulagan 19:18). Kalpasan ti Pannakailansana iti Krus, nagungar ni Jesus, a manggungun-od iti balligi iti ipapatay. No pagkaykaysaen, dagitoy a pasamak ti Pannubbot ni Jesucristo.
Ngem dagiti basoltayo ti mangaramid a naespirituan a narugittayo ket “awan ti narugit a banag a mabalin a makipagnaed iti Dios” (1 Nephi 10:21). Mainayon pay, ti linteg ti hustisia agkasapulan iti bunga dagiti basoltayo.
Ti pangsubbot a sakripisio ni Jesus ti mangipaay iti wagas tapno madalusantayo iti basbasoltayo ken mapasantotayo no agbabawitayo. Mangipaay pay daytoy iti wagas a mangpennek kadagiti kasapulan ti hustisia (kitaen iti Alma 42:15, 23–24). Kinuna ti Mangisalakan, “Siak … sinagabak dagitoy a banag para iti amin, tapno saanda koma nga agsagaba no agbabawida; ngem no saanda nga agbabawi nasken nga agsagabada a kas kaniak” (Doktrina ken Katulagan 19:16–17). No saan a gapu ken ni Jesucristo, gibusan koma ti basol ti amin a namnama para iti masakbayan a biag a kadenna ti Nailangitan nga Ama.
Iti panangidatonna iti bagina kas sakripisio para kadatayo, saan nga inikkat ni Jesus ti bukodtayo a pagrebbengan. Nasken nga adda pammatitayo Kenkuana, agbabawi, ken ikagumaantayo ti agtungpal kadagiti bilin. Kabayatan ti panagbabawitayo, idawatto ni Jesus iti biangtayo dagiti karbenganna iti asi ti Amana (kitaen iti Moroni 7:27–28). Gapu iti panangibabaet ti Mangisalakan, pakawanennatayo ti Nailangitan nga Ama, a pagin-awaennatayo iti dadagsen ken pannakakonsensia gapu iti basbasoltayo (kitaen iti Mosiah 15:7–9). Madalusantayo a naespirituan ket kamaudiananna mabalintayo a mapasangbay iti imatang ti Dios.
Ti nadiosan a mision ni Jesus ket ti mangisalakan pay kadatayo manipud iti ipapatay. Gapu ta nagungar Isuna, agungartayto amin kalpasan ti ipapataytayo. Kayatna a sawen a mapagkaykaysanto manen ti espiritu ken bagi ti tunggal tao, ken tunggal maysa kadatayo ket agbiagto iti agnanayon iti maysa a naan-anay, nagungar a bagi. No saan a gapu ken ni Jesucristo, gibusan koma ti ipapatay ti amin a namnama para iti masakbayan a panagbiag a kadenna ti Nailangitan nga Ama.
Pangiwanwan iti Nasantuan a Kasuratan: “Jesucristo”
Gospel Topics: “Jesus Christ”
Pammati ken ni Jesucristo
Ti umuna a pagbatayan ti ebanghelio ket pammati ken ni Apo Jesucristo. Ti pammati ti pundasion ti amin a dadduma pay a pagbatayan ti ebanghelio.
Ti pammati ken ni Jesucristo iramanna ti kaadda ti panagtalek nga Isu ti Bugbugtong nga Anak ti Dios. Iramanna ti panagtalek Kenkuana kas Mangisalakan ken Mannubbottayo—nga Isu laeng ti dalantayo nga agsubli iti imatang ti Dios (kitaen iti Dagiti Aramid 4:10–12; Mosiah 3:17; 4:6–8). Naawistayo a mangaramat “iti natibker a pammati kenkuana, a naan-anay nga agpannuray kenkuana a mannakabalin a mangisalakan” (2 Nephi 31:19).
Ti pammati ken ni Jesucristo iramanna ti panangpati a nagsagaba Isuna para iti basbasoltayo iti panangsubbot a sakripisiona. Gapu iti sakripisiona, madalusantayo iti basbasoltayo no agbabawitayo. Daytoy a panangdalus ti mangtulong kadatayo a mangsapul iti talna ken ragsak iti daytoy a biag. Palubosannatayo pay nga umawat iti naan-anay a rag-o kalpasan ti ipapataytayo.
Ti pammati ken ni Jesucristo ket iramanna ti panagtalek a babaen Kenkuana, agungartayto amin kalpasan ti ipapataytayo. Daytoy a pammati ti makasaranay ken makaliwliwa kadatayo kadagiti panawen ti pannakapukaw. Ti panagleddaang iti ipapatay ket mabalin a maiwaksi babaen iti kari ti Panagungar.
Ti pammati ken ni Jesucristo iramanna ti panangpati ken panagtalek nga inawatna iti Bagina dagiti rigat ken kinakapuytayo (kitaen iti Isaias 53:3–5). Ammona babaen ti padasna no kasano a siaasi a suportarannatayo kadagiti karit ti biag (kitaen iti Alma 7:11–12; Doktrina ken Katulagan 122:8). Bayat ti panangaramattayo iti pammati, tulongannatayo nga agtultuloy kadagiti rigat.
Babaen iti pammatitayo Kenkuana, maagasannatayo ni Jesus iti agpada iti bagi ken espiritu. Kanayon a nakasagana a tumulong kadatayo bayat ti pananglaglagiptayo iti awisna a “kitaendak iti tunggal panunot; saankayo nga agduadua, saankayo nga agbuteng” (Doktrina ken Katulagan 6:36).
Maysa a Pagbatayan ti Aramid ken Bileg
Mangiturong ti pammati ken ni Jesucristo iti aramid. Yebkastayo ti pammatitayo babaen ti panagtungpal kadagiti bilin ken panagaramid iti naimbag iti inaldaw. Agbabawitayo kadagiti basoltayo. Nasungdotayo Kenkuana. Agkagumaantayo nga agbalin nga ad-adda a kas Kenkuana.
Bayat ti panangaramattayo iti pammati, mapasarantayo ti bileg ni Jesus iti inaldaw a panagbiagtayo. Padakkelenna dagiti bukodtayo a kasayaatan a panagkagumaan. Tulongannatayo a dumur-as ken mangsupring iti sulisog.
Panangpapigsa iti Pammatitayo
Insuro ni propeta Alma a ti panangbangon iti pammati ket mabalin a mangrugi iti simple a “tarigagay a mamati” (Alma 32:27). Kalpasanna, tapno dumakkel ti pammatitayo ken ni Jesucristo, nasken nga aywanantayo daytoy babaen ti panangsursuro kadagiti balikasna, panangyaplikar kadagiti pannursurona, ken panangtungpal kadagiti bilinna. Insuro ni Alma a bayat ti siaanus, sipapasnek a panangtaraontayo iti balikas ti Dios iti puspusotayo, “agramutto [ken agbalinto] a kayo a rumangrangpaya nga agturong iti agnanayon a biag”—iti kasta mapatibker ti pammatitayo (Alma 32:41; kitaen dagiti bersikulo 26–43).
Gospel Topics: “Jesus Christ,” “Atonement of Jesus Christ,” “Faith in Jesus Christ”
Panagbabawi
Ania ti Panagbabawi?
Ti panagbabawi ti maikadua a pagbatayan ti ebanghelio. Ti pammati ken ni Jesucristo ken ti panagayattayo Kenkuana ti mangiturong kadatayo nga agbabawi (kitaen iti Helaman 14:13). Ti panagbabawi ket ti proseso ti panagturong iti Dios ken panangtallikud iti basol. Bayat ti panagbabawitayo, agbalbaliw dagiti aramid, tarigagay, ken panunottayo tapno ad-adda a maitunos iti pagayatan ti Dios. Ti pannakapakawan ti basol ket maaramid a posilbe babaen ken ni Jesucristo ken ti pangsubbot a sakripisiona.
Ti panagbabawi ket ad-adda nga amang ngem ti panangaramat iti bileg ti pagayatan a mangbalbaliw iti maysa nga ugali wenno mangparmek iti maysa a pagkapsutan. Ti panagbabawi ket sipapasnek a panagturong ken Cristo, a mangted kadatayo iti bileg a mangpadas iti “naindaklan a panagbalbaliw” iti puspusotayo (Alma 5:12–14). Bayat ti pannakapadastayo iti daytoy a panagbalbaliw ti puso, mayanaktayo manen a naespirituan (kitaen iti Mosiah 27:24–26).
Babaen iti panagbabawi mapadur-astayo ti baro a pannirigan ti Dios, ti bagbagitayo, ken ti lubong. Mariknatayo manen ti ayat ti Dios kadatayo kas annakna—ken ti ayat ti Mangisalakantayo kadatayo. Ti gundaway nga agbabawi ket maysa kadagiti kaindaklanan a bendision nga inted kadatayo ti Dios babaen ti Anakna.
Proseso ti Panagbabawi
No agbabawitayo, bigbigentayo dagiti basoltayo ken mariknatayo ti napudno a panagbabawi. Ipudnotayo dagiti basoltayo iti Dios ken dumawattayo iti pammakawanna. Ipudnotayo pay dagiti nadagsen a basoltayo kadagiti pinusgan ti Dios a lider ti Simbaan, a mangsuporta kadatayo no agbabawitayo. Aramidentayo ti kabaelantayo tapno makaaramid iti pannakaisubli, a kayatna a sawen, mangikarkarigatan a mangatur kadagiti parikut a mabalin a pinataud dagiti aramidtayo. Ti pudno a panagbabawi ket kasayaatan a maipakita babaen kadagiti nalinteg nga aramid iti las-ud ti maysa a panawen.
Ti panagbabawi ket inaldaw a proseso iti unos ti panagbiagtayo. “Isuda amin nagbasolda, ket agkurangda iti dayag ti Dios” (Taga Roma 3:23). Nasken nga agtultuloytayo nga agbabawi, a laglagipentayo a “maaramid[tayo] ti amin a banag babaen ken Cristo a mangpapigsa kadatayo” (Taga Filipos 4:13). Impanamnama ti Apo kadatayo a “kas iti kaadu ti panagbabawi dagiti taok ti panangpakawankonto iti naglabsinganda” (Mosiah 26:30).
Dagiti Bendision ti Panagbabawi
Ti panagbabawi ket maysa a positibo a pagbatayan a mangyeg iti rag-o ken talna. Daytoy ti mangyeg kadatayo iti “bileg ti Mannuboot, iti pannakaisalakan dagiti kararuada” (Helaman 5:11).
No agbabawitayo, maagasan ti basol ken ladingittayo bayat ti panaglabas ti panawen. Mariknatayo a dumakdakkel ti impluensia ti Espiritu. Pumigpigsa ti tarigagaytayo a mangsurot iti Dios.
Ladawan
Presidente Russell M. Nelson
“Ibilang ti adu a tattao ti panagbabawi a kas dusa—maysa a banag a liklikan. … Ngem daytoy rikna a pannakadusa ket gapuanan ni Satanas. Padasenna ti manglapped kadatayo iti panangkita ken Jesucristo, a nakatanggaya ti takiagna, a mangnamnama ken nakasagana a mangagas, mamakawan, mangdalus, mangpapigsa, mangpatarnaw, ken mangpasanto kadatayo,“ (Russel M. Nelson, “We Can Do Better and Be Better,” Ensign wenno Liahona, Mayo 2019, 67).
Gospel Topics: “Repentance,” “Atonement of Jesus Christ”
Ladawan
agtutubo a babai a mabumbuniagan
Panagbuniag: Ti Umuna a Katulagantayo iti Dios
Ti pammati ken ni Jesucristo ken panagbabawi ket mangisagana kadatayo para kadagiti ordinansa ti panagbuniag ken kumpirmasion. Ti panagbuniag ti umuna a pangisalakan nga ordinansa ti ebanghelio ni Jesucristo. Bayat ti panangawattayo iti daytoy naragsak nga ordinansa ti namnama, aramidentayo ti umuna a katulagantayo iti Dios.
Ti ordinansa ket maysa a sagrado nga aramid wenno seremonia a maannong babaen ti turay ti priesthood. Sumagmamano nga ordinansa, kas iti panagbuniag, ket kasapulan para iti pannakaisalakantayo.
Babaen dagiti ordinansa, agaramidtayo kadagiti katulagan iti Dios. Dagitoy a katulagan ket sagrado a kari iti nagbaetantayo ken iti Dios. Ikarina a bendisionannatayo no tungpalentayo dagiti karitayo Kenkuana. Nasken nga adda napigsa a panagkumittayo nga agtungpal kadagiti karitayo iti Dios.
Impaay ti Dios dagiti ordinansa ken katulagan a mangtulong kadatayo nga umasideg Kenkuana ken maaddaan iti agnanayon a biag. Bayat ti panangawattayo kadagiti ordinansa ti priesthood ken panangsalimetmettayo kadagiti nainaig a katulagan, mapasarantayo ti “bileg ti kinadios” iti biagtayo (Doktrina ken Katulagan 84:20).
Ti Katulagan iti Panagbuniag
Insuro ti Mangisalakan a kasapulan ti panagbuniag tapno makastrektayo iti pagarian ti langit (kitaen iti Juan 3:5). Kasapulan pay daytoy iti panagbalintayo a miembro ti Simbaan ni Jesucristo. Ti Mangisalakantayo ti nangipakita iti pagwadan ti pannakabuniag (kitaen iti Mateo 3:13–17).
No mabuniagan ken tungpalentayo ti katulagantayo, ikari ti Dios a pakawanenna dagiti basoltayo (kitaen iti Dagiti Aramid 22:16; 3 Nephi 12:1–2). Daytoy naindaklan a bendision ket maaramid a posible babaen ti pangsubbot a sakripisio ni Jesucristo, a “nagayat kadatayo, ken nangugas kadatayo kadagiti basoltayo iti bukodna a dara” (Apocalipsis 1:5). Ikari pay ti Dios a bendisionannatayo iti pannakikadkadua ti Espiritu Santo tapno mapasanto, maiwanwan, ken maliwliwatayo.
Iti pasettayo iti katulagan ti panagbuniag, masaksiantayo a situtuloktayo a mangawat iti bagbagitayo iti nagan ni Jesucristo. Ikaritayo a kanayon a laglagipen Isuna ken tungpalen dagiti bilinna. Ikaritayo nga ayaten ken pagserbiantayo dagiti dadduma, “makipagladingit kadagiti agladladingit; … manglinglingay kadagiti makasapul iti pannakalinglingay, ken agtakder a saksi ti Dios iti amin a kanito ken iti amin a banag, ken iti amin a lugar” (Mosiah 18:9; kitaen met dagiti bersikulo 8–10, 13). Ipeksatayo ti determinasion nga agserbi ken Jesucristo agingga iti panungpalan ti biagtayo (kitaen iti Doktrina ken Katulagan 20:37; Mosiah 2:17).
Dakkel a pagrebbengan dagiti panagkumittayo iti katulagan a mainaig iti panagbuniag. Makaparegta ken makaparagsak pay dagitoy. Mangparnuayda iti naisangsangayan a relasion iti nagbaetantayo ken iti Nailangitan nga Ama nga agnanayon a pangtedanna iti ayatna.
Panagbuniag babaen ti Pannakairarem
Insuro ni Jesus a kasapulantayo ti mabuniagan babaen ti pannakairarem para iti pannakapakawan dagiti basoltayo (kitaen iti Doktrina ken Katulagan 20:72–74). Ti panagbuniag babaen ti pannakairarem ket mangisimbolo iti pannakatay, pannakaitanem, ken Panagungar ni Jesucristo (kitaen iti Taga Roma 6:3–6).
Addaan pay iti nabileg a simbolismo para kadatayo mismo ti panagbuniag babaen ti pannakairarem. Daytoy ti mangibagi iti ipapatay ti sigud a biagtayo, ti pannakaitabon dayta a biag, ken ti itataudtayo iti naespirituan a pannakayanak manen. No mabuniagantayo mangrugitayo iti proseso ti pannakayanak manen ken panagbalintayo a naespirituan nga annak a lallaki ken babbai ni Cristo (kitaen iti Mosiah 5:7–8; Taga Roma 8:14–17).
Annak
Nasken a saanda a mabuniagan agingga a dida madanon ti tawen a kaadda ti sungsungbatanda, nga agtawen iti walo (kitaen iti Doktrina ken Katulagan 68:27). Dagiti ubbing a matay sakbay dayta nga edad ket masubbotda babaen ti Pannubbot ni Jesucristo (kitaen iti Moroni 8:4–24; Doktrina ken Katulagan 137:10). Sakbay a mabuniagan dagiti ubbing, nasken a maisuro kadakuada ti ebanghelio tapno maisaganada para iti daytoy napateg nga addang iti biagda tapno makaaramidda iti katulagan iti Dios.
Ti Sakramento
Kayat ti Nailangitan nga Ama nga agbalintayo a napudno kadagiti katulagan nga aramidentayo Kenkuana. Tapno matulongannatayo a mangaramid iti daytoy, binilinnatayo a masansan nga agmimitingtayo tapno makiranud iti sakramento. Ti sakramento ket maysa nga ordinansa ti priesthood nga inyam-ammo ni Jesucristo kadagiti Apostolna kasakbayan laeng ti Pannubbotna.
Ti pannakiranud iti sakramento ti kangrunaan a panggep ti miting ti sakramento iti tunggal lawas. Mabendisionan ti tinapay ken danum ken maibunong iti kongregasion. Ti tinapay ti mangibagi iti sakripisio ti Mangisalakan iti bagina para kadatayo. Ti danum ti mangibagi iti darana, a nagsayasay para kadatayo.
Makiranudtayo kadagitoy nga emblem kas panglaglagip iti sakripisio ti Mangisalakan ken tapno mangpabaro kadagiti katulagantayo iti Dios. Umawattayo manen iti kari a kaduaennatayonto ti Espiritu.
Addaan dua a paset ti panagbuniag. Insuro ni Jesus a nasken kadatayo ti “mayanak iti danum ken iti Espiritu, tapno makastrek iti pagarian ti Dios (Juan 3:5; nainayon ti panangyunay-unay). Insuro ni Joseph Smith, “Ti panagbuniag babaen iti danum ket kagudua laeng ti panagbuniag, ken awan ti serbina no awan ti sabali pay a kaguduana—a dayta ti, panagbuniag ti Espiritu Santo” (Teachings of Presidents of the Church: Joseph Smith [2007],95).
Ti panagbuniag babaen iti danum ket nasken a sarunuen ti panagbuniag iti Espiritu tapno kumpleto. No awatentayo ti agpada a panagbuniag, madalusantayo iti basbasoltayo ken naespirituan a mayanaktayo manen. Kalpasanna mangrugitayon iti baro a naespirituan a biag kas disipulo ni Cristo.
Awatentayo ti panagbuniag ti Espiritu Santo babaen iti maysa nga ordinansa a maawagan iti kumpirmasion. Daytoy nga ordinansa ket annongen ti maysa wenno ad-adu pay a priesthood holder a mangipatay kadagiti imada iti ulotayo. Umuna a kumpirmaendatayo a miembro ti Simbaan, ket kalpasanna italekda kadatayo ti sagut ti Espiritu Santo. Daytoy ti isu met laeng nga ordinansa a naibasar iti Baro a Tulag ken iti Libro ni Mormon (kitaen iti Dagiti Aramid 8:14–17; 3 Nephi 18:36–37).
Ti Espiritu Santo ti maikatlo a miembro ti Kinadios. Agtrabaho isuna iti pannakikaykaysa iti Nailangitan nga Ama ken ni Jesucristo. No awatentayo ti sagut ti Espiritu Santo, maaddaantayo ti panangkadkaduana iti unos ti panagbiagtayo no napudnotayo.
No Kasano a Bendisionannatayo ti Espiritu Santo
Ti sagut ti Espiritu Santo ti maysa kadagiti kaindaklanan a sagut ti Nailangitan nga Amatayo. Dalusan ken pasantuennatayo ti Espiritu Santo, pagbalinennatayo a nasansantuan, ad-adda a naan-anay, ad-adda a kas iti Dios (kitaen iti 3 Nephi 27:20). Tulongannatayo nga agbalbaliw ken dumakkel iti naespirituan bayat ti panagkalikagumtayo a mangsurot kadagiti pammilin ti Dios.
Tulongannatayo ti Espiritu Santo a mangsursuro ken mangbigbig iti kinapudno (kitaen iti Moroni 10:5). Ipatalgedna pay ti kinapudno iti puspuso ken pampanunottayo. Mainayon pay, tulongannatayo ti Espiritu Santo a mangisuro iti kinapudno (kitaen iti Doktrina ken Katulagan 42:14). No sursuruen ken isurotayo ti kinapudno babaen ti bileg ti Espiritu Santo, idanonna daytoy iti puspusotayo (kitaen iti 2 Nephi 33:1).
Bayat ti sipapakumbaba a panagkalikagumtayo iti panangiturong manipud iti Espiritu Santo, iwanwannatayto (kitaen iti 2 Nephi 32:5). Iraman daytoy ti panangtignay kadatayo no kasano a makapagserbitayo kadagiti dadduma.
Mangted ti Espiritu Santo iti naespirituan a pigsa a mangtulong kadatayo a mangparmek iti pagkapsutan. Tulongannatayo a mangsupring iti sulisog. Maballaagannatayo iti naespirituan a pagpeggadan ken pagpeggadan ti bagi.
Tulongannatayonto ti Espiritu Santo a manglabes kadagiti karit ti biag. Liwliwaennatayto bayat dagiti panawen ti pannubok wenno panagladingit, a punnuennatayo iti namnama (kitaen iti Moroni 8:26). Babaen ti Espiritu Santo mariknatayo ti ayat ti Dios para kadatayo.
No mabuniagan ken makumpirmaantayo, sumrektayo iti katulagan iti Dios. Malaksid iti dadduma pay a banag, ikaritayo nga agtungpal kadagiti bilinna ken agserbi Kenkuana iti nabati pay a panawen ti biagtayo (kitaen iti Mosiah 18:8–10, 13; Doktrina ken Katulagan 20:37).
Kalpasan a simrektayo iti dana ti ebanghelio babaen ti panagbuniag ken kumpirmasion, aramidentayo ti amin a kabaelantayo nga agtalinaed iti daytoy. No bumabatayo iti dana uray sangkabassit, ar-aramatentayo ti pammati ken Cristo nga agbabawitayo. Ti bendision ti panagbabawi ti mangpalugod kadatayo nga agsubli iti dana ti ebanghelio ken mangpatalinaed kadagiti bendision dagiti katulagantayo iti Dios. No sipupudno nga agbabawitayo, kanayon a natulok ti Dios a mangpakawan ken mangpasangbay manen kadatayo.
Ti panagibtur agingga iti panungpalan kaipapananna ti panagtalinaed a napudno iti Dios agingga iti panungpalan ti biagtayo—babaen kadagiti nasayaat a panawen ken narigat a panawen, babaen ti panagrang-ay ken panagrigat. Sipapakumbaba a palugodantayo ni Cristo a mangsukog kadatayo ken pagbalinennatayo nga ad-adda pay a kas Kenkuana. Kumitatayo ken Cristo nga addaan iti pammati, panagtalek, ken namnama ania man ti dumteng iti biagtayo.
Ti panagibtur agingga iti panungpalan ket saan laeng a kayatna a sawen ti ikakapet agingga a mataytayo. Imbes ketdi, kayatna a sawen ti panangipamaysa iti biag, pampanunot, ken aramidtayo ken ni Jesucristo. Iramanna ti agtultuloy a panangaramat iti pammati ken Cristo iti inaldaw. Itultuloytayo pay ti agbabawi, agtungpal kadagiti katulagantayo iti Dios, ken agkalikagum iti pannakikadkadua ti Espiritu Santo.
Ti panagibtur agingga iti panungpalan iramanna ti “panagtultuloy a sitatalingenngen ken ni Cristo, nga addaan iti naan-anay a kinalawag ti namnama, ken ayat iti Dios ken iti amin a tao.” Ikari ti Nailangitan nga Amatayo a no agibturtayo agingga iti panungpalan “maaddaantayto iti agnanayon a biag” (2 Nephi 31:20).
Bendisionan ti Ebanghelio ni Jesucristo ti Amin nga Annak ti Dios
Ti ebanghelio ni Jesucristo ket para iti amin nga annak ti Dios. Isuro dagiti nasantuan a kasuratan nga “agpapada ti amin iti Dios” ania man ti nagtaudan wenno kasasaadtayo. Awisenna “amin ida nga umasideg kenkuana ket makiranudda iti kinasayaatna; ket awan ti idaddadumana kadagiti umasideg kenkuana” (2 Nephi 26:33).
Bendisionannatayo ti ebanghelio iti unos ti panagbiagtayo ditoy daga ken iti unos ti kinaagnanayon. Kaaduanna a naragsaktayo—agpadpada a kas indibidual ken kas pamilia—no agbiagtayo babaen kadagiti pannursuro ni Jesucristo (kitaen iti Mosiah 2:41; “The Family: A Proclamation to the World,” ChurchofJesusChrist.org). . Ti panagbiag iti ebanghelio ti mangpalaus kadagiti ragsaktayo, mangparegta kadagiti aramidtayo, ken mangpabaknang kadagiti relasiontayo.
Ti panagbiag iti ebanghelio ni Jesucristo ket mabalin pay a mangsalaknib kadatayo manipud iti panagpili a mangdangran kadatayo iti bagi wenno espiritu. Tulongannatayo a mangsapul iti pigsa ken liwliwa iti panawen ti pannubok ken panagleddaang. Daytoy ti mangipaay iti dalan nga agturong iti naragsak nga agnanayon a biag.
Maysa kadagiti naindaklan a mensahe ti naisubli nga ebanghelio ket pasettayo amin ti pamilia ti Dios. Datayo dagiti maipatpateg nga annakna a lallaki ken babbai. Ania man ti kasasaad ti pamiliatayo ditoy daga, miembro ti pamilia ti Dios ti tunggal maysa kadatayo.
Ti sabali pay a naindaklan a paset ti mensahemi ket mabalin nga agkaykaysa dagiti pamilia iti kinaagnanayon. Inordenan ti Dios ti pamilia. Ti nadiosan a plano ti Nailangitan nga Ama iti kinaragsak ket mangpabalin kadagiti relasion ti pamilia nga agtultuloy iti labes ti tanem. Dagiti sagrado nga ordinansa ken katulagan iti templo ti mangaramid a posible a makapagdedenna a sangkamaysa dagiti pamilia iti agnanayon.
Babaen iti silaw ti ebanghelio, marisut dagiti pamilia dagiti saan a panagkikinnaawatan, panagsusupiat, ken karit. Mabalin a maagasan dagiti pamilia a nasinasina gapu iti saan a panagtutunos babaen ti panagbabawi, pannakapakawan, ken pammati iti bileg ti Pannubbot ni Jesucristo.
Tulongannatayo ti ebanghelio ni Jesucristo a mangpadur-as kadagiti natibtibker a relasion ti pamilia. Ti pagtaengan ti kasayaatan a lugar a pangisuruan ken pagsursuruan kadagiti pagbatayan ti ebanghelio. Ti pagtaengan a naipasdek kadagiti pagbatayan ti ebanghelio ket agbalinto a lugar a pagkamangan ken pagtalgedan. Maysanto daytoy a lugar a mabalin a pagnaedan ti Espiritu ti Apo.
Ababa agingga iti Kalalainganna a Balabala ti Adalen
Ti sumaganad a balabala ket maysa a pagarigan ti mabalinyo nga isuro iti maysa a tao no ababa laeng ti panawenyo. No us-usarenyo daytoy a balabala, pilien ti maysa wenno ad-adu pay a pagbatayan nga isuro. Ti pundasion a mainaig iti doktrina para iti tunggal pagbatayan ket maited iti nasapsapa iti adalen.
Bayat ti panangisuroyo, agsaludsod ken dumngegkayo. Mangtedkayo kadagiti awis a makatulongto kadagiti tao a makasursuro no kasano ti umas-asideg iti Dios. Maysa a napateg nga awis ket makipagkita manen ti tao kadakayo. Agpannurayto ti kaatiddog ti adalen kadagiti saludsod a damagenyo ken iti panagdengngegyo.
Ladawan
dagiti misionario a mangisursuro kadagiti babbai
No Ania ti Mabalin nga Isuroyo kadagiti Tao iti 3-10 a Minuto
Imbaon ti Dios ditoy daga ti Ay-ayatenna nga Anakna, ni Jesucristo, tapno subbotennatayo manipud iti basol ken ipapatay.
Ti pammati ken ni Jesucristo ket maysa a pagbatayan ti aramid ken bileg. Tulongannatayo ti pammati a mangpadas iti mangpappapigsa a bileg ti Mangisalakan iti biagtayo.
Ti pammati ken ni Jesucristo ti mangiturong kadatayo nga agbabawi. Ti panagbabawi ket ti proseso ti panagturong iti Dios ken panangtallikud iti basol. Bayat ti panagbabawitayo, agbalbaliw dagiti aramid, tarigagay, ken panunottayo tapno ad-adda a maitunos iti pagayatan ti Dios.
No agbabawitayo, pakawanennatayo ti Dios. Posible ti pannakapakawan gapu ta sinubbot ni Jesucristo dagiti basoltayo.
Adda dua a paset ti panagbuniag: panagbuniag babaen ti danum ken babaen ti Espiritu. No mabuniagan ken makumpirmaantayo, madalusantayo iti basbasoltayo, a mangmangted kadatayo iti baro a pangrugian iti biag.
Kalpasan ti pannakabuniagtayo iti danum, awatentayo ti sagut ti Espiritu Santo babaen ti ordinansa ti kumpirmasion.
Bayat ti sipupudno a panangsurottayo iti dana ti ebanghelio iti gibus ti biagtayo, ikari ti Dios a maaddaantayonto iti agnanayon a biag.