babaeng nag-aaral

Piliin at Pagkatapos ay Iakma ang Kurikulum ng Seminary

Maraming epektibong paraan para makapaghanda na ituro ang ebanghelyo ni Jesucristo. Palaging kasama sa paghahandang ito ang mapanalanging pag-aaral ng salita ng Diyos at paghingi ng patnubay ng Espiritu Santo para malaman kung paano pinakamainam na matutulungan ang mga tinuturuan mo na magbalik-loob kay Jesucristo at sa Kanyang ebanghelyo. Para magawa ito, tiyaking pag-aralan ang scripture block sa iskedyul ng Pumarito Ka, Sumunod Ka sa Akin. Tutulungan ka nito sa iyong paghahanda ng lesson habang nirerebyu mo ang kurikulum. Tutulungan ka ng kurikulum na matukoy ang mahahalagang alituntunin at doktrina sa scripture block, matulungan ang mga estudyante na malaman, mahalin, at sundin ang Ama sa Langit at si Jesucristo, at masunod ang mga inspiradong huwaran ng epektibong pagtuturo.

Isaalang-alang ang payong ito ni Pangulong Dallin H. Oaks ng Unang Panguluhan tungkol sa paggamit ng kurikulum sa paghahanda ng mga lesson sa seminary:

Pangulong Dallin H. Oaks

Pinipili muna natin, pagkatapos ay iniaakma natin. Kung napag-aralan na natin nang lubos ang lesson at pamilyar na tayo rito, masusunod na natin ang Espiritu sa pagtuturo nito. Pero natutukso tayo, kapag pinag-uusapan natin ang tungkol sa flexibility na ito, na magsimulang magturo sa halip na ipamilyar at pag-aralan nang husto ang lesson. Dapat ay balanse. Ito ay hamon na makakaharap natin tuwina. Ngunit ang pag-aaral nang husto at pagiging pamilyar sa lesson bago magturo ay mabuting paraan para makatiyak kayo na ang itinuturo ninyo ay nakabatay sa totoong doktrina.

(“A Panel Discussion with Elder Dallin H. Oaks” [Seminaries and Institutes of Religion satellite broadcast, Ago. 7, 2012], broadcasts.ChurchofJesusChrist.org)

• Ano ang ibig sabihin ng piliin at iakma ang kurikulum sa paghahanda mo ng lesson?

paglalarawan ng kaibahan ng pagpili at pag-aakma

Tinulungan tayo ni Pangulong Henry B. Eyring na maunawaan ang ilang dahilan kung bakit kailangan nating iakma ang kurikulum:

Pangulong Henry B. Eyring

Mas maraming mungkahi para sa mga ideyang ituturo, mga paraan para maituro ang mga ito, at mga cross-reference na gagamitin kaysa sa maaaring magamit ng sinuman sa atin. … Ngunit dahil gusto nating magtanong ang ating mga estudyante sa Panginoon upang sila ay maliwanagan, kailangan natin silang bigyan ng halimbawa. Para magawa iyon maaari nating basahin ang kurikulum—ang bawat salita nito. Maaaring wala tayong oras para hanapin at pag-aralan ang bawat reperensya, ngunit kilala ng Diyos ang ating mga estudyante. …

…Lubos na nalalaman ng Panginoon ang nalalaman at kailangan ng [mga estudyante]. Mahal Niya sila at mahal Niya tayo. At sa tulong niya … mapipili natin hindi lamang ang mga bahaging iyon ng kurikulum na magtutulot sa atin na magamit ang buong kakayahan nating magturo kundi yaong magdadala ng mga kapangyarihan ng langit sa mga estudyanteng iyon sa ating silid-aralan sa araw na iyon.

(“The Lord Will Multiply the Harvest” [evening with a General Authority, Peb. 6, 1998], ChurchofJesusChrist.org)

• Sa iyong palagay, bakit mahalagang piliin muna ang nasa mga materyal ng lesson bago iakma ang mga ito?

• Paano maaaring maiba ang mga pamamaraan ng paghahanda ng lesson ng isang titser na gumagamit ng kurikulum at ng isang titser na hindi gumagamit nito?

Ang Dapat Isasaalang-alang Kapag Nag-aakma ng mga Lesson

Narito ang ilang tanong na isasaalang-alang sa pagpili at pag-akma ng mga materyal ng lesson:

1. Ano ang layunin ng kabuuang lesson gayundin ang iba’t ibang bahagi ng lesson?

2. Ano ang layunin ng inspiradong awtor, at ang pag-aakma na iniisip ko na naaayon dito?

3. Ano ang mga dahilan ko sa pagnanais na iakma ang lesson? Ito ba ay personal na kagustuhan, o magbibigay ba ang pagbabagong ito sa mga estudyante ng mas magandang karanasan sa pag-aaral?

4. Naaayon ba ang pag-aakma ko sa mga pahiwatig ng Espiritu Santo?

Maaaring kailanganin mong iakma ang isang lesson para

• masunod ang mga pahiwatig ng Ama sa Langit na natanggap sa pamamagitan ng Espiritu Santo. (Tingnan ang case study ni Brother Dube.)

• tugunan ang espesyal o natatanging mga pangangailangan, kakayahan, at makukuhang resources ng mga estudyante. (Tingnan ang case study nina Brother Dube at Brother Reyes.)

• iayon ang mga bahagi ng lesson sa mga lokal na kalagayan at kultura. (Tingnan ang case study ni Sister Rodriguez.)

• tulungan ang mga estudyante sa kasalukuyang mga isyu at tanong na nangangailangan ng agarang tugon. (Tingnan ang case study ni Brother Dube.)

• humanap ng mas mainam na paraan para maisakatuparan ang parehong layunin para sa isang bahagi ng lesson. (Tingnan ang mga case study nina Brother Li at Sister Martin.)

• gamitin ang pinakabagong tagubilin at resources na ibinigay ng mga lider ng Simbahan. (Tingnan ang case study ni Sister Schmidt.)

Mga Case Study

Sister Rodriguez

Naghahanda si Sister Rodriguez na ituro ang lesson na “Mateo 1:18–25; Lucas 1:26–35.” Alam niya na gugustuhin ng mga estudyante sa kanyang klase na malaman kung ano ang itinuturo ng mga banal na kasulatan tungkol sa ina ni Jesus na si Maria. May namamayaning matitinding damdamin at iba’t ibang paniniwala tungkol kay Maria sa kanilang lungsod. Marami pa ang sumasamba kay Maria dahil sa kanyang ginagampanan bilang ina ng Diyos. Habang pinag-aaralan niya ang lesson mula sa kurikulum, naghahanap si Sister Rodriguez ng angkop na aktibidad para matulungan ang mga estudyante na maunawaan kung ano ang itinuro ng mga banal na kasulatan at ng mga lider ng Simbahan tungkol kay Maria.

Isa sa mga aktibidad sa pag-aaral sa lesson ay nag-aanyaya sa mga estudyante na maghanap ng mga turo tungkol sa kung sino ang mga magulang ng Tagapagligtas sa Lucas 1:30–35, Mateo 1:18–23, at Alma 7:10.

Nagpasiya si Sister Rodriguez na iakma ang lesson matapos basahin ng mga estudyante ang Alma 7:10 sa pamamagitan ng pagdaragdag ng sumusunod na dalawang tanong na kasama sa kurikulum.

“Ano ang ipinauunawa sa atin ni Alma tungkol kay Maria? Bagama’t iginagalang at minamahal natin si Maria at ang iba pang matatapat na disipulo sa mga banal na kasulatan, paano tayo tinutulungan ng Alma 7:11–13 na maunawaan kung bakit ang Ama sa Langit at si Jesucristo lamang ang sinasamba natin?”

Brother Li

Habang naghahanda si Brother Li na ituro ang lesson na “Juan 1:1–16,” nakita niya ang sumusunod na mungkahi at dalawang tanong sa simula ng lesson:

Ipakita ang sumusunod na larawan o magdala sa klase ng isang bola na gamit sa isang sikat na sport, at itanong ang mga sumusunod. Maaaring gumamit ng iba pang bagay kung ang malalaman pa tungkol sa bagay na ito ay makatutulong sa mga estudyante na maunawaan na higit ang kahalagahan nito kaysa sa una nilang inakala.

• Sa inyong palagay, ano ang halaga ng bolang ito?

• Paano kung ito ay ginamit sa isang world championship game o nilagdaan ng isang sikat na manlalaro?

Patuloy na binasa ni Brother Li ang lesson para malaman kung ano ang layunin ng pagdadala ng bola sa klase. Natukoy niya na ang layunin ay tulungan ang mga estudyante na maunawaan na kapag mas nalaman natin kung sino si Jesucristo bago ang Kanyang mortal na buhay, mas mapahahalagahan natin ang kahalagahan ng Kanyang misyon sa lupa.

Sa hangaring maisakatuparan ang layuning ito sa pinakaepektibong paraan para sa kanyang mga estudyante, pinag-isipan niya sandali kung anong bagay ang madadala niya sa klase na pinakamainam na maiuugnay ng kanyang mga estudyante. Nagpasiya siyang iakma ang lesson sa pamamagitan ng pagdadala ng simpleng kuwintas sa klase. Matapos ibahagi ng mga estudyante kung ano sa palagay nila ang halaga ng kuwintas, ibabahagi niya kung sino ang gumawa ng kuwintas at kung bakit ang kaalaman tungkol sa kasaysayan nito ay higit na mahalaga sa kanya kaysa sa maaaring isipin tungkol dito.

Sister Martin

Habang naghahanda si Sister Martin na ituro ang lesson na “Mga Gawa 3,” napansin niya ang isang mungkahi na magpalabas ng video na nagpapakita ng lalaking pilay na pinagagaling nina Pedro at Juan sa pamamagitan ng kapangyarihan ng Diyos. Pinanood niya ang video at nadama niya kung gaano ito kaepektibo. Ngunit alam din niya na tatlong beses nang nakapanood ang mga estudyante ng mga video sa kanyang klase sa linggong ito. Nagpasiya siyang maghanap ng ibang paraan para maisakatupran ang layunin ng video.

Natanto niya na nakadetalye sa video ang salaysay tungkol sa kuwentong ito. Naisip niya na ang layunin ng video ay mabigyan ng pagkakataon ang mga estudyante na mailarawan sa isipan ang nangyari sa halip na basahin lamang ito. Para maiakma ang lesson, nagpasiya siyang anyayahan ang mga estudyante na basahin at pagkatapos ay isadula kung ano ang nangyari sa kuwento, kaya nabigyan ng pagkakataon ang mga estudyante na maging aktibong kalahok, mapahinga sa panonood ng mga video, at matulungan pa rin silang mailarawan sa isipan ang pangyayaring ito.

Brother Dube

Masigasig na naghanda si Brother Dube sa Biyernes bago sumapit ang kumperensya upang ituro ang lesson sa aklat ng Mga Taga Roma tulad ng nakabalangkas sa kurikulum para sa darating na Lunes. Nagulat siya nang marinig niya na ibinalita ng propeta sa kumperensya na ang unang templo ay itatayo sa kanilang lugar sa malapit na panahon sa hinaharap. Iilan lang sa kanyang mga estudyante ang personal na nakakita ng templo. Alam niya na papasok ang mga estudyante sa klase na sabik na mag-uusap tungkol sa templo at marami ang magtatanong tungkol dito.

Matapos manalangin, nadama niya na hinikayat siya ng Espiritu Santo na laktawan ang nakaiskedyul na lesson para maituro ang kontekstuwal na lesson na “1 Pedro 3:18–22; 4:1–6” at ang kalakip na doctrinal mastery lesson na “1 Pedro 4:6” sa Lunes at Martes. Parang ito ang tamang pagbabago dahil nakasaad sa kontekstuwal na lesson ang layuning ito, “Ang lesson na ito ay tutulong sa iyo na maghanap ng mga paraan na matulungan ang Tagapagligtas sa Kanyang gawain ng pagtubos sa mga patay.” Nadama niya na ang natatanging panahong ito ang pinakamainam na pagkakataon para matulungan ang mga estudyante na masabik na maghanda sa pagtubos ng kanilang mga ninuno sa templo sa hinaharap.

Habang inihahanda ni Brother Dube ang lesson para sa Lunes, napansin niya ang nakasaad sa isa sa mga paanyaya na ipamuhay ng mga estudyante ang natutuhan nila:

Bisitahin ang FamilySearch.org o gamitin ang FamilySearch Family Tree app. Tingnan kung mahahanap mo ang mga pangalan ng mga ninuno na kinakailangan pa ring tumanggap ng mga ordenansa ng priesthood. Maaari mong ireserba ang mga pangalang ito at dalhin mo mismo ang mga ito sa templo o isumite ang kanilang mga pangalan sa templo upang may ibang makapagsagawa ng mga ordenansa para sa kanila. Ang Ordinances Ready feature ay magagamit upang tulungan kang mabilis na matukoy ang mga ninunong nangangailangan ng mga ordenansa ng priesthood.

Alam ni Brother Dube na karamihan sa kanyang mga estudyante ay walang access sa internet o sa FamilySearch Family Tree app. Matalino niyang iniakma ang paanyayang ipamuhay ang natutuhan nila na simulang punan ang mga family group sheet sa papel kasama ang kanilang pamilya at kausapin ang kanilang ward temple and family history consultant para malaman kung paano nila sasaliksihin ang iba pang mga pangalan ng pamilya na maaari nilang maihanda para sa darating na gawain sa templo.

Sister Schmidt

Matapos pag-aralan ang lesson na “Mateo 22:34–40” tungkol sa dalawang dakilang utos, naalala ni Sister Schmidt ang isang pahayag na binanggit sa pinakahuling pangkalahatang kumperensya na magiging perpekto para sa lesson na ito. Napansin niya na sa kalagitnaan ng lesson, may mas lumang pahayag na nilayong tulungan ang mga estudyante na maunawaan na kapag mahal natin ang Diyos, ibabaling Niya ang ating puso sa kapakanan ng iba. Pinalitan niya ito ng sumusunod na pahayag:

Ipinahayag ni Jesus ang unang dakilang kautusan: “Ibigin mo ang Panginoon mong Diyos nang buong puso mo, at nang buong kaluluwa mo, at nang buong pag-iisip mo” [Mateo 22:37]. …

Kaya ang una, mahalin ang Ama at ang Anak.

Pangalawa, “Ibigin mo ang iyong kapwa” [Mateo 22:39]. …

Pangatlo, mahalin ang iyong sarili.

Dito nahihirapan ang marami. Hindi ba nakapagtataka na tila mas madali sa ating gawin na mahalin ang ating kapwa kaysa sa ating sarili? Subalit sinabi ng Panginoon, “Ibigin mo ang iyong kapwa na gaya ng iyong sarili.” Mahalaga sa Kanya ang kabanalang nasa atin, at dapat ay ganoon din tayo. Kapag tigib na tayo ng kamalian, dusa, kakulangan, lungkot, galit, o kasalanan, ang kapangyarihan ng Pagbabayad-sala ng Tagapagligtas ang isa sa mga bagay na nagpapasigla ng kaluluwa, ayon sa plano ng Diyos. (Ronald A. Rasband, “Ang mga Bagay ng Aking Kaluluwa,” Liahona, Nob. 2021, 39, 40)

Nadama ni Sister Schmidt na ang pahayag mula sa isang pangkalahatang kumperensya kamakailan ay magsasakatuparan ng layuning matatagpuan sa lesson sa kurikulum. Bukod pa rito, alam niya na matutulungan din nito ang ilan sa kanyang mga estudyante na nahihirapang mahalin ang kanilang sarili na makita na matutulungan din sila ng mapagmahal na Diyos na makadama ng sariling pagpapahalaga sa sarili.

Brother Reyes

Habang pinag-aaralan ang lesson na “Apocalipsis 15–19,” nakahanap si Brother Reyes ng isang aktibidad na nag-aanyaya sa mga estudyante na pumili ng dalawa sa sumusunod na tatlong opsiyon:

• Opsiyon A: Mga anghel at salot

• Opsiyon B: Kasamaan at kapangyarihan ng Tagapagligtas

• Opsiyon C: Kasal ng Kordero

Bawat opsiyon ay may iba’t ibang tanong, reperensyang banal na kasulatan, at mga aktibidad na may kaugnayan dito. Nadama ni Brother Reyes na ang layunin ng aktibidad ay tulungan ang mga estudyante na maunawaan ang alituntunin na nakasulat sa bold letter sa lesson: Matutulungan tayo ni Jesucristo na madaig ang kasamaan sa mga huling araw.

Bagama’t gusto ni Brother Reyes ang mga opsiyon, nakita niya ang sumusunod na ideya na nakatulong sa pagsasakatuparan ng parehong layunin sa bahaging “Mga Karagdagang Aktibidad sa Pag-aaral” ng lesson, at nadama niya na kailangan pa ito ng kanyang mga estudyante:

Paglimita sa impluwensya ng Babilonia sa atin

Kung makikinabang ang mga estudyante sa mas pagbibigay-diin sa pagdaig sa Babilonia, maaari mong gamitin ang mensahe ni Elder David R. Stone na, ““Sion sa Gitna ng Babilonia,” Liahona, Mayo 2006, 90–93. Ang kanyang analohiya tungkol sa Manhattan temple ay magagamit upang tulungan ang mga estudyante na maunawaan ang kahalagahan ng paglalaan ng mas maraming oras sa Tagapagligtas habang nililimitahan ang impluwensya ng Babilonia sa kanila. Maaari ding makinabang ang mga estudyante sa pag-aaral at pagtalakay ng mga pamantayan ng Panginoon para sa kanila sa Para sa Lakas ng mga Kabataan (buklet, 2011).

Naghanda si Brother Reyes ng 10-minutong bahagi ng lesson batay sa karagdagang ideya. Upang makapag-ukol ng oras para dito, nagpasiya siyang anyayahan ang mga estudyante na piliing pag-aralan lamang ang isa sa tatlong iminungkahing opsiyon na matatagpuan sa pangunahing bahagi ng lesson.