grua duke studiuar

Përvetësojeni Pastaj Përshtateni Programin Mësimor të Seminarit

Ka shumë mënyra të efektshme se si të përgatiteni për ta dhënë mësim ungjillin e Jezu Krishtit. Kjo përgatitje gjithmonë përfshin studimin plot lutje të fjalës së Perëndisë dhe kërkimin e udhërrëfimit të Frymës së Shenjtë për të ditur se si t’i ndihmoni më së miri njerëzit të cilëve u jepni mësim për t’i kthyer në besimin te Jezu Krishti dhe tek ungjilli i Tij. Për ta përmbushur këtë gjë, sigurohuni që të studioni bllokun e shkrimeve të shenjta në planin e programit Eja, Më Ndiq. Kjo do t’ju ndihmojë për përgatitjen e mësimit tuaj teksa shqyrtoni programin mësimor. Programi mësimor do t’ju ndihmojë të përcaktoni parimet dhe doktrinën thelbësore në bllokun e shkrimeve të shenjta, t’i ndihmoni nxënësit që t’i njohin, t’i duan e t’i ndjekin Atin Qiellor dhe Jezu Krishtin, si dhe të ndjekin modelet frymëzuese të mësimdhënies së efektshme.

Merreni parasysh këtë këshillë nga Presidenti Dallin H. Ouks, i Presidencës së Parë, rreth përdorimit të programit mësimor për të përgatitur mësimet e seminarit:

Presidenti Dallin H. Ouks

“Ne së pari e përvetësojmë, pastaj e përshtatim. Nëse bazohemi tërësisht në mësimin e përshkruar që duhet të japim, atëherë ne mund të ndjekim Shpirtin për ta përshtatur atë. Por ka një tundim kur flasim për këtë mundësi për ndryshueshmëri, që t’ia nisim nga përshtatja në vend që t’ia nisim nga përvetësimi. Është një baraspeshim. Është një sfidë e vazhdueshme. Por metoda e përvetësimit fillimisht dhe më pas e përshtatjes është një mënyrë e mirë për të qëndruar mbi një bazë të shëndoshë.”

(“A Panel Discussion with Elder Dallin H. Oaks” [transmetim satelitor për Seminaret dhe Institutet e Fesë, 7 gusht 2012], broadcasts.ChurchofJesusChrist.org)

• Çfarë do të thotë ta përvetësoni dhe përshtatni programin mësimor teksa përgatiteni për një mësim?

përshkrim i përvetësoj kundrejt përshtat

Presidenti Henri B. Ajring na ndihmoi të kuptojmë disa arsye përse mund të na nevojitet që ta përshtatim programin mësimor:

Presidenti Henri B. Ajring

“Ka më shumë sugjerime për ide se si të jepni mësim, mënyra se si t’i jepni mësim ato ide dhe referenca‑kryq për t’i përdorur sesa mund të përdorë secili prej nesh. … Por ngaqë dëshirojmë që nxënësit tanë ta pyesin Zotin që të mund të ndriçohen, ne duhet t’i bekojmë ata me shembullin. Për ta bërë këtë gjë, ne mund të lexonim programin mësimor – fjalë për fjalë. Mund të mos kemi kohë për ta gjetur dhe studiuar çdo referencë, por Perëndia i njeh nxënësit tanë. …

… Zoti e di në mënyrë të përsosur atë që [nxënësit] dinë dhe atë që u nevojitet. Ai i do ata dhe Ai na do ne. Dhe me ndihmën e Tij ne … zgjedhim jo vetëm ato pjesë të programit mësimor të cilat do të na lejojnë përdorimin tërësor të fuqive tona për të dhënë mësim, por edhe ato të cilat do të zbresin fuqitë e qiellit mbi nxënësit tanë në klasën tonë atë ditë.”

(“The Lord Will Multiply the Harvest” [mbrëmje me një Autoritet të Përgjithshëm, 6 shkurt 1998], ChurchofJesusChrist.org)

• Si mendoni, përse është e rëndësishme që fillimisht t’i përvetësoni ato që janë te materialet e mësimit përpara se t’i përshtatni ato?

• Si mund të duken të ndryshme metodat e përgatitjes së një mësimi për një mësues që e përdor programin mësimor dhe për një mësues që nuk e përdor?

Çfarë të Merrni Parasysh Kur i Përshtatni Mësimet

Këtu janë disa pyetje për t’u marrë parasysh teksa i përvetësoni dhe i përshtatni materialet e mësimit:

1. Cili është qëllimi i mësimit në përgjithësi, si edhe i pjesëve të ndryshme të mësimit?

2. Cili është synimi i autorit të frymëzuar dhe a është përshtatja që po marr parasysh në harmoni me të?

3. Cilat janë arsyet e mia që dëshiroj ta përshtat mësimin? A është thjesht një çështje e parapëlqimit vetjak apo ndryshimi do t’u japë nxënësve një përvojë më të mirë për të mësuar?

4. A është përshtatja ime në harmoni me nxitjet e Frymës së Shenjtë?

Mund t’ju nevojitet ta përshtatni një mësim që

• të ndiqni nxitjet e Atit Qiellor të marra nëpërmjet Frymës së Shenjtë. (Shihni rastin për studim të Vëllait Dube.)

• të plotësoni nevojat e veçanta ose të pashoqe, aftësitë dhe burimet në dispozicion të nxënësve. (Shihni rastet për studim të Vëllait Dube dhe Vëllait Rejes.)

• t’i përputhni pjesë të mësimit me rrethanat dhe kulturën vendore. (Shihni rastin për studim të Motrës Rodrigez.)

• t’i ndihmoni nxënësit me çështje dhe pyetje aktuale të cilat kërkojnë përgjigje të menjëhershme. (Shihni rastin për studim të Vëllait Dube.)

• të gjeni një mënyrë më të mirë për ta përmbushur të njëjtin qëllim për një pjesë të dhënë të mësimit. (Shihni rastet për studim të Vëllait Li dhe Motrës Martin.)

• të përdorni udhëzimin dhe burimet më të fundit, të dhëna nga udhëheqësit e Kishës. (Shihni rastin për studim të Motrës Shmid.)

Rastet për Studim

Motra Rodrigez

Motra Rodrigez po përgatitet që të japë mësimin “Mateu 1:18–25; Lluka 1:26–35”. Ajo e di se nxënësit në klasën e saj do të duan të dinë se çfarë japin mësim shkrimet e shenjta rreth nënës së Jezusit, Maries. Në qytetin e tyre ka një kulturë ndjenjash të forta dhe besimesh të ndryshme rreth Maries. Madje shumë njerëz e adhurojnë Marien për shkak të rolit të saj si nëna e Perëndisë. Teksa studion mësimin nga programi mësimor, Motra Rodrigez kërkon një vend të duhur për t’i ndihmuar nxënësit të kuptojnë atë që shkrimet e shenjta dhe udhëheqësit e Kishës kanë dhënë mësim rreth Maries.

Një nga veprimtaritë e studimit në mësim i fton nxënësit të kërkojnë mësime rreth asaj se cilët ishin prindërit e Shpëtimtarit në vargjet te Lluka 1:30–35, Mateu 1:18–23 dhe Alma 7:10.

Motra Rodrigez vendos ta përshtatë mësimin pasi nxënësit të lexojnë vargun tek Alma 7:10 duke i shtuar dy pyetjet vijuese asaj që përfshihet në programin mësimor.

“Çfarë na ndihmon Alma të kuptojmë rreth Maries? Ndërkohë që e nderojmë dhe e duam Marien dhe dishepujt e tjerë besnikë në shkrimet e shenjta, si na ndihmojnë vargjet tek Alma 7:11–13 për të kuptuar arsyen përse ne adhurojmë vetëm Atin Qiellor dhe Jezu Krishtin?”

Vëllai Li

Teksa Vëllai Li po përgatitet të japë mësimin “Gjoni 1:1–16”, ai sheh sugjerimin vijues dhe dy pyetjet në fillim të mësimit:

Tregojeni figurën e mëposhtme ose sillni në klasë një top që përdoret në një sport të njohur dhe bëni pyetjet e mëposhtme. Mund të përdoret një send tjetër nëse të mësuarit më shumë rreth sendit do t’i ndihmonte nxënësit të kuptonin se ai vlen më shumë sesa mendonin fillimisht.

• Sa mendoni se vlen ky top?

• Po sikur të jetë përdorur në një lojë të kampionatit botëror apo të ishte nënshkruar nga një lojtar me emër?

Vëllai Li vazhdon të lexojë mësimin për të mësuar se cili mund të jetë qëllimi i sjelljes së një topi në klasë. Ai përcakton se qëllimi është për t’i ndihmuar nxënësit të përgatiten për të kuptuar se sa më shumë mësojmë se kush ishte Jezu Krishti përpara jetës së Tij në vdekshmëri, aq më shumë mund ta çmojmë vlerën e misionin e Tij në tokë.

Duke dashur ta plotësojë këtë qëllim në mënyrën më të efektshme për nxënësit e vet, ai përsiat për një minutë se çfarë sendi mund të sjellë në klasë me të cilin do të lidheshin më mirë nxënësit e tij. Ai vendos ta përshtatë mësimin duke sjellë në klasë një gjerdan të thjeshtë. Pasi nxënësit të thonë se sa mendojnë që kushton gjerdani, ai do t’u tregojë se kush e bëri gjerdanin dhe përse të diturit e historisë së gjerdanit, e bën shumë më tepër me vlerë për të sesa mund të ishte po të mos e dinin.

Motra Martin

Teksa Motra Martin përgatitet që të japë mësimin “Veprat e Apostujve 3”, ajo vë re një sugjerim për të shfaqur një material filmik që paraqet një burrë të çalë që shërohet nga Pjetri dhe Gjoni nëpërmjet fuqisë së Perëndisë. Ajo shikon materialin filmik dhe i bën përshtypje se sa i efektshëm është ai. Por gjithashtu e di se nxënësit në klasën e saj kanë parë materiale filmike tri herë tashmë gjatë kësaj jave. Ajo vendos të kërkojë një mënyrë tjetër për ta përmbushur qëllimin e materialit filmik.

E kupton që materiali filmik është në fakt një rrëfim pamor fjalë për fjalë i kësaj historie. Ajo arrin në përfundimin se qëllimi i materialit filmik mund të jetë që t’i lejojë nxënësit të përfytyrojnë atë që ndodhi në vend që vetëm ta lexojnë atë. Për ta përshtatur mësimin, ajo vendos t’i ftojë nxënësit të lexojnë dhe më pas të interpretojnë me role atë që ndodhi në histori, duke i lejuar nxënësit në këtë mënyrë të jenë pjesëmarrës aktivë, të shkëputen nga shikimi i materialeve filmike dhe ende t’i ndihmojë për ta përfytyruar këtë ngjarje.

Vëllai Dube

Vëllai Dube u përgatit plot zell të premten përpara fundjavës së konferencës që të jepte mësimin për librin e Romakëve siç ishte përvijuar në programin mësimor për të hënën e ardhshme. Për habinë e vet, ai e dëgjoi profetin që njoftoi gjatë konferencës se tempulli i parë do të ndërtohej në zonën e tyre në një të ardhme të afërt. Shumë pak prej nxënësve të tij e kanë parë ndonjëherë një tempull personalisht. Ai e di se nxënësit do të vijnë në orën mësimore plot dëshirë për të folur rreth tempullit dhe se shumë do të kenë pyetje rreth tij.

Pasi lutet, ai ndien nxitjen nga Fryma e Shenjtë që të shkojë më përpara dhe të hënën e të martën të japë mësimin kontekstual “1 Pjetër 3:18–22; 4:1–6” dhe mësimin shoqërues të zotërimit doktrinor “1 Pjetër 4:6”. E ndjeu se kjo ishte përshtatja e duhur ngaqë mësimi kontekstual ka qëllimin e shpallur: “Ky mësim do të të ndihmojë të eksplorosh mënyra për ta ndihmuar Shpëtimtarin në punën e Tij të shëlbimit të të vdekurve.”. Ai e ndien se kjo kohë e pashoqe është mundësia më e mirë për t’i ndihmuar nxënësit që të gëzohen rreth përgatitjes për të shëlbuar paraardhësit e tyre në tempullin e ardhshëm.

Teksa përgatitet për mësimin e së hënës, Vëllai Dube vëren se një nga ftesat për ta vënë në zbatim atë që mësojnë nxënësit, thotë:

Shkoni te FamilySearch.org ose përdorni programin kompjuterik Pema Familjare në FamilySearch. Shihni nëse mund t’i gjeni emrat e paraardhësve që ende kanë nevojë për të marrë ordinancat e priftërisë. Ose mund t’i rezervoni këta emra dhe të shkoni vetë në tempull për ta ose mund t’i dorëzoni emrat e tyre në tempull që dikush tjetër të mund t’i kryejë ordinancat për ta. Veçoria Ordinancat Gati mund të përdoret për t’ju ndihmuar që t’i përcaktoni shpejt paraardhësit që kanë nevojë për ordinancat e priftërisë.

Vëllai Dube e di se shumica e nxënësve të tij nuk kanë mundësi ta përdorin internetin ose programin kompjuterik Pema Familjare në FamilySearch. Me mençuri ai e përshtat ftesën për ta zbatuar atë që mësuan, që të fillojnë të plotësojnë fletët e grupeve familjare në letër me familjet e tyre dhe të flasin me këshilluesin/en për tempullin dhe historinë familjare në lagjen e tyre për të mësuar se si mund të kërkojnë emra të tjerë të familjes që mund t’i përgatitin për punën e ardhshme në tempull.

Motra Shmid

Pasi studioi mësimin “Mateu 22:34–40” rreth dy urdhërimeve të mëdha, Motra Shmid sjell ndërmend një thënie të bërë në konferencën e përgjithshme më të fundit që do të ishte e përsosur për këtë mësim. Ajo vë re se diku nga gjysma e mësimit ka një thënie më të vjetër që ka për qëllim t’i ndihmojë nxënësit të kuptojnë se kur e duam Perëndinë, Ai do t’i kthejë zemrat tona drejt mirëqenies së të tjerëve. Ajo e zëvendëson atë me thënien vijuese:

“Jezusi dekretoi urdhërimin e parë të madh: ‘Duaje Zotin, Perëndinë tënde me gjithë zemrën tënde, me gjithë shpirtin tënd dhe me gjithë mendjen tënde’ [Mateu 22:37]. …

Ndaj së pari, duajeni Atin dhe Birin.

Së dyti, ‘duaje[ni] të afërmin t[uaj]’ [Mateu 22:39]. …

Së treti, duajeni veten tuaj.

Kjo është e vështirë për shumë njerëz. A nuk është interesante që dashuria për veten duket se është më pak e lehtë sesa dashuria për të tjerët? Prapëseprapë, Zoti ka thënë: ‘Duaje të afërmin tënd porsi vetveten’. Ai e vlerëson hyjninë brenda nesh dhe kështu duhet të bëjmë dhe ne. Kur jemi të rënduar me gabime, brenga, ndjenja papërshtatshmërie, zhgënjime, zemërim ose mëkat, fuqia e Shlyerjes së Shpëtimtarit është, sipas planit hyjnor, një nga gjërat që e ngre lart shpirtin.” (Ronald A. Rasband, “Gjërat e Shpirtit Tim”, Liahona, nëntor 2021, f. 39, 40)

Motra Shmid e ndien se thënia nga një konferencë e përgjithshme e kohës së fundit do të përmbushë të njëjtin qëllim si thënia që gjendet në mësimin e programit mësimor. Veç kësaj, ajo e di se thënia mund t’i ndihmojë edhe disa nga nxënësit e saj, të cilët po hasin vështirësi që ta duan veten e tyre, të kuptojnë se dashuria për Perëndinë mund t’i ndihmojë gjithashtu që të ndiejnë vlerën që kanë ata vetë.

Vëllai Rejes

Teksa studion mësimin “Zbulesa 15–19”, Vëllai Rejes gjeti një veprimtari që i ftonte nxënësit të zgjidhnin për të studiuar dy prej tri varianteve vijuese:

• Varianti A: Engjëjt dhe plagët

• Varianti B: Ligësia dhe fuqia e Shpëtimtarit

• Varianti C: Dasma e Qengjit

Secili variant ka pyetje, referenca të shkrimeve të shenjta dhe veprimtari të ndryshme që lidhen me të. Vëllai Rejes ndjeu se qëllimi i veprimtarisë ishte që t’i ndihmonte nxënësit të kuptonin parimin me shkronja të zeza në mësim: Jezu Krishti mund të na ndihmojë ta mposhtim ligësinë e ditëve të fundit.

Ndërkohë që Vëllait Rejes i pëlqyen variantet, ai gjeti idenë vijuese që ndihmoi për të arritur të njëjtin qëllim në pjesën e mësimit “Veprimtari Plotësuese të të Mësuarit” dhe ai ndien se nxënësve të tij u nevojitet kjo ide edhe më shumë:

Kufizimi i ndikimit të Babilonisë te ne

Nëse nxënësit do të përfitonin nga një theksim më i madh lidhur me mposhtjen e Babilonisë, merreni parasysh të përdorni bisedën e Plakut Dejvid R. Stoun, “Zion in the Midst of Babylon” [“Sioni në Mes të Babilonisë”], Liahona, maj 2006, f. 90–93. Analogjia e tij për tempullin e Manhatanit mund të përdoret për t’i ndihmuar nxënësit të dallojnë rëndësinë e shtimit të kohës së tyre me Shpëtimtarin ndërkohë që e kufizojnë ndikimin e Babilonisë tek ata. Nxënësit gjithashtu mund të përfitojnë nga studimi dhe diskutimi i standardeve të Zotit për ta te broshura Për Forcën e Rinisë (broshurë, 2011).

Vëllai Rejes përgatiti një segment 10‑minutësh për mësimin nisur nga ideja shtesë. Që të gjente kohë për këtë, ai vendosi t’i ftonte nxënësit të zgjidhnin që të studionin njërin nga tri variantet e sugjeruara që gjendeshin në pjesën kryesore të mësimit.