Palani Ako ki he Naunau Fakalēsoni ʻa e Seminelí

ʻOku ʻoatu ʻe he palani ako ko ʻení ha ngaahi fokotuʻu ki he kau kouʻotineitá mo e kau pule polokalamá ke tokoni ki he kau faiako semineli foʻoú ʻi hono fakakakato e ngaahi ako ki he naunau fakalēsoní. ʻOku fakataumuʻa ia ke tokoniʻi e kau faiakó ke nau ako fakakongokonga, ke tokoni ke ʻoua te nau ongoʻi lōmekina.

Fakakaukau ke faʻu ha palani fakafoʻituitui mo e faiako takitaha ke tokoni ke nau fakakakato ʻa e ngaahi akó ʻi heʻenau mateuteú. Mahalo naʻa lelei taha pē ke poupouʻi e kau faiakó ke muimui ofi ki he naunau fakalēsoní ʻi he kamataʻangá. ʻI heʻenau maʻu ha ngaahi ako lahi ange pea maheni ange mo e ngaahi maʻuʻanga tokoni ʻi he naunau fakalēsoní, ʻe tupulaki ʻenau malava ke fakafenāpasi e naunau fakalēsoní ke feau e ngaahi fiemaʻu ʻenau kau akó.

Kimuʻa pea nau kamata akoʻí:

• Fakaafeʻi e kau faiakó ke lau mo muimui ki he ngaahi fakahinohino ʻi he Fakahinohino ki he Kamata Vavé.

• Fakaafeʻi kinautolu ke lau ʻa e talateu ki he tohi lēsoni ʻa e faiakó ki he taʻu lolotongá.

Hili ha uike ʻe 1–2 mei ai:

• Fakaafeʻi kinautolu ke fakakakato ʻa e Ako ke Ohi pea toki Fakafenāpasí.

• Fakataimi-tēpileʻi ha taimi ke aleaʻi ai haʻanau faʻahinga fehuʻi pē fekauʻaki mo e founga ke ohi mo fakafenāpasi lelei ai e naunau fakalēsoni ʻa e seminelí.

Hili ha uike ʻe 2–4 mei ai:

• Fakaafeʻi kinautolu ke fakakakato ʻa e Ako Fakataukei Fakatokāteliné.

• Fakataimi-tēpileʻi ha taimi ke aleaʻi ai haʻanau faʻahinga fehuʻi pē fekauʻaki mo e founga ke tokoniʻi ai e kau akó ke nau aʻusia ʻa e fakataukei fakatokāteliné.

Hili ha uike ʻe 3–6 mei ai:

• Fakaafeʻi kinautolu ke fakakakato ʻa e Ako ki he Ngaahi Siví.

• Fakataimi-tēpileʻi ha taimi ke aleaʻi ai haʻanau faʻahinga fehuʻi pē fekauʻaki mo e ngaahi lēsoni “Siviʻi Hoʻo Akó” pe ko e ngaahi sivi fakataukei fakatokāteliné.