“Wase 8: Rawati na Cakacaka ena iNaki kei na iTuvatuva,” Vunautaka na Noqu Kosipeli: E Dua na iDusidusi ena wasei ni Kosipeli i Jisu Karisito (2023)

“Wase 8,” Vunautaka na Noqu Kosipeli

Wase 8

Rawati na Cakacaka ena iNaki kei na iTuvatuva

Vakasamataka Oqo

Na cava e gadrevi kina meu tuva-takete?
E rawa vakacava mena vukei au na ivakatakilakila ni toso ni saumaki mai, meu vakanamata ki na nodra toso vakayalo na tamata yadua?
Meu na tuvana vakacava na takete, cakava na ituvatuva meu rawati ira, ka cakacakataka na noqu ituvatuva?
Meu na cakava vakacava na soqoni ni ituvatuva vakamacawa kei na veisiga?
Meu na vakayagataka vakacava na app ni Vunautaka na Noqu Kosipeli me vukei au me rawata kina na cakacaka?
Na cava na ivakavuvuli ni soli itukutuku? Ena vakalougatataka vakacava na noqu sasaga?

O sa lesi mo vukea na cakacaka ni Turaga ena dua na iwase ni vanua digitaki. E vinakati iko o Koya mo vakalougatataka na tamata yadua ena Nona loloma kei na Nona dina. E vinakati iko o Koya mo sureti ira ka vukei ira mera lako mai Vua.

Na Turaga e gadrevi iko “[mo] gumatua ena cakacaka vinaka [oqo].” E kerea mo “ vakayacora e levu na ka mai na [nomu] kila ga vakataki [iko], ka vakayacora na veika dodonu eso” (Vunau kei na Veiyalayalati 58:27; raica na tikina e 26–29). Cakava na ka kece o rawata ni ko biubiu me qaqaco cake kina na tabanalevu kei na tabana o veiqaravi kina, mai na gauna o a qai yaco yani kina.

Na wase oqo ena vukei iko mo vulica na sala mo vakadavo inaki kina, tuva na sala mera rawati kina, ka cakacakataka sara vagumatua na nomu ituvatuva. E vakamacalataka na ivakatakilakila ni toso ni saumaki mai, ka na dusimaka na nomu sasaga mera vukei na luve ni Kalou mera toso ki liu vakayalo. E qai vakaraitaka tale ga edua na iwalewale rawarawa ni tuva-takete o rawa ni vakayagataka ena vei ituvaki kece sara ni cakacaka ni kaulotu, oka kina na nomu takete kei na nomudrau takete vakaitokani. E vakamacalataka tale ga na sala ni tuvai ni ituvatuva vakamacawa kei na ituvatuva ni veisiga vata kei nomu itokani.

Na vulici ni tuva takete kei na caka ituvatuva e rawa ni vakalougatataki iko ena nomu bula taucoko. Ena rawa ni vukei iko mo cakava ka maroroya na veiyalayalati vata kei na Kalou, veiqaravi ena yalodina ena Lotu, tomana na vuli, toso cake ena nomu cakacaka, ka tara cake edua na matavuvale kaukauwa.

Vulici ni iVolanikalou

Na cava o rawa ni vulica mai na vei ivolanikalou oqo me baleta na tuvatuva me rawati kina na cakacaka ni Kalou?

Vukei Ira na Tani Mera Saumaki Mai Vua na iVakabula

Raica Matua na iNaki ni Nomu Kaulotu

O na dau vakataroga beka se o cei vei ira na nomu itavi vakadaukaulotu e bibi duadua. Oqo e taro vinaka me vakasamataki ni ko tuva takete ka tuvana na veimacawa kei na veisiga yadua. Me vukei me saumi, vakananuma na nomu inaki vakadaukaulotu:

“Sureti ira na tani mera lako mai vei Karisito ena nodra vukei mera ciqoma na kosipeli vakalesui mai ena nodra vakabauti Jisu Karisito kei na Nona Veisorovaki, ka veivutuni, papitaiso, ciqoma na isolisoli ni Yalo Tabu, ka vosota me yacova na ivakataotioti.”

Me dusimaka na nomu takete kei na ituvatuva na nomu inaki vakadaukaulotu. Vakanamata ki na sala o rawa ni vukei ira kina na tamata yadua mera cakacakataka na nodra galala ni digidigi mera saumaki kina vua na iVakabula ka ciqoma na Nona kosipeli.

Vakasaqara na veidusimaki ni Yalo ka veivakasalataki vata kei nomu itokani ni ko tuva takete ka caka ituvatuva. Ka vakayacora sara na nomu ituvatuva ka vakayagataka vakavuku na nomu gauna.

“Eda sega ni vunau ka veivakavulici tiko me ra ‘kau mai kina na tamata ki na Lotu’ se me vakalevutaki na iwiliwili ni lewe ni Lotu. Eda sega ni vunau ka veivakavulici mera vakauqeti ga kina na tamata mera bulataka na bula e vinaka cake. … Eda sureti ira na tamata kecega mera lako mai vei Karisito ena veivutuni kei na papitaiso kei na veivakadeitaki me dolavi kina na katuba ni matanitu vakasilesitieli vei ira na luvena yalewa kei na luvena tagane na Kalou. E sega tale ni dua e rawa ni cakava na ka oqo” (Dallin H. Oaks, “The Purpose of Missionary Work,” missionary satellite broadcast, Epe. 1995).

Vulici ni iVolanikalou

E a rawa vakacava vei ira na daukaulotu kei ira na parofita oqo mera rawata na nodra ituvatuva ena veivuke ni Turaga?

Vakanamata ki na iVakatakilakila ni Toso ni Saumaki

Era sa raica rawa na iliuiu ni Lotu e ono na ivakatakilakila ni toso ni saumaki mai. Na ivakatakilakila ni toso era vukei iko ena vakanamata ki na nodra toso ki liu vakayalo na luve ni Kalou. E kedra inaki mera vukei iko me veidonui na nomu sasaga e veisiga vata kei na nomu inaki vakadaukaulotu.

Na ivakatakilakila ni toso ni saumaki mai era sa volai toka e ra.

	Nodra Vakavulici na Tamata Vou. Na tamata yadua (sega ni papitaiso) ka sa ciqoma oti edua na lesoni ena loma ni dua na macawa (ia a sega ni vakavulici ena loma ni vula tolu sa oti) ka ciqoma edua na iloku vakatabakidua me sikovi tale. Na lesoni edau oka kina na masu (ke ganita), vakavulici ni dua mada ga na ivakavuvuli ni kosipeli, ka vakayacora na veisureti.
	Lesoni ka Vakaitavi kina edua na Lewenilotu. Na iwiliwili ni lesoni ena loma ni dua na macawa ka a vakavulici kina edua na tamata (sega ni papitaiso) ka a vakaitavi kina edua na lewenilotu.
	Tiko ena Soqoni ni Sakaramede na Tamata era Vakavulici Tiko. Na tamata yadua (sega ni papitaiso) o vakavulici ira tiko ka tiko ena soqoni ni sakaramede ena loma ni dua ga na macawa.
	Tamata ka tiko Nona Tikinisiga ni Papitaiso. Na tamata yadua ka sa vakadonuya me papitaiso ka vakadeitaki ena dua na tikinisiga digitaki.
	Na Tamata Era sa Papitaiso ka Vakadeitaki. Na lewenilotu vou yadua ka sa ciqoma oti na cakacaka vakalotu ni papitaiso kei na veivakadeitaki ka sa vakau oti na nona fomu ena mona livaliva ena loma ni dua na macawa. (Raica na wase 12 me baleta na ibalebale ni nona papitaisotaki edua na saumaki mai, kei na ivakamacala ni tauyavutaki ni ivolatukutuku.)
	Era Tiko Ena Lotu ni Sakaramede na Lewenilotu Vou. Na lewenilotu vou yadua ka sa vakau oti na nona Fomu ni Papitaiso kei na Veivakadeitaki ena loma ni 12 na vula sa oti ka a tiko ena soqoni ni sakaramede, ena dua ga na macawa e rawa.

Me vakalekalekataki, vakaliuca mo vukei ira na tamata mera vakaitavi ena veika-sotavi oqo. Me uto ni nomu sasaga na itavi eso ka toka e ra:

O ira era vukei iko mo kunea na tamata vou mo vakavulica
O ira era vukei ira na tamata mera lai caka veiyalayalati ka maroroi veiyalayalati
O ira era vukei ira na tamata era sa papitaiso ka vakadeitaki oti ena loma ni yabaki sa oti

Kevaka o sega ni rawa ni raica na sala ena rawa ni vukea kina edua na tamata na nomu sasaga me toso ki liu, ka vakaraitaki mai ena nomu ivakatakilakila ni toso, dikeva lesu se itavi oqo e vakayagataki vakavinaka kina na nomu gauna se sega.

Vei ira na tamata e lailai na gauna o tiko vata kina kei ira, tomana tiko mo vakabulabulataka tiko ga na nodra taleitaka na kosipeli. O rawa ni sureti ira na lewenilotu me ira dolele yani vei ira. O rawa ni vakayagataka tale ga na tekinolaji mo vakauqeti ira ka tomana tiko na nomu veiqaravi vei ira. Raica na “Vakayagataka na Tekinolaji” ena wase e 9 me baleta eso tale na vakasama.

“Na ulu ni inaki ni tuvatuva kei na vakadavo takete sai koya na veivakatisaipelitaki—oya, mera tiko na saumaki mai yalodina era caka veiyalayalati tabu ka maroroi ira, tekivu mai na veiyalayalati ni papitaiso ka yaco sara ki na veiyalayalati ni valetabu” (Quentin L. Cook, “Purpose and Planning,” mission leadership seminar, June 25, 2019).

Tuva na Takete ni iVakatakilakila ni Toso ka Cakava na iTuvatuva

Ena gauna ni tuvatuva vakamacawa, drau tuvana na takete kece ni ivakatakilakila ni toso vata kei nomu itokani. Na nomu takete ni ivakatakilakila ni toso e dodonu me vakaraitaki kina na nomu gagadre mo vukea e levu na tamata mera vakila na veivakalougatataki ni saumaki mai.

Tuvana na takete ka cakava na ituvatuva mo cakava na ka o rawata, ka na rawa ni vakayacoka ki na macala ni ivakatakilakila ni toso. Me kena ivakaraitaki:

O na rawa ni tuvana edua na takete ni ivakatakilakila ni toso, mo tekivu vakavulica edua na iwiliwili digitaki ni tamata vou ena loma ni macawa. Na nomu yacova na takete oya ena vakatau mai na nodra galala ni digidigi na tamata. Ia mo cakava na ka o rawata me rawati kina na takete. Edua na sala sai koya mo navuca edua na takete mo veitalanoa kina kei na dua na iwiliwili digitaki ni tamata vou ena veisiga yadua. O qai tuvana na sala mo cakava kina. Raica eso na vakasama ena iDusidusi Vakaivola 2 ni wase oqo kei na wase e 9.
O na rawa ni tuvana edua na takete ni ivakatakilakila ni toso, me tiko edua na iwiliwili digitaki ni lewenilotu vou kei na tamata o vakavulica tiko, mera tiko ena soqoni ni sakaramede. Na nodra lako mai se sega ena vakatau ki na nodra galala ni digidigi. Ia mo cakava na ka o rawata mo vakayaco ka kina ki na macala ni vei ivakatakilakila ni toso oqo. Tuvana na gauna mo sureti ira kina kei na sala mo na talemuria kina.
O na rawa ni tuvana edua na takete ni ivakatakilakila ni toso, mera vakaitavi kina na lewenilotu ena dua na iwiliwili digitaki ni lesoni ena loma ni macawa. Nomu yacova na takete oya ena vakatau vei ira na lewenilotu kei ira o vakavulici ira tiko. Ia mo cakava na ka o rawata mo vakayaco ka kina ki na macala ni ivakatakilakila ni toso oqo. Tuvana edua na takete mo cakacaka vata kei ira na iliuiliu ni tabanalevu mera tiko kina na lewenilotu. Qai tuvana na sala mo cokonaka kina na nodra vakaitavi.

Me kena ivakatautauvata, mo tuvana na takete ni ivakatakilakila ni toso me baleta na nomu i wasewase. yavutaki ira ena (1) nodra toso o ira o vakavulica tiko kei na (2) na gagadre mo kunei ira na tamata vou mo vakavulica. Na nodra kunei na tamata vou mera vakavulici ena dau gadrevi tu ga.

Na takete ni ivakatakilakila ni toso ni daukaulotu-raraba, era yavutaki ena takete ka tuvai mai vei ira na veitokani yadua.

Na app ni Vunautaka na Noqu Kosipeli ena vukei iko mo vakanamata vei ira na tamata, ni ko tuvana tiko na takete ni ivakatakilakila ni toso. Na app oqo ena vukei iko tale ga mo vuli mai na nomu takete sa oti, ka vakaraitaka na veika sa rawati ena nomu takete ena gauna oqo.

Na takete ni ivakatakilakila ni toso kei na kedra macala era ripotetaki vakadodonu sara ki vei ira na nomu iliuliu ni kaulotu, kei ira na iliuliu ni kaulotu itabagone ena app ni Vunautaka na Noqu Kosipeli.

Qarauna mo kakua ni vakabibitaka edua na ivakatakilakila ni toso mai vei ira tale na kena vo. Na raici matua tiko ni ivakatakilakila ni toso kece ena vukei iko mo na dau veisureti vei ira na tani mera lako mai vua na Karisito ka caka veiyalayalati.

“Ni vakarautaki na cakacaka, ena vinaka cake na cakacaka. “Ni vakarautaki na cakacaka ka ripotetaki, ena tubu cake vakatotolo sara na ivakatagedegede ni cakacaka” (cavuti mai vei Thomas S. Monson, “Thou Art a Teacher Come from God,” Improvement Era, Tise. 1970, 101).

Cakacaka Vagumatua

Na turaga e gadreva mo “vakayacora … ena yalodina” na nomu veiqaravi vaka daukaulotu (Vunau kei na Veiyalayalati 107:99). Na gugumatua e dua na sasaga tudei ena yalodina.

Cakacaka vagumatua ena nomu takete ni ivakatakilakila ni toso. Sureta na tamata mera caka veidinadinati ka na veimuataki ki na saumaki. Na nomu sasaga vagumatua ena uqeti ira mera cakava na cakacaka ka na vukei ira mera lako mai vei Karisito (raica na 2 Nifai 2:14–16).

Vakatavulica na kosipeli ena sala ena sotavi kina na nodra gagadre na tamata. Na ivunau, ni kilai vakavinaka mai vua na Yalo, ena rawarawa cake ni vakauqeti ira mera cakacaka mai dua tale na ka.

Ena gauna vata oqori, mo kila ni takete ni ivakatakilakila ni toso ena vakatau ena nodra galala ni digidigi na tani. Mo dau rokova na nodra galala ni digidigi na tamata.

Mo nanuma tiko ni ivakatakilakila ni toso e sega ni icavacava ni ka. Ia, era ivakaraitaki ni nona rawa ni toso ki liu vakayalo edua na tamata ki na papitaiso, veivakadeitaki, kei na saumaki e tudei. Na nodra toso dina ki liu na tamata ena vakatau ki na nodra galala ni digidigi. O vukea na nodra toso ena nomu cakacakataka na vakabauti Jisu Karisito ena vukudra ni ko tuvana na takete, navunavu, cakacaka vagumatua, ka veiqaravi vei ira ena sala e veivakauqeti.

Na Sala ni Tuva Takete ka Cakava na iTuvatuva mera Rawati Kina

Na vakarautaki kei na tuvanaki ni takete sa ivakaraitaki ni vakabauta. Na takete sai iyaloyalo ni veika e gadreva na lomamu kei na raivotu ni nomu vukei iko kei ira na tani mera lako mai vua na iVakabula.

Na takete kei na ituvatuva era vakasamataki vakavinaka era na solia vei iko na veidusimaki matata. Era rawa ni vukei iko mo kunea e levu tale na tamata mo vakavulica. Era rawa ni dusimaki iko ena nodra vukei o ira o vakavulica tiko mera vaqaqacotaka na nodra vakabauta ka toso yani ki na saumaki.

Vakayagataka na vakadavo isausau kei na navunavu me dua na itavi e veivakauqeti. Masu ena yalodina, cakacakataka na vakabauta, veivakasalataki vata kei nomu itokani, ka muria na veiuqeti ni Yalo. Ni ko navunavu vakaoqo, o na vakila ni Turaga e vakayagataki iko mo vakalougatataki ira na tani.

“Na takete edua na vanua e lakovi se na icavacava, ia na ituvatuva sai koya na sala o muria mo yaco kina. .… Na tuva takete e sai koya na tekivu ena kena nanumi eliu nai icavacava. Kei na tuvatuva sai koya na navuci ni dua na sala mo yacova kina na icavacava” (M. Russell Ballard, “Lesu ka Ciqoma,” Liaona, Me 2017, 62–63).

iVakakavuvuli ni Tuva Takete kei na Kena Rawati

Na iwalewale ka toka e ra ena vukei iko mo tuva ka rawata na nomu takete.

Tuva na takate ena masumasu ka cakava na ituvatuva. Tuva na takete e vakaibalebale ka o na soli igu kina ka na gadreva na vakabauta. Levea nomu tuva na takete e rui cecere sara se rui lolovira sara. Navuca na sala mo na rawati ira kina.
Vola ka tuvana. Vola na nomu takete kei na navunavu ena dua na ituvatuva matata.
Cakacakataka na nomu ituvatuva. Cakacaka vagumatua me rawati na nomu takete. Cakacakataka nomu vakabauta na Turaga me vukei iko.
Raicalesu ka talemuria. Vakadikeva na nomu toso ka volaitukutukutaka vakawasoma na nomu sasaga. Vakatulewataka na ka duidui mo cakava kei na sala mo vakatorocaketaki kina. Moica na ituvatuva kevaka e gadrevi.

Ni ko vakayagataka na iwalewale ni tuva-takete oqo, na Turaga ena vakalevutaka na nomu sasaga. O na tubu ena nomu rawa ni iyaya ni cakacaka e Ligana. O na kauta mai na vinaka ena nodra vakalougatataki na luvena na Tamada Vakalomalagi.

Navuca na Takete ka Cakava na iTuvatuva ena Veitiki Kece Sara ni Cakacaka

Vakasaqara ena masumasu na veidusimaki ni Yalo, ni ko vakayagataka na iwalewale ni tuva-takete ena veitiki kece sara ni cakacaka vakadaukaulotu. Eso vei ira oqo e oka kina na:

Nomu vukei ira o vakavulici ira tiko mera toso ki liu (raica na iDusidusi Vakaivola 1 ena wase oqo).
Kunei ni tamata vou me vakavulici (raica na iDusidusi Vakaivola 2 ena wase oqo).
Cakacaka vata kei ira na lewenilotu ka veiqaravi vei ira na tamata ena itikotiko raraba kei na tabanalevu (raica na wase e 9 kei na 13).
Cakacaka ena duavata kei nomu itokani (raica na idusidusi 6 ena Na Soqoni ni Tuvatuva Vakamacawa ”).
Vaqaqacotaka na nomu vakabauta na Turaga ko Jisu Karisito.
Vakatorocaketaka na nomu kila kei na rawa ka, oka kina na vulici ni vosa (raica na wase e 7).

Tuva na Takete e Veiganiti

Mo kakua ni tuva na nodra takete ni ivakatakilakila ni toso na daukaulotu tale eso. Ia e rawa ni ko dusimaki ira ka vakayaloqaqataki ira ena vakayagataki ni ivakavuvuli ni tuva-takete, ni ira tuvana na nodra takete vakataki ira.

Qarauna me kua na veivakatautauvatataki kei ira tale eso.

Kakua ni vakayagataka na rawati ni takete me vaka edua na ivotavota, me kilai raraba kina, se me vakadodonutaka se vakamaduataki kina edua e matanalevu.

“Eda vakabauta na tuva-takete. Eda bula ena noda tuva-takete. … [Edua] na takete bibi sai koya na kena kau na kosipeli vei ira na tamata kecega. … Na noda takete sai koya meda rawata na bula tawamudu. Oqori na takete cecere duadua ena vuravura” (Spencer W. Kimball, regional representatives’ seminar, Epe. 3, 1975, 6).

Vakayacora na Soqoni ni Tuvatuva Vakamacawa kei na Veisiga

Na tuvatuva vakamacawa ena vukei iko mo raica vakataucoko na ka, ka vakanamata vei ira na tamata. E vukei iko tale ga mo vakanamata ki na vei itavi era bibi duadua. Na ituvatuva e veisiga e vukei iko mo moici iko ka vakavakarau mo cakava eso na cakacaka digitaki e veisiga. O vinakata mo rawa-ka, sega ni ko osooso walega.

Ena soqoni ni tuvatuva-ka, tarogi iko ena veitaro rawarawa me baleta na ka o nanuma se cava e gadreva vei iko na Turaga mo cakava. Vaqara na veivakauqeti mo sauma kina na veitaro oqo ena sala e veiganiti kei na veituvaki kei na tamata yadua. Mera qai vakavotukanataki na isau ni taro ena nomu ituvatuva.

Soqoni ni Tuvatuva Vakamacawa

Mo vakayacora kei na nomu itokani edua na soqoni ni tuvatuva-ka vakamacawa, ena dua na siga kei na gauna e lokuca o nomu peresitedi ni tabana ni kaulotu. Muria na ikalawa eso e ra.

Masuta ka vakasaqara na veivakauqeti. Kerea na Tamada Vakalomalagi me dusimaki iko ena nomu cakava na ituvatuva ka na vukea me rawati na Nona inaki. Kerei Koya me vakalougatataka na nomu sasaga mo vukei ira na tamata mera toso ka lako mai vei Karisito.
Tuva na takete ka cakava na ituvatuva me baleta kece na ivakatakilakila ni toso ena vakayagataki ni app ni Vunautaka na Noqu Kosipeli. Vakayagataka na iwalewale ni tuva-takete ka vakamacalataki toka mai cake ena wase oqo. Tekivu vei ira na:
- Tamata ka papitaiso ka vakadeitaki ena loma ni yabaki sa oti.
- Tamata ka tiko na nona tikinisiga ni papitaiso.
- Tamata o vakavulica tiko ka dau tiko ena soqoni ni sakaramede.
- Tamata vou ka vakavulici tiko.
- Lewenilotu era lesu tale mai, matavuvale era sega ni lewenilotu kece, kei ira na italatala qase namaki.
- Tamata era sa vakavulici oti mai liu.
Raica na iDusidusi Vakaivola 1 ena wase oqo ena vakasama eso ni vakayagataki ni iwalewale ni tuva-takete, ni ko cakacaka vata kei ira o vakavulica tiko.
Vakayagataka na iwalewale ni tuva-takete mo kunei ira kina na tamata mo vakavulica (raica na iDusidusi Vakaivola 2 ena wase oqo kei na wase e 9 me veivuke ena vaqaqara).
Vakayagataka na iwalewale ni tuva-takete mo tara cake kina na veiwekani kei ira na iliuliu ena tabanalevu kei ira na lewenilotu. Tuva na takete ka cakava na ituvatuva ena sala mo tokoni ira kina ena nodra sasaga mera wasea na kosipeli (raica eso na vakasama ena wase e 9 kei na 13). Vakavakarau ki na bose ni veivakacokotaki vakamacawa ni tabanalevu (raica na wase e 13).
Raicalesu na nomu ituvatuva kei na takete ena app ni Vunautaka na Noqu Kosipeli. Vakadeitaka na nomu iloku kei na bose.
Vakayacora edua na bose vakaitokani vata. E dau kena ivakarau me oka kina na veika oqo:
- Kevaka e gadrevi ka ganita, wasea na nomu takete ka kerei nomu itokani me veivuke ena kedra rawati.
- Veivosakitaka na qaqaco ni nomudrau veimaliwai. Veivosakitaka na bolebole ni nomudrau talairawarawa se cakacaka vata ena duavata. Walia na duiyaloyalo ena (1) nona vakatarai na tamata yadua me vakaraitaka na nona rai, (2) me kilai vakavinaka ka ciqomi na kauwai ni tamata yadua, ka (3) tara cake vata edua na iwali ka na vakameautaka na veikauwai bibi eso.
- Wasea vata kei nomu itokani na cava o nanuma era kaukauwa kina. Taroga na vakatutu ena sala mo vakavinakataki cake kina.
- Tuva na takete ena vakavinakataka cake na nomudrau veimaliwai.
Na matabose vakaitokani e rawa ni vukei iko mo tara cake na kila-ka, ka rawa ni o vakayagataka ena nomu bula vakai iko se bula vakamatavuvale, veiqaravi ena Lotu, cakacaka kei na so tale na veimaliwai.
Me tini ena masu.

Soqoni ni Tuvatuva e Veisiga

Tuva na takete ka cakava na ituvatuva vata kei nomu itokani me 30 na miniti e veimataka. Muria na ikalawa eso e ra.

Masuta ka vakasaqara na veivakauqeti.
Raicalesuva na veika sa rawati ena takete ni ivakatakilakila ni toso vakamacawa.
Raicalesuva na nomu ituvatuva mo vukei ira na tamata o vakavulica tiko. Vakaliuca na nomu sasaga mo vukei ira era toso sara tiko vakatotolo. Moica na takete kei na ituvatuva ni veisiga kevaka e gadrevi.
Soli iko taucoko ki na cakacaka ni siga oya mo kunei ira na tamata vou mera vakavulici ka vukei ira o vakavulica tiko.
Tuva na sala ona cakacaka vata kina kei ira na iliuliu kei na lewenilotu e keri.
Me tini ena masu.

Vuli vata vakaitokani

Raicalesu na iDusidusi Vakaivola 1 kei na iDusidusi Vakaivola 2 ena mua ni wase oqo ena vakasama eso ni kena vakayagataki na iwalewale ni tuva-takete ena veivakavulici kei na vaqaqara. Mo kila na sala o rawa ni vakayagataka kina eso na vakasama oqo.

Vakayagataka na app ni Vunautaka na Noqu Kosipeli

Ena vukudra era a papitaisotaki ena nona siga, a kaya kina o Moronai, “A sa volai na yacadra, me ra na daunanumi ka vakani ena vosa vinaka ni Kalou, me ra tiko ga kina ena sala dodonu” (Moronai 6:4). Na maroroi ni ivolatukutuku vinaka edua na sala e rawa ni ko vakayagataka kina na ivakavuvuli oqo.

Vola na Nomu Sasaga

Na maroroi ni ivolatuktuku e tiki ni nomu wanonova matua tiko na nomu iwasewase ena loloma kei na kauwai. Qarauna mera dodonu ka dau vakavoutaki na nomu ivolatukutuku. Oqo ena vukei iko mo nanuma kina na ka e gadrevi mo cakava mo vukei ira kina na tamata.

Na app ni Vunautaka na Noqu Kosipeli e rawa kina vei iko mo veitaratara ka wasea na itukutuku bibi vata kei ira na iluliu kei ira na lewenilotu e keri ena toso ni tamata kei na cakacaka.

Vakamuria na iDusidusi ni Taqomaki ni iTukutuku

Vakamuria na idusidusi ni maroroi kei na taqomaki ni itukutuku, ni volai na takete kei na ituvatuva ena app ni Vunautaka na Noqu Kosipeli kei na veika e tabaki. Me baleta na ivakamacala, raica na iVakatagedegede ni Daukaulotu Vei Ira na Tisaipeli i Jisu Karisito, 7.5.

Tarogi iko ena taro e ra ni bera ni ko vola se wasea na itukutuku ena app ni Vunautaka na Noqu Kosipeli, imeli, vakauitukutuku raraba, ivola se veitaratara tale eso:

Na cava ena nanuma na tamata oqo me baleta na veika au volaitukutukutaka tiko?
Na cava beka au na vakila kevaka edua e wasea na itukutuku vakaoqo baleti au vata kei ira na tani?
Au vakamuria tiko beka na lawatu ni Lotu kei na lawa ni taqomaki itukutuku ena noqu iwasewase keu volaitukutukutaka se wasea na itukutuku oqo?

Soli iTukutuku

Na ivakavuvuli ni soli itukutuku sa ka bibi ki na ituvatuva tawamudu ni Kalou (raica na Alama 5:15–19; Vunau kei na Veiyalayalati 104:13; 137:9). Na ivakavuvuli oqo e vakayarayarataka na nomu nanuma kei na ka o vakila me baleta na ilesilesi tabu sa solia vei iko na Turaga. Na soli itukutuku e vakayarayarataka tale ga na ivakarau ni nomu cakacaka.

Ena Nona veiqaravi voli e vuravura, na Turaga a lesia na itavi vei ira na Nona tisaipeli me vukei ira mera tubu, vakatorocaketaki, ka rawata na Nona cakacaka. A solia talega vei ira na madigi me ra tukunikataka na cakacaka a soli vei ira me ra cakava (raica na Luke 9:10; 3 Nifai 23:6–13). Me vaka ni ko daukaulotu, o na soli itukutuku tale ga ena vuku ni cakacaka sa solia vei iko na Turaga mo cakava.

Mo vakayacora na nomu tuva takete kei na tuvatuva ena vakasama ni ko na soli itukutuku vua na Turaga ena masu e veisiga. Mo soli itukutuku tale ga vei iko kei ira tale ga na iliuliu ni nomu tabana ni kaulotu.

Na soli itukutuku e dodonu me dua na ka sotavi e taleitaki ka vinaka ka ra vakatakilai kina na nomu sasaga ka o kunea kina eso na sala mo vakavinakataki kina.

Vulici ni iVolanikalou

Na cava na kena ibalebale mona soli itukutuku?

Vunau kei na Veiyalayalati 58:26–33; 101:78

Na cava e bibi kina na galala ni digidigi ena soli itukutuku?

Me rau cakacaka vata beka vakaevei edua na daukaulotu kei na iliuliu ni tabana ni kaulotu?

Na cava e yalataka na Turaga vei ira era yalodina ki na nodra ilesilesi?

Vunau kei na Veiyalayalati 51:19; 78:22

Vakatutu ni Vuli kei na kena Bulataki

Vuli Yadudua

Vakasamataka mada na iyatuvosa oqo mai na nomu ivola ni veikacivi: “Ni ko solia na nomu gauna kei na yalomu taucoko mo qarava na Turaga, ka vakanadakuya na nomu gagadre tale e so, na Turaga ena vakalougatataki iko ena kila ka e vakalevutaki kei na ivakadinadina kei Jisu Karisito kei na Nona kosipeli vakalesui mai.” Tarogi iko ena veitaro oqo, ka vola na nomu vakasama.
- Sa vakacava tiko beka na noqu solia na noqu gauna kei na noqu igu meu veiqaravi vua na Turaga?
- Na veivakalougatataki cava soti au sa vakila?
- Sa vaqaqacotaki beka vakacava na noqu ivakadinadina?
- Ena rawa beka vakacava meu vinaka cake?
Taura e vica na miniti mo vakasamataka kina na iotioti ni nomu siga ena vanua ni kaulotu. Ni yaco mai na siga oya:
- Na cava o vinakata ena nomu veiwekani vata kei na Tamada Vakalomalagi kei Jisu Karisito me vakataka?
- Na cava o vinakata mo a yaco mo vakataka?
Ena nomu ivolanivuli ni veisiga, vola edua na isaunitaro ki na veitaro yadua oqo. Vakayagataka na iwalewale ni tuva-takete mo tuva kina na ka o rawa ni cakava oqo mo rawata kina na takete eso oqo. Vola na nomu ituvatuva.

Vuli Vata Vakaitokani kei na Veisau ni iTokani

Ena vakayagataki ni app ni Vunautaka na Noqu Kosipeli, sauma na taro e ra:
- Era sa dodonu ka vakavoutaki beka na itukutuku?
- Ena yaga beka na nomu sasaga ni ivolatukutuku vua edua na daukaulotu ka sa yaco ga mai ki na iwasewase, me kunea na tamata vou me vakavulica?
- Kevaka mo raicalesu na nomu app ena gauna sara ga oqo, ena vukei iko beka mo kila na vanua era tiko kina na tamata? Ena vukei iko beka mo kila na nodra toso?

Matabose ni Tikina, Koniferedi ni iWasewase, kei na Matabose ni Veiliutaki ni Tabana ni Kaulotu

Sureti ira na daukaulotu mera wasea na veika era sotava me baleta na takete kei na ituvatuva era a tuva me vukei ira kina na tamata mera toso ki liu. Na ivakaraitaki e rawa ni oka kina na takete kei na ituvatuva me vukei ira na tamata mera:
- Tara cake na vakabauta e levu cake vua na iVakabula.
- Veivutuni ka cakava na veisau mera voleka cake kina vua na iVakabula.
- Papitaisotaki ka vakadeitaki.
- Lesu tale mai ki na Lotu ka vakavouya na nodra veiyalayalati ni papitaiso.
Wilika edua vei ira na ituvaki oqo vei ira na daukaulotu. Wasei ira na daukaulotu ki na ilawalawa lalai. Mera vakayagataka na ilawalawa yadua na ikalawa 1 kei na 2 ena iwalewale ni tuva-takete, me vukei ira na tamata ena vei ivakaraitaki oqo mera papitaiso ka vakadeitaki. Mera qai wasea na ilawalawa yadua na noda vakasama.
- Edua na tamata o vakavulica tiko e sa ciqoma na veisureti me lako ki lotu ena macawa oqo.
- Edua na tamata e sa ciqoma na veisureti me papitaiso ka sa navuca edua na takete vata kei iko me papitaisotaki.
- Edua na tamata e sa ciqoma na nomu veisureti me wilika na iVola i Momani ka sa yalataka me wilika na 1 Nifai 1.
Sureti ira na daukaulotu mera vakayagataka na app ni Vunautaka na Noqu Kosipeli, me vukei ira mera tuva na takete vakaibalebale ka era na solia kina na nodra igu ena nodra:
- Raicalesu nai tukutuku makawa ni ivakatakilakila ni toso kei na nodra toso.
- Tuva na takete ni veisiga, veimacawa kei na veivula.
- Vakuri ira na tamata ki na takete ni ivakatakilakila ni toso.
Veitalanoataka na sala ena rawa ni vukei ira kina na daukaulotu na veikalawa oqo mera tuvatuvaka vakavinaka cake kina ni ira vukei ira tiko na tamata mera toso ki liu. Kerei ira na daukaulotu mera vakasamataka na veika oqo:
- Ona vakayagataka vakacava ena veisiga ni mataka na app ni Vunautaka na Noqu Kosipeli mo tuvatuva kina?
- Na veisala cava so o sa kunea mo vakayagataka vakavinaka cake kina na app oqo?

Liuliu ni Tabana ni Kaulotu kei na Vukevuke ni Liuliu ni Tabana ni Kaulotu

Dau railesuva vakawasoma na nodra app ni Vunautaka na Noqu Kosipeli na daukaulotu. Sureti ira mera wasea na sala era vakayagataka kina mera vakamuria na nodra takete kei na ituvatuva mera vukei ira kina na tamata mera toso ki liu.
Dau tiko vakawasoma ena nodra bose ni tuvatuvaka vakamacawa se veisiga na daukaulotu.

iDusidusi Vakaivola 1

Vakayagataka na iWalewale ni Tuva-Takete ena Cakacaka vata kei ira na Tamata O Vakavulica Tiko

Na wase oqo e vakarautaka na ivakaraitaki ni nomu rawa ni vakayagataka na iwalewale ni tuva-takete mo vukei ira kina na tamata o vakavulica tiko.

1. Tuva Takete ka Caka iTuvatuva

Vakasamataka ena masumasu na nodra gagadre vakayalo na tamata o vakavulica tiko. Tuva na takete ka cakava na ituvutuva me vukei ira mera rawata na veigagadre oqo. Vakayagataka na app ni Vunautaka na Noqu Kosipeli me raicilesu kina na nodra toso na tamata yadua. Vakayagataka na ivakatakila ni tubu ni saumaki, me kunei kina na veika me caka ka na vukea na tamata yadua me taura na ikalwawa ka tarava, me lako mai vei Karisito.

Ni ko tuva takete ka caka ituvatuva, tarogi iko ena veitaro vakaoqo:

Na digidigi cava e cakava tiko na tamata oya ka vakaraitaka tiko na tubu ni nona vakabauti Jisu Karisito?
Na ituvaki cava soti e sotava tiko na tamata oya kei na Yalo?
Na veibolebole cava soti ena rawa beka ni sotava tiko?
Na cava eso tale na ka eda rawa ni vulica mai vua na tamata oqo meda vukei koya kina?
Na cava e gadrevi me vakayacori me vukei kina na tamata oqo me tarai cake na nona vakabauti Jisu Karisito, vakila ka kila rawa na Yalo, veivutuni, ka papitaisotaki?
E rawa vakacava ni keda vakavakarau ki na bose ni veivakacokotaki ni tabanalevu mera okati mai kina na iliuliu kei na lewenilotu ena tabanalevu me vukei kina na tamata oqo? (Raica na wase e 13.)
Na takete cava soti ni ivakatakilakila ni toso e rawa ni keda tuva ka vakaraitaki kina na noda vakabauta na Turaga?

2. Vola ka Tuvana na Nomu iTuvatuva

Vakayagataka na app ni Vunautaka na Noqu Kosipeli mo vola ka tuvana kina vakamatailalai na nomu takete kei na nomu ituvatuva. Oqo ena vukei iko mo tuva vakamatau na cakacaka ka kila na cava mo cakava ena veisiga yadua. Muria na lawa ni taqomaki ni itukutuku ena nomu iwasewase.

Ni ko vola ka tuvana na nomu ituavatuva, tarogi iko ena veitaro vakaoqo:

Na veika vakatabakidua cava keirau rawa ni cakava nikua kei na macawa oqo me tokoni kina na toso ni tamata oqo?
Na ivunau (se lesoni) cava ena vukea na tamata oqo me vaqaqacotaki cake kina na nona vakabauti Karisito ka bulataka na kosipeli? E rawa vakacava ni keirau vakavulica na ivunau oqo me rawa vua me kila vakavinaka sara ka vakavulici mai vua na Yalo Tabu?
Na sala kei na gauna cava me keirau na vakadeitaka kina na iloku?
Na veisureti cava me keirau na solia se talemuria? Na sala cava kei na gauna cava keirau na talemuria kina?
Na sala cava kei na gauna cava keirau na vukea kina na tamata oya me tiko ena lotu, wilika na ivolanikalou, masu, ka maroroya na ivakaro e veimuataki ki na maroroi ni veiyalayalati kei na Kalou?
Na sala cava e rawa ni ra vakaitavi kina na lewenilotu?
Na ivurevure cava ena monalivaliva keirau rawa ni wasea vata kei na tamata oya?
Na ituvatuva cava e rawa ni caka kevaka e sega ni yaco edua na ka me vaka e nakiti?

3 Cakacakataka na nomu iTuvatuva

Daumasu tiko e lomamu ena loma ni siga taucoko ni ko cakacakataka tiko na nomu ituvatuva. Na Yalo ena vukei iko mo kila na vanua mo lako kina, kei na cava mo tukuna, kei na cava soti mo moica.

Ena loma ni siga tarogi iko ena veitaro vakaoqo:

E rawa vakacava me keirau cakacaka ena vakabauta, ka nuitaka na Turaga me na vukei keirau ka vakalevulevuya na neirau sasaga me veiqaravi vei ira na Luvena?
Ena rawa vakacava me keirau na vakasamataka na veika vovou ka yaloqaqa ni keirau cakacakataka tiko na neirau ituvatuva?
Ena rawa vakacava me keirau moica na neirau ituvatuva me salavata kei na nodra gagadre kei na nodra ituvaki na tamata?

Na ituvatuva ena sega ni dau yaco me vaka na ka o namaka. Mo dau tuvakarau ka vakayagataka tale edua na ituvatuva kevaka e gadrevi.

4 Raicalesu na Toso ka Talemuria

Railesuva vata kei nomu itokani na rawati ni takete drau sa tuvana, ena nodra vakavulici na tamata ka vukei ira mera toso ki liu. Tuvana na sala mo drau talemuria kina. Moica na nomudrau ituvatuva ke gadrevi, ni drau saga me yacovi na takete.

Dau tarogi kemudrau ena veitaro vakaoqo:

Era sa toso tiko beka na tamata keirau vakavulica tiko mera caka veiyalayalati kei na Kalou?
Na bolebole cava soti era sotava tiko? Na cava soti era kauwai kina?
Na cava edaru rawa ni cakava nikua me vukei ira ka vakayaloqaqataki ira mera cakacaka—ena gauna ni sota se ni vakayagataki na tekinolaji?
Era sotava tiko beka na veigauna eso era vakila kina na Yalo?
Era sema tiko beka kei ira na iliuliu kei na lewenilotu me tarai cake na veitokani? O cei e rawa ni vakaitavi ena gauna ni neirau veivakavulici ka tarava?
Na cava keirau rawa ni vulica ni yaco eso na ka sega ni namaki?
E a vakaevei beka na neirau rawata na neirau takete? E tu beka eso na ka e dodonu me keirau moica se cakava ena dua tale na kena icakacaka?
E sa kena gauna beka me vakalailaitaki kina na sota?

Raica na wase e 11 me baleta eso tale na ivakavuvuli kei na vakasama ena sala mera talemuri ka vukei na tamata mera toso ki liu.

iDusidusi Vakaivola 2

Vakayagataka na iWalewale ni Tuva-Takete mera Kunei na Tamata me Vakavulici

Na wase oqo e vakarautaka na ivakaraitaki ni nomu rawa ni vakayagataka na iwalewale ni tuva-takete me kunei kina na tamata vou me vakavulici. Vakayagataka na iwalewale oqo ena nomu ituvatuva vakamacawa kei na veisiga.

1. Tuva Takete ka Caka iTuvatuva

Vakasamataka ena masumasu vata kei nomu itokani, se cava ena vinakata na Tamada Vakalomalagi mo drau cakava mo drau kunea e levu tale na tamata me vakavulici. Cakava oqo ena veimacawa kei na veisiga. Vakabauta ni sa vakarautaka tiko o Koya na tamata vei iko (raica na Vunau kei na Veiyalayalati 100:3–8).

Tuva na takete ni vaqaqara e veisiga. Cakava na ituvatuva ni cakacaka ena veika o rawa ni lewa, me vakayacoka ki na macala ni ivakatakilakila ni toso. Na ivakaraitaki eso e oka kina na:

E vica na tamata vou o na tukuna vei ira na kosipeli ena veisiga.
O na taroga beka vakavica vei ira na lewenilotu, tamata o vakavulica tiko, kei ira oni veitaratara se era kila edua ena malele mai ki na nomudrau itukutuku.
Ena vakaevei na kena totolo ni nomu sausaumi ki na yacasoli se itukutuku ena sala ni vakau itukutuku raraba.

Railesuva na app ni Vunautaka na Noqu Kosipeli ka tarogi iko ena veitaro vakaoqo:

Na cava ena vinakata na Tamada Vakalomagi vei keirau me cakava me kunei na tamata me vakavulici?
Na takete ni ivakatakilakila ni veisiga kei na veimacawa cava me caka me kunei kina na tamata mera vakavulici?
Na itavi ni vaqaqara cava e rauta vinaka na tiki ni gauna kei na vanua vakaoqo ni dua na siga?
Ena rawa vakacava ni keirau vakauqeti ira ka tokoni ira na lewe ni tabanalevu ena nodra sasaga me wasea na kosipeli ena ivakavuvuli ni loloma, wasea ka sureta?
O ira na lewenilotu vou cava beka keirau rawa ni veitaratara kei ira ka vukei ira mera tiko ena soqoni ni sakaramede? E tiko beka eso na nodra itokani e rawa mera sureti ira?
E rawa vakacava me keirau cakacaka vata kei na matabose ni tabanalevu se o ira na vakaitavi ena bose ni veivakacokotaki vakamacawa ni tabanalevu, mera kunei kina na matavuvale era sega ni lewenilotu kece, lewenilotu era sa lesu tale mai, kei ira na italatala qase namaki mera tarai?
E rawa vakacava me keirau veitaratara vata kei ira na tamata era vakavulici tiko oqo, era sa vakavulici oti, se soli mai na yacadra? Keirau na veitaratara vakacava kei ira? (Ena sota, ena tekinolaji, ena talevoni, se sala tale eso)
Na cava eso tale na sala vou e rawa me keirau kunei ira kina na tamata vou?
Na taledi kei na igu cava e tiko vei keirau e rawa ni keirau vakayagataka?
E rawa vakacava me keirau tosoya cake na neirau igu mera kunei kina na tamata me vakavulici?
E rawa vaka cava me keirau vukei ira keimami veitaratara mera vakila na veivakayarayarataki ni Yalo Tabu?

Me ivakaraitaki ni kunei ni itaviqaravi, raica na wase e 9, 10, kei na 13.

Vakayagataka na app ni Vunautaka na Noqu Kosipeli me vukea nomu kunea na itaviqaravi qaravi eso ka sa vakayacoka oti. Me ivakaraitaki, ena rawa ni ko raica se era a kunei vakacava o ira na qai saumaki walega oqo.

Vaqara na veivakayarayarataki ka dolavi iko tu ki na veiuqeti kei na veivakasama eso. Levea na kena vakayacori edua tikoga na ka. O ira na daukaulotu ka ra dau kunei ira vakawasoma na tamata vou mera vakavulica, era dau vakayagataka e vuqa na sala e veimacawa. Era dau tovolea ena nodra igu mera rawata edua na ka.

2. Vola ka Tuvana na Nomu iTuvatuva

Vakayagataka na app ni Vunautaka na Noqu Kosipeli me volai ka tuvani kina vakamatailalai na nomudrau takete kei na ituvatuva. Na volai kei na tuvai ni nomudrau ituvatuva ena vukei kemudrau mo drau kila na cava me caka kei na gauna me caka kina.

Dau tarogi kemudrau ena veitaro vakaoqo:

Na sala cava kei na gauna cava keirau na veitaratara kina kei ira na tamata? Na cava na sala vinaka duadua me caka kina? Evei beka na kena vanua vinaka? Na cava na tiki ni gauna vinaka duadua ni nodra kunei na tamata ena dua na siga, ena veisala duidui eso?
E rawa vakacava ni vakayacori na veitalanoa e vakaibalebale kei ira na tamata keirau sotava?
Na sala kei na gauna cava keirau na kunei ira kina na tamata ena initaneti, ena vakayagataki ni sala ni vakau itukutuku raraba kei na tekinolaji tale eso?
Keirau na veitaratara ena gauna cava vata kei ira ka soli mai vei keirau na yacadra?
Na ituvatuva cava e rawa ni keirau cakava kevaka era sega ni yaco na veituvatuva tale eso?

3 Cakacakataka na nomu iTuvatuva

Tovolea ena nomu igu mo rawata na nomu takete mo kunei ira na tamata mo vakavulica. Daumasu tiko e lomamu ena loma ni siga taucoko. Dau vakabula ka vosa vei ira na tamata o sotava. Na Yalo ena vukei iko mo kila na vanua mo lako kina, kei na cava mo tukuna, kei na cava soti mo moica.

Ena loma ni siga tarogi iko ena veitaro vakaoqo:

E rawa vakacava me keirau cakacaka ena vakabauta, ka nuitaka na Turaga me na vukei keirau ka vakalevulevuya na neirau sasaga me veiqaravi vei ira na Luvena?
Ena rawa vakacava me keirau na vakasamataka na veika vovou ka yaloqaqa ni keirau cakacakataka tiko na neirau ituvatuva?
Ena rawa vakacava me keirau moica na neirau ituvatuva me salavata kei na nodra gagadre kei na nodra ituvaki na tamata?
E rawa vaka cava me keirau vukei ira na tamata mera vakila na veivakayarayarataki ni Yalo Tabu?

Na ituvatuva ena sega ni dau yaco me vaka na ka o namaka. Mo dau tuvakarau ka vakayagataka tale edua na ituvatuva kevaka e gadrevi.

4 Raicalesu na Toso ka Talemuria

Ena loma ni veisiga kei na veimacawa, raicalesuva ena masumasu na kena rawati na takete, mera kunei na tamata mera vakavulici. Dau tarogi kemudrau ena veitaro vakaoqo:

E a vakaevei beka na neirau rawata na neirau takete ka talemuria na neirau tuvatuva?
Na veisau cava soti keirau rawa ni cakava me sotavi kina na neirau takete mera kunei na tamata?
E rawa vakacava me keirau levea na cakava edua na ka e sega ni mana ena nodra kunei na tamata mera vakavulici?
Na cava edua na ka vou keirau rawa ni tovolea me cakava ena tiki ni gauna vakaoqo ena dua na siga?
Na veivakasama cava soti keirau rawa ni veitalanoataka ena bose ni veivakacokotaki vakamacawa ni tabanalevu, me vukei keirau mera kunei na tamata mera vakavulici? (Raica na wase e 13.)

Vaka itokani vata, vakayagataka na ivolakabi ni “Sasaga ni Vakasaqaqara” ena wase e 9 me dikevi kina na nomudrau sasaga vakamacawa kei na veisiga. Drau kila na veika drau cakava tiko vakavinaka, ka vakasamataka na sala e rawa ni drau vakatorocaketaki kina.

Ena loma ni siga taucoko, tu vakadua me vica na miniti ka vakananuma na liga ni Kalou ena nomudrau cakacaka.